بصراحة مش عارفة اقول عنه ايه
اول مرة امسك نفسي متلبسة بحالة خرص تدويني و غير قادرة على التعبير عن نفسي
انا بقالي اسبوع بحاول اكتب عنه و كل ما اكتب حاجة الاقيها مش حتوصف اللي بحسه لما بشوف الفنان ده
عبقري اداء
وحش شاشة
حساس بشكل مريب
المعي الحركات
و مع ذلك انا مش بنقده او ان هنا محل نقد
لكن يعني انا معرفوش شخصيا
لكن حاسة اني اعرفه
او انه شخص بقابله كل يوم
و كل يوم بلاقي فيه حاجة جديدة
انا بجد لسه حزينة على وفاته
صحيح هي كانت رحمة ليه
لكن ساعات بحس انه مماتش او انه لسه عايش و بيمثل لكنه مستخبي و حيبان بعد كده
مؤكد ده من افلامه اللي لسه شغاله لكن حضوره قوي و طاغي
النهاردة شفت البرئ للمرة المليون يمكن
و لسه الفلم عندي كأني اول مرة اشوفه
طبعا ده مش فلمه الوحيد لكن اللي شفته النهاردة
بس دلوقتي اول ما بشوفله فلم
بحزن
بحس ان احنا ضاعت مننا حاجة و خلاص مش حترجع تاني
تقريبا كل اعماله كانت ناجحة و متنوعة و مشهودله بالكفاءة
لكن ده ميهمنيش
انا اللي يهمني
اني لسه مفتقداه
احمد زكي
مازالت دموعي ساخنة
15 comments:
فقط هو احمد زكي
قد ايه بعشقه ممثل حساس غير طبيعي
يكفي اني اقول انه من 3 شخصيات حلمت اني اقابلهم و اتبادل طرف الحديث معاه
ربنا يرحمه اقريله الفاتحه ارجوك
يساري مصري
الله يرحمه الف رحمة
حاضر حقراله الفاتحة مرتين
مرة ليا و مرة بالنيابة عنك
بس فكرك تكون مقبولة؟؟؟
:D
بهزر
متزعلش
الله يرحمة كان فذ ودموعنا لا تزال حاره لأنها لم تجد من يكفكفها
ياحفصه الى بيحب احمد زكى اكيد بيحب محمد منير وبيحب الريحانى وام كلثوم وسيد درويش وعبد الحليم وفوزى وبيحب الشوارع والقهاوى والقعده عالكورنيش وبيحب وشوش البشر الطيبه..بيحب ياكل درة مع حبيته عالكورنيش واللمه مع اصحابه فى اى مكان ..انا بستنى فيلم هيستريا عشان الاغنيه الى بيغنيها احمد زكى : ان ماقدرتش تضحك ..ماتدمعش ولا تبكيش
وان مافضلش معاك غير قلبك اوعى تخاف مش هاتموت هاتعيش
وان سالوك الناس عن ضى ..جوة عيونك مابيلمعش
قلهم العيب مش فيا .. العيب فى الضي
وانا مش عاشق ضلمه ولا زعلت الضى
مسير الضى لوحد هايلمع ..مسير الضحك لوحده هايطلع ..مبيجرحش ولا يأذيش
رحم الله احمد زكى ( البريئ )
الله يرحمه
أنا بحسه زي أل باتشينو ودي نيرو وهوبكينز والناس دي
ميقلش حاجة عنهم خالص
كان ممثل عتويل فعلا
طبعا موته كان محزن جدا
بس ده ميمنعش إن احنا نحمد ربنا ان هو عمل كمية الأفلام العظيمة اللي عملها دي كلها يعني قدم اللي يخلليه عايش على طول
أنا بحبله أرض الخوف جداااااا
طبعا هو درة داوود عبد السيد بس ده ميمنعش إن أحمد زكي كان مبدع فيه جدا
:)))
عارفين ايه اكتر حاجة فرحتني دلوقتي في ردودكوا بالرغم من حزني عليه؟؟
هي ان كل واحد فينا له خلفية مختلفة عن التاني
من اول الخلفية الدينية للاجتماعية للسياسية لكل حاجة
بس
اجتمعنا كلنا على حبه
شفتوا الانسان ده قد ايه كويس لدرجة انه موحدنا على راي حتى و هو ميت؟؟
الله يرحمه...إحنا خسرناه..و إستغليناه لآخر لحظة
فعلا هو في كل دور من ادواره اختاره بعنايه و جسده ببراعه حقيقيه
حتي كانه صايع في الدور الصايع و رجل اعمال حقيقي و صعيدي حقيقي و فلاح حقيقي و اب حقيقي و مجرم حقيقي و عالم حقيقي و جاهل حقيقي
كل دور عمله كانه فعلا عاش كل هذه الحيوات كي يتمكن من ادواره
انا بحب البيضه و الحجر جدا
و كمان شفت له فيلم شادر السمك من يومين كان اسمه فيه احمد ابو كامل
و كان محتكر تجارة السمك في الشادر يرفع السعر علي كيفه و ينزله علي كيفه و في النهايه قفل ابواب الرزق علي غيره لكنهم فتحوا النار عليه بصوره جماعيه و قتلوه و بعدها ابوابهم فتحت من جديد
اشاره ذكية جدا من المخرج علاء عبد الخالق عن الحل الوحيد مع امثال عز و غيره
بجد الله يرحمه
متهيألى انه حاله نادره صعب انها تتعوض
انسان وفنان حقيقى
استعجب لما افتكر انه حاول الانتحار لما اترفض دخوله معهد الفنون المسرحيه
ست مرات.. وكان برضه مصمم
اول دور اخده كان فى مسرحية هاللو شلبى وكان طالع بدور جارسون
متهيألى المعاناه دى هى اللى خلقت جواه
قوه لا معقولهمش زى البعض اللى جتلهم على الجاهز وعلى طبق من دهب
مره حد قالى ان الواحد لما بيفتكر حد ميت بيبقى طالب منه انه يترحم عليه
واعتقد ان احمد زكى بعتلك الرساله دى وطالب منك انك واننا كلنا ندعيله ونترحم عليه
يارب ارحمه يارب واسكنه فسيح جناتك
امين
أرض الخوف...شاهدته يمكن ١٠ مرات..كان أحمد ذكى فيه لايقل عن مستوى أل باتشينو فى التمثيل بأى حال من اﻷحوال..كان وصل القمه..
فعلا الله يرحمه
..حفصه..
خللى الفاتحه ٣ مرات.
واحده من عندى أنا كمان..ربنا حيقبلها منك أنت
..أنا..؟؟
الله أعلم..تحياتى..خالد
ممثل خرافي فعلا
في فيلم الأمبراطور الذي هو نسخه عن فيلم scare face
بتاع أل باتشينو له مشاهد مثلها أحسن من أل باتشينو نفسهفعلا كمان ممثل معجز
ولن يعوض أبدا
تحياتي
وأمسحي دموعك يا حفصه
اشكر الجميع للحضور و المواساة
لا احزنكم الله في حبيب لديكم
نعم الممثل الفنان كان
ربنا يرحمه ان شاء الله
تحياتي لكل من عزاني او بعت برقية
صفصف
مش حاقول اكتر من اللى قلتيه او قاله اللى قبلي فى التعليقات
بس اللى محزن فعلا اننا معندناش اى بوادر او اشارات لممثل يعوض الفراغ اللى سابه احمد
شفت لمحه فى محمود عبدالمغنى لكن راحت فى فيلم الشبح
عندى امل فى باسم السمره
بس بالتاكيد مفيش حد بيكون بديل لحد لكن باسم السمره ممكن يعمل حاجه
نيسو
عزاكي متاخر حبتين مع انك كنتي معايا من يوم ما كنت بحضر الصوان
حمشيها المرة دي بما اني في حالة ضعف حزني على الفقيد
بالنسبة لي اللي يجيي في الترتيب بعد زكي هو محمود عبد العزيز
ثم يحيي الفخراني
و حاليا خالد الصاوي و خالد صالح
عتاولة بجد
يتخاف منهم جدا
و نفرح احنا بيهم اوي
تحياتي
انا بموت في احمد زكي
الله يرحمه ويغمد روحه الجنه
انسان عبقري ومتفاني واستثنائي
أشكرك انك ذكريتنا بهذا العملاق
Post a Comment