الاولة بحب البحر

الاولة

بحب البحر لما يزوم
و اعشق صرخته في الريح
و احس في موجه شوق مكتوم
لناس حرة و حياة بصحيح
و احبه لما يتهاود
و ادوب لما يوشوشني
و يفرش موج و سجاد في احلامي تعيشني
مالوش اول مالوش اخر
قراره طاوي اسراره

و دايما في الهوى مسافر
و لا نهاية لمشواره
بحب البحر
احب البحر
و اعشق ضحكته و انه
و احب الناس احب الناس ما هم فيهم حاجات منه

و احبك ياللي احلامي في هواك زهزهوا و غنوا
يا بلدي ياللي و انا فيكي عيوني ليكي بيحنوا

احب الورد فوق السور و اعشق ضحكته الفانية
و احس في ريحته شوق مسحور
لناس حرة و حياة تانية
و احبه في ايدين عشاق
رسالة مهفهفة باشواق
و حتى و هو بالاوراق
كتاب العشق ذكرى فراق

حياته في الهوى ليلتين
و عمره ما كان بعمره ضنين
يرش هواه على الماشيين
و يتقاسمه مع الجايين

بحب الورد احب الورد
و اعشق ضحكته و انه
و احب الناس احب الناس
ما هم فيهم حاجات منه
و احبك ياللي احلامي في هواك زهزهوا و غنوا
يا بلدي ياللي و انا فيكي عيوني ليكي بيحنوا

بحب البحر
بحب الورد
احب الناس
و احب نعيشها احرار مرفوعين الراس
و لا تفرقنا لا الالوان و لا الاجناس
و ادوب في اذان يرفرف تحضنه اجراس

تعالوا نقيم لبكرة الجاي يا ناس قداس