كلنا بنحبك يا حمار ايمان بكري

مع اني منقطعة اجباريا عن التدوين و التكنوعولمة ولكن الكليب ده وصلني في الايميل من مجموعة المصريين من وائل عباس و مقدرتش امنع نفسي من الضحك و كان لازم تشاركوني

الطريقة الفنية في صنع اللبنة المهلبية

اعزائي البلوجرز

كنت وعدتكوا في بوست سابق اني حكتبلكوا طريقة عمايل اللبنة

*

*

*

اهي

تجيبوا مصفا و تحطوا فيها طبقات كلينكس مقوى وعلى الاقل تحطوا اربعة و كل ما كان الكلينكس رقيق تحطوا طبقات اكترعشان قوة الامتصاص يعني
يتم دلق كل محتويات علبة الزبادي و حسب الكمية اللي انتوا عاوزينها و انصح في البداية بالتجربة في كمية قليلة

يتم رشرشة شوية ملح بس للحفظ لكن اذا انتوا من اللي بتحبوا الملح الزيادة اوي كتروا الملح و انا مالي بس ابقوا اشربوا كركديه ساقع بعدها

يتم ضرب الزبادي بالخلاط بتاع البيض او ربه بالشوكة المهم انه يتخض عشان ميبوظش و ممكن اضافه قشطة او كريمة لباني بس انا مش مسؤوله عن النتايج عن نفسي محبتش الكريمة اللباني لكن القشطة ااااه يا وعدي كانت قشطة فعلا

يتم التحفظ على مصفاية اللبنة و غلقها يطبق تاني كبير و نضيف و الابقاء عليها برة التلاجة لمده يوم واحد اذا كان الجو تحت الصفر عندنا غير كده انا مش مسؤولة و كان الله في عون اللي عايشين في الحر انا مالياش دعوة يتصرفوا

يتم الابقاء على التحفظ على اللبنة و الكشف عليها بعد يومين بالكتير و اذا لقيتوها بالشكل المتكسر ده اهنيكوا

نجحتوا في جعلها لبنة بيتي اصلي اذا ملقيتوهاش يبقى مالياش دعوة ضيعتوا على نفسكوا تمن اربع علب زبادي
و شغل نص ساعة و انتظار تلات ايام

زيادة ف التاكد من انها بقت فعلا لبنة مش كده و كده تقوموا تشيلوا الكلينكس من الجنب، لو اللبنة وقعت لوحدها و اتكسرت على نفسها تبقى خلاص بقت لبنة ، طبعا لو مش زي اللي فوق تبقى لسه بتستهبل و مش راضية تبقى لبنة، استنوا يوم كمان

الدليل الاخير انها بقت لبنة عشان انا زهقت ان السلطانية اللي بتحطوها تحت المصفاية حتلاقوا فيها مية الزبادي و ده معناها انه تمت تصفية العلبة بتاعت الزبادي الى اخر نفس

تفرشوا اللبنة جوا علبة للحفظ و تعملو احركتين قرعة زي ما انا عاملة كده و تحطوا زتونتين او ورقتين نعناع او قرن فلفل حار او ممكن شوية زعتر على الوش يااااااااه مقلقوش ، لحسن تقولوا لي اعملي لنا بوست عن الزعتر و فوايدة و طبخاتة

ده شكل العلبة النهائي بعد ما قعدت اربع ايام افطر منها

يلا بالهنا و الشفا

محدش يسالني تاني عن وصفة اكل عشان التصوير بياخد مني وقت

و انتوا عارفين التكاليف و اللذي منه

مع تحيات وصفات و مأكولات المهجر للعزاب و العزابات

مكة ...الطائف....

كل اللي سبق ذكرهم في العنوان هو اسماء مدن تقع في المملكة العربية السعودية، اتفاق الطائف الذي انهى الحرب الاهلية في لبنان، و الان اتفاق مكة الذي انهى بقدرة قادر و عظمة سحر فاق ديفيد كوبرفيلد، نزيف الدم بين فتح و حماس، يا للعجب العجاب،

و من الجزيرة اقتبس نصوص و مقتتفات من الاتفاق الذي وافقت عليه حماس و فتح

"

ودعا عباس في كتاب التكليف رئيس وزرائه للالتزام بقرارت القمم العربية واحترام قرارات الشرعية الدولية والاتفاقات التي وقعت عليها منظمة التحرير الفلسطينية.

"

يعني حماس حتوافق على الاعتراف بالدولة الاسرائيلية؟!!!!!؟؟؟؟ طيب كان ليه وجع القلب من الاول و قتل مدنيين فلسطيينين بايدين فلسطينيين!!؟؟؟؟

و بعدين ليه الفترة الاخيرة هنيه ظهر بغطرة و عقال و اللي مش عارف هما الطرحة و الطوق الاسود اللي اهل الخليج مشهورين بلبسهم

و بعدين يعني السعودية و خادمها ليه دايما هما اللي بيوفقوا راسين في الحلال و مع ذلك مش معترفين باسرائيل و لكنهم دايما بيشجعوا قتال الكفرة و الجهاد و مع ذلك عمرنا ما سمعنا عن رصاصة رش صيد صقور طلعت بالغلط على اسرائيل ّّّ؟؟؟؟ يعني انا اسفه بس المع ذلك عندي كترت لكن الموقف بيفرض نفسه، يعني كمية متناقضات رهيبة من كل جانب

مش فاهمة كمية تناقضات مليان بيها الموقف العربي و بالذات الفلسطيني-الفلسطيني و مش فاهمة دور السعودية الغريب العجيب اللي بيظهر فجاء ة و مع ذلك مش بنسمع عن شئ فعال حصل وقت الجد اللي بجد!!!!!؟؟؟

يعني السعودية استنت لما نص السكان الفلسطينيين قتلوا في بعض و بعدين جت تعمل اتفاق و مبادرة صلح و بين يوم و ليلة نسيوا كل خلافاتهم و اتصالحوا بالسرعة الرهيبة دي؟؟ طبعا صحيح اصلي نسيت كلها كام يوم و السعودية " تعلن" عن تبرعها للهيئة الفلسطينية بمبلغ مليون ريال مساعدة منها لاقامة ما تم هدمه و بكده تكون كفرت عن ذنبها وفرضت سيطرة زيادة على الهيئة الفلسطينية ويصلوا الفلسطينيين صلاة شكر للسعودية و تبقى هي حامية حمى العرب و المنكوبين و نرجع نلف في نفس الساقية و بعد كام سنة او ممكن كمان كام شهر يرجعوا يقتلوا في بعض تاني و هلم جرا

اييييييييييييه دنيا غريبة مايعرفش يحلها غير ملك مدقرم زي بتاع السعودية اوماااااااااال

http://www.aljazeera.net/NR/exeres/95C17364-0789-4819-8087-AA648516523B.htm

http://www.aljazeera.net/NR/exeres/137BEEE1-E364-4586-BFE1-E16F7217C273.htm

شفتوهم في الصورة و هما مزقطاطين بالاوي ازاي و كل واحد فاشخ بقه من الفرح و الانشكاح و كمان مش عارفة هما بيصقفوا و لا بيكببوا كبه بالبرغل؟؟؟ و ليه هنية مش بيصفق؟؟ الاتفاق مش عاجبه، غريبة مع انه اونكل الملك نفسه هو اللي عامله الاتفاق و خلاه يوافق على كل الحاجات اللي هو مكانش موافق عليها من اوامر عباس لكنه وافق عليها بعد ما الملك راضاه؟؟؟ و عباس فرحان اوي هو كمانعلى ايه مش عارفة

بجد حاجة مسخرة

وللحديث بقية

ملحيظة صغيرة: خدوا بالكوا من كلام الاغنية و قولولي رايكوا ايه، كلامها ينطبق على كل الحكام العرب على ما اعتقد

التاج التاج التاج موعودة ياللي عليكي التاج

اتمررلي تاجين

واحد من وئام و بعتتلي تاج الصفحة 123 من اخر كتاب بقراه

التاج التاني من ذو النون و المفروض اني احكي فيه خمس حاجات من ذكرياتي او حاجات مستخبية

المهم

امري لله و اديني حجاوب

تاج الصفحة 123

"

فتحت باب الحجرة فارتمى ضوء المصباح على الارض. تنحت من أمامه و هي تدفعه بيدها. رأى ست قمر جالسة على حافة الفراش و هو الموضع الوحيد الصالح للجلوس

"

من الحرافيش

********************

تاج ذوالنون

اول قصة

و انا في الجامعة كان لازم كل سنة طبعا اعمل تصريح العربية اللي اهلي حيجوا يوصلوني بيه من و الى الجامعة، وقتها كنت في قطر ، فمحدش يفتكر اني كنت بترفع عن السواقة، لا السواقة هي اللي كانت مترفعة عننا، المهم، انا جدي خلقه ضيق و ميحبش حد يقله تلت الخمسة كام، فانا يدوبك اعرف اخد منه معاد عشان اوقع ورق التصريح و امضيه تعهدات و الكلام ده كله، خلصت المهمة بصعوبة و اخدت الورق على مكتب التصريحات، كان يوم زحمة اوي، فانا انتخت على طرابيزة لغاية ما يوصل دوري و جبت كوباية نسكافية، و بس، عاديكوا على اللي حصل، كعادتي لازم ادلق اي حاجة فيها ميه او سوائل، طبعا عشان اتفادى الحرق فعملت حركة بهلوانية مفاداها ان النسكافيه وقعت على الورق و طبعا بقى الورق مينفعش اني اقدمه و لا بقى ينفع اني ارجع لجدي و اقله وقع تاني، حيطلقني، بس قلت مافيش غير حل واحد، ايوة بالظبط زي ما جه في بالكوا، رحت المكتبة و جبت ورق شفاف و ورق كلك و قلم رصاص سن خفيف جدا و استيكه مخصوص للورق الخفيف و للحبر الجاف كمان و قلم من نفس نوع جدي بالظبط و كبرت صورة البطاقة الشخصية بتاعته و روقتها

و اتخذت ليا مكان منزوي و درست التوقيع من جميع ابعاده و فضلت اتدرب زي اللهلوبة و استحضرت كل معلوماتي عن صفات الخطوط و بيان اختلاف اشكالها و كل العلم اللي عندي والحمدلله لما تاكدت من حرفية الشكل قمت طابعاه على طلب جديد و فيشت الهوامش و زبطت الورق كله و دعيت ربنا انه يساعد بنت مسكينة زيي جدها صعب المراس حبتين و انها يعني حتعمل ايه

اقله هي مش بتزور التوقيع عشان تسرق، و الحمدلله وقفت في الطابور تاني و والورق مشي اخر حلاوة بالصلاة عالنبي و ده شجعني اني اخلي جدي يوقع على ورق كتييييييييييييييييييييييير سهلي امور كتيرة اوي ايام الجامعة و من غير ما هو يتعب نفسه او يدرى بالموضوع شئ

و كمان ربيت سمعة كويسة بين البنات وكل اللي تتزنق كانت تجيلي لكن الشهادة لله عمري ما زورت توقيع على موضوع انا شاكة في صحبته

اه انا فتوة لكن في الحق بس

القصة التانية

مرة زمان و انا عندي 10 سنين ماما خرجت مشوار و مش عارفة ازاي قدرت اقنعها اني مش قادرة اخرج، اصلي في التمثيل ولا امينة رزق في عز شبابها، الا صحيح هي ماتت و لا لسه عايشة؟؟، المهم هي خرجت من هنا و انا جبت ورق قديم و قلت لما اجرب اولع فيه نار و اشوف حيبقى شكله ايه، و كل ده بسبب تاثير درس العلوم عليا و عن ازاي ان الحاجات لما بتتحرق بتتحول لفحم و تتغير طبيعتها الفيزيائية و كلام اهطل كده ، فلما انا شرحت لماما اني عاوزة اعمل التجربة دي بنفسي قالت لي اياكي اللعب بالنار مش كويس، طبعا للاسف انا عنيدة و مش بصدق الكلام، فمصدقت انها برة البيت و رحت اعمل التجربة الخطيرة دي، المهم ولعت النار في كبشة ورق بتاع كراريس فيها ادلة اني مكنتش بحل الواجب و اذا حليته بيكون الحل فيه دليل قاطع اني مكنتش مركزة بمليم مع المتيسة، و قلت افضل حل هو التخلص نهائيا من الكراريس دي و اجيب غيرها و انقل الحل من البت هالة الاولى بتاعت الفصل الله يمسيها بالخير بقى، بس انا بقى كنت واعية سالت نفسي لو النار خرجت عن سيطرتي اعمل ايه

فقلت احرق الورق في حوض الحمام عشان لو حصل اي شئ افتح عليه المية قوام و اهزم الخضة، اه اصل انا احب لو عملت حاجة اعملها صح يا بلاش، و طبعا انا اصلي اروبة من يومي و خبيثة و بتفرج على افلام كتير من وانا في اللفة، فبستفيد من غلطات الابطال الاغبياء، اللي هي زي انه يلاقي واحد ميت و الدم نازل و سكينة مغروزة فيه و سامع صوت البوليس بيقرب و برضو بغباءه الجبار يقوم يمسك السكينة و قال ايه يعني مش مصدق و و يعيط بعد كده لما البوليس يمسكه، طب والله لو مش حيتمسك عشان مشكوك فيه انه القاتل انا اقبض عليه بتهمة الغباء العلني المتكرر، المهم نرجع لموضوعنا، انا بقى حرقت اللي حرقته و تاويت اللي تاويته و قمت صبيت ميه بعد الجرمة النكراء و رميت بواقي الورق في التواليت الله يعزكم، المهم ربنا رايد اني انفضح قدام ماما فيقوم التواليت ميشفطش كل الورق المحروق و يتبقى شوية منه على الوش، و انا و لا على بالي، على راي المثل وقعة الشاطر بالف ، ماما ترجع من بره و من خضتها، تنادي عليا بصوت عالي اوي يخضني و تواجهني بكل صراحة

"

ماما:انت اللي حرقت الورق ده؟ و لو حرقتيه ، حرقتيه ليه؟ اتكلمي احسن لك؟

انا:( بكل ما عندي من براءة و جواها خضة و لعن للذات على غبائي من عدم احكام التخلص من الدليل) لا مش انا،

ماما: امال مين؟؟ انت بس اللي كنتي لوحدك في البيت يبقى ازاي مش انت؟؟؟

انا: معرفش( ابتدي اسح في دموع، و مش تماسيحي لاني سهل اوي اعيط) انا فضلت في اودتي اذاكر لغاية ما انت جيتي دلوقتي

اهئ اهئ اهئ

ماما: ( بتخبط كف بكف و مش عارفة تعمل ايه و اعتقد ان برج من فواضل ابراج مخها شفته بيطير)@#$%^&*؟؟

طبعا حلفتلها ايمانات ربنا كلها اني ولا ليا خبر عن اللي حصل و لانها طيبة و بتصدق في حكايات الجن و توابعها و فاترعبت لما لقيتني مصرة في جوابي و بعيد نفس الكلام، اه ما هو ده اللي علمهولي في الجيش، و فضلت يا حرام اسبوع مشغلة قران في البيت اربعة و عشرين ساعة و تبخرنا و تعيط بالليل شوية و شوية تدعي ربنا

المهم انه الان و بعد مرور 19 سنة لسه ماما تحلفني كل فترة والتانية انه مش انا اللي حرقت الورق و انا اقلها انتي لسه فاكرة ارجوكي متفكرنيش لاني كل ما اعرف اني كنت قاعدة مع جني اتلبش فتسكت هي يا حرام و تقلي متخافيش لو اعترفتي مش حعملك حاجة انتي بقيتي كبيرة زي الشحطة و مش حطول اعملك حاجة، لكن السر في الاصرار على الموقف. هههههههههههههههههههههههههههه

القصة التالتة و الاخيرة

و انا في سنة ساتة ابتدائي و كنا اخر دفعة يخلوا فيها الابتدائي ست سنين، المهم كان عندي مدرس خصوصي واخدني مقاولة يجي ساعتين كل يوم يمسكني رياضيات(يااااااااع)و علوم( نص يااااع)و هاتك يا شرح، بس المشكلة مش في كده، انا متعودة اتنح مهما كانت الضغوط، لكن المشكلة كانت في انه كان بيلف طول اليوم على رجليه و يجي عندي انا و يقلع الجزمة و تفوح الروايح، طيب انا ذنبي ايه،، طبعا هو يقلع الجزمة من هنا و انا افصل نفسي عن الواقع طوالي، و بالتالي كنت مش بركز معاه خالص و لا اعرف هو كلمني عن ايه النهاردة، بعد فترة بديت ازهق منه بالأوي و قلت خلاص يا اما هو يجنني بريحة جزمته ، يا اما انا اجننه مني و اطفشه، اصلي اشتكيته لماما فقالت لي اني بتدلع و بتلكك و انه ده تالت مدرس يتغير السنة دي و مش حنجيب غيره

قلت في سري خلاص، انا عملت اللي عليا، و انتي مسمحتيش بحل سلمي، خلاص بقى حوريكي حاعمل فيه ايه، يا انا يا المدرس في البيت ده، المهم جيت في مرة اداني فيها واجب و بعد ما علم على التمارين في كتاب سلاح التلميذ و علم على صفحات الكتاب الاصلي بتاع الحكومة ، قلت خلاص هي دي فرصتي، مسكت الكتابين و شقيت منهم الصفحات المستهدفة و بخفة ايد منقطعة النظير، و سهرت ليلتي انضف بواقي الورق من جذر الكتاب ولا اجدعها ست بتنتف ريش فرخة، و طبعا معداش عليا اني اخفي الكتاب تحت السرير عشان يرجع ماسك نفسه بعد ما كنت فضلت فاتحاه على الاخر و بقى باين ان في حد لعب فيه، بس عدوا يومين، جه المدرس و قالي فين الواجب رديت و قلتله فيما معناه اني ملقيتش الصفحة اللي هو اشرلي عليها و لا لقيت الصفحة اللي في الكتاب الاصلي و علشان اقله اذاكر شوية، طبعا الراجل بقى يضرب كف بكف و يقلي و يحلف بحياة ولاده انه علم على الصفحات بايده اللي حيكلهم الدود و طبعا اتباعا لسياسة الثبات على الموقف و تتنيح نظرات العيون فالراجل شك في نفسه، انا بقى كملت عليه اخر لمسه، قلت له مش حضرتك بتدي دروس لمي و منى و و و و ، فقالي ايوة، قلت بس تاهت و لقيناها ، تلاقيك علمت على الصفحات عندهم هما و انا لأ، طبعا كل ده بان لماما ليه انا سقطت في امتحان الرياضيات و الباقي نجحوا و عليه تم الاستغناء عن خدمات الاستاذ و جبت استاذ تاني كنت بسمع عنه انه طيب و مالوش في التور ولا الطحين و بيمشي حسب مزاج الطالب و اهم حاجة انه مش بيقلع الجزمة لما يدخل عندنا لانه كان راجل كبير في السن و بيخاف ليبرد و كان يمكن اخر الرجال المحترمين

اعتقد ال3 قصص دول كفاية اوي و كفاية اوي الفضايح اللي قريتوها

مش لازم يبقوا خمسة

تحياتي

التاج ده مش حمرره لاي حد معين لكن اللي يحب ياخده يتفضل اهلا وسهلا و يبقى يقلي عشان اقرا فضايحه

هههههههههههههههههه

حلقات ليست بمتصلة

نثرية لها من الالوان الاسود حزنا و الاحمر ولعا و الابيض طهرا و الازرق غرقا

مياة الغدير

انسابت عليها المياه كاندفاق الغدير
غسلت ما عليها من صابون براحة الفانيليا و زهر البرتقال، تاكدت من خلو شعرها من بواقي شامبو برائحة زيت الزيتون و الليمون، كانت على وشك الخروج من الدوش ذي الاربع حوائط الضيقة، توقفت، ما الذي يمنعها من البقاء فترة اطول تحت الماء؟؟
وقفت مرة اخرى تحت الماء
رفعت يديها و اسندتهما على الحائط المقابل لسقوط المياة كمن تم القبض عليه و في حالة تفتيش من قبل العسس

انهالت عليها المياة رقراقة من اعلى فقرات عنقها و حتى اخر اطراف نهايات عقبيها
تجمدت زمنا لم تشعر بطوله او بقصره، تعمدت ادخال الماء لاذنيها حتى لا تسمع الا صوت الماء فتشعر انها عادت الى رحم امها اوانها في اعماق بحر ، تريد وائلا لها من زخم المحيطات بها، فانتهت بكون حمامها موئلا اخيرا لا فرار منه، اذن فلتغرق تحت انسياب الماء.
احست ببرودة الماء فترة و فترة اخرى بسخونته، تقلبت و وجهت وجهها للماء،ازادت من قوة اندفاع المياة عليها، احست بانشقاق الغشاوة من على خلاياها، شعرت بحدود عينيها و هي تغسل بالماء فبكت بخفة حتى انها لم تضغط عضلات جفونها لاجبار الدموع على الانسياب
تعيش حالة جفاف مشاعر لا انتهاء لها، كل ما هو محيط بها متصحر، له الوان ؟؟ نعم لكن لا حياة، لا شعور، لا مياه
لكنها كانت قد اقسمت انها ستترك الماء يجري و ينساب الى كل خلية من خلايا لحمها عله يغسل حزنها و يخفف من ملوحة دموعها المراقة بين فيضان المياة
هل من الممكن تطبيق نظرية الاواني المستطرقة هنا؟ هل اذا اكثرت من استفاضة الماء الخارجي على جسدها سيؤدي ذلك لتخفيف حرقة مخزون دموعها؟؟؟
ترجو ذلك

***********
اغتسلت..... الآن تناجي
***********

لعنة القلب المسكين

مشكلتها انها ذات قلب رحيم
عطوف
رقيق
حساس
حنين
واللذي بيده توقف القلوب و تغيرها من الايمان للكفر، هذه هي مشكلتها
لماذا يشعر قلبها بكل شئ؟؟
لماذا ينفعل لاي شئ؟؟
هي اذن مبتذلة و لا شك
هي اذن افاقه و لا جدال
هي اذن مدعية و لا نقاش

اذن فلتحل عليها لعنات السماء و قبلها لعنات الارض
فللارض ملوك و ارباب
خلقوا كلهم فقط ليجتمعوا على ادانتها
و هم في ذلك محقون

ولكن اخيرا جاء وقت و اتفقت فيه الانسانية جمعاء على شئ
فلتمت هي فداءا لسلام البشرية
علها تجد الراحة في مكان غير هذا
مكان تكون هي شيطانه و ليست ملاكه
فلقد اصبحت مهترءة جراء لعبها دور الملاك
مع انها لم تطلب هذا الدور و لم تشتهيه قط
لكنه ما يسمى القدر

********************
تكلمت و ها هي تخرج القليل من مخزون طال اختباءه
*******************

اسطورة الكوتشينة


تقول اساطير الخزعبلات ان من البنات التي تلهو بورق الكوتشينة تصيبها لعنة في الحب ،اللعنة معكوسة، فيحدث انه اذا تفوقت الفتاة اثناء لعبها واكثر من ثلاث مرات متتاليه فانها تكون تعيسة الحظ في حبها و ان من يحبها في هذة الفترة فانه مفارقها وللابد. و العكس صحيح، فاذا لعبتها و خسرت ثلاث مرات متتاليات فانها علامة بان من هو واقع في شباك غرامها باق، لا بتاركها و لا بمفارقها.
تلعب فتاتنا الورق بمهارة ولكن في النهاية هو برنامج اليكتروني موجود على جهازها الساحر.
تدخل في علاقة ، تترك بعض الوقت للعلاقة و تسمح لها بالنمو، تقوم باختبارها لترى صدقها و مدي قوتها، تفتح ملف اللعبة، تبدا باللعبو تنتهي من الدور تلو الدور، واو، يا الهي، لقد كسبت الدور لثلاث مرات متتاليات، اذن محكوم على العلاقة بالفشل، تعود لاحضان حبيبها و هي تعرف انها النهاية، لكن كيف ستاتي،، ليس لها الا الجلوس والانتظار، مر يومان، ها قد اتى الحبيب، يريد الافصاح عن سر مكنون، هات ما عندك يا قلبي، يفيض القلب كلاما، يسر اللسان اصواتا، تنتهي بالاعتراف بان اخفاء بعض المعلومات قد تم في الماضي حتى يسرق قلبها و انه قد خطط للافصاح فيما يراه هو وقتا مناسبا. اه، هكذا اذن، هكذا تكون النهاية، حسنا لقد قرات ورق كوتشينتها قبل يومين و ها قد اتت النهاية، اسعت اليها؟؟؟ لا لكنها قراتها، و قبلها احست بها، فانتظرتها.

تاتي لعلاقة ثانية، ترى ان ما بها ليس بسابقتها، اذن سوف تكون جيدة، لا شوائب تشوبها، حسنا ،اتكل عليك يا الله، فلنبدا الحب و الغرام، حب في حب ، عشق مغلف بهيام، يا الله ما اروعك، تغيب فترة عن كوتشينتها، تلعب قليلا لكي تقتل بعضا من دقائق الوقت، تنتهي من شوطها الاول، كسبت، الثاني كسبت ايضا و بمعدل عالي جدا، الثالث....... كسبت، يا الله، ما هو الحادث الآن؟؟؟
الآن هي خائفة، من أي جهة سوف تاتي النهاية؟ لا تريد للنهاية ان تاتي ابدا، لا ارجوكم لا، هل من تغيير لقواعد اللعبة، هل من رحمة؟؟؟
تنتظر قلقة، تتلف اعصابها خوفا، تبكي بكاءا خفيضا بمنتهي بعويل خافت و تتسأل، لم؟؟؟
تنتهي الثانية كسابقتها

تمر ايام تتكون على شكل شهور و سنين، تتصالح مع قدرها، تطمئن له و تستقر لمكنوناته و ترى نفسها في دورها الاجتماعي الجديد، هي ليست لشخص، هي لاشخاص، حبها يكون عالميا، تهتم بهذه، ترعى هذا، تتبنى اخرين، تكون هي الاخت و الصديقة، الصاحبة و الونيسة، لكنا ترى انها ملكية عامة، لا خصوصية بعد الآن، حسنا ، و كما انه من المضحك ان يدعي جميع الاباء انهم كانوا من اوائل الفصل، فمن اذن اللذي كان بعد العاشر و من سقط؟؟
اذن ستكون هي الاخيرة، دورها الجديد يقتضي ان تكون متواجدة، لطالما رات نفسها ملاذا للاخرين، لم؟؟؟ هي لا تعرف و الرد عند الاخرين انها " حكمة الله" اذن كن فيكون، فكان الحدث......... و كانت هي

باركولييييييييييييي

النهاردة ولاول مرة في حياتي، ايوة اول مرة في حياتي، اعمل بيض اومليت و ميتقطعش مني لما اقلبه، طول عمرك يا وهيبة، انا ممكن اعمل محاشي بمختلف انواعها و طواجن و اسماك و دواجن و حاجات كتيرة بجد لكن اجي عند الاومليت و افشل و ينتهي الامر بيه انه بقى بيض ملخبط او محروق او متشحتف الاواصل، لكن الليلة دي قلت لازم اقوم اكل حاجة لاني بقالي يوم و نص مش واكلة أي شئ غير شاي بميرامية لان عندي برد و زكام سخيفين جدا جدا جدا
الظاهر ان جوعي ضغطني اني اتقنه و كنت فرحانة اوي اوي اوي اني عرفت اظبته

اسيبكوا مع الصور عشان تصدقوني

الوش الأولاني

الوش التاني والحتة الدهبي اللي في النص دي كانت جبنة شيدر مبشورة وناعمة اوي وسايحة

حاجة مزاج يعني

الشكل النهائي مع كتع من الطماطم و اللبنة البيتي و اللي عاوز يعرف ازاي ممكن يعمل لبنة في البيت و بمنتى السهولة يقلي و انا اعمل بوست مخصوص عن الوصفة

ملحوظة: يمكن البعض لاحظ ان البوتجاز مش نضيف و انا احب اوضح اني بهتم بالنضافة جدا لكنها البنت الامريكانية اللي عايشة معانا و مش عارفة اوصفلكوا قد ايه هي مش نضيفة ولا تعرف اي شئ عن النضافة و لاني كنت عيانة فهي لعبت براحتها في البيت و وسخت المطبخ و لاني برضو كنت عيانة فمقدرتش انضف وراها و كنت بجد زهقانة منها

اه لو احكي لكوا على الخناقات والمواجاهات اللي بينا، بقالي 6 شهور بعلم فيها النضافة لكن تقولوا ايه، ديل الكلب او الكلبة

لنا بقية مع مذكرات حفصة في بلاد الامريكان منطقة المنسية

يوم الامتحان يكرم المرء او يهان

اية اللي حيحصل لايميلك لما تموت ؟
مش عارفة و الاكاده اني سالت نفسي السؤال ده كتير لكن متخذتش أي اجراء فعلي لتفاديه، طيب هل مثلا افتح حساب خزنة في بنك و اسيب فيه المعلومات دي و لا ايه يا هل ترى.

اديت الباس وورد لحد قبل كده؟
ااعتشكد ايوه لكن محصلتش حاجة وحشة لانهم كانو اناس بثق فيهم كويس اوي

لو اه كانت طبيعةعلاقتك بيه اية؟
اصديكائي

اسمك؟
حفصة

اسم الدلع المشهور في وسط اصحابك؟
والله اسمي من النوع المش مالوف فلذلك يصعب ايجاد دلع ليه و ان كان صحابي شفقة بحالي بينادوني حفصفص و صفاصيفوا و صفصف و بعض قرايبي بيقولولي دوسي بس مش قصدهم على شئ معين و فيه كمان بيقولولي اسوووس و زمان مدرب الكراتيه قالي حسميكي فيفي فسبتله التمرين و مشيت

عمرك؟
ايه البتاع ده ، مش كفاية فضايح في الفايل ما قلنا حبقى 30 في يوليو الجاي

برجك؟
السرطان و ده برج ناس كتير مهمة جدا لكن منه لله بوش و رامسفيلد و توم كروز جم بوظوا سمعته و جابوها الارض منهم لله بقى اشوف فيهم يوم بس الرسمي الاسد و ده عشان عبال ما بابا سجلني و لان ورقي مش شهادة ميلاد مصرية فاخدنا وقت و بقيت الاسد لكن انا والله السرطان

مجالك او مجال دراستك ؟
المفروض اني مربية فاضلة وعلى العموم انا بدرس انزليجي بجدارة و عربي بجدارتين مع ان العربي مش تخصصي بس بحب اللغة اوي و أي حد يحب دروس عربي او انزليجي او لعب عيال للاتفال نحن على اتم استعداد لتوصيل اهدافكم لرؤوس الاتفال من غير أي ضرب

شخصيتك نوعها اية؟
شخصيتي مفتكسة، مالهاش حل يعني، متناقضة يمكن، معرفش و اوقات بتكون سهلة جدا و اوقات بتكون معقدة جدا و الشاطر اوا لشاطرة اللي يقدر يفهمني

السفر بالنسبة لك؟
طول عمري مسافرة الصراحة زهقت نفسي اقعد كذا سنة من غير ما اسافر شوية

المود بتاعك؟
حضرتك المود بتاعي بيتغير مع تغير ساعات الابراج الصينية فكل شوية تلاقيني في حال لكن ببقى مسيطرة و الحمدلله لاني بشتغل مع نا س مالهاش ذنب في مخي الدزمة

وقت فراغك بتعمل فيه اية؟
الصراحة انا عندي خلط عجيب غريب بين وقت الفراخ و وقت الشغل لان ده هو ده و ديكهون هو الاولاني فتلاقيني بعمل كذا حاجة مع بعض و بستفيد من كل حاجة زي ما بقدر و كله ماشي حلاوة و ظريف عالاخر

الاكلة المفضلة؟
السؤال ده اصعب من أي سؤال كيميا عضوية حليته في حياتي لاني ذويقة و بحب الاكل ددا ددا ددا


الصفات اللي خدتها من ماما؟
قولي ايه اللي مخدتوش من ماما

الصفات اللي خدتها من بابا؟
حب القراية و كثرة الاطلاع و هي اصلا عادة عند ماما برضو لكن اهو عشان الراجل ميصحش يطلع من المولد بلا حمص :)

اكتر 6 حاجات بتكرهها؟
بكره ابص لنفسي في المراية بالليل عشان بخاف اوي
بكره اشوف خيالي بالليل برضو عشان بخاف برضو
بترعب و افقد اعصابي لو شفت برص و بتحصلي عملية انهيار جامدة جدا
بكره انفصام الشخصيات عن واقعها
بكره الادعاء يعني مدعي الثقافة ، الادب، الصحافة و الخ الخ الخ
بكره السبانخ و اللحمة و الضفادع

اكتر 6 حاجات بتحبها؟
البحر
الموسيقى
ضوافري لما احطلها لون مانيكير جديد
عيني لما اكحلها و حتى لما مش بكحلها برضو بحبها
الفضة و الاحجار الكريمة
اتمشى في الخان لغاية ما اتعب او ماما تستدعيني


الشغل بالنسبة لك؟
هم لابد منه و نفسي يبقى عندي مشروعي الخاص و شغلي الخاص مش كسلا (لا الصراحة كسلا)
لكن عندي سياسة معينة و نفسي اطبقها


اية الكومبيوتر والانترنت بالنسبة لك؟
والله لغاية 3 سنين فاتوا كانوا جهاز شيك لابد منه في البيت لوحده في برستيجي لكن بعد ما بقيت متيسة انجليزي بقوا دول اهم عندي من المنهج نفسه لاني اكتشفت بلاوي ممكن اعملها للاتفال من النت و عملت حاجات جبارة حازت على اعجاب الكثيرين لدرجة انهم اتجننواو بعتوني البعثة السودا اللي انا فيها دلوقتي اما حاليا فهو نافذتي على العالم و بالذات عليكوا انتوا

احب امرر العريضة دي لكل من
وينكي
زنزانة
ريكا
شهروزة
وئام
اوسا
كلبوزتي
قصاقيص

نوران
ام العيال
مذكرات امراة مثلية

ومن الرجالة المدونين
فارس قديم

الاستاذ حسني سليمان

ابوريشة
ياسر عوف
ذوالنون
دانتي المصري
مزمز
الحاج جرجس
اعصار
عاشور

الدبور