احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Thursday, July 10, 2008

استودعكم الله ..... الله يخرب بيتك يا احمقي سجاد


اخبار جميلة جدا تحل عليا من بعد تلات ايام من عيد ميلادي

انا كنت حاسة برضو ان اخري 31 سنة و يلا حسن الختام

الافندي احمقي سجاد قرر انه يهوش بصواريخه و قال ايه حيضرب اسرائيل و يدمر مصالح امريكا

و حسب موقع الجزيرة، الخبر ده

اوله بيقول الاتي

"

استبعد وزير الدفاع الأميركي روبرت غيتس وقوع أي مواجهة بين بلاده وإيران في الوقت الراهن، وذلك عقب اختبار طهران تسعة صواريخ متوسطة وبعيدة المدى قادرة على الوصول إلى إسرائيل والمصالح الأميركية في المنطقة

"

انا بقى مش هاممني غير شبة جملة اللي علمت عليه، هو اللي ارقني و قلق تفكيري


طبعا حيقلي حد يعني انتي مش هامك ان اسرائيل تندك لكن هامك المصالح الامريكية

حقوله استنى بس

خليني اوضحلك

انا انسانة

و من حقي اعيش

و انتوا لسه جايين مهنييني بعيد ميلادي و داعين لي اني احقق احلامي

شكله مافيش

بح

شطبنا

حقولكوا ليه


فاكرين صدام؟؟

ايوة صدام الرئسي السابق المشنوق

هو اتشنق ليه؟؟

مش عشان ضرب له صاروخين على تل ابيب و شخخ اليهود على روحهم؟؟

الكلام ده كان سنة كام؟

سنة 1990

الراجل اتشنق امتى؟؟

نهاية 2006

يعني بعدها بستاشر سنة

فانا مش حنبسط لما احمقي سجاد يضربله كام صاروخ و اسرائيل تفضل موجوده و بعدها بكام سنة يشنقوه

طبعا ان مش حيفرق معايا اذا حيتشنق و لا لأ،يعني قلقي على موضوع شنقه مش صحيح لحسن حد يوزه عقله، هو رئيس و مسوؤل عن نفسه و عن شعبه و عن حياته، عاوز يبعترها، براحته

فالحكاية انه مش حيتغير اي شئ لو هو ضرب اسرائيل او مضربهاشي


لكن



و اشدد على لكن دي

انا حاليا يهمني المصالح الامريكية

محدش يفتكر بخاف عليها

نوبسي

انا بخاف منها

احنا قطر كلها لفة اربع ساعات بالعربية

فلما حبيب شعبه يضرب صواريخ

على المصالح الامريكية في المنطقة

و هما مؤكد حيردوا عليه

مين حيكون في النص؟؟

انه انا والشعب الغلبان هنا

ايه ذنبة نوفل صاحب السوبرماركت اللي جنبنا انه سايب انديا و جاي يدور على لقمة عيشه هنا؟؟

و القاعدة اللي هنا ماهياش بعيدة

مدرستي اللي كنت بتشغل فيها كانت جنبها طوالي

و هل على بعد 45 دقيقة سواقة لو الشوارع زحمة

فلما الشوارع تفضى

حتكون تلت ساعة

ده سواقة بعربية سرعتها 80 كيلو في الساعة

طيب لو صاروخ؟؟

مؤكد حلاقيه قاعد جنبي عالكنبة، مش كده و لا الرياضيات بتاعتي غلط؟؟


فيه خريطة ظريفة خالص للبلاد في الشرق الاسود مع معلومات بسيطة عن كل دولة هما حاطين عليها سهم و ذاكرين هناك كل دولة خليجية فيها قاعدة امريكية

على راسهم الكويت

تيجي بعدها قطر ثم البحرين و السعودية فيها طبعا بس مخدتش بالي حجمها قد ايه

فانا مش عارفة هل احمقي سجاد حيرحم الناس العادية امثالي و يستعوذ من الشيطان الرجيم اللي بيوز في ودانه من كام سنة و لا احنا حنروح في الازوزة؟؟؟؟؟


المهم

و الهدف الاساسي من البوست ده هو اني حابه اقلكوا استودعكم الله

اذا زعلت حد مني

فيا ريت يسامحني

لو حد واخد على خاطرة اني مش بكلمه او بقالي فترة متصلتش بيه يسامحني برضو

اي حد انا استلفت منه فلوس يستعوض ربنا لان الضربة جاية في نص الشهر و ما ادراك ما نص الشهر

حتتحسبله في حسناته

و هو اديه زود الرصيد

و اذا حد بيحبني

يبقى يجيب بوكيه ورد كل سنة و يفرتك ورق الوردة و يرميها في البحر

و متنسوش قرص الرحمة


باي باي



10 comments:

عاشور الناجي said...

باي باي فين ؟

بألف سلامة طبعا

لكن لازم ترجعي و تكتبي

لازم

و قريب

أجازة سعيدة و إن كنت أرى أن التاريخ يعيد نفسه

نفس التهديدات السخيفة بس هو أحمقي سجاد أجن من صدام له إتصال مباشر مع الإمام الغائب

:)))

صدقت حفصة هو شرق أسود فعلا

® رأفتـــلوجيا الرأفتانى said...

نجادى غبى سياسيا ودبلوماسيا زى معظم حكامنا فى الشرق الاوسط. واخد الحكايه قفش . مابيفكرش ما بيحاولش كده يوضح موقفه وصورته للعالم من غير صواريخ وشهاب واحد وثلاثه
والله يا حفصه انا قاعد اعمل لسته فى اليلاد اللى ممكن اعيش فيها لو الحرب دى قامت
جزر القمر ما يعلاش عيلها

نعكشة said...

:D

العالم دية لية غاوية حرب كدة
إية القيف دة.

بس سؤال يعني
لما هوه ببيقول

القادر على حمل رأس حربي نووي


يعني ممكن لو ضرب سيادتو اسرائيل
ماهو الفلسطينيين هيتضرروا برضو من النووي
ولا إية

ماهي الفكرة زي ما حضرتك قلتي
لو ضرب المصالح الامريكية باق يالويت ولا قطر هيتضرر


وبعدين بقة مع الناس دية

ربنا يهديهم

متنسيش تبعتي الأربعة جنية اللي سلفتهملك قبل ما تسافري في جواب بوسطة

ربنا يستر

دمتي سالمة
سلامٌ عليكي

فاتيما said...

حفصة
يا حبيبتى
ربنا يسلم إن شاء الله
و يا ستى هيا موتة و لا اكتر لو المواضيع إتنيلت قوى يعنى طيارة و إرجعى على مصر موتى وسطينا
هيا موتة و لا اكتر بقولك
إنا كنت عند نسرين بسيونى و كاتبة بوست من وحى الاحداث الراهنة برضو
ربنا يستر إن شاء الله
و يا رب يطمنا عليكم كلكم قادر يا كريم
تحياتى يا حبيبتى
و بعدين مش إنتى اللى قعدتى تنبرى فيها البوست اللى فات و تقولى مفيش تغيير فى حياتى معملتش لسه حاجة الأيام هيا هيا
إتفضلى يا ست
إهى هتتغير تغييرات سودة إهى
عشان زى ما الحكمة الخالدة ما بتقول
إحذر مما تتمناه
تحياتى يا حبيبتى
و فطستينى من الضحك على حكاية الكنبة دى الله يحظك

Desert cat said...

اولا كل سنة وانتى طيبة ولو انها جت متاخره
والعمر كله ليكى يارب وتحققى كل ما تتمنى
بالنسبة لموضوع البوست فانا عندى كالو بسبب اللنكات اللى دخلتها
دعواتك بالشفاء
كل سنة و انتى بالف خير

Nsreen Bsunee said...

وعلى رأسهم الكويت
هئ هئ هئ هئ هئ هئ هئ هئ هئ هئ

والله يا بنتي القاعده العسكريه لو انا طويله شويه اشوفها مسافه خمس دقايق بالسياره اصلا
وهنا مش قاعده واحده كمان
والكوي كلها متجيش قد امبابه
:))
بصي بقي انا من اشد المعارضين لسياسه ايران بس معلش هى امريكا مينفعش معاها غير بجاحه احمدي نجاد
هى عماله تهدد تهدد وتقول نووى ومش نووى وعاوزه تمشي ام الكون على ان مزاجها
والمفروض بقي احمدي نجاد يقول آمين
ما هو لازم يبجح
واهى امريكا جت بكده
بعد العرض بتاع الصواريخ جابت ورا علطول
اهو لما نشوف ايه اللى حيحصل
واحنا من ناحيه حنشوف يا اختشي حنشوف اوى
:))

اجندا حمرا said...

كل سنه و انتي طيبه ياحفصه معلش جت متأخره بس لظروف انترنتيه و مشاكل في الشبكه
بس تعالي هنا باي باي علي فين؟ربنا يستر و مايكونش فيه اي حاجه حتحصل

الصراحه بتاع ايران ده مجنون و كلامه بيدل علي جنانه و لا همه شعبه و لا اي حاجه
ربنا يستر و لو حسيتي بأي حاجه تيكت علي مصر و تعالي وسطينا
:)
عقبال بليون سنه ياقمر

راجى said...

كل سنة وانتى طيبة
البوست ده على فكره من اظرف ما كتبتى، وانا مندهش انى موش لاقى حاجة اختلف معاكى فيها المرة دى
:)))

HafSSa said...

عاشور
اجازة ايه يا خويا
بقلك حننضرب بالننوي تقلي اجازة سعيدة ؟؟
لا لا ملكش حق
:)
نورتني


الزعيم الرافتاني
لسته ايه؟؟ مش انت في امريكا؟؟ حد يبقى فيها و يخاف على نفسه برضو؟؟
صلي عالنبي يا عمنا


اهلا يا نعكشة
اتسرحتي النهاردة و لا لسه؟
حبعتلك الاربيعن جنية بس اوصل
فين معرفش؟


فاتيما روحي انا
والله انا منبرتش
انا بس كنت بستحتث عجلة الزمن انها تمشي شوية
فقوم خرفت والفرامل سابت


قطة الصحرا
ربنا يعينك و يشفيكي من ما قراتيه يا اختي
قلوبنا معك


نسرين
انتي تيجي تقضي الصيفية معايا
اها
ديتها قطر لسه احسن سنة من الكويت و نطلع بطيارة ورق مع بعض على مطار برج العرب نصيف


اجندا حمرا
ولا يهمك التهنئة
نتقبل التهانيو الهدايا طوال شهر يوليو المعظم



استاذ راجي
تعليقك يشرفني لكن لااخفي عليك شده اندهاشي لحد البله انك ملقتش حاجة تختلف فيها معايا
يعني لو حضرتك بتقرالي بنية انك متاكد لازم تلاقي شئ تختلف فيه معايا فدي علامة متريحنيش
بصراحة
و م شمعنى اننا مختلفين فده شئ وحش
المهم اننا منفرضش راينا على بعض
اونتهم بعض بالجهل
زيارتك عزيزة


تحياتي للجميع

HafSSa said...

تعليق ليا على فكرة لاحظت وجودها و انتشارها بين اغلبنا

فكرة ان امريكا هددت ايران فلما ايران عملت عرض الصواريخ بتاعها ده امريكا خافت و جابت لورا دي انا مش مقتنعة بيها لاسباب كتيرة اوي


اولا: متوقع اوي ان امريكا تكون عاوزة تستفز ايران عشان الهبلة اياها تهوش و تفرض عضلاتها و امريكا تكسب حاجتين
1- تقول لهيئة البتاع النووي اللي بتفتش فيما معناه"اهو شفتوا.؟؟ جالكو اكلامي؟؟ اهو عندها نووي و صواريخ و بتهوش بيهم، كذبتش انا عليكوا؟؟"
2- تقدر تحدد مدى قوة الصواريخ اللي استخدمتها ايران و بالتالي تقدر تظبط نفسها و تعرف تتحضر ازاي تواجه ايران وتعيد ترتيب اوراقها ليس خوفا،و انما استعدادا لما هو ات

ثانيا:
ايران فرضها لعضالتها له تفسير انها عاوزة يكون لها كيان معترف بيه بين الرووس الكبيرة زي الصين او روسيا الظاهر و لكن امريكا لا تقبل شراكة مهما كان مع اي حد
و اذا قبلت فبيكون بشكل صوري و على الورق
و لكون جمهوري خبلاني ايراني اسلامي فلا ممكن ابدا امريكا تقبل بيه راس مساوية و تمسكه حتة من الكيكة
هذا والله اعلم


تحياتي