احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Friday, February 22, 2008

Tuesday, February 19, 2008

to David Santos الى ديفيد سانتوس

Today i decided to write about david, The international blogger and great human being. although many of usK the arabic bloggersK were surprised to se your comments in our pure arabic posts, but i was delighted to find your comments in my blog and other blogs as well.
i discovered that you are a very beautiful human being, you dont care about problems of your conutry only , but in addition , you symathysie with any human issue happening in any place in the world. i discoverd that you are trying to build a cultural bridge between you and us with out any involvement from any third party. once you commented on a post of mine and said that you want to know the truth about us but not from the single sided american media.
david santos, thank you for trying to know us in a better way and giving us the chance to express it.
thank you for starting a bridge between you and us, and although most of us dont know how to speak portoguese and you dont speak arabic but at least there are steps taken, maybe the next generations will be able to communicate better than us.
david santos, thank you for your visits and the desire to communicate with us.
and as you always say " have a nice day, thanks for a great posting"




النهاردة قررت اني اكتب عن ديفيد سانتوس، هذا المدون الانسان العالمي الجميل


صحيح كتير مننا كانوا بيتشغربوا و يتضايقوا من تعليقاته لكن انا كنت بحبها


و تابعت ليه ردود و بوستات و فهمت وجهة نظره و اكتشفت ان الراجل ده انسان عالمي بجد


طبعا يمكن حد يسالني يعني ايه انسان عالمي الاول


حقول انه مش مهتم بس بقضايا بلده و مكانه و خلاص،لأ، بالعكس هو بيتعاطف مع اي قصة شخصية تتعلق بانسان احنا ممكن منخدش بالنا منه حتى لو قرينا عنه خبر


طبعا احنا عندنا مشاكل تكفينا من هنا ليوم القيامة بس الفكرة ان الراجل ده مقالش و انا مالي


تابعت مدونته على قد ما اقدر و لما كان بيكتب بالانجليزي او يترجم عربي عن طريق جوجل كنت بعرف جزء جديد عنه و اكتشف ازاي انه بيهتم بحريات الناس و حقوقهم بشك لعالمي جدا


يعني مش بس الناس اللي في البرتغال و خلاص


اهم حاجة اكتشتفها انه بتعليقاته عندنا بيحاول يبني جسر معرفة و تواصل بينا من غير وجود وسيط او طرف تالت


اعتقد مرة علق عندي في بوست قديم و قالي فيما معناه انه عاوز يعرفنا و يعرف عننا مننا احنا مش من خلال الة الاعلام الامريكية احادية النظرة و التوجة


للاسف اعتقد ان اغلبنا ان مكنش كلنا مبيعرفش برتغالي و العكس صحيح


لكن على الاقل ادينا بنحاول


الشئ التاني اللي فرحني لما دخلت عنده ان لقيت مدونين عرب و مصريين تانيين بيدخلوا عنده و بيعلقوا


فقلت كويس


صحيح ام العيال و كلبوزة و بيكتب بالرصاص اتخنقوا منه بس والله شكله طيب و محترم و كفاية ان هدفه نبيل


ديفيد سانتوس اشكرك انك حاولت و فكرت في شئ اعتقد اغلبنا و لا كان ممكن يفكر فيه


اعتقد ان احنا كنا ممكن ندخل عالم التدوين و نطلع منه من غير ما نجرب و لو مرةواحدة ندوس على زرار المدونة التالية


ديفيد سانتوس اشكرك لانك بتحاول توصلنا و تتواص لمعانا مع اننا مفكرناش في كده ابدا


شكرا لانك بدات جسر بينا و بينك طويل بالفعل لكن مؤكد حيجيي يوم و نقدر نكلمك برتغالي و انت تكلمنا عربي


شكرا ديفيد سانتوس


و شكرا جوجل طبعا






*the arabic script is not an exact translation of the english script.


النص بالعربي ماهواش ترجمة حرفية للنص بالانجليزي
بس الجملتين دول ترجمة حرفية لبعض
but these 2 sentences are.

Saturday, February 16, 2008

تم افتتاح مدونة جديدة انما ايه موز موز موز عالاخر
اتفضلوا هنا
ممكن تنضموا كشعب و تعبروا عن رايكوا و تدونا اقتراحتكوا و تقولوا نفسكوا في ايه
و اللي يحب يترشح لمنصب يتقدم و يشاور عليه و انا اطولهوله باذن الله
ده اذا المترشح جه على مزاجي

Wednesday, February 13, 2008

نظرية الصباع



بعلق لا بيا و لا عليا
و اذ بي افوجئ بتعليق من شخصية تدعي الاسلام يؤكد فيها هذا الشخص على اعطاءه كل ذي حق حقه و بالتالي فهو يعطي صباعه للمجتمع الدولي
بصراحة أنا اتلجمت، لأني حاولت اعرف انهي صباع هو بيتكلم عليه لان لكل صباع مقال؟
يعني مثلا لو شاور بالابهام لفوق فمعناه انه بيدينا علامة النصر
و لو شاور بالابهام لتحت يبقى بيدينا علامة الوكسة
طيب لو شاور بالسبابة لفوق يعني بينهانا عن فعل شئ
و لو شاور بيه متوجه لقدام يعني بيامرنا بشئ
و لو جينا على الخنصر لو قدر يرفعه لوحده مش حيقدر يوجهه لاتجاه معين لكن في لغة الاطفال رفع الخنصر معناه أنا مخصماكي يا وحشة عشان اخدتي لعبتي مني
و لو جينا للبنصر فهو اصعب في الرفع و الاتيان بحركة خاصة و فريدة بيه هو لوحده و عادة يستخدم في حمل الخواتم سواء كانت للزينة او لتنبيه البشر اني مرتبط او مرتبطة
و اخيرا لم يتبقى لنا غير الوسطى و سواء رفعها المدون المتاسلم لاعلى او خفضها لاسفل فكلتا الحالتين هي علامة جنسية منحطة تدل على سفالة اخلاق فاعلها اذا فعلها في حضور العامة و بالذات اذا اقر فعلها للمجتمع الدولي
صدقت يا عباس لما شرحت نظرية ولاد الكلب
ولكن الان
عزيزتي المدونة، عزيزي المدون
أي صباع تحبذ اعطاءه للمجتمع الدولي ام انك لا تحبذ اعطاء أي صوابع للمجتمع الدولي؟؟
دمتم

Monday, February 11, 2008

الجوز الخيل


يوم سخيف

و تعليقات اسخف من مدون متخلف عقليا في مدونة صديقة

و زملاء عمل أسخف من الرزالة

و مشاوير مش بتخلص و لا في حاجة راضية تنتهي

و رحت اشتري سندوتش من كنتاكي و لما رجعت البيت لقيتهم ناسيين يحطوا الاكل

بجد بكل بساطة سايبين الصندوق فاضي

يعني انا دفعت فلوس عالفاضي

ولما اتصلت بالشكاوي كنت حعيط مش من سندوتش

بس من القهر اللي بيحصل في كل حاجة صغيرة كانت او كبيرة

وتلفون مقطوع

ليه عشان لسة الفاتروة حتيجي كمان اسبوع بس كيوتل حبت تريحني من دفع مبلغ و قدره و قالت تقطع الخط من النهاردة

طيب ليه يا كيوتل؟

محدش يعرف المنطق بتاعهم

عادي

و حتى ركنة قدام البيت ملقيتش

عادي برضو

فركنت في اول الشارع و مشيت لغاية بيتنا

عادي جدا عشان محدش يقول اني متدلعة بس الجو مكنش يشجع عالمشي يعني

و لما رجعت البيت اخيرا اتصلوا بيا من الشغل

"

انت مخلصتيش الريبورت اياه؟"

انا:لا مخلصتوش، انا لسه مستلماه النهاردة و فلان عارف انه بيخلص مش اقل من خمس ايام.

طيب هو عاوزة بكرة الصبح على مكتبه

انا:حاضر

ضحكة خبيثة جدا و ادي دقني لو شافه

لكن

هناك دائما امل

بمر على المدونات و اعترف اني مش بروح عند رفندل غير كل حين و مين

و لما رحت لقيت الحاجات الحلوة دي

فكشرا يا رفندل

و شكرا لكل من أبدع الجوز الخيل
************************
شكر واجب جدا يا جدعان لبنت القمر اني عرفت اعمل حاجة كنت بحلم بيها من يجي سنة و شويتين الا و هي اني اعمل الحركة الخبيثة و اكتب اسم مدون او ارجع لموضوع لكن بدل ما كنت بحط اللينكات بشكلها البدائي و افضل اجري ورا يحيي المصري عشان هو يظبطها و الواد يا حبة عيني كان شكله خلاص عاوز يقطع علاقتنه التدوينية بيا
بقيت اعرف اعملها لوحدي
دي سهلة خالص جدا اللي عاوز يعرف يسالني و انا مش حبخل عليه
عقبال الريدر و عقبال ما جوجل تخليه في سهولة وضع اللنكات بالشكل الظريف ده
وشك حلو عليا يا رفندل
ملحوظة: طبعا انتوا واخدين بالكوا من احداث النعمة و ان كل اسم وارد هنا حاطله لينك
ههاهاااهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاهاه

Sunday, February 10, 2008

ألف مبروك أو شيل الريدر حط الريدر

طبعا احب اهني االسيد الرئيس و كل من والاه أو استعداه بمناسبة حصول المنتخب القومي المصري على كاس الامم الافريقية المتحدة و بالمناسبة دي وصلتني شوية تهاني من ام رانيا في القدس و ام سليم في دبي و غزةو عيلة ابو خمسة و خميسة من السنبلاوين و ده انما يدل على تماسك الشعوب العربية بس في الكورة
كويس كويس ماشي
و انا من منبري هذا بحيي كل اللعيبة الشداد اللي كنت اول مرة اعرفهم و اتفرج عليهم و اشوفهم النهاردة
شكرا للحضري الا مافيه كورة عدت من ايده لمرمانا
شكرا لزيدان المصري
شكرا لشحاته طبعا و الغريب اني كل وقت المباراة كنت بردد التيمة القديمة بتاعت حسن شحاتة نزل الملعب لقى الخطيب قال مش حلعب
و مش قادرة اعرف ليه كنت بقولها طول الوقت و ايش دخل خوف شحاتة من الخطيب من يجي 20 سنة و اكتر في مباراة النهاردة لكن هي دي انا و ما خفي كان اعظم
و طبعا شكرا لابو تريكة على الهدف الجبار اللي جابه بمساعدة زيدان و شكرا لمتعب و زكي و عبدالسلام و محمد احمد و لجمهورنا المصري المقدام
و بالمناسبة دي احب استعطف الجمهور الكريم سواء التدويني او الكروي و اقولهم
ممكن حد يساعدني اني احد ريدر خاص بيا
لاني غلبت و الذل مش حلو
بنت القمر ساعدتني بما فيه الكفاية و انا مش عارفة اعمله
بقالي داخلة على شهرين و مش عارفة اعمله و مش عارفة اكتشف المشكلة فين
ميغركوش الريدر اللي عندي دلوقتي لاني اخدته من بنت القمر خبط لزق و لما حطيته طلع بيجب محطاتها هي
قصدي مدونتاها هي
طبق الاصل مدوناتها هي لا بوست قل و لا بوست زاد
و لما انا حاولت امشي على الخطوات اللي في حساب الجوجل بتاعي برضو مش نافع
يعني انا اخترت المدونات اللي عاوزاها تظهر في الريدر بتاعي و كله تماما بس مش عارفة اظهرهم على المدونة و مش لاقيه حاجة تساعدني
ارجوكم اعطوني هذا الكود و الخطوات
والله الموفق
الله
التدوين
جوووووجل

Friday, February 1, 2008

تاج غريب المضمون

هل توافق علي حذف خانة الديانه من البطاقه الشخصيه؟

المشكلة مش في اني اعارض او اوافق، الموضوع كله يتحل بحاجة بسيطة جدا، عدم الحجر على حرية المواطن في التغيير بين الديانات او عدمها من اصله و اذا ده حيسبب مشاكل يبقى نحذفها من اساسه و دمتم.


ما رايك في المثليين؟هل تري انها حرية شخصيه؟ هل توافق علي الاعتراف بالمثليين؟هل لك اصدقاء من المثليين؟

رايي انهم ناس و بشر زينا زيهم لكن تختلف اراءهم عننا في ذوقهم الشخصي و دي حاجة مقدرش افرضها على الناس بالنسبة للموافقة فانا مش فاهمة يعني لو تخيلنا ان كل الناس رفضت الاعتراف بيهم هل مثلا حيختفوا؟ لا ابدا حيفضلوا موجودين و ممكن يكتروا .




هل تعتقد بوجود اضطهاد للمسيحيين في مصر؟
اعتقد انه في اضطهاد لكن مش كبير اوي حتفضل في حكايات عن قصص للاضطهاد بس لسه في ناس كتار عايشين مع بعض بكل حب و حسن عشرة


من هو الشخص الذي تختاره لرئاسة الجمهوريه؟
عمرو موسى و اعتقد ان ده راي ناس كتيرة و الا مكنش استبعد من الخارجية و اترمى في الجامعة العربية



اذا قمت بتاسيس حزب سياسي ،فمن هم الاشخاص الذين سوف تضمهم للحزب ليشاركوك الحكم؟
تحديث مهم جدا
يسري فودة وزارة الاعلام
انيس منصور وزارة الثقافة
نجيب ساويريس وزارة الاقتصاد
وائل عباس وزارة الداخلية
زبيدة الحرملك وزارة الشؤون الاجتماعية
كلبوزة سمباتيك وزارة التموين و مستشارة الامن القومي
عباس العبد وزارة الكتب (شعارها كتاب لكل مواطن)
جدو العزيز وزارة الخارجية
هاني انتوك وزارة البيئة ومدير حديقة الحيوان و رئيس هيئة الرفق بالحيوان و مكافحة انفلونزا الطيور
يحيي المصري وزارة التربية و التعليم
حسن الهلالي وزارة الأوقاف و الشؤون الدينية
مصطفى اسماعيل وزير شؤون اعالي النيل و رئيس هيئة السد العالي وسفير مصر في اوغنده
محمد المصري محافظ الفيوم و مدير مهرجان القاهرة السنمائي الدولي و مندوب مصر الدائم في جامعة الدول العربية
سندريل وزيرالشباب و الرياضة و مندوب مصر في الامم المتحدة
نسرين بسوني رئيس هيئة الاذاعة و التلفزيون و السنما و المسرح بالمشاركة مع محمد المصري و كمان معاها هيئة تنشيط السياحة
ذوالنون المصري مدير المتحف المصري و المصنفات و رئيس هيئة الرقابة على المصنفات الفنية و مدير وزارة مصلحة الجمارك
دانتي المصري رئيس مجلس الشعب و نائب رئيس محكمة النقض و صاحب مصنع الاسمنت الوحيد في العالم كله
محمد عبدالغفار رئيس اتحاد المصري للكرة الطايرة و سفير مصر في انجولا
بنت القمر وزارة التعليم العالي و البحث العلمي و شؤون صغار الموظفين و هيئة الطاقة الذرية
ارضفارك وزير الدفاع و قائد المركبة امينوفيس للصعود الى زحل و رئيس هيئة قناة السويس و مضيق هرمز
الجحيم هو الحقيقة وزارة الزراعة و مدير مركز الاستشعار عن بعد
الرافتاني مدير مجمع اللغة العربية و رئيس جامعة القاهرة و الهيئة العامة لمترو الانفاق و التكتك
نوارة نجم مندوب وكالة رويترز و الاسوشيتد برس و مدير تحرير الاهرام و الاخبار و الجمهورية و الوقائع
مينا زكري رئيس مجلس ادارة مصر للطيران و هيئة الاتصالات السلكية و اللاسلكية (عشان عنده لاب توب و ماشي بيه طول النهار فيقدر يتابع حركة الطيران)؟
و باقي المدونيين هم اعضاء مجلس الشعب و الشورى و المجلس الاعلى للصحافة
بدوي الاول عشر رئيس جهاز المخابرات
هرطقة وزير الوزارة اللي بتراقب الوزارات التانية
و في اتنين مدونين مش حذكر اسمهم لاني بحبهم اوي
دول بقى حعينهم جواسيس لحسابنا على اسرائيل و اول ما يوصلوا ابلغ عنهم طوالي و ساعتها يوروني شطارتهم بقى



هل توافق علي مشاركة الاقباط و الاخوان في حكم مصر؟

اوافق على الاقباط طبعا لانهم مش داخلين الحكومة بصفتهم الدينية لكن الاخوان و لا ممكن ابدا لانهم داخلين بصفتهم الدينية و ده في ظلم لناس تانية اولهم المسلمين التانيين اللي مش متفقين مع سياسات الاخوان فما بالك بغير المسلمين؟




ما هي افضل مدونه زرتها؟
الوعي المصري و حجاب نقاب و اشياء اخرى




هل توافق علي الزواج من مطلقه؟
مينفعش ارد على السؤال ده بس حقول ومالها المطلقة؟؟



اذا انجبت ولدين و بنتين ، فاي الاسماء ستختارها لهم؟

مش حقول الاسماء الحقيقية اللي نفسي فيها لحن حد ينطس في عقله و ياخدهم مني لذلك الاسماء اللي حقولها هنا ممكن التداول بيها
ممكن اسميهم مسعد و عاطف و البنات تفيدة و شلبية


هل تعتقد ان توريث الحكم في مصر سيحدث فعلا؟

بص التوريث زي ما احنا متخيلينه مش حيحصل بمعنى ايه؟ بمعنى ان مبارك حيموت حتقوم انتخابات عشان يشوفوا مين يمسك الحكم بداله جيمي حيرشح نفسه عن الحزب الوطني و بما انهم اغلبية فحيكسبوا يعني حيكسبوا و بكده حتكون انتخابات نزيهة و حرة و راحت علينا بسبب اسباب تكنيقية، بس خلاص.

ما هو افضل انجاز لمبارك ؟ و ما هو اسواء سقطات حكمه؟
ممممممممممممممممممممممممممممممممممممممممممممممممممممممممممممممممممممممممممممممممممممممممش عارفة ده سؤال صعب صعب صعب جدا



لمن تمرر هذا التاج؟
لاي حد و لكل حد بس انا ليا سؤال
مين اللي بيألف التاجات دي؟ اصل كل مرة الاقي تاج عند مدون و يكون مبعوتله من حد طيب مين الفه من الاصل؟؟

مستشكرة جدا