احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Tuesday, July 22, 2008

على راسنا باروكة ريش


يعني حالة من ازدواج المعايير و الاصرار على اتباع نظرية المؤامرة ضد العرب بالمجمل و المسلمين بالاخص
مثيرة للشقفة
خبرين حصلوا في نفس الوقت تقريبا
خبر بترحيل كراديتش للمحكمة الدولية في لا هاي
و نفس الخبر ينطبق على رئيس السودان عمر البشير
الاتنين قاموا بعمليات ابادة جماعية لعرق بشري معين من سكان اوطانهم
سواء كراديتش قتل مسلمين
او البشير قتل مسيحين
فالاتنين يبقوا قتالين قتلا
طبعا هما مارحوش ميدان الحرب بنفسهم و قتلوا الناس
لكن مادامهم كانوا و مازالوا على راس حكمهم اذن كل شئ بيتم بعلمهم و موافقتهم
امال هما رؤسا ليه؟
مش هما مسؤولين على ما يصدر وقت حكمهم من مشاكل؟؟
لكن لما قريت الخبرين لفت انتباهي حاجتين
التلعيقات اللي على خبر القبض على كراديتش
مليانة كلمات لغوية من نوعية تامر
و نظرية و لماذا هذا التوقيت
و البعض هو تشفي في الراجل و حكمه و ان ربنا حياخد بتار المسلمين منه
و قليل اوي اللي شايفين ان الموضوع لا مؤامرة و لا غيره
و انه زي ما كراديتش احنا عاوزينه يتسجن يبقى لازم البشير كمان يتسجن
الخبر بتاع البشير في الجزيرة مجتش عليه تعليقات كتيرة
لكن مواقع تانية و اخبار متفرقة من القناة اظهرت الغضب "الشعبي" في تلقي الامر و رفضهم لتسليم اي مواطن سوداني لاي محكمة
و حاصلة هناك تظاهرات تعبرعن حب الشعب لرئيسه لدرجة انه حتى الفرق الصوفية خارجة تحتفل بيه و تؤازره و تشد على ساعديه
طيب ايشمعنى احنا عاوزين كراديتش يتسجن و تتم محاكمته
بينما رافضين ان البشير يتم تسليمه و هو نفسه رافض تسليم اي مواطن سوداني للمحاكمة، يعني ايه مستوى الازدواجية ده اللي بنتعامل بيه مع كل شان دولي لينا قدام العالم؟
و بعد كده نستغرب اوي لما الدول الغير عربية يتهمونا بالتخلف و الرجعية و الطفولية في التصرف؟؟
مش معقولة حجم عدم النضج اللي احنا عايشين فيه
حتى الاطفال الصغيرين مبيعملوش كده
و لو علموا كده بعد القليل من الزجر و النهر او الترغيب و التهديد
بيتعظوا
لكن ايه مستوى التفكير الاهبل اللي احنا عايشين بيه ده؟؟
الشعوب اللي متضايقه من حكامها، ازاي حتتخلصوا منهم لو مش راضيين انهم يتاخدوا لمحاكمات دولية؟؟ مش الرؤسا دول اللي مطلعين عينكوا و مطفحينا الكوتة و مكسرين امالنا كل يوم عن اللي قبله؟؟
انا مش بقول ان المحاكمات الدولية دي قمة العدل
و لا انها ماشية على الصراط المستقيم
لان حاليا بالنسبة لي اول واحد المفروض يتاخد هو جورج بوش
لكن طبعا مين امه؟ ماما امريكا، و اللي له ضهر مبينضربش على بطنه
لكن له يوم
بس اقله ان كراديتش توبه من توبنا
ان مكنش اعز على المجتمع الغربي اكتر مننا
فلو احنا عاوزين نحتكم من كراديتش
اقل شئ نعمله اننا نوافق ان البشير او اي حاكم عربي غيره عمل حروب و قتل ناس من بني الوطن نفسه فقط لكونهم مختلفين معاه عرقيا او دينيا يتقدم لمحاكمة
و نشوف
يا يطلع برئ
يا ميطلعش
و اهو طريقة جديدة نغير بيها الرؤسا اللي قاعدين مبلطين على قلوبنا
و ركبوا باركيه كمان
مش كده و لاايه؟

30 comments:

على باب الله said...

أكتر حاجة نرفزتني في موضوع البشير هو أن كل الكتاب المصريين كتبوا فيما يشبه الإتفاق علي أنه راجل 100 % و موضوع دارفور ده ( اللي بقاله أكتر من 6 سنين من غير حل ) ده موضوع عادي خالص مالص و بيحصل في أحسن العائلات
الغريبة أن ولا كاتب واحد قال كلمة مفيدة عن الوضع في دارفور لكن الكلام كله كان عن إزدواجية المعايير الأمريكية

يعني أيه المشكلة لما يتقتل بتاع 300 الف نفر .. عادي شأن داخلي

و لا لما يخرج 2 مليون لاجيء بيصارعوا الموت و الإغتصاب و الجوع .. أيزي خالص

المهم في المسألة أن أمريكا عندها مؤامرة علي العرب

عباس العبد said...

نظرية التحكيم
يا حفصت
نظرية التحكيم
التانى هو بس الى غلطان

عباس العبد said...

نظرية التحكيم
يا حفصت
نظرية التحكيم
التانى هو بس الى غلطان

Samir Saad said...

اصل احنا خير امة، منغلطش. وإن غلطنا مانتحاسبش. لكن هما ضالين محتاجين منا الوعظ.
كراديتش سفاح لكن البشير راجل ابن ابوه
كراديتش خليفة الصليبيين، لكن البشير خليفة صلاح الطين
يلا القرد في عين امه غزال

Aardvark EF-111B said...

انا شخص بسيط, مشاعري مباشرة, و أحب المواقف السطحية حتى لو طلعتني غبي أمام الناس

باختصار يحرق دين أم كاراديتش على البشير في يوم واحد

أنا مش فاهم قصدك ايه يا صفصف

^ H@fSS@^ said...

على باب الله
الكتاب المصريين قالوا كده كنوع من المؤازرة لو حصل الكلام ده للحبيب اياه
لانهم لو شمتوا في البشير دلوقتي
ديكهوا حيفتك انهم مستنيين ليه عشان بس يقع يدبحوه


قدساتك هنا؟
و كمان معلق مرتين؟؟
احمدك يا رب
بص يا سيدي
انا بجد مكنتش حاطة في بالي نظرية التحكيم ابدا
لكن لما انت فعلا قلتها دلوقتي لقيتها سينسبل جدا جدا
***** على صعيد اخر بمناسبة بوستك بتاع الموت
النهاردة رحت الشغل لقيت اتنين من صاحباتي امهاتهم اتوفوا و فجاة
افتكرتك على طول و مكنتش عارفة اعمل فيك ايه لو شفتك؟؟
نشنت يا فالح؟




انوسنت
لو قصدك بالقرد الرؤسالاعرب
وعين امه هما الشعوب العربي
فمعتدقش ان حد فينا شايف الموضوع
ه
بس صدقت في تشبيهك
هما ضالين و نحن اللاضالين



فارك
حتشككني فيك ليه؟؟
الكلام واضح و صريح و زي ما انت قلت قبل كده فج
اجنا بنعير بمعياريناه هو صحيح الله يحرق الاتنين بس انا بتكلم عن ردة الفعل العربية الرسمي منها و الشعبي
ارجو ان ده يكون واضح يا اما حشك في نفسي


تحياتي للجميع

Wandering Scarab said...

حفصة..

اللي حصل دة نتيجة لعنصرية العرب. احنا العرب عنصريين جداً، متخيلين إن احنا أحسن شعب في الدنيا و فوق باقي الشعوب. إذا كان المسلمين العرب شايفين إن هما أحسن من المسلمين الصينيين والباكستانيين مثلاً، و بنقول إنه الشعب العربي أحسن شعب لأنه مختار و ربنا نزل القرأن بالعربي والنبي عربي، فطبعاً هنكون عنصريين ضد أي حاجة من الغرب. و كمان العرب متمسكين جداً بموضوع المؤامرة الأمريكية، هو اه أنا شايفة إنه بوش محتاج شبشب كبير من أبو زنوبة على دماغه و دماغ اللي خلفوه لكن مش كل حاجة تبقى مؤامرة أمريكية. يمكن بعد ٥٠ سنة ممكن العرب يتغيروا عن الفكر دة

جبهة التهييس الشعبية said...

وجورج بوش مش قتال قتلا؟
مين ح يحاكمه؟
والله احنا مش مشكلتنا اننا بنقول على نفسنا امة ما بتغلطتش
الكلام ده مش مظبوط

احنا مشكلتنا اننا مصممين نغلط نفسنا حتى لو مش غلطانين ومصممين نعتذر عن افعال احنا ما عملنهاش مع كل ادان واقامة ومصممين نسد ودانا

فيه اتنين مليون مدني اتقتلوا في العراق وافغانستان وللا دي كمان هسهس وما حصلش؟

ما داهية نكون احنا اللي محتلين امريكا ومش واخدين بالنا

^ H@fSS@^ said...

نوارة
بالحف قلت التالي
"
انا مش بقول ان المحاكمات الدولية دي قمة العدل
و لا انها ماشية على الصراط المستقيم
لان حاليا بالنسبة لي اول واحد المفروض يتاخد هو جورج بوش
لكن طبعا مين امه؟ ماما امريكا، و اللي له ضهر مبينضربش على بطنه
لكن له يوم
"
فده معناه ايه عندك؟؟
انتي فهمتيه ازاي؟؟
او بانهي منطق؟؟
و لا هو لازم افضل اجعر بس تيجي سيرة اميركا و عشان ابان بطلة و مخوفاتيه المنطقة؟؟
مش فاهمة ايه اللي ملقطيهوش في بوستي و فين قلت ان اميركا بنت حلال؟؟

karakib said...

:)))
كلام كبير
بس مين يفهم

Al Haraka said...

صح كده يا معلم. انا معاك.

Daana said...

الحقيقة البشير يستاهل الحرق مش بس يتقبض عليه. لكن عندي شوية توضيحات لبعض كلامك. البشير لم يقتل مواطنيين مسيحيين و حرب الجنوب لو كان قصدك عليها فهي روجت خطأً على إنها حرب بين مسيحيين و مسلمين و هي أصلاً حرب سياسية على إقتسام الحكم حتى إن نسبة المسيحيين في جنوب السودان لا تتعدى عشرين في المية و الأغلبية هم وثنيون أما أهل دارفور فهم مسلمين

عموما الحكم ده جاء في توقيت خاطئ لأنه حيضر بالمحاداثات الجارية. و نفس الوقت الحكم منقوص لأنه لم يأمر بتسليم المتمردين اللي قاموا بإرتكاب فظائع في حق أهل دارفور و العديد من المنظمات المدنية اللي بتعمل هناك

من قرائتي الكثيرة في موضوع دارفور و من إستماعي لأرآء العديد من الباحثين في هذا الشأن أقدر أقول و أنا مقتنعة إن مشكلة دارفور أساسها نزاعات قبلية على شح الموارد بسبب التصحر و المتمردين اللي كان كثير منهم منضمين للحزب الحاكم على فكرة إستغلوا هذه النزاعات لتدويل المشكلة خصوصا بعض القبض على عرابهم الترابي.. و لا أستبعد إنه يكون هو محرضهم..طبعا المشكلة تفاقمت بعد كده بسبب غباء الحكومة و تجنيدها لمليشيات عشان تحارب المتمردين

بالنسبة للمظاهرات المساندة للحكومة فهي بتطلع بإيعاز من الأمن. زي ما حصل في موضوع المدرسة البريطانية لو سمعتي عنه. أغلب الناس كانت متضايقة من اللي بيحصل و كثير منهم عملوا حملات تضامن معاها لكن الإعلام للأسف متحيز للحكومة

أنا شخصيا ما عندي مانع من القبض على البشير لكن لازم برضو يقبضوا على الحكومة كلها و على الترابي و نميري و خليل إبراهيم بتاع العدل و المساواة و باقي المتمردين و يحاكموهم على جرائمهم ضد السودان و السودانيين كلهم لأنهم قضوا على دولة كانت تحقق خطوات حقيقية في مشروع المدنية و الديموقراطية

و آسفة جدا جدا على التطويل

^ H@fSS@^ said...

كراكيب
وحياتك ولا حد مافيش حد حيفهم والله
بس ادينا بنهرتل من الهم


الحركة
متشكرين يا حضرتك
اتشرفنا بوجودك



دانا
اهلا بيكي اولا
كونك سودانية فده حيخليكي فاهمة الوضع هناك احسن مننا
و كلامك صح انها مش حرب دينية
لكن ده اللي كان بيوصلنا من الاعلام
و اللي اعرفه من اصدقاء سودانيين ليا ان الجنوب هو اللي متمركز فيه المسيحين السودانيين
و على ما اعتقد هو ده سبب رغبة الجنوب بالانفصالعن الشمال و باقي الدولة
في جميع الاحوال
سواء اللي ماتوا دولمسيحيين او غير مسيحيين
الفكرة ان فيه ناس اتقتلت بالغلط و ظلم و لازم حقها يرجعلها
و على رايك
يا ريتهم يقدموا للمحاكمة كل القائمة المذكورة اعلاه
و يا ريت يحاكماو كمان اللي ماتوا و لو عن طريق يعملولهم محاكمة صورية و يخلوا احفادهم يدفعوا تعويضات للناس
انا اعرف حاكم عربي
لازم يتعمله كده و ضرورض

تحياتي

عين فى الجنة said...

اذا كنا نتحدث عن العدل فما هو المرجع المحايد ؟ اين هى المسطرة التى يقاس عليها افعال الناس والتى يقوم عليها اناس لا يخافون فى الحق لومة لائم
قديما قال محمد ابن عبد الله ما معناه
لقد هلك اقوام اذا سرق فيهم القوى تركوه وان سرق فيه الضعيف اقاموا عليه الحد ووالله لوسرقت فاطمة بنت محمد لقطعت يدها
من الواضح الجلى ان الناس المطلوبين للعدالة المزعومة مطلوبون بطريقة انتقائية تمشى على ناس وناس لا
ولو ذكرنا الجرائم والمذابح التى اما شارك فيها رؤساء او قادة جيوش او سياسيين اما بالفعل او بالصمت والتجاهل
وحشرناهم على الهيج مقر المحكمة لتحولت لما يشبه سجن طرة
تحياتى

bluestone said...

طبعا كان لازم رد الفعل العربي يكون كدة .. أمال يعني كنتي عايزة الزعماء العرب يطلعوا يقولوا انه يستاهل .؟؟
كل واحد خايف الدور يجي عليه
بس هي الفكرة ان الضعيف هو اللي بيطير الاول

اما الازدواج في المعايير فعادي .. هو عادتنا ولا هنشتريها
حتى الصحف كتير منها تعمد بشكل غير مباشر للترويج للدعاية الهبلة دي
ييجي عند السودان
يقولك امر بالقاء القبض على الرئيس السوداني

وكاراديتش
يقولك اعتقال مرتكب مذبحة سربرنيتشا

مع الاتنين اقذر من بعض
والاتنين السبب في مذابح راح ضحيتها الالاف
ودارفور تشهد
ومن قبلها سربرنيتشا

السياسة لعبة قذرة وفيها لعيبة كويسين ولعيبة شاطرين
ولعيبة غشم وبيلعبوا بافترا

والغشيم هو اللي بيتعكش
:)

DantY ElMasrY said...

الرعب سيطر على كل الكتاب العرب اللى رفضوا ملاحقة البشير القضائية عملا بالمثل القائل :أكلت يوم أكل الثور الأبيض .
لكن الغريب بالنسبة لى هو الربط المباشر بين شخص الرئيس من ناحية وبين البلد كلها من ناحية تانية
يعنى البشير هو السودان
وكرامته هى كرامته السودان
وبشكل موازى مبارك هو مصر

هذا على المستوى العام
يعنى ما يسمى بالوعى الجمعى
ملاحقة البشير القضائية فرصة للتغيير وإن لم تكن للأفضل فلتكن من باب التغيير
وليؤكل الثور الأبيض بألف هنا وشفا وعقبال باقى الزريبة

Ahmed Kamal said...

مش عارف ليه تحليلك وصلك لانتقاد العرب و المسلمين و زوارك المفضلين ينتقدوا أننا خير أمة و يصفونا بالعنصرية ، لكن على العموم الرأي حر ، أرجع و اقول لك رأيي أنه لا يصح أن ننتقد ازدواجية معايير العرب في الوقت الذي نتقبل ازدواجية معايير أمريكا لمجرد أنه الأمر الواقع ، على الأقل فكريا ، و على فكرة موضوع المسيحيين ده في الجنوب و مالوش علاقة بدارفور أساسا ، و تاريخه أقدم من البشير نفسه ، و أما بالنسبة لدارفور نعم المحكمة غير محايده لأنها لم تطلب أحد من العدل و المساواة أو أي حد من المتمردين ، و السؤال الأهم من وراء المتمردين و ما سبب ظهورهم بعد ظهور البترول ، و لا تتهميني بالبحث عن مؤامرة لأني فعلا لا أحبها ، و لكنني أرفض أيضا أخذ المواضيع بشكل سطحي . و إلا فلماذا لا يحاكم بوش و آل صهيون ؟

و في النهاية و لأقرب فكرتي أنا لم أكن أحب صدام ، و مازلت أعتقد أنه كان خير عميل لأمريكا في زمنه ، و لم أحزن يوم إعدامه ، و لكن يوم سقوط بغداد كان أحد أسود أيام حياتي ، و أرجو أن تكوني قد فهمتي ما أعنيه ، الباطل حايفضل باطل من أي فريق ، لكن مايصحش نقبل باطل و نرفض باطل ، ولا إيه ؟

ابو احمد said...

ابنتى الجميله حفصه
انا طبعا مقدر شجاعتك وسباحتك ضد التيار بالبوست ده لكن ليا أسئله مش عارف دارت فى دماغك والا لأ
الأول هيه محاكمه جنائيه والا سياسيه
الثانى لو كانت سياسيه مين اللى بيحركها
الثالث الباحثون عن العدل والحق هل يبحثون عنه عند قاضى حقيقي يعنى معندهوش ازدواجيه والا يبحثوا عنه عند محكمه معاييرها سياسيه وليست قانونيه
ملاحظتيش ان دى حرب بين الصين وامريكا على البترول
على فكره انا ضد البشير وكل الحكام العرب ومع تصحيح مفاهيمنا وتنقيه أحكامنا وثقافتنا من الغوغائيه ولكن مش معقول استبدل ثقافه ومعايير خطأ بسياسه ومعايير خطأ اخرى
آسف للاطاله
واتمنى لكى دوام السباحه ضد التيار الخطأ بمعايير صحيحه

أبوفارس said...

هى محاكمه سياسيه طبعا يابواحمد وحانشوف من ده كتير الفتره القادمه وخاصه مع تزايد احاجه الى البترول والمواد الاوليه الاخرى
ومافيش عدل جد ولاضمير بالمطلق كده.. بس غشميه حكامنا بقت زياده يامجدى وبياخدوا ف رجلهم البلد بما فيها ومن فيها يمكن حاجه زى كده تخلهم يشغلوا دماغهم سويتين بدل اسلوب
..شعبى وانا حر فيه ده
بوست مجدع احفصه تعرفى شفت الخبر ف البى بى سى وتوفعت ماحدث بااحرف
وردود الفعل والصراخ والمظاهرات
ومشهد البشير وهو يهز عصاه ذكرنى بابوعدى وهو يطلق النار من مسدسه
والشعب بهتف وهو يبتسم حتى ضاع العراق وشعب العراق الله اعلم لامتى
تحياتى ومودتى... خالد

مُزمُز said...

ايه ده؟؟
ايه اللي بيحصل؟؟
مين البشير ده؟؟
ومين امريكا دي؟؟
انا مش فاهم حاجة
انا فين هنا؟؟

ابو احمد said...

معلش ياحفصه مش معقول أشوف حبيبى ابو فارس وممسيش عليه
بس ياخالد احنا بقينا بين شقى رحى بين نظام دولى غاشم وحكام وتقافه غاشمه لا ده صح ولا ده صح عاملين زى فى الداخل بين نار الأخوان واستبداد الحكام نفسنا فى نظام دولى عادل وديموقراطى له معايير واحده ياه ياخالد يبقى العالم شكله حلو وداخليا نظام ديمقراطى ياه الواحد بيحلم
تحياتى ليكى ياحفصه وتحياتى لأبو فارس

أبوفارس said...

أبو أحمد
حتى يحين الحين ويتحقق حلمك علينا العمل من خلال الموجود..والسياسه هى فن الممكن..وهناك تناقضات وأبنيه ذات أستقلاليه نسبيه علينا أستغلالها
..مثلا محكمه لاهاى طلعت قرار ضد حائط الفصل العنصرى اﻷسرائيلى وقرار حاد جدا..عملنا بيه أيه..؟؟ ولاالهوا..أحنا اللى ميعناه..مش أسرائيل..
أسبانيا أصدرت قرار أعتقال لمسئولين أسرائيلين وقبلها بلجيكا بتهمه أرتكاب جرائم حرب..وفرنسا ضد جنرالات الجزائر المسئولين عن مذابح الحرب اﻷهليه..أقف بقى وأقول ياتحاكموا بوش اﻷول يامانيش لاعب..والا أخد المتاح وأبنى عليه أنشاالله بعد جيل..؟؟
الهتاف والصريخ سهل ياأبو أحمد وأول ناس عارفين أننا ظاهره صوتيه هم أعدائنا..وكل وصوتنا ما يعلا وسقف مطالبنا يطلع هما يستريحوا
على فكره الشيوعى السودانى طلع بيان محترم جدا ف الموضوع..ومنشور ف "حوار متمدن"..دور عليه وأن حاشوف يمكن أقدر ابعت لك اللينك
معلهش ياحفصه
..اعذرى تطفلنا..وأحتلالنا لفضائك السيبرى..تحياتى وصادق مودتى..خالد

lastknight said...

أوسخ من رد الفعل العربى على قرار اعتقال البشير رد الفعل الليبى على اعتقال ابن معمر القذافى فى سويسرا .. كارثه حقيقيه بكل المقاييس

ذو النون المصري said...

زي ما قلتي بالظبط
علي راسنا باروكه ريش
و كمان بنبدلها
المشكله في المعترضين هو نقص المعلومات
يعني محدش عارف ايه اللي بيحصل في دارفور اصلا سوي ان مجموعه من المتمردين و البشير بيحاول يردهم عن غيهم

عم مينا said...

و قالك ايه السودان مش موافقة علي محاكمة دولية و هتعمل محكمة محلية و سلملي علي القضاء المستقل!

The Alien said...

أنا كل ما أفتكر منظر البشير لما راح دارفور الأسبوع اللي فات وهو بيرقص وبيتكلم عن التنمية بموت من الضحك
:)
كراديتش مجرم حرب ويستاهل ضرب الجزمة عشان قتل ملسمين .. البشير رئيس مؤمن ومحاكمته تعدي علي إستقلال السودان حتي لو كان السبب ف ألوف القتلي والاجئين من أهل بلده

عمر الدنيا ما هيكون فيها عدل لإن اللعبة لعبة مصالح
يعني لما ييجي حد ف يوم من اﻷيام يحاكم بوش .. هو/هي هيكونوا بيعملوا كدا عشان مصلحتهم
أنا مبقتش أصدق إن فيه حد ف العالم بيعمل حاجة عشان حد من غير أي مصالح

تحياتي

Aardvark EF-111B said...

المعيار الوضيع لحقوق الانسان في مصر
قتل 80 انسان على مزلقان في مطروح - يطلع وزير النقل يقول (حادث قدري)

غرق 1100 بني آدم في البحر يطلع القضاء بعد سنتين يقول برضه الحادث قدري و غلطة الربان اللي غرق

و بعد كدة أندهش عشان واحد مش عاجبه توقيت القبض على كاراديتش و للا مكرم محمد احمد مش عاجبه القرار قي حق البشير

و استغرب ليه؟؟؟

^ H@fSS@^ said...

كنت على وشك الرد و التفسير لكل صاحب تعليق
لكن
خبر قضية العبارة لدعلي الابلاتين و سيحلي الميكروتشيب في بعضها
لذلك اذ لقيتوا أي خلل في الرد اهو التوضيح سبق
اولا البقاء في مصر
خلاص مبقاش فيه ناس
عليه العوض و منه العوض

استاذ راجي
مافيش مرجع للعدل محايد
لانه لو فيه كان زي ما قلت في البوست الاولى انهم يجرجروا بوش نفسه و يحاكموه كمجرم حرب
ده في رايي الشخصي


بلو
مثال اللغة المستخدمة بيفكرني بنظرية الخطاب الانتحاري و الخطاب التحريضي
فاكراها؟
بس البشير مش غشيم
يعني هو مش اهبل انه يا حبة عيني ميكونش عارف اللي بيحصل فيه بلده
داهية تاخده هو امثاله


دانتي
مش غريبة انه يتم الربط بين البشير كشخص و بين البلد كانها بقية عزبة بابي اللي سابهالوا لما مات
ما هي دي الموضة
او يعني ده بقى العادي
زي ما مصر هي ناصر و ناصر هو مصر
فالسودان هي البشير و البشير هو السودان
زي ما سبقهم بكتير ستالين هو روسيا
كله نفس الماركة
عقبا ل ما الكل يندبح و يدوقوا طعم الويل

^ H@fSS@^ said...

استاذ احمد
انت مش عارفة ليه تحليلي وصلني لانتقاد العرب و المسلمين؟
مش البشير ده بيتولى رئاسة دولة اسلامية عربية برضو لا أنا غلطانة؟؟
يعني مؤكد مادام كدا فبتالي بتكلم عن ردة فعل الناس اللي هي بالتالي برضو حيكونوا عرب و مسلمين
حضرتك شايف انه في الزمن ده فعلا من حقنا نقول كنا خير امه اخرجت للناس؟؟
طيب والله دي تبقى عيبة و كبيرة اوي
لما نعمل حاجة واحدة بس عليها القيمة نبقى نقول اننا احسن من غيرنا عرقا و ديانة
لكن غير كده فمينفعش
حتبقى اسمها بجاحة
بالنسبة لتلعيقات الزوار عندي
فكل واحد يقول اللي عاوزه هو حر
المهم ميشتمنيش او يتهمني بقلة المعرفة
و مش معنى ان فيه حد معلق عندي يبقى لازم اكون باصمة له على كلامه
ممكن اتفق معاك الف مرة و نختلف مرتين
و ممكن اختلف معاك الف مرة ونتفق مرتين
ماهياش باكدج واحدة ابدا
او على الاقل مش ليا
و رابع حرجع اقول اني اول واحدة تنادي بمحاكمة بوش و كل من هم معه
اخيرا بالنسبة لصدام و العراق
فالرئيس العراقي شئ و البلد شئ تاني
أنا عمري ما وافقت على أي من افعاله لكن زيك بالظبط
يوم سقوط بغداد كان بالنسبة لي من اشاءم ايام ذاكرتي
فيه فرق كبير بين الدولة او الحكومة يعني
و بين البلد نفسها بين الشعب
دول دايما تلات محاور منفصلين عن بعض
لكن الشهادة للحق
احنا في العالم العربي طمسنا كل واحد فيهم مع التاني في حالة تزاوج غير شرعية بالمرة و بقت الحكومة هي الشعب
هي البلد و هي الرئيس و محدش عارف ياخد حق من التاني
و انا مقبلتش باي باطل على حساب باطل تاني
لو قبلت يا ريت حضرتك تنبهني فين و شكرا


والدي العزيز
ابو احمد
بصراحة أنا مسالتش نفسي ايه نوعية المحاكمة اللي حتم للطرفين
أنا كان هدفي الاول و مازال من البوست الاشارة لردة فعل الناس العادية
بغض النظر مين مظلوم و مين ظالم من كاردايتش او البشير
يعني تقدر تقول مهتمة بالناحية السيكولوجية لتفسير الخبر عند الناس
انه ازاي في ناحية بيقولوا كذا
و في المقابل ليها بيقولوا العكس
و دي علامة مخيفة جدا تدل على عدم الوعي
فيا داهية دقي


ابو فارس
تذكرك لمشهد صدام بنفس المرجلة و كيف انتهى
صدقني ميبشرشي بخير بتاتا بس خوفي هو على مصر
ما اصل الخريطة كده مش حلوة
فلسطين و اسرائيل من ناحية
ليبيا من ناحية تانية
دلوقتي السودان
يبقى مين اللي مقصود اصلا بكل المهاترات دي؟
ربنا يستر

^ H@fSS@^ said...

مزمز
انت هنا في مدونة الناس و العالم
موضوع الحلقة هو ازدواج ردة فعل العرب حول اعتقال كراديتش و طلب القبض على البشير
ارجوك تابعنا


ابو احمد و ابو فارس
تتفضلوا تعلقوا و تتناقشوا براحتكوا
املا احنا فاتحين البوستات للنقاش ليه؟
مش كده؟؟

الفارس الاخير
اذا طلع العيب من اهل العيب ميبقاش عيب
و قياسا عليه
اذا طلع العيب من ابن المجنونة القذافي ميبقاش عيب
ده اترفع عنه القلم خلاص
بس شعبه يا حرام خلاص سلم نمر الظاهر زي اغلب الشعوب
فساكتين عليه من باب ايه باظبط معرفش


ذوالنون
حلوة بنبدلها
يعني فيه كذا واحدة كمان
نهار اسود؟
بس حقلك
حتى لو فيه وعي على ايه اللي بيحصل بالظبط هناك برضو حتلاقي نفس ردة الفعل
الفكرة اننا لا يجب المساس بينا و لا تجب معاقبتنا باي حال من الاحوال


عم مينا
تخيل
اول ما قريت تعليقك يعني ازبهليت و بعدها فطست ضحك
بجد حيحاكموه محليا؟؟
بجد؟؟
هو أنا ريالتي نازلة اوي كده يعني قدام الناس؟؟
بجد دول ناس مسخرة



بيشو
مؤكد هي لعبة مصالح
بس مظنش ان الشعوب نفسها لها أي مصالح في الموضوع
ولا ايه؟


فارك
معاك الف حق