احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Monday, November 26, 2007

نفس اخر في حجرة هي حرة


نقلا عن مدونتها الحرة

"
" نَـفَـس آخر فى الحجرة "
.
.
أول أولادى
الاثنين صباحا
الموافق
26/11/2007
هيبقى فى السوق خلاص
عن
دار
اكتب للنشر و التوزيع
هيكون متوفر فى الأماكن التالية
كبداية
مكتبة الهيئة
بساقية عبد المنعم الصاوى
*
*
مكتبة البلد
بجوار سيلانترو
بجوار الجامعة الأمريكية
*
*
مكتبة عمر ستور
فوق فلفلة
بشارع طلعت حرب / وسط البلد
*
*
مكتبة سندباد
بجوار مدبولى \ طلعت حرب \ وسط البلد
*
*
مع باعة الجرايد
توزيع الجمهورية
و لما تتنفذ خطة التوزيع اللى من اول السنة أكيد هقول
*
*
و حفلة التوقيع
ان شاء الله الاسبوع القادم
بوسط البلد
مش محتاجة أقول ان الدعوة عامة
جدا
و الميعاد هيتحدد كمان يومين
على الأكثر
*
*
سعر النسخة
5 جنية
.
.
على الهامش
هي سعيـــــــــــــــدة .. كما لم تكن من قبل
"

ربنا يسعد كمان و كمان

Saturday, November 17, 2007

حملة وقع لإبقاء القبض على سامينا مالك


حملة وقع لإبقاء القبض على سامينا مالك

وقع معايا حتى نحافظ على العالم نظيفا آمنا خالي من الإرهاب و التخلف الفكري السميني
بكل بساطة دي حملة للرد على حملة الزملاء التانيين اللي محتجين على إلقاء القبض على سامينا مالك
نبذة بسيطة عنها
بريطانية من أصل هندي مسلمة الديانة، كتبت أشعار تصف فيها كيفية جز العنق للآدميين و بطريقة مفزعة جدا و في قصيدة أخرى وصفت كيف انها تتوق للشهادة
يعني كلام أصلا عيب انه يتقال عليه أدبي أو شعري ماشي بس بريطانيا مقبضتش عليها بتهمة الشعر السئ لا سمح الله
المحكمة البريطانية قبضت عليها و هي رهن الاعتقال حاليا و في الرابط التالي كلام عن الموضوع وماذا كان محتوى اشعارها و كيف توصل اليها النظام البريطاني و يروي الموقع انه عند صدور قائمة التهامات الموجهة اليها اجهشت بالبكاء
http://www.kifaharabi.com/ArticleDisplay.aspx?ArticleId=12997&ChannelId=83&EditionId=224

طيب حلو اوي يعني هي عاوزة تستشهد و بتقول ده في اشعارها، يعني فكرة انها عاوزة تفدي الاسلام بنفسها واردة عندها و نفسها تقدم له أي شئ، طيب ما اديكي بتتقدمي لمحاكمة و الغرب الكافر بيتهمك، مش ده جهاد؟؟ زعلانة ليه بقى؟؟
يعني هي عاوزة تتمم مشيئة ربنا و تكمل رسالتها اللي هي مقتنعة بيها نقوم احنا نيجي احنا نمنعها ليه؟؟
ليه نحرمها من حصولها على الشهادة او انها تفدي الاسلام و المسلمين بروحها او بسنين عمرها و بحاضرها و مستقبلها؟؟
الموقع كمان بيقول ان السلطات البريطانية توصلت اليها بعد ما لقيوا اسمها في ايميلات واحد مشتبه فيه من الإرهابيين، هل دي صلة و لا مش صلة؟؟ و لو دي تعتبر صلة يبقى من حق بريطانيا و حسب قانون الإرهاب الدولي الحالي انها تقبض عليها
http://www.aljazeera.net/NR/exeres/C1169D80-AEA8-4A7E-B040-DC3384B669B3.htm
رابط على وجود علاقة لها بارهابي هرب من بريطانيا الى لبنان
في كمان حبة أدلة عقلية على انها مؤكد لها اتصال بشكل ااو باخر مع جهات ارهابية
حبتدي و اسال السؤال التالي
كام لاجئ سياسي اسلامي موجود و عايش في بريطانيا؟؟ كتاااار منهم مثلا حمزة المصري اللي اخيرا بريطانيا حتسلمه لامريكا. طيب لما هو معروف انه ارهابي اسلامي بريطانيا مقدمتهوش للمحاكمة ليه؟؟ عشان معندهاش و لا دليل مادي فعلا ضده وبالتالي مش عارفين يلبسوه تهمه، ليه؟ لانهم فعلا بلد بتحترم حرية الفرد و حقوق المواطنة بشكل كبير جدا.
اذن فمعنى انهم مش عارفين يتهموا حمزة المصري بجلالة قدره و يمسكوها هي يبقى مؤكد فيه دليل على وجود اتصال و لو ضعيف بينها و بين جهة ارهابية، اضف الى ذلك اشعارها، فالاجهزة البريطانية مش حتستنى لغاية ما هي تفجر نفسها فعلا و ساعتها يقولوا يا ريت اللي جرى ما كان . يعني أي حد في مكان بريطانيا كان حيعمل نفس الشئ
لو هي بس كاتبه اشعار حنقول ماشي بس تكون كاتبه الاشعار و كمان لها صلة بمشتبه فيه و كلامها كله عن ازاي نفسها تشارك الامة الاسلامية فعل الخير اللي هو طبعا قتل الغرب الكافر اللي ياللغرابة هي عايشة فيه؟؟؟؟؟؟؟؟؟؟؟؟؟
يعني كل ده و مش عاوزين السلطات البريطانية تقبض عليها؟؟ طيب دي لو كانت السلطات مقبضتش كنت أنا قبضت عليها و ريحتنا منها و بعتها لبعيييد عشان تروح تفجر نفسها براحتها من غيرما حد يتاذى منها.
لازم ناخد بالنا من حاجة تانية اللي هي ان سامينا بتشتغل في مطار هيثرو؟؟ يعني ممكن فعلا يكون في حد من جبهة ارهابية بيحاول يشغلها معاهم عشان مين عارف ممكن بكرة تبقى عين ليهم و شخصية ناصحة و يستخدموها ف يزرع قنابل في المطار و بما انها موظفة هناك سواء في استاند بيع جرايد او في هيئة المطار نفسها فمؤكد سهولة دخولها و خروجها من المطار و معرفتها بمواقع حاجات كتيرة حتسهل العملية دي، اصحوا يا بشر.ولا عاوزين نستنى لما قنبلة تانية تتفجر واحنا اللي ندفع التمن؟؟
ادي كمان رابط عشان محدش يقول اني معتمدة على موقع واحد مع اني و حسب نظرية حرية التعبير عن الراي ممكن اقول أي كلام و مجبش عليه ولا دليل، مش صح كده؟؟
http://www.aljazeera.net/NR/exeres/2919B217-E625-4CE0-B587-1E0421D42DF7.htm

حاجة كمان احب افهمها عن هذه السامينا ، مش هي مسلمة برضو؟؟ مش سيدنا محمد قال المسلم من سلم الناس لسانه و يده؟؟
و بما انها مسلمة يبقى المفروض انها تمشي بالقول ده وتعمل بيه ، فمثلا كريم عامر مش حقدر اقله الرسول قال لان مرجعيته غير مرجعيتي ، لكن سامينه هانم بما انها عاوزة تشارك الامة خيرها مش الاولى بيها تسمع كلام رسولنا من باب ان الاسلام رسال سلام و الحاجات دي؟ ولا هي بتاخد من الاسلام اللي على كيفها و الباقي تفجره و ترميه البحر؟؟
خد عندك دليل تاني في مسرحية اسمها
my vield lady
على وزن
my fair lady.
المسرحية كوميدية و بتنكت على الحكم الاسلامي القاسي في افغانستان و لبسوا الممثلات نفس ملابس الافغانيات بس بدل الازرق خلوه بمبي مسخسخ ، حاجة فكاهة يعني. المسرحية في جولة حاليا و من ضمن الاماكن اللي كانوا حيزوروها كانت جامعة في اسكتلنده ، اول ما اتحاد الطلبة المسلمين اعترض على ان المسرحية دي بتسئ للاسلام الجامعة راحت طوالي موقفة عرضها و منعوا الممثلين من اداء المسرحية، ممكن حد يقلي في انهي دولة عربية اعترضوا طلبة على شئ الا و كان مصيرهم الحبس و ما هو افظع من كده ؟؟
كتلخيص
سامينا تكتب شعر، سامينا تقمع بامية، أنا ماليش دعوة، بس متجيش تهزر في موضوع زي بتاع الارهاب و بعدين تعيط و نيجي احنا نمسحلها دموعها بكلينكس ونحرق دمنا. بس

تحياتي


رابط مجلة الراي

http://www.alrai.com/pages.php?news_id=181227
تحديث اول
بعد قراءت اخرى لسامينا اللي سانة السكينة لقيت ان التسلسل بتاع الاحداث بيقول شئ واحد ان السلطات البريطانية مقبضتش عليها بتهمة الشعر، لا هما كانوا بيقبضوا عليها لوجود صله مع ارهابي مشبته فيه و لما فتشوا البيت لقوا فيه اشعارها
يعني التهمة الاساسية الاشتباه في ارهاب ثم وجود الاشعار و ليس العكس كما يريد البعض لنا تصديقه
تحديث تاني
خدوا بالكم احنا بقينا مخبربن، ده طبعا مش كلامي ده كلام نوارة اللي متهمة اي شخص مناهض لسامينا انه بيتكلم زي المخبرين و انه لا يفرق عنهم شئ
يعني نوارة بتدافع عن حرية تعبير سامينا لكن احنا مينفعش، احنا لازم نختار ما بين اتنين يا نوافق نوارة على كلامها و نبقى ناس محترمة يا اما لو اختلفنا معاها في الراي نبقى مخبرين و مش بعيد بنشتغل مع الاف بي اي او الامي اي فايف او سيكس او اقله بنشتغل في امن الدولة و المخابرات المصرية اديني خبرتكوا عشان اللي عاوز يتراجع و خايف من نوارة يتراجع
http://tahyyes.blogspot.com/2007/11/blog-post_18.html

Friday, November 16, 2007

Sunday, November 11, 2007

كلام مدخنن

هو: بتعملي ايه دلوقتي؟
هي: كنت سرحانة في دخان سيجارتي.
هو: سرحانة في ايه؟
هي: حاجات كتير.
هو:في علاقة بينهم؟
هي: يمكن.
هو: و وصلتي لأيه؟
هي:ولا حاجة!؟
هو: طيب و الحل؟؟
هي: عمر الحلول ما كانت مكتوبة في دخان سيجارة.
هو: "متسائلا" يعني مستفدناش حاجة؟؟
هي: انا قلت ان الحلول مش حنلاقيها في دخان سيجارة ، بس م م م م م م
هو: بس ايه؟
هي: يمكن الدخان و هو طاير شاور لي على حاجة بعيدة هناك
هو: شفتيها؟
هي: لأ.
هو: ليه طيب؟
هي: مركزتش اوي بالي مشغول باللي هنا
هو: متحمليش هم كتير يا حبيبتي
هي: تسلم لي يا حبيبي

الحوار ده بيكون قبل الجواز و في فترة الخطوبة او في اول فترة الجواز
الحوار التالي بعد الجواز و مرور فترة لا يستهان بها تؤدي لعدة انهزامات

هو: بتعملي ايه دلوقتي؟
هي: كنت سرحانة في دخان سيجارتي.
هو: سرحانة في ايه؟
هي: حاجات كتير.
هو:في علاقة بينهم؟
هي: يمكن.
هو: و وصلتي لأيه؟
هي:ولا حاجة!؟
هو: طيب و الحل؟؟
هي: عمر الحلول ما كانت مكتوبة في دخان سيجارة.
هو: "متسائلا" يعني مستفدناش حاجة؟؟
هي: انا قلت ان الحلول مش حنلاقيها في دخان سيجارة ، بس م م م م م م
هو: بس ايه؟
هي: يمكن الدخان و هو طاير شاور لي على حاجة بعيدة هناك
هو: شفتيها؟
هي: لأ.
هو: ليه طيب؟
هي: اصلي مكنتش لابسه نضارتي اطارها بقى بيوجعني اوي
هو: "بخيبة امل" يبقى لازم نعلمك عملية الليزك دي
هي: "مبتسمة" حلو، هات بقى فلوسها و مصاريف ايد الدكتور.
هو:!!!!!؟؟؟؟؟

Wednesday, November 7, 2007

الى القارئ

الزنبقات السود في قلبي
و في شفتي اللهب
من اي غاب جئتني يا كل صلبان الغضب؟
بايعت احزاني
و صافحت التشرد و السغب
غضب يدي
غضب فمي
و دماء اوردتي عصير من غضب
يا قارئي
لا ترج مني الهمس
لا ترج الطرب
هذا عذابي
ضربة في الرمل طائشة
و اخرى في السحب
حسبي باني غاضب
و النار اولها غضب
مش عارفة ليه فجاءة افتكرت الابيات دي و مع ان معناها هو قمة الاحباط و القرف و الياس الانساني لكني حسيت انها علامة نصري و زي ما يكون غضبي انتصر على الشر لانه كان غضب حق
اليوم استعيد جزءا من استقراري
تحياتي

Sunday, November 4, 2007

قصة فرعونية، ما اشبه اليوم بالبارحة

"
فقال ابنوم:
بدأت المأساة بضعف الملك بيبي الثاني لعجزه و طعونه في السن و ذهوله عما يجري حوله و تسليمه باكاذيب المنافقين من حوله، فأستقل حكام الأقاليم بأقاليمهمو استبدوا بالاهالي، فرضوا المكوس الجائرة ، و نهبوا الأقوات ، و اهملوا اي اصلاح للري و الارض، و انضم اليهم الكهنة حرصا على أوقافهم، يبيحون لهم بفتاواهم الكاذبة كل منكر، غير مبالين بانات الفقراء و ما يعانون من قهر و ذل و جوع، و كلماقصدهم مظلوم طالبوه بالطاعة و الصبر و وعدوه بحس الجزاء في الاعالم الاخر، و بلغ منا الياس غايته، فلا حاكم يعدل، و لا قانون يسود، و لا رحمة تهبط، فانطلقت بين قومي أدعوهم الى العصيان و محاربة الظلم بالقوة، و سرعان ما استجابوا الى النداء، فحطموا حاجز الخوف و التقاليد البالية، و وجهوا ضرباتهم القاتلة الى الطغاة و الظالمين، و سرت النار المقدسة الى جميع البلاد و انطلقت قذائف الغضب الاحمر على الحكام والموظفين و رجال الدين و المقابر."
الظاهر ان الكهنة على جميع اختلاف مرجعيتهم الدينية كانوا دايما كده لا يهتمون الا بجمع المال و الضحك على ذقون المجتمع و بالذات فقراءه

Friday, November 2, 2007

اما النصرانية و اما الكفر


وردني التعليق التالي من مدون اقل ما يمكن ان يوصف به انه سخيف و رذل و بيلصق بغرا يعني لو دخل لحد من معشر المدونيين الكرام يعرف انه مش حيخلص منه و لا من قرفه ،غتيت لابعد حد . حاولت اني ابعده اكتر من مرة عن مدونتي لكن هو بيدعي الحرية فشايف من وجهة نظره اني مادام انا فتحت بلوج اذن يبقى مشاع لكل واحد و اي واحد يعدي ، انا معنديش مشكلة في دخول اي شخص البلوج لكن لما نختلف في الراي و هو يصر اني غلط و هو صح ، طيب يريح نفسه و ميجيش تاني لكن طبعا هو عقله اصغر من انه يفهم او يستوعب الفكرة البسيطة دي. المدون اياه شاطر جدا انه ينقل ردوده من كتب و يستعين بمراجع و بيرد ردود على وزن المسابقات المدرسية اللي كنا بندخلها زمان و احنا صغيرين في المدارس و نبتدي ردنا بسم الله الرحمن الرحيم فلان الفلاني من سنة كذا منطقة كذا. و مع انه بلغ من العمر تسعة و عشرون سنة الا انه عقليته لم تتطور عن سن 12 او 14 كأعلى مستوى ممكن يوصل ليه طالب شاطر في الاعدادية. طبعا في زملاء مدونينن حيقولوا لي انه ميستاهلش انك تكتبي عنه بوست بحاله و لكن كما في حالة وجود وباء في مجتمع معين فأن هذه الحالة نفس الشئ و وجب عليا اني احذر معشر المدونين المحترمين من وجود عقلية بالمنظر ده.
اسباب الصراع بدات في مدونة الزميل ذو النون في بوست ليه نشره يوم عشرة رمضان في ذكرى حرب اكتوبر المجيدة لصاحبها الرئيس البطل محمد انور السادات و من معه من قيادات بطلة. دخل المدعو فارس ليعلق و يا ليته لم يعلق، تكلم بطريقة العارف بالأمور و الفاهم لجميع النظريات و المقدم لجميع الحلول و ان رايه هو الراي و لا يوجد ما هو احسن من ذلك و تكلم بطريقة ان ذو النون لا يعرف و انه من المؤكد انه لم يقرا كذا و كذا من الكتب ... المهم انه ارغى و ازبد كتير بالباطل طبعا و عالفاضي و ان قال ايه ناصر هو اللي خطط للحرب لكن مكنش عنده وقت!!!! كلام يعني ميتردش عليه غير بكلمة احيه يا ابو سوسو احيه، طي بابنك معملش الحرب ليه؟؟
انتهى النقاش بعد ما عرفت ان شخص كهذا سوف يظل على ما هو عليه الا ان يشاء الله تعالى بانزال الرحمة و نعمة الفهمعلى مخه. بانتهاء شهر رمضان انتهى مسلسل الملك فاروق. و المسلسل احدث موجة تساؤلات بين الناس سواء كمعارضين او غير معارضين لحكمه و لكنه ازاح الستار عن عصر لم نكن لنعرف عنه شيئا الا من بعض الكتب البسيطة و ذلك لان اغلب الكتب الاخرى اما غير متاحة و اما غير موضوعية و تتحدث بشكل غير علمي. كتبت موضوع اول عن الملك فاروق و كان جل حديثي انه اخيرا تم اظهار وجة اخر مغاير لما تعودنا عليه عن الملك و عصره.
ظهر بوست اخر لي موضوعه شخصي جدا و مع ذلك فوجئت بهذا الدعسوقة المتدلية يعلق على بوست الملك فاروق و يتمسخر على اشعار بيرم التونسي التي وردت ككلمات الاغنية لتترات البداية في المسلسل. لم ينفع معه الحوار و ظهر لي انه غارق و موغل في الجهل بابسط الحقوق و الحريات الفردية و لكن طبعا كاي ناصري لا يعترف بوجود حرية شخصية او حرية اعتقاد فكر أو انني من الممكن ان اكون مسلمة و لكن ليس عليا الزاما ان اكون متفقة معاه باي نسبة حتى يعترف هو بي كمسلمة . نسيت ان اوضح انه يعتقد نفسه المهدي المنتظر او الشيخ السيستاني او البابا بولس الثاني فتعليقاته دائما تتكلم من منظور انه يعرف و انت لا تعرف و هو يفهم و انت لا تفهم و هو متاكد و انت لست متاكد و هو قرا و انت لا تقرا و هو يقول لك ما هو صحيح و مفيد لانك انت لا تعرف مصلحتك فين.
تبع البوست الشخصي بوست اخر لي عن مجلة روزاليوسف التي وجدت عددا لها مخصص لشتيمة الملك فاروق و اظهاره بنفس الصورة التي كنا معتادين عليها من مظهر سلبي. نشرت ما قاله صحفييو روزا و نشرت تعليقي عليه. بالطبع قرر انه كعادته هو الصح و اني غلط و اخذ ليعلق و افهمته و حاولت اكثر من مرة انه اذا لم يعجبك كلامي فلا تأتي و لكن تابى نفسه الغريبة ان تفهم هذا الطلب . بدات الردود بيننا تاخد منحنى اخر حتى فوجئت به مرة اخرى يظهر لي مثل الفرقع لوز في مدونة اخرى لي اسمها ليالي الصفا و يتهمني اني كلامي كلام كفر و اني لا يمكن ان اكون مسلمة و اني بالتاكيد نصرانية و اني لو مسلمة فيالها من كارثة حطت على العالم الاسلامي. يعني كان العالم الاسلامي كويس و مافيهوش و لا مصيبة و انا اللي جيت و بوظت الصورة الاسلامية، بس يا ترى بوظتها في نظر مين بالظبط؟؟ مين مهتم يبص علينا يعني او شايفنا حاجة يعني؟؟و من خلال متابعتي لردوده في عدة مدونات وجدت انه يتشدق بكلمات حجمها كبير اوي عليه من مثال الحرية و الديموقراطية و المساواة و حقوق المواطنين و الخير و الوطنية و و و و في سؤال تم توجيهه له عن من هو الاكثر احقيه و مواطنة بالوطن و العروبة هل هو المسلم العربي ام المسيحي العربي فرد قائلا ان الاثنين واحد فليس للدين ان يقلل من عروبة شخص اذا لم يكن مسلما. حلو اوي ولكن في اول فرصة جاء ليقول عكس ما يعتقد و يتهمني اما بالنصرانية و اما بالكفر و كانه لا يوجد خيار ثالث او رابع و كأن النصرانية تهمة وهذا الفارس لا يعرف ان الله تعالى خلق الناس مختلفين ليتعارفوا و ليس ليحجروا على اراء بعضهم. و لكن مع من نتحدث؟ للاسف مع اراذل الناس و اتفه العقول
و هذا هو نص تعليقه على مدونتي و ها هو يتهمني بأني مؤكد نصرانية لاتكلم مثل هذا الحديث او كافرة كأنه اطلع على قلبي مع العلم ان الله تعالى هو فقط المطلع على القلوب أو كأن النصرانية شئ سيء . للتنبيه لقد بدا تعليقه بالاستاذة الفاضلة حفصة ، الله العالم اذا كان يكتبها للتريقة و انقاص شاني فأن شاء الله مردود عليه خبثه و اذا كان يريد بذلك ان يظهر انه مؤدب و انه تكلم معي بكل ادب و من ثم يبدا في الشتيمة و التكفير في متن التعليق نفسه فلا اقول له الا لعبتك قديمة يا فندم روح العب غيرها
"

فارس عبدالفتاح said...
الأستاذة الفاضلة / حفصه مع احترامي وتقديري إن الإباحية في الأدب والفن يخالف شرعنا الحنيف فعليك أن تحاذري من استعمال كلمات غامضة وغير مفهومة أو توحي باللحاد والشرك واني اقتبست من كلامك في هذا البوست وتقولين بالنص : حتى الله لا يعلم ، انه فقط سميع عليم خبير،اما انت فلديك القرار" فتسألت مندهشة " و لكنه قال انه علام الغيوب" فظهر الشيخ و قال " لم تعودي غيبا ، لقد اصبحت لحما و دما، جسد قائم في حدود المرئيات، يكفيكي هذا ..ما معني هذا الكلام وما دخل الله سبحانه وتعلى علواً كبيرا في هذه الأمور المخالفة لشرع الله .وفى بوست بعنوان : عيناها تذكرين أبيات من قصيدة شربنا على ذكر الحبيب للشاعر الصوفي عمر ابن الفارض ..وادخليتها في سياق التخاريف الكلامية التي تكتبيها ..وأنا اعرف بل أوقن تمام الإيقان انك لا تعرفين ماذا كان يقصد الشاعر عمر ابن الفارض من القصيرة وأتحداك واتحدي أي إنسان من الذين تتشدقين معهم من أمثالك على هذه المدونات .. أن يقول لي ماذا كان يصف الشاعر في هذه القصيدة ومن المفروض أن اسم المدونة ليالي الصفا في حب المصطفي ..وكل الموجود فيه لا يمت إلى المصطفى أو الدين الحنيف أو أي شيء للمصطفى عليه أفضل الصلاة والسلام .أظن انك نصرانية وهذا ما أخشاه .. أما إن كنتي مسلمه فهذه مصيبة كبيرة وكرثة على شباب المسلمين والأمة الإسلامية إذا كان يوجد من أمثلك الكثير ..
October 31, 2007 12:09 AM
"
و مثال اخر على تناقضه هو ما علق به في مدونة دانتي المصري فعندما لم يعجبه اقتباس دانتي لجبران اتهمه هو ايضا بكونه اما نصرانيا او كافرا و كان النصراينة تهمة و ليست ديانة سماوية من عند الله تعالى و استنكر على جبران خليل جبران كتاباته عن سيدنا عيسى قائلا ان ابي حنيفة النعمان لم يقول اي شئ بالسلب عن سيدنا عيسى، و المثل بالمثل يذكر فجبران لم يسئ الى سيدنا عيسى باي شئ بالعكس فان كتابه عن سيدنا عيسى المسمى ب عيسى ابن الانسان هو من اجمل ما قيل عن المسيح من كاتب كجبران و هذا ان دل فيدل ان المدون ابو الفوارس لم يقرا و لجبران اي شئ و حتى ان قرا فلا اعتقد انه سوف يفهم او يستوعب الكلام و ليس معنى اننا ذكرنا كلام سلبي لشخص عن شخص اخر او عن شخصية عظيمة مثل المسيح ان هذا يعني اننا نهين الشخص المعني، و لكن..... ، الم قل لكم انه العالم ببواطن الامور؟؟؟

ثم كتب مقال في مدونته يتكلم فيه عن الناس التي تاخذ معلوماتها من المسلسلات وكيف انه متخوف جدا من الجيل التافه الذي لا يعرف و لا يقرا و لا يفهم مثله هو. قبلها كان قد كتب مقالة عن نظرية المعرفة و الثقافة و كالعادة ارغى فيها و ازبد عن القراءة و التفكير و المعرفة و من هم المثقفون و كل هذا حتى يثبت انه مثقف و معرفي الشخصية و انه عالم ببواطن الامور و انه هذا لا يتعارض مع كونه عسكريا. بالذمة مش حاجة تموت من الضحك؟؟؟
اعزائي اضمن لكم بمشاهدة مدونته و قراءة تعليقاته ان يتم لكم السرور و الضحك حتى السخسخة و الابتسام ملء شدقيكم.
في النهاية اود ان اطلب منك حل عن كيفية التخلص من هذا البقة الرذيلة و من يستطيع افهامه انه اذا لم تعجبه مدونتي فالحل بسيط : لا يأتي. ارجو منكم المساعدة.
ملاحظة: سوف انشر اي تعليق حتى و ان اختلف معي في الراي و لكن لن اسمح بنشر اي شتيمة او قلة ادب من اي نوع .
تحياتي
رابط لردوده في مدونة دانتي المصري و تعليقاته عن جبران و السلام و ما يجب ان يقال و مالا يجب ان يقال
رابط اول يرغي فيه المدون عن الاقليات في الاسلام و غيرها من الامور عن الدولة و الاسلام الى اخر اللستة المعهودة
رابط اخر يقلل من شان كتاباتي و ينقدها بكل غباء و يتهمني اني مؤكد نصرانية لاكتب مثل ما اكتب و ارجو مراجعة ما قاله اصلا في المقالة و مجمل حديثه عن المسلسل و كيف ان الاشخاص عديمو المعرفة و الثقافة ياخذون معرفتهم من المسلسلات(يا ترى قصده مين؟)