احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Sunday, July 6, 2008

حصيلة عام




ان تصلك رسائل من جميع انواع الاتصالات الحالية
من اوفلاين مسج لمسج عالموبايل
لمسج في الفيسبوك
لمسج مكتوبة في ورقة مرمية تحت كعب الباب
لفن ووال بوست
لسوبر ووال بوست
لكرت معايدة اليكرتوني
و كرت معايدة كرتوني
من ناس اغلبهم اصدقائك
و الغريب انهم اصدقاء موصولين بيك عن طريق الشبكة العنكبوتية فقط
يعني لا انت شفتهم و لا هما شافوك
لكن اهتموا
و بعتوا
و عيدوا
و سالوا و اتمنولك الخير
فلا يسعني غير اني اقول شكرا للجميع
لاني بصراحة بعد مندبة السنة اللي فاتت
كنت مقررة انسى الاعياد كلها
و مفكرش نفسي بالعداد اللي بيعد
لانه ميعنيش اي شئ بالنسبة لي
السنة اللي فاتت زي اليوم ده تميت 30
فضلت مكتئبة بالرقم ده فترة طويلة اوي
لغاية من اربع شهور فاتوا فقت فجاة و لقيت اني حوصل 31 و انا لسه بعيط على 30
طيب مش معقولة عمري يضيع عشان رقم بينحسب
لكن فعليا انا مش حاسة بيه
و انا مش بقول كده ككلام تجاري أو دعائي و اعمل منظرو حركات
اوقات كتيرة بحس اني يدوبك تميت الواحد و عشرين مثلا
ده روحيا، لكن عقليا اعتقد اني متطورة بكتير اوي عن 31
و ده مش كبرياء مني او غرور
بس حان الوقت اني ادي القليل لنفسي من الاستحسان
كهدية مني لنفسي على اللي بحاول اعمله كل يوم في حياتي
بحاول اصحى كل يوم و اوعد نفسي انه حيكون يوم جديد
صحيح بكتشف الخدعة دي بس اديني بعافر
بحاول اصحى كل يوم و انا ناوية اعمل حاجات كتيرة
صحيح اغلبها مش بيتم
لكن اديني حاولت اني اخلص منهم شئ و نجحت
بحاول اصحى كل يوم و انا بقول ان النهاردة مؤكد حيوصلني لحتة معينة كنت بدور عليها
و صحيح اني مش بوصل لكن من امتى بنوصل مشوارنا في نطة واحدة؟؟
بحاول كل يوم اصحى و انا شايفة نفسي كويسة او عادية و اخفي عيوبي قدر الامكان
احيانا بفشل
احيانا بنجح



بس دايما بحاول اني اظهر خيري قبل شري و ايجابيتي قبل سلبيتي و ان كنت احب اظهر جهلي قبل علمي

بحاول و بحاول وبحاول
من اهم الحاجات اللي اتعملتها لما كنت في امريكا هي المحاولة
سواء لما كنت انا الطالبة او لما كنت المدرسة
كنت بقولهم بصريح العبارة انني ححاول اجيبلكم المرجع الفلاني
سواء كنت نجحت او فشلت كانوا بيقدرولي محاولتي
لما كنت طالبة كنت بقول للاستاذة ححاول اني اخلص الموضوع بنظرتي انا و حسب قدرتي انا و فهمي للموضوع
سواء خلصته او مخلصتوش بس هي بتبقى عارفة اني حاولت
المحاولة كانت ناجحة
يبقى كتر خير الدنيا
المحاولة فشلت
مافيش مشكلة
نعيد من اول و جديد و كل مرة نخرج بشئ جديد
المهم نحاول
و مش حكون ببالغ لو قلت يمكن بحارب كمان
كل يوم لازم احارب حاجة
عادة غبية
تقليد متخلف
تساول منجاوبش عليه
غباء متاصل
تعبت؟
ايوة
اقدر اقول اني تعبانة اوي
بس لو محاولتش
و لو متعبتش
ازاي دي حتكون حياة
هي الخلية الاولى لما تطورت كانت قاعدة مكانها؟


حفصة

كل سنة و انتي طيبة
كل سنة و انتي بتحاولي
كل سنة و انتي معاكي ناس حلوة بتفتكرك و بتعيد عليكي
كل سنة و انتي حفصة

24 comments:

The Alien said...

كل سنة وإنتي طيبة
وعقبال 99 سنة
أتمنالك كل التوفيق والسعادة

تحياتي

Empress appy said...

كل سنه وانتى طيبه يا جميله وعقبال كتير قوى بس من غير عياط على اللى فات وتكون سنين كويسه

الأغاني للرأفتاني said...

كل سنه وانت طيبه
وربنا يديم فرحك ويبعد عنك الهم
والسنه اللى جايه كده تبقى ضابط قد الدنيا

^ H@fSS@^ said...

بيشو
و انت طيب و عقبال 100 سنة انت كمان

ابي الحلوة
و انتي طيبة واللهالسنة دي معيطش
السنة اللي فاتت هي اللي كانت مناحة و حياتك

الزعيم الرافاتاني
سخسختن يمن الضحك
حكب رو ابقى ضابط؟
و مين يحلم بالشغلانة المهببة دي دلوقتي؟؟
شوفلي دعوة غير والنبي



تحياتي للجميع

ehsanbros said...

كل سنة وانتي طيبة يا حفصة...

ذو النون المصري said...

ياخبر ابيض
كل سنه و انتي بالف صحه و سلامه و يارب تنتصري في الحرب علي سلبياتك
و عقبال ما اتم الثلاثين انا كمان
تحياتي الغاليه

فاتيما said...

كل سنة و إنتى طيبة يا حبيبتى
و كل سنة و محاولاتك لا تتوقف
دى نعمة على فكرة محدش بيحس بيها ألا لما يفقدها و بعد الشر عليكى
أنا قصدى إن اليأس فظيع و لما الواحد يبطل يحاول يبقى خلاص وصل لليأس
اللى هوه راحة و موت فى نفس الوقت
ربنا يمد فى عمرك و إنتى بألف صحة و سلامة و احلام بتحاولى تحقيقيها
يعنى إنتى لسه صغننة يا بنتى
تحياتى ليكى يا جميلة
و كل سنة و إنتى معانا
و عيطى و لا يهمك العياط بيغسل العين و القلب و الروح
بس مش كتير قوى بقى و متسوقيش فيها
عشان أهو من دا و دا
الدنيا كدا

bluestone said...

لا لا لا
كل سنة وانتي حفصت بقى :)
حاولت اروحلك على الفيسبوك لقيتك عاملة حداد في ال
STATUS
فمبقتش عارفة اقول ايه ..
اتلخمت
:))

دايما بيقولوا
IT'S nothing.. only a number .. and not even latin :)

بس يعني برضه ممكن اقول
كل سنة وانتي حفصت
اكثر تمردا
واكثر جنانا
وابرد لسانا وقلما
(ابرد مش من البرودة ولكن من المبرد..حاد من كافة الاوجه) :))

Hypatia said...

بت يا حفصه كل سنه وانتى حلوه وطيبه ويخرب بيت السرطان ابو قلب خسايه جايبه لورا
:))
ايه بقي اللى حصل ع الفايس بوك ده
ايه اللى حصل للجروب بتاع اخلعي حجابك
وايه اللى حصل للاكاونت بتاعك فهميني لاحسن كده انا قلقت لاحسن يكون حد ضايقك ولا عمل حاجه فى الاكاونت
طمنيني

Unknown said...

كل سنة وانتى شايفة العالم من منظورك المعرفى
مش من الناحية العمرية

افتكر دة كفاية فى حد ذاتة

انة يخلى الانسان يعرف قيمة نفسة

صح

Samir Saad said...

كل سنة وانت طيبة يا حفصة
تحياتي

Anonymous said...

كل سنة وانت زى ماانت

دايما طيبة .. دايما رقيقة ..دايما كميلة كما انت

نعكشة said...

كل سنة وانتي بألف صحة و سلامة
كل سنة وانتي ناجحة ( بإذن الله)
كل سنة وانتي متمردة علي ماهو قبيح
كل سنة وانتي بتنمي نفسك والناس حواليكي
كل سنة وانتي اقرب إلي الله
كل سنة و يزيد ميزاد حسناتك
كل سنة وانتي طيبة يا جميلة
اتمنى لكي دوام الصحة و راحة البال

دمتي سالمة
سلامٌ عليكي

^ H@fSS@^ said...

احسان بروس
و انت بالف خير و صحة يا رب




ذوالنون
خبر ابيض ليه بس
مخضوض ليه بس؟؟
متخافش انت حتم التلاتين يعني حتمهم مافيش هروب
ههههههههه


فاتيما
تسلميلي يا رب و ربنا ميجبش عياط عشان خلاص قنواتي الدمعية اتهرت
هههههههه




بلوووووووو
السنة دي كانت حفصت فعلا
حالة الحداد اللي على الفيسبوك للاسف عشان حالة وفاة والدة ناس صحابنا او في حكم انهم اهلنا من شدة العشرة
و النبي بلاش اكتر بروجا
عشان انا لساني لما بيتبرى مني بيبقى حاد جدا و قاطع
:D



نيسو
لو مكنتيش جيتي كنت جيتلك الكويت مخصوص خنقتك و رجعت تاني
و ايشعرفك اني قلبي خساية
بموت انا في الخس
اما ايه لالي حصل على الفيسبوك
فواحد منه لله عمل هاكنج لحسابات اصداقئي و قفلنا جروباتنا قال ايه بدعوى اننا بنشتم في الاسلام و هو كداب
الاولى كان يروح يتشطر على الجروبات اللي بتشتم فيه فعلا
و قال هو كده بيدافع عن الاسلام و طبعا كفرنا
و المصيبة انه عمل هاك لحساب صحابي و بالتالي يقدر يشوف حسابي انا و يخش على معلوماتي و يفصصها
بس على مين
قفلت عليه الدنيا و لحقت نفسي




واحد فاهم كويس اوي
كلامك صح و كل سنة و انت طيب




بريئنا الجرئ
و انت طيب و بالف صحة و هنا




استاذ شريف
معايدتك في قمة الزوق و الرقة زي حضرتك باظبط
بس صدقني يمكن انا مش طيبة اوي كده يعني
بس اديني بحاول
نورتني



نعكشة
و انتي طيبة و تحققي امانيكي ان شاء الله في المستقبل القريب


تحياتي للجميع و اشكركم من عميق قلبي لاهتمامكوا و تفاعلكوا
و كل 31 سنةو انتوا بالف خير و سلام
و محدش يهككلوكوا حساباتكوا على كتاب الوشوش و في مقولة اخرى كتاب القفا لانه اخدنا فيه بمبه كبيرة اوي

Anonymous said...

loool
happy birthday!
ana ma3aky that your spirit is that of a 21st year old (though your mentality is surely that of a much older person than 31).
So yes I'm only 22, but with you (and some other few bloggers) the age difference disappears, I don't feel younger or older, communication and thoughts and "theories" and other stuff... left no room for petty things such as age to be considered :D So you're 31 today.. :) you're still you and that's what makes you special I guess!
my wish for you is to never give up trying I guess... and to find beautiful things along the way that help you carry on.

Migo Mishmish said...

كل سنة وانتي طيبة يا جميله وعقبال ميت سنه
بس في جملة كنت سمعتها في فيلم اجنبي وعلقت معايا قوي. بتقول كدة
"اسواء ما في البحث عن الحقيقة انك من الممكن ان تصل اليها في يوم من الايام"
Love,
MishMish

Wandering Scarab said...

Happy Birthday Hafssa!

hurricane_x said...

Happy Birthday :)
faker 2ana 2elmana7a beta3et 30 elsana 2elly fatet :)
of course u have new goals, so I wish u'll finish them all.

^ H@fSS@^ said...

bluevoid
thanks dear, i totally agree with u about the idea of no age difference between boggers, so many of my friends are so much younger than me and some are my paretns age. so it is really a conection of thoughts.

مشمش حبيبتي
و انتي طيبة يا قمر
المقولة صحيحة بس ده لو اصلا حد فينا بيعرف يوصلها او قدر يوصلها
نفسي مرة اشوف الحقيقة عريانة
دايما كده متغطية مستخبية مننا
جتها القرف زهقتني
اخبار البيبي ايه؟؟
لو بنت ستميها حفصة طوالي و انتي مغمضة هههههههههههههه



مينو
و انتي بالف خير يا حبيبتي
و السنة الجاية نتقابل يا رب


hurricane x
thanks for the greeting, soon u r reaching it as well. but u know what, after the 30 one, 31 is normal, no big deal, i really dont know whats the big fuss when its 30? y was i sad all that much about it, dunno.


salam

^ H@fSS@^ said...

صحيح
يا جماعة مش بذمتكوا الارنب الموجود في اول البوست يتاكل اكل؟؟
مش قصدي نبدحه و نعمل عليه ملوخية لا سمح الله
قصدي يتاكل بمعنى يتهشتك و يتبشتك و ندلعه كده و نلعب بيه
والله شكله يجنن تحفة

Lounge Abu A7mos Al Tibi said...

Happy birthday Hafssa...hope the new year is full of happiness and success....

على باب الله said...

كل سنة و أنتي طيبة

Migo Mishmish said...

هي بنت - الحمد لله ولا الحوجة لعز وحديد عز
يعني هتقعد في بيت امها وابوها معززة مكرمة اتجوزت كان بها كل اللي علينا شوية حاجت بسيطة ولو ماتجوزتش اهي قاعدة في بيت ابوها برضه
انما لو كان ولد كنت هتكفي بكدة مش هجيب عيال تاني واقعد من دلوقتي اعمل جمعيات وسلفيات واخلي ميجو يبيع كليته علشان على ما يبقى عنده بتاع 40 سنه كدة نكون جبناله شقه في مساكن الزلزال
مش هاعرف اسمي حفصة علشان كل مرة بتلخبط فيه ومش بعرف اكتبه صح مره هاقولها يا حافظة ومرة تانيه يا حافصه ومرة تالته يا حصفه
شوفيلنا حاجة سهله على المستوي الشعبي السلس
Love,
MishMish

^ H@fSS@^ said...

abu a7mos
thanks alot for your wishes, hope the same fo ru.

على باب الله
و انت طيب و بالف خير يا رب


مشمش
لو حاجة على مستوى الشعبي السلس فسميها صفصف
او صوفي
او حفصفص
كده يعني
صرفيها



تحياتي للجميع