صحياني مش سهل و معروف لعيلتناو اصدقائنا انه فقط من يريد بعتره عمره و اللعب في عداد موته فليتقدم لتصحيتي
و ياما خسرت قرايب قبل الصحاب لانهم اتصلوا بيا في وقت غلط جدا او حاولوا يهزروا معايا هزار بايخ و يجييوا قال ايه يصحوني بخضة تنقلب ليلة سودا على رووسهم
قوم ايه
النهاردة العصرية اصحي
و قبل ميعاد المنبه لما يرن
و لوحدي
دول تلات حاجات مش بيحصلوا
و لو حصلوا بتبقى معجزة و رسالة تنبيهية لحدوث شئ لازم احطات له
فصحيت على حلم
خير اللهم اجعله خير
ان ايه لازم اصحى و بسرعة عشان فيه راس برص طالعالي من فتحة التكييف
نهار اسود!!!؟؟؟ برص في بيتي؟؟
واللي ميعرفش تاريخي المشين مع الابراص ياخد فكرة هنا
و دي مش حاجة جديدة انا طووووول عمري عندي عداوة بيني و بين الابراص
المهم
صحيت من الحلم المزعج ده شيكت على كل التكييفات
ملقتش شئ
قلت هي فعلا اضغاث احلام
قضيت يومي و انا متوجسة خيفة لكن ملقيتش و لا دليل معايا ان فيه برص متربص بيا برا الشباك
فقلت يا واد طنش خالص
اتفرجت على مبارة ايطاليا و اسبانيا
اتقهرت عليك يا بوفون يا حبيبي
صحيح ايطاليا ماشيه حسب نشيدها القومي الجديد
لكنده مينمنعش انهم لعبوا
و بكفاءة عالية كمان
و بوفون صد كمية خطيرة من الاجوان من العيال المتدلعة بتاعت اسباينا
كل ما حد يقربلهم يقعوا
اي ايدي
اي رجلي
و حاجة كده طرية خالص
لكن ايطاليا
يا عيني على ايطاليا
يا سيدي انا على ايطاليا
ايطاليا دي يعني اقول فيها ايه
لو لم اكن مخلطة عرقيا
لوددت ان اكون ايطاليه
طيب والله شكلي ينفع
المهم
خلصت المباراة
وضبت اموري للشغل تاني يوم
قفلت نور الاودة و بستعد للنوم
رحت اشغل تكيفيي و انا في الضلمة( خدوا بالكوا انا اصلا بلبس نضارة) فلقيت بوز التكييف طالع
خير
هو حيبوظ على اخر الليل كده؟؟
قلت افتح النور و البس النضارة و يمكن تصليحة ديتها شيكارتونة و الصم المواضيع
فلقيته هو بعينه مافيش غيره
ساب البيت كله و جالي لحد عندي
و الادهى و الامر
انه هرب
و لجوا الاودة
طيب اجيبه منين انا دلوقتي؟؟
انام ازاي انا دلوقتي؟؟
ايش يضمني اني انام و مصحاش الاقيه واقف جنبي على المخدة بيتامل جمال عيوني الناعسة؟؟
او اني مصحاش الاقيه مستخبي في خفي حنين اللي بمطتيهم كل يوم؟؟
اني احدثكم الان و انا في قمة القلق النفسي من وجود هذا الكائن الغريب
و انا اعلنتها كذا مرة قبل كده
اني على استعداد اني اواجه اسد
لكن برص
لا و الف لا
شوفولكوا حل
8 comments:
المثل المصري يقول: "فلان دا زي البرص لا يهش ولا ينش لكن يربّي في القلب عداوة".
ليلتك سعيدة
حفصة
أنا عندي نفس مشكلتك دي بس مع الصراصير والخنافس.. أنا كنت دايماً أقول لبابا يا أنا يا الصرصار دة في البيت. انتي أكيد عارفة الصراصير بتاعت مصر.. الصرصار الفحل اللي بيطير و يدخل من الشباك و يقعد يتنطط جوا البيت على الارض و شواربه عمالة تتحرك.. منظر مرعب جداً. بس انتي شجاعة انك لسة قاعدة في البيت.. أنا لو مكانك و دة كان صرصار كان زماني عزلت.. اه والله.
هههههههههههههه
هههههههههههههههههه
هههههههههههههههههههه
يا صفصف ما تخافيش
البرص خايف منك اكتر مانتي خايفة منه
مش ممكن يقعد جنبك على المخدة هو اتجنن؟
اهلا انوسنت
بصراحة اول مرة اسمع المثل ده بس سخسخني من الضحك
هو فعلا البرص بيربي عداوة
شرفتني
مينو
بصي انا كمان بتقرف منهم بس مش بخاف
ليه؟
لان حركتهم نوعا ما مقدور على متابعتها و بالذات الخنفسا لانها بطيئة اوي
حقلك انا لو البرص بيمشي براحه او تقدري تتنبئي بحركته و تحسي بيها معنديش مشكلة
انا كل تعبي و قرفي منه في المراوغات
اه والله
معلش
نعمل ايه
لازم نتعايش معاهم
نوارة
تضمنيلي ان البرص خايف مني؟؟
و لو صحيت و لقيته و شعري شاب ححملك المسؤولية و اخلي ماما هي اللي تتصل تتخانق معاكي لو رقعت بالصوت اخر الليل ماشي؟؟
أنا باقول ماتتفرجيش على ماتشات كورة تاني ..
إنتي فكرتيني باليوم الأليم اللي اكتشفت فيه فار ، و قلبت الدنيا لأن المدام مش ممكن تنام و هو معانا في نفس البيت ، و بعد ما قلبت المطبخ فعلا مش مبالغة ، ماعرفتش غلطتي غير لما الباشمهندس ميكي خرج من مخبأه .. و طلع على رجلي ..
لكن دي حكاية تانية .
أنا باقول تحطي للبرص طبق فيه شوية لبن و تخشي تنامي .
تستاهلي ، وهو حد أصلاً يشجّع إيطاليا يا بنتي
وبعدين إيه لعبوا كويس دي ؟ هما عملوا على الأسبان غير هاجمة واحدة ؟
عموماً يعني عشان انتِ بنت حلال هسامحك على حكاية إيطاليا دي وأنصحك فيما يخص البرص ، وبناءً عليه فمازنجر هو الحل طبعاً :)
LOOOOOL
hehe... i watch those crawling 3ala selk el shebak mn barra in amazement! I wouldn't know how I'd act thought law dakhal gowa :D
اسفه جدا يا جماعة لعدم ردي عليكوا من قبل كده
مش عارفة ازاي موصلنيش ايميلات بالتعليقات
حاجة غريبة جدا حقاضي بسببها جوجل و لو كسبت ليكوا نصيب من التعويض
المهم
استاذ احمد بتتكلم جد والله؟؟
لو حطيت لبن للبرص حيحصله ايه؟؟
انا عن نفسي اكتشفت ان افضل سائل هو الديتول
بيحرقه و يزفلطه
بس لو بجد حكاية اللبن دي من بكرة حضرتك حرش لبن داير ما يدور البيت
محمد المصري
ايوة ايطاليا لعبوا كويس
حسب معرفتي انا بالكورة لعبوا كويس
ماليش دعوة هما لعبوا كويس
ازاي بقى معرفش
هههههههههههههههههه
انا فعلا افتكرتك في البوست ده وقلت لو محمد بقى كان بيواجه البرص كان عمل ايه؟
ابقى احكيلي عن وجهة نظرك في كيفية محاربة البرص
و الف الف مبروك ليا
عشان سي دي منير نزلك يا قطر و جبت منه نسختين احتياطا
:D
بلوفويد
بتضحكي يا اختي؟؟
طيب حستني اسمع صرختك لما يخشلك و متعرفيش تجيبيه
نياهااههااااااا
تحياتي
Post a Comment