احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Friday, June 17, 2011

الحقيقة المرة هي ..... احلى بلد بلدي

الحقيقة هي اني من يوم ما وصلت مصر و انا في قمة احباط من اللي بشوفه و شفته

الحقيقة هي ان ولا الف ثورة ممكن تغير مصر للاحسن طول ما احنا زي ما احنا

طول ما احنا بنلم فلوس و لو جنية بحجة نبيض الرصيف و ندهن الشجر و سايبين الزبالة مالية الشوارع و الاركان و متناثرة بشكل فج و مقرف فوق الوصف

يبقى مافيش ثورة حصلت بجد

الحقيقة هي كول ما احنا لسه بنضرب مواعيد فشنك لصحابنا و بنعطل مشاوير الاخرين

يبقى مافيش ثورة حصلت بجد

الحقيقة هي طول ما احنا شايفين اننا لازم نكسر اي نظام فعمرنا ما حنفلح لانه اي تجمع يزيد عن شخصين لازم له تنظيم فما بالنا بشعب

طول ما احنا لسه بنطلسء كل شغلانة بنعملها و نكلفتها و نخليها "على الله" يبقى مافيش ثورة حصلت بجد

لما نكون بلد بيعتمد على السياحة كرابع مصدر دخل و نتحجج ان الثورة بوظتلنا السياحة دي بينما واقع الامر اني نزلت في فندقين و الاتنين لقيت فيهم صراصير

اي نعم صراصير

و غرفة مهتوك عرضها

و خدمة زي الزفت و مافيش حاجة بتمشي غير لما احط بقشيش

يبقى مافيش ثورة حصلت بجد

لما اخش على اي كافية فيقوم الجرسون يجيبلي ازازة مياة و يفرضها عليا قبل ما افتح بقي و يصبهالي ف يكاسة المياة يبقى مافيش اي ثورة حصلت بجد ولا الف ثورة تنفع معانا

مافيش اي حد مستعد يتعامل بمصداقية ولا حد ناوي يبنيها

و المشكلة اني سافرت في بلد اوروبي و يا رتني ما سافرت لاني اكتأبت بزيادة

طول ما احنا بنهلفت

بنطلسء اي حاجة في اي حتة

بنستهبل

مش صريحين في اي نوع خدمة بنقدمها ولا عاوزين نتقدم لقدام

طول ما احنا متكلين على اي عامل خارجي غير نابع من جوانا

طول ما كل العبر فينا و لسه بكل بجاحة نكتب داير ما يدور البلد ان احلى بلد هي بلدي بينما تملاها اكوام الزبالة كاننا عايشين في جبل زبالة عظيم مش بلد كبرى

و طول ما احنا بنعيشها فهلوة

فأهنؤا بثورة الفهلوة برضو

مبقاش في اي نظام نسقطه تاني غيرنا احنا

من نفسنا احنا

من جوانا احنا

فوقوا الله لا يسيئكم

محدش يقلي مصر احلى بلد

بس عاوزة حد يعلمني ازاي اخليها احلى بلد

وقتها نتكلم