العواف ياهل بحري..
جولوا يعافيك..
عكلمكم هنا ومعاود..
لحتة.. واه..
ربنا ميوريك..
أصل انتم حداكم هنا: أأباط..
وإحنا بتوع هناك: أجباط..
وإن كنت إبطي ولا جبطي..
ولا قرآني ولا شيعي..
ولا بهائي ولا ملحد ولا مصري..
يبجا..
ربنا ميوريك..
بس إحنا بيجومو معانا بواجب أجدع..
أصل إحنا ع الخريطة تحت..
يا مسؤولين نفسي مرة أطلع..
جالولي ربك خلجك تحت..
سبحانك يا ربي يالى..
خلجتني ع الخريطة تحت..
والنيل من تحت رجلي بيطلعلهم؟
ولا بينزل تحت!
أنا مش متنور بس عارف ربك..
عمره ما عيسيب اللى تحت تحت..
وأني جاي ف الجطر جابلوني..
شوية متنورين..
من حداكم هنا ف بحري..
جالولي وطنيين..
متبقاش طائفي ف كلامك..
واحنا معاك مضامنين..
سكت..
ماني مش فاهمهم ولا أعرف سلووكم..
فصابر..
جالولي متجولش جبطي..
جلت والله لانا جايل..
جالولي جول مواطن..
جلت هو انا طايل..
دا أنا من بتوع تحت..
وجاي مأمورية هنا فوج..
جاي أشكي عن جتيل من تحت..
يمكن سيدي مرة يفوج..
حكلولي جصة تانية غير جصتي..
عن أزمة مش أزمتي..
عن أزمة مواطن إتجتل من أخوه المواطن والإتنين ف بعض مواطنين..
سبحانكو ياهل بحري..
فين عجول المتنورين..
العلام لحس دماغهم..
كيف ساووه بالمجرمين..
هيه المساواه دي يا ربي عدلك؟
ولا ده عدل المثجفين!
العدالة دي مش بتاعتي..
دي إختصاص المسؤولين..
أني حيالله جاهل..
من بتوع تحت..
جاي للنور عندكم فوج..
جاي أشكي عن جتيل من تحت..
يمكن المتنور مرة يفوج..
إدليت محطة مصر..
جه عليا راجل سمين..
بجلابية زي حالتي..
بس بيضا من غير طين..
جه يعزيني ف جتيلي..
وجال إنه مشي ف جنازته..
ومد إيده جوه إيدي..
رحت حاضنه من حماسته..
وجوه حضنه..
شميت ريحته..
أفتكرته..
ريحة جتيلي لازقة فيه..
لازقة ف لسان ابتسامته..
مهما غسل وغسّل وعزى..
الريحة لازقة من وقت موته..
مش جنازته..
الروايح وإقتفاءها مش شغلتى..
دي من إختصاصات المعامل..
والمنابر..
والأزاهر الأفاضل..
وأنا حيالله كافر..
من بتوع تحت..
جاي عندكوا فوج..
جاى أنوح على جتيل من تحت..
يمكن اللى مش كافر مرة يفوج..
واني رايح المرقسية..
وجفوني ف الكمين..
ولما جالولي: بطاجتك..
جلت وجعة زي اطين..
لو عرفو مكان إقامتك..
ماهو أني من هناك..
من آخر بلاد المسلمين..
والبلاغ عن جتيلي..
عيضايج السادة المسؤولين..
هما هما المسؤولين..
هما الى نصبولي الكمين..
قلت أعمل فيها سائح..
رديت: Upper Egypt..
راجل جنبي فيا زاعج..
بالحنجورة الحيّانية..
مد إيده والله شاهد..
وراح مجلعني الدلابية..
راح ملبسني جضية..
بالتخاطر والتعامل..
مع الجهات الأجنبية..
قال إني مستقوي بـ: Egypt..
وقعد يعصر فيا عصر..
والله أنا غلبت أحايله..
إن Egypt هيه مصر..
فهموني ياهل Egypt..
ليه سيرتكم واطية تحت..
عشان بتنادوني Upper ..
وهنا عايزيني تحت؟؟
الديبلوماسية دي مش بتاعتي..
دي إختصاص الكبارات فى الوزارات الخارجية..
وأنا حيالة داخلي..
من ممتلكات العنابر والتخشيبات الداخلية..
يا حبيب العدل الداخلي يانا..
يانا يامة على بتوع تحت..
لما يعلوا حسهم ع لي فوج..
يجرسهم بتاع بره تحت..
وبتاع جوه ما بيفوج..
ويزيد ف فحت اللى تحت فحت..
سحبوني ع الجهاز..
والسبب جاهل وأمي..
قالولي متتذاكاش..
بعد ما جابوا سيرة أمي..
إحنا أذكى جهاز ف مصر..
والملف د ملف أمني..
وطلعولي محضر صلح..
عن جتيلي!! مضاه عمي..
إحنا أذكى.. فوج.. إصحى..
د الصعيدي الذكي: خيال علمي..
الخيال ده مش بتاعي..
لا ميراث أبويا ولا ورث أمي..
الخيال د إختصاص غباوه...
من أذكى جهاز أمني..
الخيال ده مش بتاعي..
دا إختصاص الروائيين..
اللى يبرز فيه مهارته..
هما السادة المسؤولين..
هما هما المسؤولين..
هما اللى نصبولي الكمين..
طب يا رب يا بيا عالم..
أروح لمين أشكي وأبكي..
كل يوم ألاقي ظالم..
في جتتي ينهش ويحكي..
عن عنصرين مصنع نسيج..
شطب بضاعته بدري بدري..
وأنا اتولدت متأخر جوي..
شطب نسيجه بدري بدري..
بغني وأزجل وأشعر..
ما أعرف مغنى ولا عديد..
وصراع جوايا يرقص
زى افتكار الميتين ف العيد..
وبجيت غريب الدار..
لابسني توب العار..
ساكن فى وطنى.. بالإيجار..
بعاني فرداني..
شياطيني لابساني..
ومصر قدامي.. مفارقاني..
صدجت يابن والدي..
بعد السوجارة اللف..
لما قلت عن أمّتنا:
أمة تدور وتلف..
تجيلة مش حتخف..
حماسية..
وحماسها بكتيره ساعة يجف..
أمة بتتخابِط..
أمة بتتعابط..
أمة ومالهاش لا زابط ولا رابط..
ولا كبير عيلة..
ولا قرابةْ دم..
وفكرة وهمية..
ما تورث إلاّ الهمّ..
ما تحل عنى يا عم..
إحنا ورثنا كلام..
إحنا تاريخنا كلام..
علشان كده مهما تقول..
علطول هاقول: وبكام؟
ما هو حب..!؟ دبرني..
وتاريخ..!؟ فكرني..
وطريق..!؟ نورني..
ومصير..!؟ بصرني..
ده أنا بقيت عربى من قبل ما ألقى اللى يمصرني..!!
أنا انتمائي لأمتي.. ممسخرنى..
كد ما ننورها.. هيه مضلمة..
كد ما نعلمها.. مش متعلمة..
يالى إنتي لا أمة، ولا أنتي أم..
فيه أم! متعرفش ساعة الألم.. تضم..!؟
وردة على جبين أجباط جنا
باسم الجنوبي
7 يناير 2010
