احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Sunday, June 29, 2008

تيجي مع الاسبان كاسات

اولا كان لابد من الايفاء بوعدي و الاعتراف بهزيمة الالمان مع اني مش مقتنعة بالهزيمة
لذلك اقول
وبعدين ادي اسبانيا اللي جابت الجون
والله جه كده
حظوظ
حظوظ الدنيا
و هما نفسهم بيعترفوا انهم عمرهم ما اتاهلوا للنهائي
فمؤكد انها كانت حظ عوالم يعني

و المانيا حبيبتي ضاع عليها ضربتين جزاء ومش عارفة ليه الحكم كان متحيز ضدهم مع ان مش المانيا اللي خرجلته بوفون ابو عيون خضرا من البطولة فالظاهر ان له اجنده خاصة مستخبية او حاجة (ايوة نظرية المؤامرة) و مش معنى ان المانيا خسرت المعركة دي فتكون خسرت الحرب كلها
حنشوف
هو اصلا تلاقي الفيفا و الاتحاد الاوروبي قالوا خلينا ندي الكاس لاسبانيا المرة دي حلاوة روح لانها اول مرة توصل للمستوى ده من فترة طويلة و المانيا مؤكد حتعوضها بعدين
السلام الملكي الفخوري الالماني

Einigkeit und Recht und Freiheit
für das deutsche Vaterland!
Danach lasst uns alle streben
Brüderlich mit Herz und Hand!
Einigkeit und Recht und Freiheit
Sind des Glückes Unterpfand;
Blüh' im Glanze dieses
Glückes, Blühe, deutsches Vaterland.
Unity and law and freedom
For the German Fatherland
Let us all strive for that
In brotherhood with heart and hand!
Unity and law and freedom
Are the foundation for happiness
Bloom in the glow of happiness
German Fatherland.
خلوا بالكوا خبو اعيالكوا
الالمان جايين سوخنين
منهزرش
مناننش
و كمان منضيعش اجوان
شفين شتايجروالواد شنايدر
كاس العالم كان تسخين

Tuesday, June 24, 2008

نظرية أو نبوءة أو نكبة، المهم كله بحرف البون

التالي ذكره هو من محض توصيل افكاري ببعضها و تنبؤاتي
سواء صحيح ام غير صحيح ميهمنيش
هو فقط ما اراه سوف يحدث بنسبة كبيرة و متوقعاه لما هو ات

و لهذه المقالة اسماء كثيرة جالت و صالت في بالي

فمرة ارى ان الاسم المناسب هو
نظرية النشوء و التطور الاسلامية

او

الغزو السعودي لسواحل البسفور

او ممكن برضو

الانتشار و التوغل ، احدث الطرق في هدم ثقافات الغير

اعتقد ان اغلب الناس اللي عايشة في العالم العربي بتابع مسلسلين تركيين واحد اسمه نور و التاني اسمه سنوات الضياع
اساميهم الحقيقية مش حتفرق فشئ لانهم في النهاية متدبلجين
و لان اغلبنا لا يفقه من التركية غير ايفندي و باشا و سيس و كان الله بالسر عليم
من فترة و في بداية عرض المسلسلات دي كنت قريت تعليق لشخص ما في مكان ما ان التراكوة اذكياء
هما حابين يجتذبوا استثمارات عربية و بالاخص سعودية لبلدهم و كمان عاوزين يكون لهم وضع مهم كبلد سياحي
على خارطة العالم
من حقهم طبعا
الراي ده كمان قال ان المسلسلين دول بالذات كانوا معمولين مع وضع اعتبارات معينة في الملبس و الحاجات اللي مسموح بيها و اللي مش مسموح بيها
(يبدو ان المسلسلات التركية العادية فاجرة و ماشية على حل شعرها)
احب انوه في النص على شئ مهم جدا
و هو ان المسلسلين دول متعرضوش في اي قناة تانية غير الام بي سي اللي هي قناة سعودية بتمويل سعودي لدعوة لوجهة النظر السعودية في السياسة و الدين لو لزم و الاهم و الاخطر في اسلوب الحياة
و لا استبعد ان دبلجة المسلسلين دول تمت بتمويل من الام بي سي نفسها
زي ما هو حاصل لأغلب المسلسلات الميهيكية
طبعا ممكن واحد يقلي و فيها ايه لما شركة سعودية اعلامية تنتج او تدبلج مسلسلين و تذيعهم في قنواتها؟؟ بيزنس يعني مافيهوش مشكلة. و انا اقول مؤكد كتيرمننا عارفين شكل نمط الاخ اللي بيساعد اخواته و يرجع بعدين يذلهم بفلوسه او يفرض عليهم شروطه
معلش انا قلبي اسود و تفكيري متشائم

ارجع للمسلسلين تاني
انا مكنتش متابعاهم بشكل محموم لكن لاحظت في المجمل انه مافيهومش بوس، او عري او رقص او حاجات غريبة على مجتمعنا ، بالعكس، سنوات الضياع بطئ بشكل مقزز و نور احداثه تتوالي زي كانه اخر مسلسل حينتجوه
يعني لو كانوا من الاول قالو لنا ان ده مسلسل عربي والله مكنتش اخدت بالي من اي فرق
هو بعينه و برزالته و سطحيته و مطه و تطويله
المهم عشان مخرجش من النقطة
انا تخيلت التالي
المسلسلين نجحوا فعلا في اثارة اهتمام الناس
و وصل قوة الاعجاب بالمسلسلين لدرجة ان الكثير دلوقتي متهايين انهم لازم يسافروا يصيفيوا في تركيا الصيف اللي جاي
و في خبر صغير كنت قراته من فترة اسبوعين تقريبا و للاسف محتفظتش بمصدره
لكنه كان بيقول ان نسبة الحجوازت في المملكة لسفريات الصيف ارتفعت لتركيا بشكل ملحوظ جدا
بينما قلت للبلاد عربية اخرى و من اهمها القاهرة و بيروت و دبي و تونس و المغرب
و حتى هنا في قطر لاحظت كمية من الاعلانات لوكلاء السفر لعروض مقدمة على تركيا
و هي كانت موجوده من قبل
لكن دلوقتي بيشار ليها بالبنان
و باسعار مخفضة اكتر
و بتزيين اعلامي واضح اكتر من الاول
كل ده بيزنس
حلو ماشي معنديش فيه مشكلة
طبعا هي غلطتنا اننا في مصر مش بنعمل حاجة تشد الناس لينا
و لو عملنا بتكون بس في الاعلان لكن على ارض الواقع نصها بيكون كذب و الربع بيكون حاصل بس بمشاكل
فاحنا اللي بوظنا سمعتنا بايدينا

دلوقتي اللي انا شايفاه ممكن يحصل هو التالي
واضح ان القطاع الخليجي و بالاخص السعودي متجه نحو تركيا
بناءا على ما سبق و شافوه من جمال المناظر الطبيعية
و جمال التركيات اللطيف
و حلاوة الرجالة التراكوة الغير مسبوق
و لا استبعد انتشار التواجد السعودي السياحي في الدولة
و الذي سوف يترتب عليه انتشار المتطلبات السعودية في هذا المجتمع المتفتح
و من امثله ذلك انتشار محلات لبيع الملابس الاسلامية
و المطاعم الاسلامية
و الخروجات الاسلامية
و السينما "النظيفة" و اماكن اللهو العائلية و يمنع منعا باتا دخول الشباب المفرداني او الكوبلز
و بعد فترة نلاقي مطاعم تقدم الاكل السعودي زي المندي و المظبي و الكبسة و الحبشتكانات دي كلها
و انا معنديش مشكلة مع الاكل السعودي او الخليجي بشكل عام
لكن ايه فايدة اني اسافر برة و ارجع اطلب اكل انا متعودة عليه؟؟
فين هنا الفايدة من السفر؟ و على العموم ده مش قصدي

الفكرة اني بديت اقلق على تركيا العلمانية
لانه جاييها مد متطرف وهابي قوي و عتيد
و لان تركيا الان في قمة و عز حربها ما بين اظهار شكلها كدولة علمانية او كدولة اسلامية
الحزب الاسلامي فيها بدت شوكته تقوى
بيكسبوا معركة
و بيخسروا التانية
لكن مع بداية الغزو اياه
لا اتوقع ان تصمد تركيا العلمانية الكثير اما تركيا الاسلامية القادمة برعاية التطرف الاسلامي متمثلا في الفكر الوهابي و محاطا بكل فلوس ابار البترول
فانا شايفة انه حيتكتبلها نجاح قوي اوي اذا تمت رعايتها بالشكل الغير مباشر ده
فحنبص نلاقي ان الحزب الاسلامي اياه
مرة على مرة بيقدم للمجلس التركي طلبات للسماح باقرار قوانين معينة احتراما للجالية المسلمة التركية او حتى السياحية
و مرة على مرة
قانون من هنا و قانون من هناك
حنلاقي ان تركيا بقت اسلاميه صرف
و وقتها يتحول الحكم لحكم اسلامي درجة اولى بشكل رسمي لا غبار على قانونيته
الاذكى بقى لو الحزب الاسلامي عمل حركة تحويل تركيا لاسلاميه بعد انضمامها للاتحاد الاوروبي و بكده حيحصل حاجتين
اولا
يمكن اوروبا وقتها تضطر انها تمشي تركيا من الاتحاد و طبعا دي حتكون اكبر جنازة للمسلمين عشان نشبع فيها لطم و نتهم اوروبا بكرهها للاسلام و المسلمين مع ان الغلطة غلطتنا لان تركيا اخلفت شرط للانضمام و هو عدم وجود هوية دينية من اي نوع للدولة

ثانيا
لو اضطرت اوروبا انها تسيب تركيا في الاتحاد فدي حتكون الشوكة المتنية في ضهرهم و حتنطلهم كل شوية بقانون يراعي المسلمين
او اعتراض على قانون تاني لا يراعي مشاعر المسلمين

بس احب انبه ان الفاتيكان مش منضم للاتحاد الاوروبي، اولا لانه اصلا مش دولة هو فقط كيان ديني لفئة دينية معينة و ثانيا لانه حتى لو كان دولة فمش حيستحب دخوله لمجمع دول لا دينية التشريع.

اخيرا لا استبعد اي شئ يحصل لتغيير المجتمع التركي المتفتح الحر و تحويله لمجتمع متوهبن متطرف لانه ده بالفعل حصل لمصر والدليل قالولوا و اللي مش شايف يقول عدس

تركيا.... فوقي من النوم يا حبيبتي

اللهم بلغت اللهم فاشهد

Sunday, June 22, 2008

هلاوس

صحياني مش سهل و معروف لعيلتناو اصدقائنا انه فقط من يريد بعتره عمره و اللعب في عداد موته فليتقدم لتصحيتي

و ياما خسرت قرايب قبل الصحاب لانهم اتصلوا بيا في وقت غلط جدا او حاولوا يهزروا معايا هزار بايخ و يجييوا قال ايه يصحوني بخضة تنقلب ليلة سودا على رووسهم

قوم ايه

النهاردة العصرية اصحي

و قبل ميعاد المنبه لما يرن

و لوحدي

دول تلات حاجات مش بيحصلوا

و لو حصلوا بتبقى معجزة و رسالة تنبيهية لحدوث شئ لازم احطات له

فصحيت على حلم

خير اللهم اجعله خير

ان ايه لازم اصحى و بسرعة عشان فيه راس برص طالعالي من فتحة التكييف

نهار اسود!!!؟؟؟ برص في بيتي؟؟

واللي ميعرفش تاريخي المشين مع الابراص ياخد فكرة هنا

و دي مش حاجة جديدة انا طووووول عمري عندي عداوة بيني و بين الابراص

المهم

صحيت من الحلم المزعج ده شيكت على كل التكييفات

ملقتش شئ

قلت هي فعلا اضغاث احلام


قضيت يومي و انا متوجسة خيفة لكن ملقيتش و لا دليل معايا ان فيه برص متربص بيا برا الشباك

فقلت يا واد طنش خالص

اتفرجت على مبارة ايطاليا و اسبانيا

اتقهرت عليك يا بوفون يا حبيبي

صحيح ايطاليا ماشيه حسب نشيدها القومي الجديد





لكنده مينمنعش انهم لعبوا

و بكفاءة عالية كمان

و بوفون صد كمية خطيرة من الاجوان من العيال المتدلعة بتاعت اسباينا

كل ما حد يقربلهم يقعوا

اي ايدي

اي رجلي

و حاجة كده طرية خالص

لكن ايطاليا

يا عيني على ايطاليا

يا سيدي انا على ايطاليا

ايطاليا دي يعني اقول فيها ايه

لو لم اكن مخلطة عرقيا

لوددت ان اكون ايطاليه

طيب والله شكلي ينفع


المهم

خلصت المباراة

وضبت اموري للشغل تاني يوم

قفلت نور الاودة و بستعد للنوم

رحت اشغل تكيفيي و انا في الضلمة( خدوا بالكوا انا اصلا بلبس نضارة) فلقيت بوز التكييف طالع

خير

هو حيبوظ على اخر الليل كده؟؟

قلت افتح النور و البس النضارة و يمكن تصليحة ديتها شيكارتونة و الصم المواضيع

فلقيته هو بعينه مافيش غيره

ساب البيت كله و جالي لحد عندي

و الادهى و الامر

انه هرب

و لجوا الاودة

طيب اجيبه منين انا دلوقتي؟؟

انام ازاي انا دلوقتي؟؟

ايش يضمني اني انام و مصحاش الاقيه واقف جنبي على المخدة بيتامل جمال عيوني الناعسة؟؟

او اني مصحاش الاقيه مستخبي في خفي حنين اللي بمطتيهم كل يوم؟؟


اني احدثكم الان و انا في قمة القلق النفسي من وجود هذا الكائن الغريب

و انا اعلنتها كذا مرة قبل كده

اني على استعداد اني اواجه اسد

لكن برص

لا و الف لا

شوفولكوا حل