حمل الستين خطر عالأمة

في موضوع سابق بأسم الايموفوبيا

دخلت قطة الصحرا و علقت بكلام لطيف اوي و قالت التالي:
هى الامة الاسلامية دى كل حاجه خطر عليها كدا لو حد كح يقولك الراجل اللى بيكح ده خطر على الامة الاسلامية بيفكرونى بالست الحامل بعد عشرين سنة جواز واول حمل ليها تنفضل نايمة على ضهرها علشان خاطر الجنين اصل الحركة خطر خطر خالص عليها
"
و بصراحة عندها الف حق
الامة الاسلامية فعلا بقت زي الست اللي حملت و هي في سن خطر بعد ما احتفلت بعيد ميلادها الستين مثلا
و كل ما حد يكلمها تقله " اوف ، اوعوا بقى يا كماحة، ميصحش كدا، انا حامل" لغاية ما نتفاجئ ان حملها اتوفى من زمان و عدت علينا سنين قبل ما ناخد بالنا ان حملها بقاله شغال على الاقل مليون سنة و هي بتسترزق منه زي القشطة الصابحة
ما هو مش معقولة كل بم تحصل تبقى خطر على الامة
شباب الايمو خطر على الامة
البهائيين خطر على الامة
رواية مترو خطر على الامة
خانة الديانة خطر على الامة
ستة ابريل خطر على الامة و ان كان مالهوش لازمة
عذرية العذراء خطر على الامة
امي خطر على الامة
الشيشة اللي قدامي خطر على الامة
الحشيش خطر بس جميل للامة
الاديداس خطر على الامة
مشروم اند سويس خطر عالامة
الصين خطر على الامة عشان بتسعى لنشر فكر المشروم وسط شباب الامة و بالتحديد المراهقين (زي حالتنا )

البوكيمون خطر عالامة
سبيس تون خطر على الامة
ميكي ماوس خطر على الامة
مهند خطر بس مش على الامةهو خطر على بنات العيلة عندي و عندك
قلع الحجاب خطر على الامة
بيبسي ماكس و كولا زيرو خطر على الامة
و امجد خطر على الامة
حد الزعف خطر الامة حيث ان النخيل حيتجرد و دي يمؤامرة من اقباط المهجر
الجمعة الكبيرة خطر على الامة حيث ان الفول النابت حيخلص
حيث انهم بيخططوا لتصحير الرقعة الزراعية المصرية الاصيلة
و بما اننا عاوزينها تبقى خضرا تبقى دي خطر على الامة
المدارس الانترشنايونال خطر على الامة
مطعم القزاز بتاع نص البلد خطر على الامة
عصير القصب خطر عالامة
هو مين خطر عالامة ده؟ حد يعرفه؟ حد يقدر يستدل عليه عشان نساومه بقرشين حلال و نخليه يحل من نافوخنا؟
او لو حد عنده كلاريتين مكثف القوة ممكن يرضو نديه للامة عشان تبطل حساسية و الورم يخف شوية

شكلي كدا اني خطر عالامة انا كمان

الله!! هو مش المذيع ده ناس؟؟

خلاص يبقى يتبربر بالبرورة و يتمدد بالحرارة

********************

الانسان الطبيعي:

بيزعل لو حد زعله
و بيفرح لما حاجة تفرحه
و بياكل لما يجوع
و بيشرب لما بيعطش
و بيخش الحمام لما يتزنق
و بيستلف برضو لما بيتزنق
و بيكون عصبي لما حد بيضايقه
و بيكون لطيف لما حد بيوانسه
و بيروح السنما لما يحب يتفرج على فلم
او يجيبه دي في دي
و بيطلب من كنتاكي لما المطاعم تكون قافلة و مش لاقي يطبخ
و بيلبس لما بيخرج من بيتهم
و بينام لما يتعب
و بياخد دوا لما بيعيا
و بيروح الشغل كل يوم الصبح يسب لمديره
و بيسوق العربية لو هو محتاج يروح مشوار
او يتكل على الله و يرمي نفسه في التهلكة و يركب مواصلات
و بيسافر لما يضطر يسافر
و بيتفسح اذا حصل امر جلل
و بيشوف صحابه لما يحب يشوفهم
و بيعيط لما حاجة تاثر فيه
و بيضحك من قلبه لما حاجة غير الحاجة الاولانية تضحكه
و بيسال عن حاجة محيراه
و بيقرا لما يحب يكبر
و بيكتب لما يحب يبعبع
و بيسمع موسيقى لما يحب يتمزج
و بيرقص لوحده لما توصله احاسيس الاغنية كويس
و بيخش الفيسبوك ينكد على عيشته بايده
و بيدون عشان استدرجوه من حيث لا يدري
و بيتفاعل للاسف الشديد مع كل ما يحيط به من محيطات و انهار و بحيرات
و بيحضر مناسبات مالهوش اي دخل فيها
و بيروح خروجات غريبة عشان عاوز يتعرف على ناس
و بيوضب سريره في المناسبات الخاصة اللي عمرها ما حصلت و بناء عليه عمره ما وضب سريره
و بيكركب اوضته لانها زحمة و هو مش فاضيلها
و يغسل غسيله كل اربع ايام
و بيستحمى كل يوم
لكن شعره لا
و بيشتري هدايا لصحابه في مناسبتهم
و بيتعب من الناس لما تعاتبه عمال على بطال مع انهم هما اللي سخفا
او هكذا ارى
و بيحمل هم الدنيا المقرفة
و كدا يعني
فبعد كل ده توصيف للانسان العادي
و دي حاجات انا بعملها
ليه الناس بتقول عني غريبة ؟
ما هو طبيعي اني اعيط شوية و اضحك شوية
و ارقص شوية و اغضب شوية و اتعصب و ارجع اهدى و اكتئب و ارجع انشرح و هلم جرا
ده حتى على راي الست ام ئطاطة "هو فيه حد بيفضل على حاله؟"
يعني هل فيه حد ممكن مثلا يكون بيضحك طول الوقت او بيعيط او بيشتكي او بيهزر او بيفكر طول الوقت؟
هل ده هو الطبيعي؟
و ما هو تعريف الطبيعي؟
و ازاي اقيس نفسي عشان اعرف مدى طبيعيتي من زيفي؟؟
و ليه الناس شايفة ان التحول ما بين الاحوال شيئ سيئ؟؟
هما مش بيراقبوا نفسهم ولا ايه؟
ولا هما ملخطبين بين يغيروا حالهم و يغيروا رايهم؟

حد يفهمني لاني مش فاهمة

حين يكون فقدان القدرة عن التعبير ابلغ ما يمكن قوله من كلام

جمال الماشطة و وائل البلانة

حسرة عليكي يا مصر لما يكون المدعو بأسم جمال عبدالحريم بيشتغل و محسوب علينا صحفي

انا معرفش هي كلمة صحفي بقى معناها ايه الايام دي بس يبدو لي انها بقت تعني ماشطة او بلانة

واللي ميعرفش ايه ماشطة و بلانة هي مهن كانت تمتهنها زمان ستات بيقوموا بدور تجهيز العروسة استعدادا لزفافها من الناحية الجمالية

و من نايحة اخرى كانوا بيمولوا العروسة بمختلف انواع الاقمشة و مساعدتها في اختيار جهازها كعروسة

نظرا لكونهم طول النهار بيمشوا في الشوارع و بيشوفوا بيوت كتيرة فكانوا دايما معروفين ان لهم شبكة اصدقاء و معارف و كمية مهولة من الاخبار تقضي ملفات جهاز المخابرات لوحده لمده كام سنة قدام

المهم ان ما يسمى بالصحفي جمال ده شكله اسلوبه و افعاله تدل انه كان بيمتهن مثل هذه المهن الشريفة في الزمان السحيق

و لكن قرر يعملها بشكل جديد تحت مسمى صحفي

و انا احب اوضح

انا ميهمنيش ايه نوع فكر البهائيين

شوية منهم بيقلولوا انهم مسلمين

شوية بيقولوا انهم مش مسلمين

متفرقش معايا

هما حرين في عقيدتهم

يصنفوها زي ما هما عاوزين

بس انا يهمني الانسان

ولو مالهوش عنوان

بالظبط زي ما قالها منير

دول ناس

بشر

بني ادميين زي زيهم

لا ينقصوا رجل او ايد عني

بل ممكن يزيدوا

ولا عمري شفت شيئ وحش من حد فيهم

اعرف منهم ناس

جيران بقالهم سنين و ايام

زوق و اخلاق و في حالهم

طيب لما واحد زي جمال عبدالرحيم ده يطلع يقول اللي يقوله

او بمعنى اصح يهوهو اللي هوهوه

،ده يبقى اسمه ايه؟

و لما وائل ابراشي (اللي هو البلانة)هو كمان محسوب انه صحفي يبقى مؤكد عارف خلفية شخص زي جمال و يستضيفوه؟ ده يبقى ايه؟

و معروف ان البرامج دي بيكونوا منسقين فيها ايه اللي يتقال و ايه اللي ميتقالش، ده يبقى ايه؟

و تاكيدا لكلام جمال

يقوم اهالي قرية الشارونية بحرق و تهجير و ارهاب اهلها فقط عشان هما بهائيين و هما ميشرفهومش انهم يكونوا كدا

و بكل فخر يعلنوا الكلام ده في مدونة المتعوس جمال و ياكدوا له ان حتى الاطفال الرضع تم تهجيرهم و طردهم من القرية

من يحدثني عن التسامح؟

والله نسيت شكله ايه

و لكني ارجو انه في يوم من الايام

فقط يوم واحد

نبقى احنا فيه اقلية

احنا المسلمين يعني

نبقى اقلية في مصر

و ادعو كل من هو غير مسلم انه ينكل بينا و يقرفنا و يهمشنا و يعتدي علينا و يسلب مننا ابسط حقوقنا الانسانية و يهجرنا من بيوتنا و يعتدي على حرمتنا و يسرق متاعنا

و يعمل ما بداله فقط كوننا اقليه

وقتها

يمكن

يمكن نحس بجزء صغير من اللي بنعمله في الاخر مهما كان مختلف عننا و ايا كان مين هوا

هو ده علاجنا الوحيد

و ان كنت اشك اننا حنفهم المغزى و حيطلع حد يقلنا دي بلاء من ربنا نستحمله عشان نخش الجنة

دمتم
ملحوظة: الصور بتاعت مدونة جمال عبدالرحيم ماخودة من مقالات رامي رؤوف على الفيسبوك

الايموفوبيا

حين تصاب امة برهاب الافصاح عن مشاعرو اعتبارها رجس من عمل الشيطان

خير اللهم اجعله خير كنت نايمة و صحيت على الناس بتتكلم انهم ضد الايموو مظاهرات بقى و بيانات من البي بي سي و مارشات عسكرية و قران
و ان الايمو خطر ضد الامة
و حلل البعض انهم امتداد لعبدة الشيطان
و ذهب البعض الى انهم مشروع صهيوني امبريالي للقضاء على الشباب العربي و تمييعه مابين الجنس الاول و الثاني و خلق نوعين جداد تانيين
بل لقد انشات حملة على الفيسبوك لجمع توقيعات مليون و واحد شخص للمطالبة بازالتهم من خريطة الوطن العربي
و ناقش عضر البرلمان اهمية القضاء على هذه الظاهرة الاخذة في التفشي حتى لا يضمحل المجتمع العربي و يتردى لقاعية الهوى
و في برنامجه العميق " الحقيقة" استضاف وائل الابراشي افراد من جماعة الايمو ليتكلموا عن اهداف حزبهم المعلن و ما هي خطتهم الحزبية و من سيكون المترشح عن الحزب و في اي منطقة سوف يمثلون
ده كان ملخص اخبار الموضوع

بس انا قلت مبدهاش، لازم اعرف ايه حزب الايمو دول و نشوف بيقولوا ايه، ما هي خربت اصلها وهو يصح كل من افتكر انه قرا دستور بلده يقدر يفتح حز ب ولا ايه، شكلها سابت

مش عارفة ايه الصعب في تحديد جنسهم

اما هويتهم الجنسية فمليش دعوة بيها

المهم حطيت كلمة ايمو على محرك البحث و لقيت انهم شوية عيال بيطولوا شعرهم بشكل معين و بيحطوا مكياج غامق و مناكير الوانات ملخبطة على بعضها و بيعبروا عن مشاعيرهم بكل حرية و لذلك اتسمو ايمو اختصار ايموشن يعني و عايشين حالة يعني و بتنتهي عند سن 17 لان ده سن الاحالة على المعاش بالنسبة لاعضائهم و مسمعتش عن انشطة معينة ليهم.
طيب حلو اوي
احنا ليه خايفين اوي منهم كدا؟ يعني ايه المرعب فيهم للدرجة دي حتى ان وائل الابراشي يستضيفهم في حلقة في برنامجه؟ خلاص خلصت مشاكل الدنيا و مصر و الوطن العربي ففضينا لشوية ولاد و بنات عايشين الدور و مقلدين اشكال مسلسلات و افلام بيشوفوها؟
بعد كدا قلت اخش اشوف "المنتديات" بتقول ايه عنهم

يا مامي، دول بيخضوا بجد، اشرار

ايه السطحية و الهبل دول؟
حتى موضوع اهبل زي ده محدش من شباب العرب الهمام عارف يجيبله اخبار صحيحة او على الاقل يتكلم بشكل علمي لما يحط تعريفات؟

في الموقع ده

كاتبين التالي
"
ولكي نعرف أكثر عن مراهقين " الأيمو " كان لابد وأن نقترب منهم فهم يتميزون ببعض الصفات مثل الحزن والاكتئاب .. والخجل .. ويعانون من التشائم والصمت ويطلق عليهم في علم النفس Emotive Driven Hardcore Punk أى ذو نفسية متمردة حساسة.
"
يعني لا احنا عرفنا الاخ ا و الاخت صاحبة الكلام قربوا من شباب الايمو ازاي مثلا؟ زاروهم في جنينة الحلونات؟ ولا قربوا منهم قد ايه؟ ولا ازاي
بس هما قربوا، يبدو انهم قربوا من شاشة الكومبيوتر فقط عشان يحللوا الوان كحل عنيهم
و اللذيذ في الامر ان صاحب الكلام اعلاه قالك علم النفس بيطلق عليهم، يعني وصلت اننا بقينا نستحضر فروع جديدة في علوم حسب الطلب و ان حالة الاطفال دول اسمها، حسب علم النفس اللي بيقول، ذو نفسية متمردة و حساسة، يعني الحكاية بقت مرض رسمي بضغطة زر

بينما اسمهم ده لا هو تعريف علم نفس و لا علم منطق ولا هو علم من اساسه، هو تطور خلفيتهم الموسيقية و خلاص

خدوا بالكوا الجزم دي شريرة و بتؤدي للوقوع في الخطيئة بالذات السودا اللي في النص دي، حقوم ارميها حالا درءا للمفاسد


و الموقع ده

بيحذر انهم خطر على الامة الاسلامية، يعني يعقل برضو ان امة مليار و شوية حتخاف من كام عيل تافهة عايشين حالة بتروح لحال سبيلها بعد كام سنة و لو حتى مراحتش مش عارفة هل سبب خوفنا هو علمنا بضعفنا و هشاشة عظام اساسنا ولا ايه؟ ايه اللي يخلينا نخاف و نهتم اوي بظاهرة زي دي؟
طبعا كل ده غير اتهامات مكيلة ليهم انهم امتداد لشارع عبدة الشيطان اللي اتهموهم من كام سنة بس عشان بيسمعوا موسيقى الهارد روك و الهيفي ميتال و طلع انهم لا عبدة و لا شيطان و لا اي حاجة
و اتهام تاني انهم شاذين جنسيا بسبب قصة شعرهم و حركاتهم و رهافة حسهم و المكياج اللي البنات بيحطوه على عيونهم
يعني الهوية الجنسية عندنا انحصرت في كونها شكلك ايه؟
للدرجة دي؟


و في نفس الموقع ده
بيكمل الاخ تحليله العبقري لموسيقى الهارد روك و الهيفي ميتال و بيقول " ومراهقين الأيمو دائما يسمعون موسيقى الروك أو الميتال، حيث تتحدث كلماتها عن الحزن والألم وتدعو إلى العزلة وعدم التعامل مع الآخرين وأخرى تدعو إلى الكفر بالله."
و انا بعد الوصف الجبار ده اقدر اقول ان السخص اياه ده مؤكد مسمعش الاغاني دي خالص و لو سمعها مفهمهاش و لو شافها ماشية قدامه في الشارع مش حيتعرف عليها بتاتا.
كل ما في الامر انه ماشي حسب قاعدة العرب الاولى في تقصي جميع الحقائق و النظريات
المسماة اختصارا ب " قالوا له"
لا تعرف مين قال ايه لمين و لا ازاي و لا ليه
المهم قالوا له
و تصفحت كمية منتديات مهولة، مصري و سعودي و مختلف الجنسيات العربية و بعدها تسائلت
مين اللي بيمثلوا خطر حقيقي على الامة؟ جيل الايموام جيل المنتديات الفارغة اللذي لا يفعل شيئا الا نقل المعلومات و غلط كمان و عن دون فهم او تقصي او اي نوع من انواع البحوث؟
من الذي يضيع وقته في مواضيع مثل هذا المحتوى التافهة و يهول من امرها حتى تصبح مثل بالونة تحجب عنا نور الشمس؟
الى متى التغييب؟
*****


ملحوظة: في احد المواقع،للاسف تاه مني و معرفتش اجيبه تاني، و انا بتصفح، لقيت ان من ضمن علاماتهم انهم بيلبسوا جزم converse، يا خراشي يعني انا ايمو و انا مش عارفة؟ طيب مش حخش عندك يا عباس العبد تاني خلاص.

في ايدي ناي و الناي مكسور

بيني و بينك سور ورا سور

و انا لا مارد و لا عصفور

في ايدي ناي

و الناي مكسور

و صبحت انا في العشق مثل

و البحر بيضحك ليه

و انا نازلة اتدلع املى القلل

البحر غضبان مبيضحكش

اصل الحكاية متضحكش

البحر جرحه مبيدبلش

و جرحنا و لا عمره دبل

البحر بيضحك ليه

و انا نازلة اتدلع املى القلل

قللنا فخارها قناوي

بتقول حكاوي و غناوي

يا قلة الذل انا ناوي

ما اشرب ولو في المية عسل

البحر بيضحك ليه

و انا نازلة اتدلع املى القلل

***************

يصمت البحر حقا حين يكون متالما

فالغضب طاقة

و الامساك عن الضحك قدرة

و الامتناع عن الشرب معجزة

و لا يدبل جرح البحر جراء حقد او كره

فقط لان ملح القاع تؤجج ورمه

اما الان

فالبحر ساكن

لا طاقة

لا قدرة

لا معجزات

حتى جرحه يرقد عميقا في بطن حوت يونان

مساعدة لو سمحتوا

فيه بلوج عندي اتمسح

يا ريت حد يقلي ارجعه ازاي؟

و متمسحش بسبب هاكر

اتمسح بسبب بعض الاسباب التقنية من بعض الاعضاء

شكرا