احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Sunday, March 23, 2008

مهنة التدين حلال يا ردالة... اول القصيدة كفر


طالعتني جريدة الراية القطرية بتاريخ 22 مارس بكمية لا باس بها من اخبار من شانها خلق مرارة جديدة ليا و فقعها من اول و جديد
البداية كانت تخصيص صفحة بحالها للوصول لهدف معين الا و هو ان الاحتفال بالمولد النبوي الشريف باطل بطلان جوزاة عتريس من فؤادة، طيب أنا عندي سؤال ،ايه المانع اني احتفل بالمولد النبوي الشريف
ليه مكونش زي المسيحيين لما بيختفلوا بالكريسماس؟؟ فين النص القراني الصريح اللي بيحرم الاحتفال؟ طيب و فيها ايه لو الاحتفال ده تراث فاطمي يعني شيعي يعني مذهب من مذاهب الاسلام زيه زي السنة و الدروز الخ الخ
ليه ميكونش المذهب السلفي الوهابي هو اللي حرام من ساسه لراسه؟؟ و في الاخر يقولولك احنا بندعو للرحمة و الموعظة الحسنة؟ احب اعرف بتدعو في انه ياتجاه؟ فجر نفسك و ورح الجنة و نبقى بكده عملنا فيك معروف؟؟
الخبر هنا اهو


في نفس الجريدة لقيت خبر يعني اصابني بالسقم و التهاب جيوب انفية مزمن وعلى قد ما الخبر عنوانه يرفع الروح المعنوية الا ان محتواه اصابني بغمامة سودا زي بتاعت حرق الرز في اول الخريف
يعني و اخيرا حد فاق من النوم و قال انه لازم ننقي البخاري و مسلم من الخرافات اللي فيهم و مع ذلك اتفاجئ بتصريح عبدالباقي(حد يقلي مين ده ) علشان يقول التالي
"عبدالباقي شدد علي أنه لا يجوز الطعن في الصحيحين أو التشكيك فيهما، مرجحا أن يكون المحامي صاحب الدعوي من القرآنيين الذين يرفضون الأخذ بالسنة النبوية أو العمل بها.
"
يعني يا اطخه يا اكسر مخه
يا اما لازم نؤمن بالبخاري و المسلم يا اما نبقى قرانيين و الغريب ان دلوقتي كل شيخ من دول بقى يستخدم لفظ قرانيين كانها مسبة او اهانة للشخص اللي يقولك أنا مش بتبع غير القران، الله يعني القران بقى وحش يا ناس و بشهادة الشيوخ نفسهم و لا ايه؟؟
الله؟؟
امتى الناس حتفوق بقى من الغباء الازلي ده؟؟ يعني عبدالباقي ده يقولك لا يجوز الطعن في الصحيحين لكن اللي يتمسكوا بالقران يبقوا عيبة و كخة؟؟
انهي منطق ده اللي بيتبعوه في الازهر؟؟ أنا بجد مزبهلة؟؟ مسمعتش عن بجاحة و قلة ذوق بالمنظر دي و من امتى بقينا نقسم و نفصل ونقول قرانيين؟؟ خلاص خلتوهم ملة و مذهب بروحه؟؟
والله اشرفلي يتقال عني قرانية و لا انيش يتقال عني بخارية و لا مسلمية و لا يا عالم حيطلعولنا بايه بعد كام سنة
اصل ممكن كل كتب عمرو خالد و عبدالكافي و القرني تبقى مراجع لا يجوز المساس بيها و ينتهي بيا الامر و اكون قرنية او بازية او عثمنلية و القائمة تطول يعني
و المصيبة التانية ان السنة النبوية مطالبناش بيها سيدنا محمد او باتباعها، هي كانت حاجات سيدنا محمد بيعملها لنفسه ، هو عاوز يعمل كده، لا فرضها على حد و لا قال لحد عليها، و ابسط مثال عليها صلاة التروايح.
و المشكلة الحقيقية ان فعلا الصحيحين فيهم قصص لو فعلا قراها أي انسان بيفكر بعقله مش بجزمته حيلاقي فيها بلاوي و في الاخر نقول الغرب جاب الحاجات دي منين. طيب يعني المسلمين عاوزين يتبعوا صحيحين اراهن ان الكثيرين مقروهومش عن بكرة ابيهمو لما يطلع ان الكتابين مليانيين حاجات غريبة ما انزل الله بها من سلطان نفضل برضو نتبعهم؟؟ و نتضايق اوي لو حد اتهمنا بعد كده بحاجة وحشة؟؟؟
و نزود فوق كل ده ان اللي بيتبعوا القران كنص مستقرين على اصله يبقى كمان دي عيبة؟؟؟
و ادي كمان خبر


واما اخر بوكس كان جامد اوي لكنه يفرح، ليه؟ علشان ينطبق عليه مقولة و شهد شاهد من اهلها
د. صفوت حجازي : الدعوة الى الله مهنة كأي مهنة اخرى لها اجر، يعني يتكتب له في البطاقة داعي بس لايه بالظبط مش عارفة
د. محمد شامة: التجارة في الدعوة الاسلامية غير مقبولة شرعا ، ارجو انه يكون بيقول كده علشان فعلا مقتنع مش علشان مش نايبه من الحب جانب
د. زغلول النجار: ما المانع ان ياخذوا اجر عملهم ، معلش هو قصده يقول احنا عاوزين نسترزق على قفا الهبل، نفضل نشرحلكوا القران و متشغلوش مخكوا و ناخد كمان فلوس على كده و هنا مقدرش اقول غير زي ابو الليل يا اخي ا7ا
خالد الجندي: لماذا لا يعترض احد على ملايين الراقصات و لاعبي كرة القدم؟؟ يسلم فمك يا استاذ نفيسة ، اعترفت انك زيك زي لاعبين الكرة و راقصات هز الخصور؟؟
و ادي خبرهم روح لصفحة 35


الاخوة الدعاة شايفين انه عادي اوي يتربحوا من الدين و الرقاص الجندي بيقول و فيها ايه لمنا نتربح منه زي لاعبين الكرة و الرقصات، يعني شهد شاهد من اهلها و بالذات خالد الجندي دلوقتي فيه كلام عليه في جريدة الفجر انه بيشتغل في غسيل الاموال و كمان برنامج القاهرة اليوم جايب سيرة الموضوع مع ان عمرو اديب بيقول ان خالد صديقه،
شئ ظريف جدا.
يا ريت الحقيقة متتخفيش و نعرف اذا كان الموضوع ده صح و لا غلط

و بكده
بعد قراية الاخبار دي ورا بعضها اكتشفت الاتي
1-ان الصحيحين اهم من القران و ان كلمة قرانيين دي كلمة مش كويسة و كيسكليا خالص
2- ان المتاجرة بالدين حلال و ده بشهادة اهل الكار و الفرح بنفسهم
3- انه بكرة حتطلع علينا فتوة تبيح غسيل الاموال القذرة اللي بتيجي عن طريق المتاجرة بالمخدرات و الاعضاء البشرية و بيع الاطفال في سوق النخاسة و لزواج المتعة و القيان و صفقات بيع السلاح و ما خفي كان اوسخ
4- أنا من بكرة لازم احول داعية او اني اقبل اشتغل مع رسايل ابراهيم زونجو و ملكة قبيلة خزعبلات اللي بتجيلي يوميا من نيجيريا و الكاميرون الشقيقة و اغسل معاهم اموال و اعيش بقى و اقب على راي هنيدي

ونهاية اقول
جتكم القرف مليتوا القنوات
و خربتوا عقول الشباب و ضحكتوا على دقون خلق ربنا
كفاية بقى
عيب
عيب
عيب

51 comments:

بنت القمر said...

http://bntalkamar.blogspot.com/2007/11/blog-post_09.html
اقري الرابط ده
القرآنين من منكري السنه هم القصودين مش معناه رافضي القرأن وحجتهم مايروة شطحات او قصص غير مقبوله في الصحيحين
اظن شهروزة كتبت تلات بوستات عن الصحيحين وما رأته اخطاء ورد كتااار عليها ومنهم مختار العزيزي في يجي بتاع تلات بوستا مضادين
اقري الرابط الاول

بنت القمر said...

بنت القمر said...
http://bntalkamar.blogspot.com/2007/11/blog-post_09.html
اقري الرابط ده
القرآنين من منكري السنه هم القصودين مش معناه رافضي القرأن وحجتهم مايروة شطحات او قصص غير مقبوله في الصحيحين
اظن شهروزة كتبت تلات بوستات عن الصحيحين وما رأته اخطاء ورد كتااار عليها ومنهم مختار العزيزي في يجي بتاع تلات بوستا مضادين
اقري الرابط الاول

محمد عبد الغفار said...

السلفيين لا يدعون لتفجير النفس

والقرأنيين هم منكروه السنة بالكلية ومنكر السنة كافر اما الصحيحين فتدقيقهما علم كسائر العلوم يخضع للخطا والصواب وما اجتمع العلماء على صحته اللأن لا يصح لمثى ان يقدح فيه

لكل عمل اجر دنيوى وادر اخروى ولكل واحد الحق ان يفضل ايهما ولنا الحق ان نفضل من يريد اجر الأخره

يَحيى المِصري said...

بحب أقرا الأخبار دي
:)

Aardvark EF-111B said...

شر البلية ما يضحك

بصراحة أنا بطلت أفهم حاجة من إللي بيقولوه..أي حاجة بيقولو عليها بأعمل عكسها و خلاص

بجد بأحس إن أحسن حاجة أفضل مع نيكول هيلاند...طالما كله بيستعبط على كله

MKSARAT SAYED SAAD said...

حفصة
دة رابط فتوى دار الافتاء المصرية
ياريت الناس تقراه
http://www.dar-alifta.org/viewfatwa.aspx?ID=4024

Abominatrix said...

واللهي أنا اعدت أضحك لم شفت البست دة بالأخص على موضع أخد الأجر على الدعوة. مهم ليهم حاء طبعا يعملوا و يقولوا إلي هما عوذينو لئن الناس سيباهم. خلص احنا المسلمين بطلنا نفكر أساسا. محدش وئف كدة و فكر هو احنا لما نكتبلو فال بطاقة إن داعي دي تبقا وظفته يعني؟ و واحد زي عمرو خالد دة متخرج من الأزهر ولا إكتسب نظام الداعية دة ازاي؟ هو احنا بنكتب في البطاقة دكتور لي أي حد كدة؟ ولا لزم الدكتور يكون معه شهادة تثبت إن درس طب. إذا لما عايزين نعمل للداعية دة مهنة يبقى لازم يكون في نظام معين. انما احنا العرب عندنا عادي خالص واحد يفتي في الدين و ناخد كلمه عادي خالص و نقول لا محدش يعترض عليه دة بيفهم أكتر مننا. ماهو العملية وسعت على الأخر. دة إلي جبنا ورا للأسف. هو في حد في البلاد المتقدمة بيقول أنا دكتور بس مدرستش طب. واللهي لو حد عملها في البلاد إلي زي دي لا يدولو على افاه و يقول له روح شفلك حتة تانية تنخرب فيها. العالم إلي بطلع فتاوي دي عايزة ضرب النار.

Migo Mishmish said...

ازيك ياحفصه ..انا مبسوط منك لانك بتكتبى بجرأة شديده ..انا مش عايز اتدخل فى موضوع الدين لانى مسيحى ومش بحب اتدخل فى شئون الاخرين انا هاتكلم بصفه عامه عشان المتعصبين مايقولوش ايش دخلك انت فى وسطينا ..انا رايى اننا عايشين حاله فوضى اعلاميه كبيرةوسباق على الفضائيات بين جميع الاطراف مسيحيين ومسلمين وكله بيعلى صوته على التانى ..وناس بتسترزق على حساب الدين واهو كله سبوبه ..وطبعا الناس بتتفرج على التليفزيون والجهل منتشر والناس بتصدق يعنى اى حد طالع فى التليفزيون يبقى كلامه منزل ومسلم به ومن هنا ييجى الاحتقان التوتر الطائفى بين الناس يعنى تلاقى المسيحيين والمسلمين محتقنين والمسيحيين بينهم وبعضهم محتقنين وبرضه المسلمين بينهم وبعضهم وكل واحد شايف انه صح والتانى غلط ماحدش عنده ثقافه الاختلاف مع ان الاديان كلها تدعو لان تستفتى قلبك وتكون لك طريقتك المختلفه عن الاخر فالله جعل الناس درجات بس مين بقى يسمع ؟؟؟؟؟؟؟؟؟؟؟

Marvel said...

الدعاة والفتاوى اللي ماليين الجرايد اليومين دول بقوا مستفزين اكتر من الحزب الوطني نفسه..بقم يحللوا بمزاجهم ويحرموا بمزاجهم واسهل حاجة دلوقتي هي التكفير

ربنا يهدي الجميع

david santos said...

Hello, My friend!
Thanks for your posting and have a good week.

HafSSa said...

بنت القمر
مفهمتش؟؟ القرانيين مرفضوش القران اصلا
و انا مرفضتش القران
و تبقى مصيبة لو بتوع الازهر هما اللي رافضين القران

معلش بس في تعبير غلط و مخليني مش فاهمة قصدك ايه بالظبط
ممكن توضحيلي اكتر؟؟؟


محمد عبدالغفار
السلفيين لا يدعون لتفجير الناس لكن بيدعوا للجهاد و قتل الكفار و تحرير البلاد و كلام كبير اوي مفسرهوش كويس و خلى اللي يتبعهم يروح يفجر نفسه
ازاي الحال؟؟
و احب اقولك حاجة يا محمد
والله ان شاء الله كل علماء الكون اجمعوا على شئ و انا فكرت فيه لقيته مش معقول
يبقى غلط
كلامهم مش مقدس و لا لازمن عليا اني امشي عليه او اقدسه فقط لفكرة انهم سبقوني في الوقت او درسوا الموضوع
في حاجات في الصحيحين لو الواحد فكر فيها و امن انها صح تبقى مصيبة سودا
يبقى الاولى اني ارجع للقران و بس
و بعدين كذا مرة يطلعوا علينا شيوخ و باحثين يقولوا بثبوت فساد الكثير من الاحاديث و بيستدلوا عليها من خلال التوقيت و الزمن و مين شاف مين
طيب حنعوز ايه اكتر من كده؟؟؟؟

يحيي
عارفاك انت تموت في الخناقات و البلاوي دي
سوسة



ارضفارك
انت ضحكت؟؟ بجد؟؟
اصلي يومها اتحرق دمي مضحكتش خالص
و خليك مع نيكول افضل بكتير فعلا



سيد صاحب المسكرات
مش عارفة ليه الرابط مفتحش معايا و في كذا مناسبة لو تقدر تقلي محتوى الكلام ايه او فكرة عنه
تبقى مشكور



ابوميناتركس
اهلا بيك
انا والله لما تخيلت البطاقة فضلت اقول يعني يكتبوا داعية ولا مفتي و لا مذيع اسلامي و لا ايه بالظبط
حاجة تمخول فعلا؟؟


ميجو او مشمش
شوف يا ميجو لما يكون حاجة تخص جارك لكن بعد فترة ممكن تاثر عليك يبقى من حقك تتكلم فيها
هو لما المجتمع يتملي ناس شغالة كلام مالوش لازمة طول النهار و مش بيؤدي لاي شئ غير زيادة الفرقة و اظهارها بين الناس و بعضها
م شده يضرك او يضر مشمش؟؟
صح و لا مش صح؟؟
اذن يبقى من حقك تدخل في الحوار
يعني تخيل معايا لو ماسورة مية عند جارك بدت تنقط
في الاول جوا بيته و هو مش عاوز يصلح لكن لما تبتدي تنشع على بقية الجيران؟؟
هل بقت بس مسالة جوا البيت ولا تعدت حدودها و خرجت لبرة؟؟
لكن حصلت مرة مع صديق مسيحي و تدخل و لم يصبه الا اللعنات
فاديني وعيتك و انت حر
(هو مين فيكو ميجو و مين مشمش)


مارفل
بص احنا تعدينا مرحلة انهم بيفتوا على كيفهم
احنا دلوقتي في مصيبة انهم بيحللوا الثروات الخطيرة دي اللي تخلي الواحد يستغرب
شغل دين ايه ده بس اللي يربح ملايين و من الدولارات ؟؟
ده اقل شئ يعلموه لو عندهم دم و بيعملوا بالكلام اللي هما قارفينا بيه
كانوا اتبرعوا بالفلوس دي لجمعيات خيرية و تقاسموها مع الفقراء
علشان يبينوا مثال حي مباشر و حقيقي على اشتراكية الاسلام الجميلة
لكن تقول ايه؟؟
ان لم تستح
فأفعل ما شئت



mr. david santos, thanks for ur visits and have a nice whoel year to you as well.



تحياتي للجميع

بنت القمر said...

يا حفصه انا اعرفه انهم مش رافضين القران لكن من منكري السنه
وانكارهم السنه خلاهم يعتمدوا علي انفسهم في التفسير
كنت نزلت بوست عن اراء محمد صبحي زعيم القرأنين في اراء حتي شهروزة اللي كانت بتدافع عنهم شافتها صادمه البوست عندي وانا اديتك لينكه
اسمه زعيم القرانين بقول النظام يعادي الجميه
ووصل بيه الي ان احل زواج المسلمه من الكتابيين يعني اليهود والنصاري وقام فعلا بتزويج بعض المسلمات من غير مسلمين
يا بنتي شوفي البوست!!وانتي تفهمي
وعموما هو مطرود من مصر

DantY ElMasrY said...

يعنى مطرود من الجنة ؟
فى آية فى القرىن بتقول :
إذ تبرأ الذين اتبعوا من أتبعوا من الذين اتبعوا ورأوا العذاب ....
يعنى ان الواحد يمشى ورا فلان او علان علشان الأمة كلها بتعمل كدا يبقى عذر ليه
الغلط غلط وإن كثر فاعليه والصح صح لو كان بيعمله فرد واحد
ولا ننسى وصف المولى عز وجل لإبراهيم بقوله :إن إبراهيم كان أمة
للأسف إحنا محاصرين بشيوخ بيخاطبونل بسطحية وهم مطمئنين ان الجنة لنا ان اتبعناهم ومفهوم طبعا انهم هايدخلوا الجنة قبل مننا بس مابيقولبوش من باب التواضع !!!!!!!!!!!!
وزعيم كل ملة يدعى ذلك لملته
بل لطائفته ولا ينسى أن يسبعد مخالفيه
واتباعه وراه زى البقر
لكن ربنا ما بتاخدش بالصوت ولا بالكلام الكتير ولا تؤثر فيه الدعاية عبر الفضائيات

زكرياء said...

انا ايضا لازم احول اوراقي إلى اقرب كلية "دعوة" و لازم تكون على مذهب شيوخ الرمال اياهم، و لا شيوخ الهيب هوب الجدد؟
الله يلعنهم واحد واحد، عمرنا ما سمعنا ان الرسول (ص) يتلقى سنتا واحدا على كل شخص يدخل الإسلام مثلا أو سفيان الثوري كان ياخذ دولار واحد عن شرح كل حديث، أو مثلا على ابن ابي طالب عن كل يوم قضاه عادلا في حكمه امة أورو مثلا ....هؤلاد اجدر علميا و اخلاقيا منهم، يعني لو صحت الإستفادة المالية حسب
القدرة و المميزات الشخصية لكان هؤلاء
الأجدر ان يتلقوا مقابلا ماديا على عملهم!!! لماذا انتم فقط تحلون لكم هذه الأشياء؟؟؟ الله يحرقكم واحد واحد و يكتبلكم مصيبة بكل واحد ادخلتوا فكرة الاسلام المعوجة بطرقكم هذه في عقله! سئمنا هذا القرف، أما عن ابن باز و ابن عثيمين هؤلاء و غيرهم من انصاف الجهال، فلا داعي حتى للحديث عنهم، لأن رائحة النفاق تفوح من كل كلمة يقولونها، يعني عندما يصبح آل سعود اولياء الأمر، فلا داعي لان نتعب ادمغتنا على امر مفروغ منه كهذا

تحياتي و دعواتي لكِ بالصبر على هذا القرف الذي يلاحقنا كاللعنة
زكرياء

بنت القمر said...

دانتي المصري
الغلط غلط ولو كثر فاعليه!!
هو ايه هو الغلط ؟؟ هو انا قلت لك روح اتبع فلان ولا علان
ولا قلتك عباده ربنا ودخول الجنه مش ها تحصل الا عن طريق الشيخ الفلاني ولا القناه الفضائيه
فيه ايه يا عم دانتي
انا لا بحب عمرو خالد ولا انا درويشه ولا حتي بشوف لا الناس ولا البركه
صلي علي النبي في قلبك وروق دمك!!يا تاخد تاكس وتروح تقرا
وتيجي توقلي الراجل ده انا مقتنع بيه وبكلامه
يا تقولي لا مش مقتنع
وفي كل الاحوال انا معنديش اعتراض
لكن تحمل كلامي اللي مقولتهوش ازعل منك ونروح القسم والمأمور يحكم بينه!! اقرا اللينك ياعم دانتي ولا لينك المدونه بتاعي مش عندك
:))
عموما اقرا ومستنيه رأيك ورأي حفصه
مقتنعين ومش مقتنعين
تحياتي

hartaka said...

الاستاذ محمد عبد الغفار
مين قالك ان منكر السنة كافر ؟
وانهى سنة فصدك عليها السنة القولية ولا السنة الفعلية ؟

معلش السؤال دا حازقنى وعايز إجابة علية

راجى said...

السنة النبوية المصدر الثانى بعد القرآن للتشريع
ولقد امرنا الرسول باتباع سنته وعلى سبيل المثال كيفية الصلاة ومناسك الحج وهى الفرائض التى وردت بدون تفصيل فى القرآن الكريم
اما فى طريقة الملبس مثلا او غيره من امور الحياة فيأخد منها ويترك
ومتفق معكى فى حرية الاحتفال بمولد الرسول ومتفق معكى فى عدم اتخاذ الدعوة مهنة للتكسب والربح بل ان الدعوة فى الاسوة الحسنة
واذا كان هناك جهد مطلوب لاعادة قراءة الصحيحين فيجب ان يبذل من جانب المتخصصين
ولكى التحية

مُزمُز said...

ازيك يا حفصة

يا بنتي مش هتبطلي بقى تشدي ف ديل القطة
مش مام قالتلك سيبي القطة وخلليها ف حالها؟

:)

أنا بكل صراحة بحسدك على أعصابك وعلى قدرتك على التحمل
ازاي قدرتي تقري كل اغثيان ده ف يوم واحد
وازاي لسه قادرة تكتبي عنه وتقولي رأيك من غير ما يجيلك إحباط؟
ماعلينا

الملاحظة الطريفة بقى إنك لو حاولت مجرد محاولة ولو صغيرة جدا إنك تعتمد بصورة أساسية على النص القرآني اللي هو واضح ومحكم وثابت الثحة والتواتر تبقى فجأة بقيت قرآني وطبعا لازم تعرف يا كلب يا جزمة إن القرآني كافر وطبعا الكافر يستتاب تلات أيام بعدين يقتل وطبعا دي سلسلة من الإرهاب علشان انت حاولت بس تفكر وتشيل شوية خرافات من دماغك

المفارقة
إن القرآن نفسه هو اللي صرح بأنه المصدر الأساسي لأخذ المعرفة الإسلامية وأن السنة لا تأتي بتشريعات جديدة وإنما تدور في فلكه وتوضح تفاصيل أدق عن أمور أقرها في الأصل القرآن الكريم

القرآن بيقول
ما فرطنا في الكتاب من شئ

وف موضع تاني
وما كان ربك نسيا

وبعدين كفاية كده

عشان أنا كاتبلك انتي التعليق ده لكن مش داخل أتناقش عشان أصلا أنا راجل صاحب مرض ومرارتي مبتستحملش ومش فاضي

بس في النهاية عايز أقول تعليق صغنن على موضوع الجهاد

في أحكام الفقه اللي درستها في الأزهر وفي باب الجهاد كان الحكم بيقول إن الفقهاء المسلمين أجمعوا على وجوب الجهاد سنة وسنة

يعني واجب على الإمام المسلم أن يغزو وحط تحت يغزو دي مليوووووووون خط
أن يغزو عاما وعاما على الأقل

وطبعا هيتقاللك إن الغزو ده بدافع نشر الدين وليس إجبار الناس على اعتناقه ولو هو الأمر كده يبقى غزو أمريكا للعراق كان أمر مباح بدافع نشر الديمقراطية ما هي ميغة بقى كل واحد عايز ينشر فكره يقوم يجهز جيش ويروح يغزو بلد آمنة ويخضعها لدولته ويسميها بقى المسميات اللي تريحه اللي يقوللك فتح ودلوقتي أمريكا تقول تحرير وكده يعني

وأقول قولي هذا وأستغفر الله العظيم لي ولكم

آه صحيح
متجيش عندي ليه؟

ابقي خلينا نشوفك
:)))))

Nsreen Bsunee said...

الله ينور عليكي يا صفصف متفقه معاكى فى كل حرف وكلامك مفيش فيه مجال للمناقشه بس فعلا فيه من اللى بيسموهم القرآنيين ناس بيشطحو شويه بس ده اجتهادهم ويناقشو فيه ويحاسبو من ربنا عليه لكن ده مينفييش ان القرآن هو مصدر التشريع الوحيد فى الاسلام واى حاجه غيره تعتبر اجتهاد من العلماء ممكن اوى الواحد ميقتنعش بالاجتهادات ديه وميأثمش يعني بعد النص القرأنى كل شئ قابل للمناقشه والاجتهاد والاقتناع والرفض مفيش شئ بعد القرآن مقدس

بالنسبه لموضوع الدين مهنه فا مفيش احسن من الاقتباس من الاخ ابو الليل
ا7ا
ا7ا
ا7ا
ا7ا

وشكرا

HafSSa said...

يا قمر مشكلتنا مع رافضين السنة و متبعين الرقان
لما انتي كتبتي و قلتي رافضي الرقان انا اتبرجلت
مش مختلفة معاكي فمين الصح مين غلط
بس هي دي كانت المشكلة و فهمتها



دانتي المصري
كلامك صح لان لو فرضنا ان فيه 100 شخص اعمى و واحد مفتح مش معقولة هما ينفوا وجود الشمس و يبقى هو غلط لانه هو واحد بس
صح؟؟

زكرياء
اللهم امين في كل كلمة من كلامك
ربنا يخلصنا منهم على خير


بنت القمر تاني
انتي ليه اخدتي كلام دانتي عليكي
هو بيتكلم في فكرة معينة و بيشرح ان الغلط مهما كتر عدده ميبقاش صح
لكن مش قصده يقول ان انت يغلط و هو صح او العكس
هو بيشرح نظرية
بس
فكط لا غير
و دانتي لو انا غلطت صححني لو سمحت


استاذ هرطقة
والله مش عارفة فعلا فين انهي نص في القران بيقول ان منكر السنة كافر
لان ده معناه ان فيه ناس مسلمة كتيرة اوي
حتتكفر قريب اوي و يتحلل دمها
ربنا يكون في عونهم
و لمحمد عبدالغفار
ارجو انك فعلا تجيبلنا الدليل القراني
لان دليل من الاحاديث مينفعش
لانه م شمعقولة من دقنه و اتفل له يعني
يعني مينفعش نجيب دليل من الحاجة اللي محرمة الشئ اللي احنا عاوزين نتاكد من صحته
عاوزين مصدر محايد
زي القران مثلا
لا يختلف عليه اثنين



استاذ راجي
تقريبا نفس تعليقي لمحمد عبدالغفار
مين قال ان السنة النبوية تاني تشريع بعد القران؟؟
اذا كان سيدنا محمد نفسه مكن شبيعمل السنن دي لينا ، كان بيعملها ليه هو اللهم صلي و سلم و بارك عليه حبا منه لله و تقربا بزيادة و لكونه نبي من انبياء الله
و الدعوة لقراءة الصحيحين مطلوبة من كل الناس و كل النا سمن حقها انها تطالب بتنقيحهم
لان فيهم لكام كتير اوي يبان للانسان العادي انه مصيبة و مش محتاج ذكاء او فكر خطير علشان يميزوا ان الكلام ده مش منطقي


مزمز
والله انا مش بحب القطط اصلا
لكن اعمل ايه و لاقطة بتخربشني و مش سايباني ف يحالي؟؟
بس حقلك على حاجة
والنبي بلاش الحسد علشان لو تفتكر انت السبب ف يموت المدونة القديمة
فاكر؟؟
انا لعلمك عصبية جدا و مخي صعيدي حبتين كبار مع اني مش صعيدية بس لكن لما تتراكم الانفقاعات بيجي يوم و تستفحل مينفعش معاها اي نوع مهدئات
و لقد كان يومها هذا هو الحاصل فيه اللي كتبته
و صدقني هي الاخبار كلها كانت في جرنال واحد مقدرتش اهرب منه
متفقة معاك في كل اللي قلته بالذات لانك دارس و متخصص و عارف انت بتتكلم من انهي مصدر
عن الزيارات انا جيت لك من فترة و اتدفنت تحت طوفان البوستات اللي منزله ورا بعضه
فقررت اخصصلك قعدة لوحدك قريب ان شاء الله
مش انت اللي اقراه حتتك بتتك و امشي
لازم امزمز يا مزمز


نيسو
بعد ما تسلميلي على الحاج و تقوليله عاوزين 9 كيلو كباب و كفتة في جنينة الحيوانات
ابقي سلميلي على ابو الليل و قوليله يسلم فمك يا استاذ و طبعا يسلم فمك انتي كمان

:D


تحياتي للجميع باجازة سعيدة

Alexandrian far away said...

أستاذه حفصه
صباح الخير
رائع البوست ده الصراحه
وبيثير قضيتين مهمين
أولا: ليه لا يجوز التشكيك في الصحيحين؟
ثانيا: العبقري الذي قال أن منكر السنه كافر ممكن يقول لنا جاب الحكم ده منين؟

وسؤال كمان مهم هو كتاب المسلمين أسمه القرأن ولا اسمه الصحيحين؟
وسؤال كمان هل ممكن نتخيل أن الأرتباط العجيب ده والعشق الفزيع المفزع ما بين السنه الأشاعره وما بين الصحيحين ممكن يؤدي لدمجهم مع القرأن في يوم من الأيام

وتبقى الديانه كلها راحت كده
روحوا ربنا لا يسلمكم ولا يغنمكم


تحياتي يا حفصه وأحترامي

راجى said...

طبعا لو احتكمنا الى القران فهناك ايات كثيرة تأمر باتباع الرسول
ولو فرضنا جدلا ان السنة النبوية غير ملزمة للمؤمنين فما هى الحكمة اذن من ارسال رسول الم يكن الحق سبحانه قادر على تنزيل القرآن فى كتاب جاهز مطبوع وبكل اللغات كمان؟
وعلى فكرة لمن لا يعرف فأن القرآن الكريم نزل على قلب الرسول بدون ترتيب وتلاه على بشر ممن حوله من الصحابه ثم كتب ثم جمع بعد وفاة الرسول والذى قام بهذا بشر ايضا وليس الملائكة ولا الجن ولا العفاريت ، ليه حضراتكوا لا تشكوا فى ذمتهم ايضا زى ما بتشككوا فى ذمة ناقلى الاحاديث
حتقولوا ربنا حفظ كتابه الكريم من التحريف وانا اقول لكم ايضا ربنا حفظ كلام الرسول وسنته المبينه والمفسرة والمكملة والتى لا يستقيم الاسلام بغيرها
ولو مكن بقى طلب اخير ياريت نموذج من الاحاديث التى وردت فى البخارى ومسلم و مش ماشى مع عقولكم يمكن حد متخصص يقدر يبين ويوضح
وشكرا

بنت القمر said...

راجي
البوست اللي عندي لقاء مع زعيم القرأنين محمد صبحي و وحوار حول افكارة خد اللينك من فوق وبص عليه
بالنسبه للاحاديث دي اعتقد ان شهروزة جمعتها وقالت نفس الكلام في بوستات قديمه تلاته ورا بعض ورد عليها مدون اسمه مختار العزيزي في تلات بوستات مضاده تتناول حفظ السنه عن طريق ما يسمي علم الرجال وعلم الحديث
انا مش ها اقدر اتكلم احسن من ما هما اتكلموا
بدايه البوستات عند شهروزة
http://shahzad12.blogspot.com/2007/10/blog-post_18.html
اقرا وانت تشوف والبوست اللي قبله وبعده
وفي نفس التوقيت الزمني كتابات مختار العزيزي
ورده






************************
Alexandrian far away
مش انت يا عزيزي لسه قايل عند رامز انك قمت صليت الشروق لنفر تم!!!تاعب روحك ليه بقا
في دوشه الصحيحين والسنه الاشاعرة؟؟!! ياعم لكم دينكم بقا ولي ديني
؟؟الا صحيح نفر تم دي الهة ايه بالظبط ولا تبع انهي اسرة؟؟
يا ابو اسكندرتحياتي

Alexandrian far away said...
This comment has been removed by the author.
Alexandrian far away said...

عزيزيتي بنت القمر
بجد أتخضيت وأفتكرتني علقت في مدونتك بدل مدونة حفصه
ماشاء الله يعني أنتي قايمه بالواجب وزياده وراده غيبتها وراده على الناس كلها
يا بختها بيكي والله
المهم هو أنا يا ستي فاتح شركة ألكسندريان فار أواي لتوريد الديانات وعموم الميتافيزيقا ولا ايه؟
هو أنتي بتصدقي أي حاجه كده
ومش عارفه تلاقي لي ديانه تدبسيني فيهاوخلاص؟
عموما نفرتم هو إله شروق الشمس وكان يمثل برجل يحمل على راسه براعم اللوتس وهو المولود بلا أم ولا اب بل من براعم اللوتس نفسها

تحياتي

راجى said...

بنت القمر
حاضر سوف افتح اللينكات
لكى الشكر

Hassan El Helali said...

العزيزه حفصه

آن الأوان لمراجعة كل ما علق بدين الإسلام من تفسيرات مغلوطه ومن أحديث مدسوسه

وأول المشوار هو نزع القداسه عن كل ما لا يصح تقديسه وأولهم ما يطلق عليهم الصحيحين

لو تنازلنا عن حساسيتنا المفرطه وقرينا فيهم حانشوف العجب وحانشوف إن فيهم أسوأ إهانه للدين وللرسول وكلام فارغ يتنافي مع العلم ومع الذوق العام

ولو أحد من زوار المدونه حب يشوف أمثله علي ما لا يصح أن يكون من "ثوابت الدين" فليذهب إلي


http://shahzad12.blogspot.com/2007/10/blog-post_18.html

ويشوف كلام من الواجب حذفه ولو كان صحيح وهو قطعاً غير صحيح ويسئ لنا ولديننا ولرسولنا

الأتراك من حوالي شهر شرعوا في دراسة تحديث الإسلام وتنقيته من كل الشوائب دي وانقلب عليهم العالم الأرزقيه وتوقف المشروع

أكيد لازم ييجي اليوم اللي حايكون عندنا الشجاعة إننا نراجع ونجدد وإلا سيخرج من الدين كل من فكر وبحث في هذه ال"ثوابت" التي لا لزوم لها

حسن الهلالي

Alexandrian far away said...

العزيزه الأستاذه حفصه
مبدئيا أتفقت معك في وجوب مراجعة السنة والأحاديث لننقيها من المدسوس عليها

لكن أسمحي لي
أنتهيت لتوي من قراءة مدونة تتحدث عن نفس الموضوع، وخطر في بالي سؤال: أي أحاديث هي المدسوسة التي يجب تنقية السنة منها؟
غالبا أنها ما لا يوافق رؤيتنا أو أرائنا أو تصورنا عن النبي -صلعم- رؤيتنا نحن من نعيش في مدن عملاقة بأوائل القرن الحادي والعشرين ومن نختلف لدرجة التناقض ذوقيا وفكريا وأخلاقيا مع هؤلاء من عاشوا بالجزيرة العربية قبل 15 قرنا، تلك الأحاديث والروايات موجودة منذ زمن بعيد ، كانت موجودة طوال العصر العباسي على الأقل وما تلاه، ولم يعترض عليها أحد، بل وحتى هجمات عتاة الزنادقة والملحدين لم تستعملها أو تشير إليها أقل إشارة، ولم تتخذ منها مطعنا في الدين كما أتخذت حتى من بعض أيات القرأن، لكن من الذين أستخدموها لطعن الدين؟
ليس الملاحدة بل طائفة جديدة من الكفرة أو المتزندقين أضافة طبعا لبعض الغربيين، وأتباع زكريا فحلص ومن لاف لوفهم لكن ما الذي يجمع كل هؤلاء؟
أنهم جميعا أبناء القرن العشرين ويعيشون أوائل القرن الحادي عشر وأنهم ابناء المدن المتحضرة الحديثه وليسوا أبناء عالم الجزيرة العربية في القرن السابع الميلادي
تلك الأحاديث كانت وبقيت فترات طويلة جدا، لم ينفر منها أحد ولم يطعن فيها أحد
لم؟
لأنهم كانوا أقرب تاريخيا لذلك الزمن وعرفوا أن ما ننفر منه الأن وربما نفروا هم منه وقتها كان أمرا عاديا وطبيعيا ولا غبار عليه في تلك البيئة وذلك الزمن ولا حق لنا في أن نحاكم زمنا نما بمعاييرنا نحن وقيمنا نحن
من يعرف مثلا أن الرومان كانوا يقضون حاجتهم جالسين جنبا إلى جنب بالعشرات في حمامات عمومية دون اي ساتر بينما يقوم عازف بلعب مقطوعة موسيقية أو يلقي شاعر قصيدة عصماء؟

وما رأيكم أنه باي بيت روماني أرستقراطي كان من حسن الأدب واللياقة أنه حين تتخم كضيف بالطعام تقوم غلى غرفة معدة خصيصا لذلك وتقىء ما أكلته ثم تعود للأكل مرة أخرى.

وهل تعلمون أن لويس الرابع عشر ملك فرنسا كانت تحضر له القصريه (النونيه) ليقضي حاجته وهو جالس على مائدة العشاء؟

مقزز مش كده؟
لكن كان كل ذلك مقبولا ومحترما ولا غبار عليه في زمنه

أخشى أن نفرض رؤيتنا على التاريخ ونمارس عليه الديكتاتوريه مرتكبين خطأ محاكمة الماضي بقيم الحاضر

مجرد خاطره
تحياتي للجميع

Hassan El Helali said...

الإسكندراني البعيد
وأنا اسكندراني قديم أوي وبعيد أوي
ومش من أتباع زكريا فلحص
ولا متزندق والعياذ بالله

أتفق معك في أن كل هذه الأحاديث والتفسيرات كانت موجوده من قديم الزمان ولم يعترض أحد (أو هكذا نعتقد) ولكن مع ثورة الإتصالات وتحول العالم إلي غرفة وليس قريه صغيره أصبح من غير المقبول أن نتجاهل إمكانية الهجوم والتهجم من أبعد بقاع الأرض علينا وعلي أفكارنا وعلي ديننا وعلي معتقداتنا

أرجو فقط أن يتسع صدرك لنقطتين

الأولي: أن ما تسميه هجوم غربي علي الإسلام ليس إلا رد فعل طبيعي ودفاع شرعي عن النفس ضد التحول الكبير في أسلوب المسلمين في الثلاثين سنه الماضيه ومع طفرة البترول ووهبنة الإسلام بكل ما تحتويه تعاليم إبن عبد الوهاب من عنف وتعالي واحتقار وكراهية الآخر والذي توج بالحادي عشر من سبتمبر المبارك ولحق بثقافة الإنتحاريات التي صورت المسلمين كعصابة من المجرمين الدمويين فلا نلوم إلا أنفسنا

الثانية: يجب علي الإنسان الذكي أن يتعلم من تجارب الآخرين بدلاً من المكابره والغرور الذي لن يؤدي إلا إلى الكوارث... فاليهوديه والمسيحيه تنازلت عن أحكام عديده وعن أساطير لم تعد تتماشي مع الزمان وطورت إلي حد ما وعدلت من المفاهيم الثوابت ومع ذلك يخرج العديد من الدين اليهودي والمسيحي لعدم كفاية التطوير وتمسك الحاخامات والرهبان بالثوابت... ومن عظمة الإسلام أننا نملك إعادة التفسير للآيات وللنصوص ولنا أن نقصرها علي مناسبتها وعلي أسباب التنزيل وعلي ظروف زمانها... ولنا أن نرفض كل ما هو ثابت خطأه علميا ومنطقيا من الأحاديث وخصوصاً ما يمس الرسول ويظهره بمظهر شائن كما في اللنك السابق الإشارة إليه

أما أن مقولتك بوجوب قبول الممارسات القديمه بدون مراجعه واعتبارها عاديه فغير مستساغ... نعم كان الرومان وملوك الفرنجة يفعلون هذا وأكثر من هذا ولكن تطوروا وتطورنا فلا يجوز أن نقضي حاجتنا في الخلاء ونستعمل الحجاره في الإستنجاء لمجرد أن هذا كان مقبولاً في زمن الرسول ونجعل منها سنة مستحبه

إذا لم نطور من أنفسنا ومن معتقداتنا فمئالنا إلي الزوال، لا سمح الله

حسن الهلالي

بنت القمر said...

ههههههههههههههههههه
هاموت من الضحك
ازدنجراني في خانه الدفاع عن ثوابت الاسلام
هههههههههه
مش ممكن!!مستحيل..بوش يدافع عن صدام..
تحياتي للجميع
هاموت من الضحك
رد يا ازدنجراني.

Alexandrian far away said...

عزيزي الأستاذ حسن الهلالي
كويس أننا طلعنا بلديات
أسمح لي بأن أبدأ تعقيبي على تعليقك من نهايته
أعترف أني أحيانا قد أسهو أو أنسى حتى ما كتبت لكن أين قلت بوجوب قبول الممارسات القديمة دون مراجعه؟!!!!أنا بالتحديد قلت أنه لا يجب أن نحاكمها بذائقة عصرنا بل بذائقة عصرها
بس كده
وأن الناس تحاول تتحلى ببعض الشجاعه وتتوقف عن النفاق وخداع الذات وتكرار كلام مثل أن هذه الأحاديث مكذوبه ومنتحله ومختلقه وتعترف ببساطة أنها لم تعد تتساوق مع عصرنا وموقفنا الحضاري والزمني وأن بعض التعديلات والتغييرات حتميه وضروريه وأن عن الإسلام أن يسير الطريق الذي سارته المسيحيه واليهوديه ليتنازل عن أحكام وأساطير لم تعد تتماشى مع الزمان كما سبق وذكرت في تعليقك

أما بخصوص موقف الغرب من الإسلام المتوهبن فالغرب يجني ما زرعت يداه والمسخ الذي رباه أنقلب في النهاية عليه وهو ما أرى فيه قدر من العدالة الشاعرية

تحياتي وأحترامي
أنتي فين يا أستاذه حفصه؟

HafSSa said...

حضرتك انا عمالي بتفرج على المباراة الحلوة اللي قدامي في عرض الاراء و عكسها و انا المستفيدة طبعا

:D
ضحكة مكارة

Alexandrian far away said...

طيب يا ست المكاره
عهلى الله ما تقلبش المباراه بعراك

هاهاهاهاها
ضحكه خايفه

HafSSa said...

لا لا
تقلب بعراك ليه لا سمح الله
احناهنا بنتناقش
و اللي عنده دليل يجيبه
انا بس حابه اوضح كام نقطة و السلام ختام من اولها

1- المطالبة بتنقية السنة لا تعني رفضها

2- القرانيين حتى مع شطوح بعض تفسيرهم الا انها لها اساس و مثال ذلك جواز المسلمة من الكتابي و مش هما لوحدهم اللي اباحوا نوعية الجوازات دي و الموضوع ده لوحده محتاجله بوست نهايته مش حتكون ظريفة لكن ما دام فيه ايات بتتكلم عن الجواز ده يبقى ليه مناقش هاش؟؟

3- مش معنى ان في وقت من الاوقات اهل روما كان بيستغطوا في الشارع ان ده يبقى شئ عادي و الاهم ان مافيش نص جه و حرم التغوط في الشارع
لكن فيه نص جه و حرم معاشرة الرجل لامراته و هي حائض
فمش معقولة النبي نفسه يكسر الحرمانية دي و يعمل ما ورد ذكره في الاحاديث العجيبة الوارد ذكرها في البوست بتاع شهروزة و غيره

4-نزول الرسول برسالة على الناس كان فيه رحمة ليهم و علشان ربنا يعضد من موقفه كتب له كتاب
يعني كأن ربنا قال لسيدنا محمد قلهم انا بقول كده و خلي كل حاجة مكتوبه علشان على مر السنين محدش ينسى
و لان بكل بساطة مينفعش كتاب ينزل لوحده من السما على الناس، فين الوسيط؟؟ ولا الوحي حينزل كل مرة على حد مختلف؟؟
مؤكد لازم يبقى في شخص واحد موثوق في ذمته و قوته على تحمل تبليغ رساله
فكان سيدنا محمد اللهم صلي و سلم عليه

5-اما عن ترتيب ايات القران و نزولها و جمعها فحتى ده فيه عليه كلام كتير
مش بقول انه متحرف ، لأ طبعا، لكن في قصص مثلا بتقول ان القران كان متجمع عند السيدة فاطمة و لكن لاسباب عديدة اختفت النسخة دي
و موضوع جمع و كتابة القران ده نفسه موضوع شائك جدا مقدرش ادعي فيه العلم
لكن برضو مقدرش ادعي فيه التاكيد الجازم

6-ارجو عدم التكفير لو كلامي ده مش عاجب حد لان تهمة الكفر دي ما هي الا اشراك نفسك مع الله في حكمه على البشر
فمش معقولة تكفرني و انت مشرك بالله
ولاايه؟؟

تحياتي للجميع
اشكركم و بشدة على اضافة قيمة حقيقية و قوية لبوست مكنش هدفي منه الا مشاركتكم فقع المرارة و تحليل بعض النقاط المعينة المستغلقة صحيح كان نفسي نوجه كلامنا على مكاسب شيوخ الندامة لكن خرجت بفايدة تانية
فشكرا
تصبحوا على خير

حدوتة مصرية said...

حفصه ازيك يا جميل
بصى المفروض ان الناس تستفاد من الدعاه وبس ما لهاش دعوه بقى بياخدوا كام بيشتغلو ا ايه بعد الضهر لا انا ماليش غير اللى بيقولوا واعديه على عقلى ولو ما اقتنعتش بحاجه اسال فيها كذا واحد او اقرا عنها لكن عمرو خالد بياخد خمسين مليون وخالد الجندى بيكسب مش عارف ايه انا مالى
وبعدين انا ملاحظ ان البخارى ومسلم اتمسكوا تقطيع من كل الدنيا فكرونى بعصام الحضرى وهو بيتقطع من الجرايد كلها ديه ناس تعبت وشقيت عشان تجمع الكتب ديه ولو هى صح ليها اجر ولو هى غلط ليها اجرين احنا بقى عملنا ايه لدينا ولا حاجه
فيه حديث فيما معناه
تركت فيكم بعدى ما ان تمسكت به لا تضلوا ابدا كتاب الله وسنتى
ولو اخدنا القران بس من غير سنه يبقى الدين باظ
والدليل
ان ما فيش مثلا فى القران ازاى نصلى وما فيش صيغه الادان وما فيش عدد الصلوات بالتفصيل ده
وما فيش احكام الغسل والطهاره بالتفصيل بتاع السنه
وبالنسبه لمولد النبى
الاصل ان احنا عندنا عيدين الفطر والاضحى
لكن انا شايف ان عادى نعمل احتفال بالمولد مش مشكله لكننا بننسى ان فيه اقوال ان النبى مات فى نفس اليوم
يبقى نحتفل بموته ولا ميلاده
لكن عادى نفرح طبعا وناكل حلاوه وبالذات اللديده رهيبه رهيبه ولو لسه عندكم حلاوة ابعتيلى حته

أبوشنب said...

انا طلعت ندل بصراحة ونسيت اعزمك

انا يا ستي يوم مولد النبي

قمت جايب شوية حلويات على ما قسم

وجايب تسجيل للشيخ ياسين التهامي

ولميت المسلمين اللي في الموقع وعملنا احلى جو

الناس اكلت حلاوة

وانبسطت

وصلت عالنبي

وعملو احلى شغل ليلتها

كل سنة وانت طيبة

محمود المصرى said...

بسم الله الرحمن الرحيم

تعليق عام على الموضوع والنقاش

بالنسبة لمسألة القرانيين هم ينكروا السنة القولية وحجيتها , يعنى لما حضرتك تقوليلهم الرسول قال كذا يقولوا مايلزمناش , لكن فى المقابل يقبلوا السنة الفعلية , وهو دا التناقض لأن ناقلى السنة القولية هم انفسهم ناقلى السنة الفعلية , ثم ان حجية السنة الفعلية موجودة فى السنة القولية , يعنى ربنا امرنا بالصلاة فى القران , لكن لم يبين صفة هذه الصلاة وكيفيتها , الرسول وضحها بأفعاله جميل جدا لكن مين قال ان صفة الصلاة اللى صلاها الرسول هى اللى يجب ان نؤديها فى الصلاة ؟ دى مش موجودة فى القران لكن موجودة فى السنة القولية للقول الرسول ( صلوا كما رأيتمونى اصلى ) يبقى حجية السنة الفعلية مستمدة من السنة القولية , ولما يرفضوا السنة القولية يبقى كلامهم تخريف وكفر ودا مش اشراك بالله ولا حاجة .
نأتى لنقطة تنقية السنة , لازم قبل ما نقول ننقى السنة نضع معايير قبول الاحاديث , وعلماء الحديث وضعوا شروط صارمة لقبول رواية الحديث , وهى دى اللى بنطبقها , ولا يختلف احد من اهل العلم المعتبرين على ان احاديث البخارى ومسلم وشروطهما فى الرجال وقبول الرواية لا خلاف عليها , وعلى فكرة اجماع الامة حجة ومصدر من مصادر التشريع لقول الرسول ( لا تجتمع امتى على ضلالة )
اما قول حضرتك ان فى احاديث لا يصدقها عقل فهذا لا دليل عليه , لأن صحيح النقل لا يتعارض مع صريح العقل مطلقا , وكل ما يرد فى هذا الصدد مردود عليه ووضحه اهل العلم من قبل .
بالنسبة لحديث ان الرسول كان يباشر زوجته وهى حائض فهذا لا يتعارض مع القران لأن المباشرة هى التقاء البشرتين لا الجماع , لأن القران لم يقل ان المرأة الحائض اذى لكن قال عن المحيض انه اذى , وبالتالى هذا الاذى لا يمكن ان يحصل اذا قبل الرجل زوجته او لمسها فلا تعارض بين الاية والحديث .
السؤال الاهم بقى , هل حضرتك عارفة ازاى القران وصل لنا ؟ القران وصل لنا بالرواية السماعية , وليس بالكتابة , لأن تشكيل احرف القران وتنقيطها تم على اساس هذه الرواية السماعية , يعنى التابعين تلقوا القران سماعا عن الصحابة الذين تلقوه عن الرسول سماعا ايضا , وبالتالى لو تم الطعن فى الرواية السماعية للحديث يجب الطعن فى الرواية السماعية للقران ايضا , وهو دا هدف كل اللى بيهاجموا الاسلام , والقرانيين فى هذا سواء معهم .

HafSSa said...

حدوتة مصرية
لو حضرتك حللت محتوى الكلام حتلاقي ان كل قصدنا اننا نفكر بنفسنا و نطلع الغلط و ان المشكلة ظهرت لما ناس بتقول ان لأ،الصحيحين لا يجوز المساس بيهم.اما عن مستوى دخل الدعاة فاسمحلي في دي بقى
لان مهم و مليون مهم كمان لان المفروض ان شغلهم يكون لوجه الله و انهم يطبقوا الناصيح الردررية اللي بيفقعونا بيها ليل نهار و لان اي شخصية عامة فارضة رايها و ظهورها على لاناس من حقنا احنا بقى دول مصدر دخلهم ايه

و للاسف زي ما اوردت سابقا انه اصلا مافيش احتفال هنا بيتم خالص
حتى العيدين مش بيبان لهم منظر لذلك لا يمكن تلاقي عندي اي حلويات يا فندم




ابو شنب
يعني اقمت الليلة و وزعت حلويات و كمان حطيت تسجيلات للشيخ التهامي و جاي تقلي بعد الهنا بسنة انك ندل
روح يا شيخ قلبي و ربي مش راضيين عليك


استاذ محمود المصري
يعني برضو حضرتك كفرت غيرك ممن اختلف معاك في الراي و فسرت موضوع الجماع مع الحائض زي ما انت شايف او فاهم و مؤكد مش قصدنا فقط التقبيل او غيره من خفايف الامور
يعني احنا بنتكلم عن الجماع
مش عارفة هل كلمة الجماع صعب معناها و لا لازم اجيب لها تفسير و نشرحها؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
حيفضل ده راي حضرتك المبني على مراجع غيرك بيختلف فيك عليها
و هم لهم حق الرجوع لمراجع و ادله عقلية تانية
و ربنا بس هو اللي يكفر و هو اللي يدخل نار و جنة و يعفو عن الظالمين
فيا ريات متقولش كفروا و كفر و كفار
مش انت اللي تقول و لا انت اللي تحدد



سؤالي بقى
لما القران منزلش طريقة معينة للصلاة، ليه احنا عملنا زي بني اسرائيل في موضوع دبح البقرة و اتفذلكنا على شكل و كيفية الصلاة؟؟؟
الصلاة ليها اشكال كتيرة
و ربنا بيسمع الانسان في اي مكان و اي جهة و اي وضع و بيسمعه بالقول و بالفعل و بالنية و القلب
طيب ليه احنا نخنق على نفسنا؟؟
لكن ده موضوع تاني
الظاهر شكلي لازم افتح بلوج لوحده نناقش فيه كل موضوع من المواضيع الشوكية المذكورة هنا


تحياتي

محمود المصرى said...

بسم الله الرحمن الرحيم

انا لم افسر الجماع بمعانى من دماغى حضرتك انا فسرت المباشرة , واعتمدت فى ذلك على معناها اللغوى , واللغة هى الاساس فى فهم الالفاظ , والمباشرة هى التى ذكرت فى الحديث اللى حضرتك تتكلمى عنه , ولم يذكر حديث واحد فى الصحيحين فيه ان الرسول جامع احد زوجاته وهى حائض انما الحديث فيه لفظ باشر , والمباشرة معناها اللغوى هو اللى ذكرته لحضرتك وحضرتك تقدرى ترجعى للمراجع اللغوية .
اما بالنسبة للصلاة فالظاهر ان حضرتك ذهبتى لأبعد مما ذهب اليه القرانيين فهم انكروا السنة القولية فقط واخذوا بالسنة العملية زى الصلاة والصوم والعبادات , لكن حضرتك كمان بتنكرى السنة العملية وبتقولى احنا نصلى على مزاجنا وبالطريقة اللى تريحنا , طيب انا عاوز اسأل حضرتك سؤال عقلى بسيط , هو الرسول كان لازمته ايه ؟ حضرتك هاتقولى انه رجل ثقة يبلغنا القران طيب وماله لا اشكال لكن ليه استمر ثلاث وعشرين عاما يبلغنا قرانا يحفظه الاطفال فى ثلاث سنوات ؟
نقطة اخرى ربنا لما يقول من يطع الرسول فقد اطاع الله مش معناها ان الرسول اوامره ونواهيه واجبة الطاعة مثل اوامر الله ونواهيه ؟
لما ربنا يقول واطيعوا الله واطيعوا الرسول واولى الامر منكم فان اختلفتم فى شىء فردوه الى الله ورسوله مش معنى كده ان كلام الرسول واوامره ونواهيه وافعاله وحياته كلها مرجع مثلها مثل القران ؟
اما بالنسبة للتكفير فالكفر هو انكار معلوم من الدين بالضرورة حضرتك , وانا لست عالما ولا فقيها ولا مجتهدا حتى اصدر احكاما بالكفر على الاعيان لكن انا متبع فى هذا لمنهج علماء الامة فى تكفير من كان صاحب بدعة كفرية , يعنى لما واحد يقولى انا لا اؤمن بالرسول ولا بالقران اقول انا ماقدرش اكفرك وربنا بس هو اللى يكفرك ؟ طيب هاتعامل معاه ازاى حضرتك فى الامور التى تختلف فيها الاحكام بين المسلم والكافر؟ هل هاقدر ازوجه بناتى مثلا؟
لكن جواب مباشر على سؤالك بخصوص الصلاة لأن الرسول امرنا بأن نصلى كما رأيناه يصلى , والتقرب الى الله بالطاعات تكون كما امر الله , والا المشركين الذين عبدوا الاصنام كانوا على صواب لأنهم ما قصدوا بعبادتهم لها الا ان تقربهم الى الله زلفى .
عموما انا اعتقد ان الموضوع بالنسبة لحضرتك اكبر بكتير من مجرد التحقق والتدقيق فى السنة لكن يمتد لقبول السنة ككل ودا موضوع فعلا لا يسعه رد ولا بوست ولا اظن ان تسعه مدونة كاملة .
تحياتى واسأل الله ان يرنا جميعا الحق حقا ويرزقنا اتباعه وان يرنا الباطل باطلا ويرزقنا اجتنابه .

HafSSa said...

امين يا استاذ محمود و انا عندي بس نقطة يمكن حضرتك تشوفها عيب و غيرك يشوفها فضيلة
و هي اني للساف بفكر كتير اوي و بحب احلل كل شئ و اجيب له كذا فرضية
مش عيب
بالعكس بيخليني ملمة اكتر بديني و عن اقتناع و منطق اكتر منه حفظ حرفي لما سبقني ليه الاولين
لان دي اخطر حاجة بيعملوها الناس
انهم يفضلوا متبعين ما قاله الاخرون من غير تمحيص كل فترة و التانية و كلام على كلام يتراكم و توه الحقيقة في النص
مش معنى اني بستجوب شئ يعني بشكك فيه
ابدا
بالعكس
ممكن بكون عاوزة اثبته لكن بطريقة غير مباشرة
ارجو ان كلامي ده يكون مفهوم او له معنى و شكرا

تحياتي

راجى said...

استاذة حفصة
احب اشكرك على تعليقك الاخير على الاستاذ محمود وياريت واتمنى لانى باقدرك واعزك ان كلام محمود يكون له اثر ايجابى فى نفسك
ولكى كل تحية

راجى said...

استاذى محمود المصرى
ربنا يكرمك و يفتح عليك
يمكن اكون فى سن والدك لكن انا لا اخجل من وصفك باستاذى

HafSSa said...

شكرا يا استاذ راجي الفكرة كلها اني مش بحب احصر نفسي في توجه معين
اتعودت دايما اني اعرف الشئ و نقيضه و متوافقه و القريب منه
يعني اشوف الموضوع بوجهة نظر مختلفة و كل مرة من ناحية مختلفة
و كل مرة بفرضية غير مطابقة لما سبقها
و اللي يقع مني وقع العقل و المنطق و اشياء اخرى
بيكسب معايا و مش بتناز لعنه ابدا
يعني زي كاني بنقي الماس
الحر بس هو اللي بشتريه
هههههههههههههههه
ايه رايك في المثال الغالي ده
و مين عارف
مش يمكن بعد 20 سنة متكونش دي افكاري
هو الانسان ايه غير شوية افكار متكومة فوق بعضيها يا تنفعه و يمشي عليها يا متنفعهوش فيسيبها و يدور على غيرها
لكن التمسك بفكرة و منحى واحد فقط مدى الحياة،، فيالهي
تبقى مصيبة



تحياتي للجميع و اشكركم كلكم واحد واحد على ان الحوار كان فقط عرض لاراء و مافيهوش اي مسبة و قلة ادب من اي طرف
بجد احنا بنتطور و الحمدلله
مرة على مرة

اشكركم لكل كلمة فهمتها و كل مفهوم عرفته و كل فكرة جديدة تستحق الاشادة

تحياتي اخيرا بجد

DantY ElMasrY said...

أنا عارف حديث فى البخارى لا يقبله عقل وليس له دليل ويتناقض مع نصوص وأصول أخرى
والحديث مشهور جدا
الحديث اللى بيروى فرض الصلاة على النبى فى رحلة المعراج ومراجعة موسى عليه السلام للنبى صلى الله عليه وسلم أكثر من مرة ليعود الى ربه ليخفف الفروض بحجة أن بنى إسرائيل لم يطيقو الصلاة وضيعوها .
الحديث مروى فى البخارى بشكل مطول ووجه اللامعقوليه وعدم القبول يتلخص فى أن شريعة بنى اسرائيل ليس بها صلاة مفروضة على الشعب
فكيف يراجع موسى محمدا فى ذلك
لعلم من لا يعلم العبادة المفروضة على بنى اسرائيل كلها ذبائحتنقسم الى ذبائح سلامة وذبائح خطية وذبائح قربان أؤكد أن الله لم يفرض صلاة واحدة على بنى اسرائيل .
ولكن واضع الحديث فاته ذلك
كما كذب الشيخ الذى تحدث عن المرأة الدانمركية
وكذب المسلمون كلهم فى حكاية الشجرة التى رسمت بفروعها لفظ التوحيد بفروعها فى ألمانيا
فلا يمنع ان واضع الحديث شطح بخياله ووجد من يصدقه لمجرد اتصال رجال السند
واتصال رجال السند هو الفيصل فى صحة الحديث عند اصحاب علم القيل والقال
ولك شروط الاتصال اختلفت
فأحمد فى مسنده روى كل ما وصل الى سمعه من حديث بسنده
غير أن البخارى وضع شروطا لقبول الحديث عن طريق اتصال رجال السند
ولكن مشكلتى مع كل ما بذل البخارى من جهد أنى لا أصدق رجال السند المتصلين على شرطه
و كم كان ابى حنيفة سابقا لزمنه ولنا جميعا عندما اعتمد القياس العقلى اساس للإجتها عند تناقضه مع النص
على فرض ان النص منسوخ
ولو كان النص غير منسوخ لكن تناقضه مع العقل داعى لتواتر الحديث
ولكن الأحاديث المتواترة لا تتجاوز العشرة ولا تعد فى اصول التشريع من الأحاديث المهمة جدا
من ناحية اخرى
الفترة التى تم فيها تداول الحديث وسؤال الناس عن اقوال الرسول وافعاله كانت متزامنة مع حكم بنى امية الاستبدادى
فسيدكم معاوية استولى على الحكم وورثه فى اول انهيار لمنظومة القيم التى ارساها الرسول
ولا أقول الدولة
فالرسول عندما عرض عليه الملك قبل الهجرة قال والله لو وضعوا الشمس فى يمينى والقمر فى يسارى على ان اترك هذا الامر ما تركته
وهذا النص يؤكد ان الرسول لم يكن مصلحا سياسيا
ولا زعيما مطالبا بحكم وان كان بالعدل

كفاية لحد كدا ومستنى الرد لو فى حد من المتشنجين يطلعى
واللى على راسه بتاعه بيعمل مش عارف ايه عليها !!!!!!!!

بنت القمر said...

حفصه.... مجمود المصري
سعيده جدا بالنقاش ودي احترام طرفيه
ويبعد عنكم عين الحسود
حفصه بتسأل وتشغل مخها بادب
ومحمود بيرد بثقه المؤمن.. المحترم

كملوا
وحد يرد علي دانتي اثار نقاط كتيرة
تحياتي للجميع

بنت القمر said...

محمود المصري
القرأنين مش بس انكروا السنه القوليه لكن اعتمدوا علي انفسهم في تفسير القرأن
االبوست اللي جبت لينكه من عندي فيه لقاء مع محمد صبحي الراجل بيعرض فيه افكار صادمه
منها تزويجه لمسلمات من كتابيين وليه تفسيره الخاص للاايه
ممكن تقري كمان التعليقات
علي فكرة يا حفصه في التعليقات رد لشهروزة اللي كتبت البوستات دي كلها
وقالت ان الراجل كده شطح لان الرسول لم يثبت عنه انه زوج صحابيه لكتابي ولكن تزوج هو السيده ماريه القبطيه
ده كان تعليق شهروزة اشد من دافع عن القرأنيين
تحياتي

محمود المصرى said...

بسم الله الرحمن الرحيم

اخى الكريم الاستاذ راجى

ربنا يكرمك ويعزك ويزيدك تواضعا ورفعة لكنى لست استاذكم اخى ربنا يبارك فيكم

الاستاذة حفصة
اعمال العقل لا يدعو ابدا للأسف ولا اراه ابدا عيبا , لكن انا اؤمن ان العقل يمكن ان يضل بسهولة اذا لم يتم تنظيمه بقواعد وقوانين تحكم نشاطه وتمنعه من الزلل , واخيرا احيى حضرتك على الحوار الهادىء المحترم

بنت القمر

انا اعتقد ان الاستاذة حفصة انهت النقاش ولم يعد هناك ما يقال فكل منا طرح وجهة نظره فى جو من الاحترام المتبادل والصورة اكتملت لكل منا عن تفكير الاخر وتصوره ورأيه
اما بالنسبة لما اثاره دانتى المصرى فهو لم يطرحه للنقاش العلمى الهادىء لكن طرحه للمتشنجين وانا لست متشنجا وبالتالى اترك الرد عليه للمتشنجين اللى هو عاوزهم يطلعوله , اما لو احب ان يناقش بأسلوب هادىء كالنقاش مع الاستاذة حفصة فلا مانع ابدا لدى .
وبالنسبة للينك انا قراته وهاعلق عليه فى المدونة عندك .
تحياتى للجميع

DantY ElMasrY said...

أعزائى المتسامحين
لوحد رجع لواقعة خطوبة دينا بنت يعقوب على شكيم بن حمور وموافقة يعقوب وهو نبى على الخطوبة ورفض أبناؤه لها
ذلك الموقف الذى هو أصيل عند العرب
فالعرب لايزوجون الروم ولا الفرس ولا الأحباش .
وليس لذلك من تفسير إلا البداوة
وتفضيل زواج الأقارب وأبناء العم مفضلون على أبناء الخال
تحت شعار بيت الحماسة القائل
بنونا بنو أبنائنا -وبناتنا
بنوهن أبناوء الرجال الأباعد

Aardvark EF-111B said...

إحنا بجد شعب هايف نيييييك, لما تبقى تدوينة مباشرة و فجة زي دي و خالقة الجدل ده كله

أنا فهمت ليه سوق الفضائيات رائج للدرجة المخيفة دي

Hossam Hassan said...

ربنا يشفيكى يا بنتى .. اى حد عاوز يتكلم ومش لاقى حاجة يقولها .. يتفلسف ويستظرف .. الله يخربيتكو مليتو البلد

^ H@fSS@^ said...

صباح الخير يا حسام
ابقى عدي علينا كل سنة و لو مرة لو سمحت