احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Sunday, July 27, 2008

لم يعد بالامكان اعهر مما كان

والله يومي كان كويس و ماشي فل الفل
صحيح اخره زعلت لما عرفت بوفاة جو شاهين
بس
كله كوم و
لما رجعت البيت و فتحت الجزيرة للاسف الشديد و يا رتني ما فتحت
فوجئت و فوجعت بالخبر بتاع براءه ممدوح اسماعيل
يعني بجد
بجد شئ مقزز و مقرف
المدعي العامم و لا ابصر مش عارفة مين الراجل للي كان بينطق بالحكم عاوزة اسئله سؤال
هو انت مكنتش مكسوف من نفسك و انت بتنطق بالحكم؟؟
مكنتش طيب خايف على روحك لحسن الناس تهجم عليك و تموتك بالقباقيب؟
طيب سيبك من ده كله
مش خايف من ربنا؟
مش عامل يوم حسابه؟
مش خايف لتتشوي بنار جهنم انت و اللي اصدروا الحكم ده معاك وكل من شارك في عملية القتل دي؟
انا مش فاهمة
بجد مش مستوعبة
يعني ايه اللي بيحصل ده
كفاية صويت الناس و قهرة الرجالة
الراجل اللي الجزيرة جايباه
خلاص انا نفسي حسيت قلبه حيقف
من كتر ما هو مخنوق
مش عارف ينطق
حد شاف ظلم اكتر من كده
انا مش عارفة اتلم على نفسي بجد
حاسة فيه نار بتقيد قدامي
حرام كفاية
حرام
كفاية
الناس خلاص
مبقاش فيها
ارحموهم شوية
عيب
اقله اصرفوا التعويضات
اقله
ريحوهم في عيشتهم التانية
لكن ان كله كده يكون متلخبط على بعضه و مش طايلين و لا حاجة
ايه ده
بجد ايه ده؟
امتى الخلاص يا ربنا؟

Tuesday, July 22, 2008

على راسنا باروكة ريش


يعني حالة من ازدواج المعايير و الاصرار على اتباع نظرية المؤامرة ضد العرب بالمجمل و المسلمين بالاخص
مثيرة للشقفة
خبرين حصلوا في نفس الوقت تقريبا
خبر بترحيل كراديتش للمحكمة الدولية في لا هاي
و نفس الخبر ينطبق على رئيس السودان عمر البشير
الاتنين قاموا بعمليات ابادة جماعية لعرق بشري معين من سكان اوطانهم
سواء كراديتش قتل مسلمين
او البشير قتل مسيحين
فالاتنين يبقوا قتالين قتلا
طبعا هما مارحوش ميدان الحرب بنفسهم و قتلوا الناس
لكن مادامهم كانوا و مازالوا على راس حكمهم اذن كل شئ بيتم بعلمهم و موافقتهم
امال هما رؤسا ليه؟
مش هما مسؤولين على ما يصدر وقت حكمهم من مشاكل؟؟
لكن لما قريت الخبرين لفت انتباهي حاجتين
التلعيقات اللي على خبر القبض على كراديتش
مليانة كلمات لغوية من نوعية تامر
و نظرية و لماذا هذا التوقيت
و البعض هو تشفي في الراجل و حكمه و ان ربنا حياخد بتار المسلمين منه
و قليل اوي اللي شايفين ان الموضوع لا مؤامرة و لا غيره
و انه زي ما كراديتش احنا عاوزينه يتسجن يبقى لازم البشير كمان يتسجن
الخبر بتاع البشير في الجزيرة مجتش عليه تعليقات كتيرة
لكن مواقع تانية و اخبار متفرقة من القناة اظهرت الغضب "الشعبي" في تلقي الامر و رفضهم لتسليم اي مواطن سوداني لاي محكمة
و حاصلة هناك تظاهرات تعبرعن حب الشعب لرئيسه لدرجة انه حتى الفرق الصوفية خارجة تحتفل بيه و تؤازره و تشد على ساعديه
طيب ايشمعنى احنا عاوزين كراديتش يتسجن و تتم محاكمته
بينما رافضين ان البشير يتم تسليمه و هو نفسه رافض تسليم اي مواطن سوداني للمحاكمة، يعني ايه مستوى الازدواجية ده اللي بنتعامل بيه مع كل شان دولي لينا قدام العالم؟
و بعد كده نستغرب اوي لما الدول الغير عربية يتهمونا بالتخلف و الرجعية و الطفولية في التصرف؟؟
مش معقولة حجم عدم النضج اللي احنا عايشين فيه
حتى الاطفال الصغيرين مبيعملوش كده
و لو علموا كده بعد القليل من الزجر و النهر او الترغيب و التهديد
بيتعظوا
لكن ايه مستوى التفكير الاهبل اللي احنا عايشين بيه ده؟؟
الشعوب اللي متضايقه من حكامها، ازاي حتتخلصوا منهم لو مش راضيين انهم يتاخدوا لمحاكمات دولية؟؟ مش الرؤسا دول اللي مطلعين عينكوا و مطفحينا الكوتة و مكسرين امالنا كل يوم عن اللي قبله؟؟
انا مش بقول ان المحاكمات الدولية دي قمة العدل
و لا انها ماشية على الصراط المستقيم
لان حاليا بالنسبة لي اول واحد المفروض يتاخد هو جورج بوش
لكن طبعا مين امه؟ ماما امريكا، و اللي له ضهر مبينضربش على بطنه
لكن له يوم
بس اقله ان كراديتش توبه من توبنا
ان مكنش اعز على المجتمع الغربي اكتر مننا
فلو احنا عاوزين نحتكم من كراديتش
اقل شئ نعمله اننا نوافق ان البشير او اي حاكم عربي غيره عمل حروب و قتل ناس من بني الوطن نفسه فقط لكونهم مختلفين معاه عرقيا او دينيا يتقدم لمحاكمة
و نشوف
يا يطلع برئ
يا ميطلعش
و اهو طريقة جديدة نغير بيها الرؤسا اللي قاعدين مبلطين على قلوبنا
و ركبوا باركيه كمان
مش كده و لاايه؟

Friday, July 11, 2008

هل هكذا تكون الحرب اذن؟؟

يبدو ان الراحة لم و لن تكتب لي ابدا


بلوج صديق تعرض لهجمة شرسة و حقيرة جدا من اعدائه
من هو البلوج ؟ لحسن الهلالي
الاعداء: هو كل من قرر عدم استخدام عقله و بدلا عنه قرر استخدام سيفه و طرقه الحقيرة في القضاء على صوت مغاير و مضاد له في الراي

محارب يدعو لتخليص الاسلام مما لحق به من تدين زائف و
تلويث لسمعته كدين سماوي و يدعو لاعمال العقل و التفكر في كل ما نراه من مظاهر مسيئة و هدامة و كلها باسم الدين و باسم الاسلام
والدين منها برئ
ما الغلط في القول ان اغلب الاحاديث غير موثوق منها و لا عقلية في كثير من الاحيان؟؟
ما العيب في القول ان الشيخ فلان دجال او متاجر بالدين؟؟
ما الخطا في ان نقول ان الكثير من تفاسير البعض للقران قد خرب معناها و حرفت على كيف و هوى حكام عصر معين؟؟
لماذا ندفن رؤوسنا في الرمال و نرفض كشف النقاب عن ديننا و نخلصه من شوائب اضافوها المرتزقة على مر السنين ادت الى ما نعاني منه الان من تطرف و ارهاب و اتهام الكثير لنا باننا قتلة بالوراثة؟؟
كل هذا الارهاب لان المدونة ضد الحجاب؟؟
ماذا اذا عرف الاغلبية ان اغلب شيوخ الدين و الفقهاء انفسهم مختلفين على تحديد العورة للمرأة؟؟
فكيف سوف نحدد الحجاب اذا كانت العورة نفسها غير متفق عليها من قبل شيوخ الدين القدامى؟؟
والايات القرانية؟؟
اختلف معناها و اختلف التفسير عليها
لماذا ناخذ براي واحد و نقصي غيره؟
اين الشورى التي نتشدق بها كعلامة مميزة للاسلام؟؟
الا يعيب البعض منا على المسيحيين انهم دين كهنوت؟؟
فماذا فرقتوا عنهم يا من تزدروهم و تتهموهم بالكفر و انتم لا حق لكم البته في تكفير هذا او ذاك؟؟
اتوقع كل انواع الحوار و المتدني منه ايضا
و كم راينا من تعليقات تشين الاسلام انها خارجة من امثاله اكثر من ان تشين صاحب التعليق نفسه




توقعت كل شئ
لكن لم اتوقع ان الرد يكون هو الاستيلاء على حسابه الشخصي و مسح المدونة في حركة اقل ما توصف انها حقيرة و غير اخلاقيه و منحطة
فهل هكذا تكون الحرب اذن؟؟
هل هذا هو الشرف؟
هل هذة الاخلاق التي تدافع عن الاسلام؟؟
ثم نتعجب ان شخصا مثل جيرت فيلدرز يشوه سمعتنا؟؟
الم نعطه هو و امثاله من اعداء الاسلام كل المعطيات المتاحة حتى يتهمونا بكل هذه التهم؟؟
الم يحن الوقت بعد حتى نخرج راسنا من الحفرة و نواجه ما يحدث بالعقل بدلا من السيف و السرقة
ان ما حدث لا معنى له الا ان المسلمون غير قادرين على التحاور
للاسف الشديد

****
مصاب مثلي في حريته

هرطقة يحارب هو ايضا
و انضم لنا
تحديث
كما راى البعض سفالة ة وانحطاط الصارم الحاسم
فاضطريت اني احط خاصية التحكم بالتعليقات
لعنه الله و بئس المصير ان شاء الله هو و امثاله

Thursday, July 10, 2008

استودعكم الله ..... الله يخرب بيتك يا احمقي سجاد


اخبار جميلة جدا تحل عليا من بعد تلات ايام من عيد ميلادي

انا كنت حاسة برضو ان اخري 31 سنة و يلا حسن الختام

الافندي احمقي سجاد قرر انه يهوش بصواريخه و قال ايه حيضرب اسرائيل و يدمر مصالح امريكا

و حسب موقع الجزيرة، الخبر ده

اوله بيقول الاتي

"

استبعد وزير الدفاع الأميركي روبرت غيتس وقوع أي مواجهة بين بلاده وإيران في الوقت الراهن، وذلك عقب اختبار طهران تسعة صواريخ متوسطة وبعيدة المدى قادرة على الوصول إلى إسرائيل والمصالح الأميركية في المنطقة

"

انا بقى مش هاممني غير شبة جملة اللي علمت عليه، هو اللي ارقني و قلق تفكيري


طبعا حيقلي حد يعني انتي مش هامك ان اسرائيل تندك لكن هامك المصالح الامريكية

حقوله استنى بس

خليني اوضحلك

انا انسانة

و من حقي اعيش

و انتوا لسه جايين مهنييني بعيد ميلادي و داعين لي اني احقق احلامي

شكله مافيش

بح

شطبنا

حقولكوا ليه


فاكرين صدام؟؟

ايوة صدام الرئسي السابق المشنوق

هو اتشنق ليه؟؟

مش عشان ضرب له صاروخين على تل ابيب و شخخ اليهود على روحهم؟؟

الكلام ده كان سنة كام؟

سنة 1990

الراجل اتشنق امتى؟؟

نهاية 2006

يعني بعدها بستاشر سنة

فانا مش حنبسط لما احمقي سجاد يضربله كام صاروخ و اسرائيل تفضل موجوده و بعدها بكام سنة يشنقوه

طبعا ان مش حيفرق معايا اذا حيتشنق و لا لأ،يعني قلقي على موضوع شنقه مش صحيح لحسن حد يوزه عقله، هو رئيس و مسوؤل عن نفسه و عن شعبه و عن حياته، عاوز يبعترها، براحته

فالحكاية انه مش حيتغير اي شئ لو هو ضرب اسرائيل او مضربهاشي


لكن



و اشدد على لكن دي

انا حاليا يهمني المصالح الامريكية

محدش يفتكر بخاف عليها

نوبسي

انا بخاف منها

احنا قطر كلها لفة اربع ساعات بالعربية

فلما حبيب شعبه يضرب صواريخ

على المصالح الامريكية في المنطقة

و هما مؤكد حيردوا عليه

مين حيكون في النص؟؟

انه انا والشعب الغلبان هنا

ايه ذنبة نوفل صاحب السوبرماركت اللي جنبنا انه سايب انديا و جاي يدور على لقمة عيشه هنا؟؟

و القاعدة اللي هنا ماهياش بعيدة

مدرستي اللي كنت بتشغل فيها كانت جنبها طوالي

و هل على بعد 45 دقيقة سواقة لو الشوارع زحمة

فلما الشوارع تفضى

حتكون تلت ساعة

ده سواقة بعربية سرعتها 80 كيلو في الساعة

طيب لو صاروخ؟؟

مؤكد حلاقيه قاعد جنبي عالكنبة، مش كده و لا الرياضيات بتاعتي غلط؟؟


فيه خريطة ظريفة خالص للبلاد في الشرق الاسود مع معلومات بسيطة عن كل دولة هما حاطين عليها سهم و ذاكرين هناك كل دولة خليجية فيها قاعدة امريكية

على راسهم الكويت

تيجي بعدها قطر ثم البحرين و السعودية فيها طبعا بس مخدتش بالي حجمها قد ايه

فانا مش عارفة هل احمقي سجاد حيرحم الناس العادية امثالي و يستعوذ من الشيطان الرجيم اللي بيوز في ودانه من كام سنة و لا احنا حنروح في الازوزة؟؟؟؟؟


المهم

و الهدف الاساسي من البوست ده هو اني حابه اقلكوا استودعكم الله

اذا زعلت حد مني

فيا ريت يسامحني

لو حد واخد على خاطرة اني مش بكلمه او بقالي فترة متصلتش بيه يسامحني برضو

اي حد انا استلفت منه فلوس يستعوض ربنا لان الضربة جاية في نص الشهر و ما ادراك ما نص الشهر

حتتحسبله في حسناته

و هو اديه زود الرصيد

و اذا حد بيحبني

يبقى يجيب بوكيه ورد كل سنة و يفرتك ورق الوردة و يرميها في البحر

و متنسوش قرص الرحمة


باي باي



Sunday, July 6, 2008

حصيلة عام




ان تصلك رسائل من جميع انواع الاتصالات الحالية
من اوفلاين مسج لمسج عالموبايل
لمسج في الفيسبوك
لمسج مكتوبة في ورقة مرمية تحت كعب الباب
لفن ووال بوست
لسوبر ووال بوست
لكرت معايدة اليكرتوني
و كرت معايدة كرتوني
من ناس اغلبهم اصدقائك
و الغريب انهم اصدقاء موصولين بيك عن طريق الشبكة العنكبوتية فقط
يعني لا انت شفتهم و لا هما شافوك
لكن اهتموا
و بعتوا
و عيدوا
و سالوا و اتمنولك الخير
فلا يسعني غير اني اقول شكرا للجميع
لاني بصراحة بعد مندبة السنة اللي فاتت
كنت مقررة انسى الاعياد كلها
و مفكرش نفسي بالعداد اللي بيعد
لانه ميعنيش اي شئ بالنسبة لي
السنة اللي فاتت زي اليوم ده تميت 30
فضلت مكتئبة بالرقم ده فترة طويلة اوي
لغاية من اربع شهور فاتوا فقت فجاة و لقيت اني حوصل 31 و انا لسه بعيط على 30
طيب مش معقولة عمري يضيع عشان رقم بينحسب
لكن فعليا انا مش حاسة بيه
و انا مش بقول كده ككلام تجاري أو دعائي و اعمل منظرو حركات
اوقات كتيرة بحس اني يدوبك تميت الواحد و عشرين مثلا
ده روحيا، لكن عقليا اعتقد اني متطورة بكتير اوي عن 31
و ده مش كبرياء مني او غرور
بس حان الوقت اني ادي القليل لنفسي من الاستحسان
كهدية مني لنفسي على اللي بحاول اعمله كل يوم في حياتي
بحاول اصحى كل يوم و اوعد نفسي انه حيكون يوم جديد
صحيح بكتشف الخدعة دي بس اديني بعافر
بحاول اصحى كل يوم و انا ناوية اعمل حاجات كتيرة
صحيح اغلبها مش بيتم
لكن اديني حاولت اني اخلص منهم شئ و نجحت
بحاول اصحى كل يوم و انا بقول ان النهاردة مؤكد حيوصلني لحتة معينة كنت بدور عليها
و صحيح اني مش بوصل لكن من امتى بنوصل مشوارنا في نطة واحدة؟؟
بحاول كل يوم اصحى و انا شايفة نفسي كويسة او عادية و اخفي عيوبي قدر الامكان
احيانا بفشل
احيانا بنجح



بس دايما بحاول اني اظهر خيري قبل شري و ايجابيتي قبل سلبيتي و ان كنت احب اظهر جهلي قبل علمي

بحاول و بحاول وبحاول
من اهم الحاجات اللي اتعملتها لما كنت في امريكا هي المحاولة
سواء لما كنت انا الطالبة او لما كنت المدرسة
كنت بقولهم بصريح العبارة انني ححاول اجيبلكم المرجع الفلاني
سواء كنت نجحت او فشلت كانوا بيقدرولي محاولتي
لما كنت طالبة كنت بقول للاستاذة ححاول اني اخلص الموضوع بنظرتي انا و حسب قدرتي انا و فهمي للموضوع
سواء خلصته او مخلصتوش بس هي بتبقى عارفة اني حاولت
المحاولة كانت ناجحة
يبقى كتر خير الدنيا
المحاولة فشلت
مافيش مشكلة
نعيد من اول و جديد و كل مرة نخرج بشئ جديد
المهم نحاول
و مش حكون ببالغ لو قلت يمكن بحارب كمان
كل يوم لازم احارب حاجة
عادة غبية
تقليد متخلف
تساول منجاوبش عليه
غباء متاصل
تعبت؟
ايوة
اقدر اقول اني تعبانة اوي
بس لو محاولتش
و لو متعبتش
ازاي دي حتكون حياة
هي الخلية الاولى لما تطورت كانت قاعدة مكانها؟


حفصة

كل سنة و انتي طيبة
كل سنة و انتي بتحاولي
كل سنة و انتي معاكي ناس حلوة بتفتكرك و بتعيد عليكي
كل سنة و انتي حفصة

Thursday, July 3, 2008

أحلام و أنغام

حلمت به، هذا ما كنت متأكدة منه، و لكن كيف أحلم به في البداية ثم ينتهي حلمي بأخر؟؟ و من هذا الأخر، ما هو الا زميل عمل لم تتم على زمالته الا الشهرين!!؟
حلمت اني تحدثت مع حبيبي على الهاتف، اتفقنا ان نتواعد في حديقة نقصدها دائما لبساطتها و جمال مناظرها الطبيعية
حالما وطأت قدمي الشارع شعرت بأحساس غريب، أحساس قال لي انك لن تريه بعد الان، لن تلتقوا من هذة اللحظة فصاعدا.
غيمت سماء عقلي و رأيت كل شئ استحال رمادي اللون. حتى دموعي رايتها كالفضة المتلألأة مشوبة بسواد رغم انني لم اتكحل في نهاري هذا. وودت الصراخ متاوه من وقع الخبر الأليم الا ان ظهور تاكسي وقف وحده دون اشارة مني دفعني للسكوت. نظرت للسائق فلم يتكلم لكن عينيه قالت اركبي فورا سوف اخدك الى هناك. ركبت فطارت بي العربة مجازفة بكل قوانين الطبيعة. طوال طريقي كنت متحفزة، كيف لن ارى حبيبي؟؟ اتراني اموت في هذا النعش الطائر ام اترك المكروه يحدث له و هو بعيدا عني؟؟؟
في لحظة احسست انه لا هواء لي لاستنشقه، فوقف وجهي على تعبير واحد(عين مفتوحة على اقوى مدى لها، فم متهدل لا تحكم لي عليه و انف توقف على استنشاق ايا كان مصدره)
ياللعجب!!؟؟ وصلت الى الحديقة المزعومة، كم اكرهها الان. و لكني ما ان وصلت حتى رن تلفوني المحمول( حلمي حديث و الكيتروني المفردات فيما يبدو) ظهر صوته الخفيض فتنهدت منهية توتري و جزعي عليه و انخفض ادريناليني حتى لم اعد استوعب اي شئ مما قال
" المهم متكونيش زعلانة مني؟"
" ازعل من ايه بس؟؟"
"الله ؟ مش لسه قايلك اني مش حقدر اجي و حاولت اكلمك بس كان بيديني خارج الخدمة!!؟"
"@#$^%^*%^$؟؟؟؟؟؟؟"