احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Monday, March 31, 2008

عاجل و خطير و بجد فعلا يعني

ليه منضربش عن التدوين يوم 6 ابريل احنا كمان كمدونيين و كل المدونيين الصحفيين اللي بيشتغلوا في جرايد هما كمان ينشروا خبرعن الموضوع و بكده نكون اضفنا جبهة رفض تانية وزودنا كمية الشعور العام و كمان نبتدي الاضراب من قبلها بيوم
ليه؟؟
علشان الناس اللي بتفتح مدوناتنا يلحقوا ياخدوا خبر و يستعدوا لليوم ده
يمكن ممكن حد يقول انه مافيش اي ضرر حقيقي حيقع من جراء توقف المدونيين عن التدوين
لكن الفكرة هنا هي نشر الموضوع على اعلى نطاق
فكروا
و قرروا
و المهم
ننفذ و بسرعة
مش عاوزة لك لك لك كتير

شعرة معاوية ......لكم اكرهها

بداية اكره معاوية و نسبه و سلساله

لكن هذا ليس حديثي اليوم

فحديثي اليوم شخصي جدا من بعد طول غياب عن نفسي

قد تكون شعرة معاوية جيدة في بعض امور الحياة

كالمفاوضات من اول مفاوضاتي في السوق مع البائعين لتخفيض سعر البضاعة و نهاية بمفاوضات الاعداء حين يجلسون معا راسمين اغبى ضحكاتهم و اكثرهها دهاءا مفتعلين الصلح

قد تكون شعرة معاوية جيدة جدا و فعالة في ترغيب و ترهيب اشخاص حديثي العهد بالتدين او بدخولهم دين جديد

قد تكون شعرة معاوية فعالة جدا للمدرسة في فصلها حتى تتمم اعلى نوع ديموقراطية بناءة مع طالباتها بجانب وعيهم انه كما يوجد عقاب فانة يوجد ثواب

قد تكون شعرة معاوية جيدة في اوقات يصعب الاتيان بها بحدود فاصلة و واضحة وضوح الابيض من الاسود فيكون الرمادي هو سيد الموقف بلا منازع

لكن

ان تكون شعرة معاوية تلك اسلوب و طريقة متبعة عند البعض لقول ما يريدون قوله و من ثم التراجع عنه بعد ذلك عند اشتداد الضرائر؟؟

ان تكون هذة الشعرة ملاذا للمتجابنين عن قول الحق و عدم الخوف من الحياد عنه و التمسك به،

ان تكون هذه العشرة حجة من لا حجة له فيقلب علينا قوله

تارة نراه هكذا

و تارة اخرى على عكس هكذا الاولية

ان تكون هذة الشعرة اسلوب ممنهج حتى لا يصل اي طرف لاي نتيجة

فذلك غريب

و المخيف انه يصل بك الى حالة توهان لا تستطيع معها الاقرار بشئ لان الكلام المعسول غطى و ساح و فاض على البلاد

فلا تتمكن امام هذا السيل الجارف من فيضان المشاعر الا ان تقف عاجزا عن الاتيان باي حركة لان وقتها سوف تعتبر قليل الادب

اما ان تكون شعرة معاوية تلك طريقة ليستهين شخص بقلبك و يهين مشاعرك و يعقتد ان لديه السلطة الاعلى على مجرى سير الامور

فهذا ما لن اسمح به ابدا

"

لا يعرف العاشق الا المهانة

لا اختيار لديه

"

و انا اقول

صحيح ان العاشق يعرف المهانة في حبه و لا اختيار لديه و لكن هناك حدود

*

*

*

شعرة معاوية

تبا لكي

كما انه تبا لصاحبك فلم يردنا منه الا كل سوء


Friday, March 28, 2008

راؤول كاسترو يسمح بالنوبايلات

اولا اجهزة الميكروويف و الان اجهزة المحمول
انا مصدقتش لما قريت
الخبر ده



راؤول كاسترو: بامكان الكوبيين الحصول على تليفونات خيلوية
ويل فايسرت، اسوشيتد برس

اولا اجهزة الميكروييف و الان اجهزة التلفون المحمول. هل هذه كوبا الجديدة؟؟ ان راؤول كاسترو يعيد احياء جزيرة اخيه بشكل صغير لكن فعال. اخرها كان قانون صدر يوم الجمعة يسمح للناس العادية بالحصول على خدمة الهاتف المحمول، رفاهية كانت متوافرة للطبقة المختارة فقط .
حاليا البيروقراطية الشيوعية تحد من استخدام الانترنت و حتى تملك المنازل.

ده كان كلام ويل فايسرت من الاسوشيتد برس
من عندي حقول لا تعليق
تسلملي الشيوعية و زعماءها و انصارها و احفادها و كل اللي يتشدد لها و أنا و انت و الطم لي على وشي يا جدع منك له.

Thursday, March 27, 2008

احمد زكي.... ما تزال دموعي ساخنة


بصراحة مش عارفة اقول عنه ايه

اول مرة امسك نفسي متلبسة بحالة خرص تدويني و غير قادرة على التعبير عن نفسي

انا بقالي اسبوع بحاول اكتب عنه و كل ما اكتب حاجة الاقيها مش حتوصف اللي بحسه لما بشوف الفنان ده

عبقري اداء

وحش شاشة

حساس بشكل مريب

المعي الحركات

و مع ذلك انا مش بنقده او ان هنا محل نقد

لكن يعني انا معرفوش شخصيا

لكن حاسة اني اعرفه

او انه شخص بقابله كل يوم

و كل يوم بلاقي فيه حاجة جديدة

انا بجد لسه حزينة على وفاته

صحيح هي كانت رحمة ليه

لكن ساعات بحس انه مماتش او انه لسه عايش و بيمثل لكنه مستخبي و حيبان بعد كده

مؤكد ده من افلامه اللي لسه شغاله لكن حضوره قوي و طاغي


النهاردة شفت البرئ للمرة المليون يمكن

و لسه الفلم عندي كأني اول مرة اشوفه

طبعا ده مش فلمه الوحيد لكن اللي شفته النهاردة

بس دلوقتي اول ما بشوفله فلم

بحزن

بحس ان احنا ضاعت مننا حاجة و خلاص مش حترجع تاني

تقريبا كل اعماله كانت ناجحة و متنوعة و مشهودله بالكفاءة

لكن ده ميهمنيش

انا اللي يهمني

اني لسه مفتقداه


احمد زكي

مازالت دموعي ساخنة






Sunday, March 23, 2008

مهنة التدين حلال يا ردالة... اول القصيدة كفر


طالعتني جريدة الراية القطرية بتاريخ 22 مارس بكمية لا باس بها من اخبار من شانها خلق مرارة جديدة ليا و فقعها من اول و جديد
البداية كانت تخصيص صفحة بحالها للوصول لهدف معين الا و هو ان الاحتفال بالمولد النبوي الشريف باطل بطلان جوزاة عتريس من فؤادة، طيب أنا عندي سؤال ،ايه المانع اني احتفل بالمولد النبوي الشريف
ليه مكونش زي المسيحيين لما بيختفلوا بالكريسماس؟؟ فين النص القراني الصريح اللي بيحرم الاحتفال؟ طيب و فيها ايه لو الاحتفال ده تراث فاطمي يعني شيعي يعني مذهب من مذاهب الاسلام زيه زي السنة و الدروز الخ الخ
ليه ميكونش المذهب السلفي الوهابي هو اللي حرام من ساسه لراسه؟؟ و في الاخر يقولولك احنا بندعو للرحمة و الموعظة الحسنة؟ احب اعرف بتدعو في انه ياتجاه؟ فجر نفسك و ورح الجنة و نبقى بكده عملنا فيك معروف؟؟
الخبر هنا اهو


في نفس الجريدة لقيت خبر يعني اصابني بالسقم و التهاب جيوب انفية مزمن وعلى قد ما الخبر عنوانه يرفع الروح المعنوية الا ان محتواه اصابني بغمامة سودا زي بتاعت حرق الرز في اول الخريف
يعني و اخيرا حد فاق من النوم و قال انه لازم ننقي البخاري و مسلم من الخرافات اللي فيهم و مع ذلك اتفاجئ بتصريح عبدالباقي(حد يقلي مين ده ) علشان يقول التالي
"عبدالباقي شدد علي أنه لا يجوز الطعن في الصحيحين أو التشكيك فيهما، مرجحا أن يكون المحامي صاحب الدعوي من القرآنيين الذين يرفضون الأخذ بالسنة النبوية أو العمل بها.
"
يعني يا اطخه يا اكسر مخه
يا اما لازم نؤمن بالبخاري و المسلم يا اما نبقى قرانيين و الغريب ان دلوقتي كل شيخ من دول بقى يستخدم لفظ قرانيين كانها مسبة او اهانة للشخص اللي يقولك أنا مش بتبع غير القران، الله يعني القران بقى وحش يا ناس و بشهادة الشيوخ نفسهم و لا ايه؟؟
الله؟؟
امتى الناس حتفوق بقى من الغباء الازلي ده؟؟ يعني عبدالباقي ده يقولك لا يجوز الطعن في الصحيحين لكن اللي يتمسكوا بالقران يبقوا عيبة و كخة؟؟
انهي منطق ده اللي بيتبعوه في الازهر؟؟ أنا بجد مزبهلة؟؟ مسمعتش عن بجاحة و قلة ذوق بالمنظر دي و من امتى بقينا نقسم و نفصل ونقول قرانيين؟؟ خلاص خلتوهم ملة و مذهب بروحه؟؟
والله اشرفلي يتقال عني قرانية و لا انيش يتقال عني بخارية و لا مسلمية و لا يا عالم حيطلعولنا بايه بعد كام سنة
اصل ممكن كل كتب عمرو خالد و عبدالكافي و القرني تبقى مراجع لا يجوز المساس بيها و ينتهي بيا الامر و اكون قرنية او بازية او عثمنلية و القائمة تطول يعني
و المصيبة التانية ان السنة النبوية مطالبناش بيها سيدنا محمد او باتباعها، هي كانت حاجات سيدنا محمد بيعملها لنفسه ، هو عاوز يعمل كده، لا فرضها على حد و لا قال لحد عليها، و ابسط مثال عليها صلاة التروايح.
و المشكلة الحقيقية ان فعلا الصحيحين فيهم قصص لو فعلا قراها أي انسان بيفكر بعقله مش بجزمته حيلاقي فيها بلاوي و في الاخر نقول الغرب جاب الحاجات دي منين. طيب يعني المسلمين عاوزين يتبعوا صحيحين اراهن ان الكثيرين مقروهومش عن بكرة ابيهمو لما يطلع ان الكتابين مليانيين حاجات غريبة ما انزل الله بها من سلطان نفضل برضو نتبعهم؟؟ و نتضايق اوي لو حد اتهمنا بعد كده بحاجة وحشة؟؟؟
و نزود فوق كل ده ان اللي بيتبعوا القران كنص مستقرين على اصله يبقى كمان دي عيبة؟؟؟
و ادي كمان خبر


واما اخر بوكس كان جامد اوي لكنه يفرح، ليه؟ علشان ينطبق عليه مقولة و شهد شاهد من اهلها
د. صفوت حجازي : الدعوة الى الله مهنة كأي مهنة اخرى لها اجر، يعني يتكتب له في البطاقة داعي بس لايه بالظبط مش عارفة
د. محمد شامة: التجارة في الدعوة الاسلامية غير مقبولة شرعا ، ارجو انه يكون بيقول كده علشان فعلا مقتنع مش علشان مش نايبه من الحب جانب
د. زغلول النجار: ما المانع ان ياخذوا اجر عملهم ، معلش هو قصده يقول احنا عاوزين نسترزق على قفا الهبل، نفضل نشرحلكوا القران و متشغلوش مخكوا و ناخد كمان فلوس على كده و هنا مقدرش اقول غير زي ابو الليل يا اخي ا7ا
خالد الجندي: لماذا لا يعترض احد على ملايين الراقصات و لاعبي كرة القدم؟؟ يسلم فمك يا استاذ نفيسة ، اعترفت انك زيك زي لاعبين الكرة و راقصات هز الخصور؟؟
و ادي خبرهم روح لصفحة 35


الاخوة الدعاة شايفين انه عادي اوي يتربحوا من الدين و الرقاص الجندي بيقول و فيها ايه لمنا نتربح منه زي لاعبين الكرة و الرقصات، يعني شهد شاهد من اهلها و بالذات خالد الجندي دلوقتي فيه كلام عليه في جريدة الفجر انه بيشتغل في غسيل الاموال و كمان برنامج القاهرة اليوم جايب سيرة الموضوع مع ان عمرو اديب بيقول ان خالد صديقه،
شئ ظريف جدا.
يا ريت الحقيقة متتخفيش و نعرف اذا كان الموضوع ده صح و لا غلط

و بكده
بعد قراية الاخبار دي ورا بعضها اكتشفت الاتي
1-ان الصحيحين اهم من القران و ان كلمة قرانيين دي كلمة مش كويسة و كيسكليا خالص
2- ان المتاجرة بالدين حلال و ده بشهادة اهل الكار و الفرح بنفسهم
3- انه بكرة حتطلع علينا فتوة تبيح غسيل الاموال القذرة اللي بتيجي عن طريق المتاجرة بالمخدرات و الاعضاء البشرية و بيع الاطفال في سوق النخاسة و لزواج المتعة و القيان و صفقات بيع السلاح و ما خفي كان اوسخ
4- أنا من بكرة لازم احول داعية او اني اقبل اشتغل مع رسايل ابراهيم زونجو و ملكة قبيلة خزعبلات اللي بتجيلي يوميا من نيجيريا و الكاميرون الشقيقة و اغسل معاهم اموال و اعيش بقى و اقب على راي هنيدي

ونهاية اقول
جتكم القرف مليتوا القنوات
و خربتوا عقول الشباب و ضحكتوا على دقون خلق ربنا
كفاية بقى
عيب
عيب
عيب

Friday, March 14, 2008

احلى مشهد رومانسي

يمكن مافيش بنت الا وشافت الفلم ده و سواء كانت بنت من جيلي و اكبر او بنت من جيل اصغر مننا
مؤكد شافت الفلم ده مرة و اتنين و عشرة
الفلم كله لذيذ بسيط و بتتحرك احداثه بسرعة فهمت منه ان فعلا ممكن تكون فيه صداقة بين بنت و ولد من غير ما الحب يبوظها و فهمت منه اني ممكن اتجوز واحد يكون بيحبني لكن حتفضل حتة في قلبه ملك بنت كان حبها زمان او صديقة مفضلة ليه
لكن مقتنعتش اوي لاني بطبعي بحب التملك و الانفرادية
المهم
الفلم ده مستعدة اشوفه كل مرة يتعرض على اي قناة
و مستعدة اشتريه بس الاقيه
و مستعدة اقول فيه ابيات شعر لو بقدر انظم شعر
لكن للاسف
مش بعرف
المهم تاني
بحب الفلم ده جدا جدا
و الفلم كله كوم و المشهد التالي كله كوم
وصفي في منتهى البذاءة لكن مش لاقيه كلمات توصفه صح
في رايي
انه من احلى المشاهد الرومانسية و في تقييمي الشخصي الاول و يمكن الاخير
مشهد بسيط
حقيقي
واقعي
و انفعاله هادي بس سريع
يعني زي ما المية بتكون بتجري من تحت تبن
الموسيقى تجنن
الشمس وهي ضاربة في وش جوليا روربتس
دموعها السخنين على خدها
احساس صديقها بيها
و بالذات الحتة اللي بيرقصوا فيها مع بعض و مع انهم في مكان زحمة لكن بحس كأنه زي الناس كلها في عالم و هما في عالم تاني خالص
يعني كانت فيه مومينتم خطيرة هنا
مش عارفة اقول ايه و لا ايه
الاخراج
القصة
التمثيل
البساطة
الفلم كله حلو
لكن بالنسبة لي حلاوته كلها مختزلة ليا في المشهد ده و بس
طبعا عرفتوا انا بتكلم عن انهي فلم؟؟

Monday, March 10, 2008

dedicated to extra Intelligent hammas

تحذير
الفيديو انا مش مسؤولة عن اي من محتوياته لذلك محدش يقلي مكنش حقك والخ الخ وانصح اي مشاهد حساس بعدم الفرجة لوجود مشهد قتل صارخ في نص الفيديو اي نعم هو يدوبك كام ثانية لكن اديني حذرت

اللي قلبه جامد يتفرج
اللي قلبه على قده ميخاطرش
و اللي اعصابه بتبوظ بسرعة زي يتحسبن عند ربنا

حماس حبيبتي
اليكي اهدي اروع ما قيل في الحروب سواء مدنية ام عالمية
اشوف فيك يوم ياللي فبالي





"what we've got here is failure to communicate, some man you just can't reach, so you get what we had here last week, which is the way he wants it, well.... he gets it. i don't like that anymore."


"ما يوجد لدينا هوفشل التواصل، بعض الرجال لا يمكنك الوصول اليهم، فتحصل على ما وجدناه الاسبوع الفائت، و هو ما اراده، حسنا، و هو ما يحصل عليه، اصبحت لا احب ذلك اطلاقا"

" my hands are tight"

"when everybody is fighting for the promised land"

"i don't need your civil war"

"look at the blood you are spilling"

"look at the leaders we follow"

"it feeds the rich and burries the poor"

"i don't need one more war"

.

.

.

.

.

now the extra super question i have ever seen in my whole life:

"what so civil about war anyway??"

ما هو المتحضر في الحرب اساسا؟؟

لان كلمة civil

لها معنيين واحد بمعنى مدني و التاني بمعنة متمدن او حضاري

فلعب على المعنى و سال سؤاله الجبار

Guns and roses, i still salute you, since 17 years i am.

peace

Sunday, March 9, 2008

لأن الأرض كانت لنا يوما ما

لأيماني بتفوق المرأة في عدة اشياء على الرجل
تتفوق في تحملها للالم
تتفوق في قدرتها على الصبر و المرار
تتفوق في ابداعها و نظرتها الحياتية الثاقبة
تتفوق لاحسيسها التي نادرا ما اخطأت فيها
تتفوق لاحساسها العالي
تتفوق لنظرتها الحانية التي في لحظة تغير امور لعواكسها
و لان الارض كانت لنا
فكنا سعيدات
هانئات
حوريات و حريات بفتح الحاء
لأن اضافة الميم و التاء و تكرار حرف الراء تظهر ان الحرية اعطيت لنا مع انها خلقت معنا
و كنا قويات
قويات العزيمة و البأس و الحنكة
و لأن الارض كانت لنا فكانت هي جنة الله في ارضه و هي مختلفة عن تلك التي في سماءه
هل كان ينقصنا شئ؟؟
ربما
فنزل علينا ادم
امنا به لاننا مؤمنات
صدقناه لاننا مصدقات
و احببناه لاننا انثيات
و لكن للاسف عبدناه لاننا كنا مغفلات
و لانه لم يخلق للعبادة فتكبر علينا و تمخطر
و سكتنا له فتذمر
و ابدينا الضعف فتبطر
و قلب ارضنا ملهى له واستكبر
و صبرنا عله يرجع لعهده الاول فلم يتوقف
و لانه يوم المرأة فيجب التذكير بان الارض كانت لنا و انت يا ادم كنت ضيفا
لكنها حكمة الله و بسط نفوذك على اهل الدار
انت من تذمر
انت من اشتاق لحواء
و كم كانت حواء كريمة لك
فرحة بك
سيدي ادم
هذا اليوم يومنا
و المفروض ان كل يوم هو لنا
و لكننا اندثرنا تحت طيات ما يسمى حياء الانثى و دلالها
فهل اخطأنا؟؟
سيدي ادم
الارض لنا و السماء لك
فاحمد الله على نعمة التي لا تحصى و نحن اولها
فلا جنة الا بنا
و لكننا لسنا حور اعينك
لكن الارض كانت لنا يوما ما و كنا سعداء بها من دونك
عذرا صديقي لكنها الحقيقة

Tuesday, March 4, 2008

معا امام الله


لأني مؤمنة انه فيه أمل (تخيلوا لسه فيه شوية فاضلين) فقررت المشاركة(جالي امر من رامز بكده) في مبادرة معا امام الله

بصراحة مكنتش عارفة اكتب ايه بالظبط، يعني بانهي اسلوب او ازاي؟

هل اكتب قصة ذات دلالة؟ ولا احكي عن مواقف بتعدي عليا يوماتي و تتنوع ما بين تشدد مسلمين ضد مسيحيين و لا العكس و لا المواقف التانية اللي بيتكاتفوا فيها الاتنين و يبقى احلى من كده مافيش

احترت لكن محبتش اغلط غلطة هاملت و اخلي حيرتي و ترددي يفوتوا عليا فرصة المشاركة في الوقت الصحيح

معنديش اي حاجة اقولها غير ان نفسي فعلا الحكاية دي تنجح و الواحد يبقى عايش من غير ما يضطر يحمل هم حاجة مكنتش موجودة و لا كان لها اثر في مجتمعنا قبل كده

نفسي نتعامل مع بعض جوا مصر بكل سلاسلة و طبيعية

الغريب ان احنا بنعامل الاجانب بشكل كويس جدا و بنحترمهم هما او حتى اي حد غريب

لكن بنيجي عند المسيحيين " بتوعنا" يعني اهلنا من مصر و نتشدد طيب ليه؟؟

يعني زميلة او قريبة مترضاش تاكل من ايد او بيت مسيحيين زملاءنا في الشغل بحجة انها متضمنش هي حطت ايه و لانها مسمتش على الاكل، طيب و الاكل اللي بناكله في المطاعم بره ايش ضمنكوا هو محطوط فيه ايه؟؟ و ايش ضمنكوا ديانة الطباخ ايه؟؟ و لا حنخش لكل مطعم و نقله وريني البطاقة الشخصية بتاعت الطباخين اللي عندك؟؟

طيب ما فيه مسلمين ياما و مش بيتبعوا اي اسلوب نضافة و لا ليهم بيها علاقة؟؟ازدواجية المعايير هي اللي تعبانا

اصلا و انا بكتب الكلام ده دلوقتي محتارة ، فضلت افكر كتير في كل كلمة مكتوبة و كل شوية اكلم نفسي و اقول، لو كتبت دي فلان حيزعل مني، و لا فلانة تعتبرها قلة ادب، طيب لو هزرت شوية من باب التخفيف عن نفسي اولا و من باب تخفيف الموضوع على القارئ، هل حيعتبرني حد اني بستهبل في موضوع جد و لا ايه بالظبط؟؟

حتى الكلام في الموضوع الواحد خايف انه يغلط بكملة او بحرف ممكن يزعل منه اهله و صحابه

لكن

ارجو ان احنا، و اعني بها المسلمين و المسيحيين معا، ان نتوخى الحيادية، مش حلاقي مثال احسن من اللي ذكرته ماريان في القهوة العالية

و مش حلاقي تشبيه احلى من اللي وصفه اخر الحارة

ولا القصص اللي حكاها ابن عبدالعزيز و البقية طبعا انتوا عارفينها
هاني انتوك و عباس العبد

بالمختصر

عاوزة استريح من الهم ده

ارجوكوا

و على ذكر البطاقة الشخصية و ازدواجية المعايير اتفضلوا الموضوع ده
تحديييييث
لقد نسيت ان احط لنكات الاستبيان و انا اقول ايه اللي ناقص
اذا مسلم دوس هنا
اذا مسيحي دوس هنا

Saturday, March 1, 2008

و مازال الثور حمارا

بينما يحدث هذا فيؤدي لهذا
يظل المستحمر بامر الغباءيردد كلاما كهذا
"

حماس: أي مساس بهنية سيفتح أبواب جهنم على العدو الصهيوني

وكالات:
أكدت مصادر سياسية فلسطينية رفيعة المستوى في غزة، أنّ رئيس الوزراء الفلسطيني في حكومة تسيير الأعمال الشرعية إسماعيل هنية، لم تصبه الغارة الصهيونية التي استهدفت مركزاً للشرطة في منطقة مخيم الشاطئ بغزة بأي أذى.
وأوضح أمين سر كتلة حماس في المجلس التشريعي الفلسطيني، مشير المصري، في تصريحات صحفية "أنّ الغارة الصهيونية استهدفت مركزاً للشرطة في منطقة مخيم الشاطئ التي يقطنها رئيس الوزراء إسماعيل هنية.
وحذر المصري من أنّ أي مساس بهنية سيكون نقلة نوعية في الصراع الفلسطيني ـ الصهيوني ، وقال "أي اقتراب من رئيس الوزراء إسماعيل هنية هو لعب بالنار، وهو تجاوز لكل الخطوط الحمراء، وسيفتح العدو الصهيوني على نفسه أبواب جهنم إن هو ألحق أي أذى برئيس الوزراء اسماعيل هنية، لأنّ طبيعة الصراع وقتها ستختلف تماماً وتخلق حربا جديدة غير مسبوقة
"
يعني هنية و بمنتهى البساطة بيقول ان شاء الله الشعب الفلسطيني المنهار كله يموت و ماله، فدايا ، انا صامد لاني محصن و حفضل كده كده موجود و الى ان تجف اخر قطرة دم في جسد اخر فلسطيني عايش فيكي يا غزة و ان شاء الله اكمل على الباقي
فرق ايه الاخ عن اي نظام فاشيستي متطرف، مش عارفة؟
ايش يخيره عن ستالين و لينين و ناصر و كل الانظمة الفاسدة اللي ودت شعبها حروب و موتتهم من الجوع و الفقر و القتل، مش عارفة؟؟
ليه مش راضي يعترف ان اللي انتخبوه خلاص مش عاوزينه، مش قادرة ؟
و مش عارفة ازاي هو مش واخد باله انه غير قادر على مسؤوليات حكم دولة، هو بكتيرة يحارب الحارة اللي جنبهم و بس خلاص
عجبي
عجبي
و المثل زمان قال
مالو عاجبك ، علي حواجبك
و مش عارفة ليه لما قريت لاخبر افتكرت نكتة الفار السكران اللي جه يتخانق مع اسد فقال سيبوني عليه اربيه
*********************
نص الكلام وصلني من
الفجر الباسم قادم صاحب مدونة انسى عن طريق مجموعة المصريين
و كنت فاكرة اني لقيت رابط فيه نص كلامه لكن معرفتش اتوصل ليه تاني
اللي يلاقي رابط كدليل على كلام هنيه يا ريت يوافيني بيه
بس بما ان العضو الفجر الباسم جايبه و بيتكلم بيه من وجهة نظر ايجابيه تدل على الصمود الرائع لقائد شعب بتتم ابادته
فحعتبر ده دليل كافي انه قال الكلام ده فعلا
تحديث
في يونيو كنت قد كتبت الكلام ده
يا ريت يا ليوناردو توضحلك فكرتي

الى متى الحزن و البكاء؟؟؟

الى متى الحزن و البكاء؟!!؟؟
و لماذا الدهشة ؟؟
اما عن الخيانة فحدث و لا حرج
فهي الموضة الا من رحم ربي
الى متى الطعن في الظهور؟؟
الى متى الجبن و الغبور؟؟
متى سوف ينجلي هذا الرياء
متى تسمعني السماء؟؟
الى متى الحزن و البكاء.؟؟؟
الى متى متى السكون و الخواء؟؟
الى متى الضعف و الموت للفقراء؟؟
فقراء الحيل بيض السرائر و القلوب الحانيات
الى متى الخديعة الوهماء
الى متى الحزن و البكاء
متى؟
فقط متى و من ثم انا كفيلة بالصبر
فقط قولوا لي متى الانتهاء
لست ايوب او سارة او حتى من الاولياء
لكن مؤكد انا من سلسلة موسى كثير الغضب صادق الطعنات
الى متى الحزن و البكاء؟؟