"بيضة الويكيبيديا المكسورة"
دائما ما تأتيني المصايب بالصدف و الحمدلله
فالصدفة وحدها من دفعتني لتصفح مدونة مايكل نبيل و منها لمدونة نفسين حشيش و شدني بوسته عن فلم البرئ و منه لصفحة الويكيبيديا العربية تشرح ابعاد الفيلم
الى هنا و كل شيئ ماشي تمام لكني استغربت من الكم الهائل للكلمات الظاهرة بلون ازرق تفيد وجود تفسير لها
فمثلا ما الهدف من شرح معنى عصاة او مصري او انسان (و التي لم يوجد لها تعريف في الويكيبيديا من اساسه) الى اخره من الكلمات التي بطبعها معروفة المعنى لشخص وصل به مستواه العقلي لتصفح الانترنت و التنقيب عن معلومات تخص فلم مميز كفيلم البرئ و مقارنة بتعريفات الويكبيديا الانجليزية لافلامها فنجد مثلا فلم كسيد الخواتم يقوم بتعريف الكلمات المهمة فيه فقط و التي كانت من صميم تخليق مؤلف الرواية و لذلك يجب تفسيرها للقارئ و لكنهم لم يفسروا معنى كلمة انسان او جنسية الاشخاص او معنى كلمة خاتم مثلا
و سؤالي هو التالي
هو احنا حنفضل متخلفين لامتى؟؟
10 comments:
الى ان يرث الله الارض و من عليها
طيب ما هو تعريف "مصري"؟
و ما "الإنسان"
ليه انا شايف أن صفحة الفيلم على الويكي حلوة ... فيها معلومات كتير كانت جديدة علىّ انا شخصياً
صحيح في لينكات سخيفة لإنسان و آلة و الكلام ده بس مش مشكلة قوي ... ها نتجاهلها بمبدأ
" العارٍف لا يُعَرَف "
اهلا عاشور
الف
شرفتني
بكل بساطة تعريف مصري ممكن نقول فيها هو اي شخص يحمل الجنسية المصرية من غير ما نخش في انتماءات مثلا او نقول هو اي شخص بيحب مصر
بس انا هنا مش بتعامل مع كلمة مصري لوحدها انا بقراها وسط محتوى كامل لا اعتقد انه يعصب فيه فهم معنى كلمة مصري
و زيها الانسان
اللنك اللي انت حاطه لتدوينتك بيتكلم عن موضوع الحفرية المكتشفة حديثا
بينما موقع الويكي بيتعامل مع النص كأن كل كلمة فيه مستغلقة الفهم على القارئ ووصل بيه الامر انه بيشرح كلمة فكرة
الخ الخ الخ
جيمي
معلومات الفلم اه جديدة بس انا بحكي عن كثرة تفسير معاني كلمات زي ما انت قلت سخيفة
تحياتي
و إيه هي الفكرة؟ و إيه هو التفكير؟ و إيه علاقته بالذكاء؟ و هل كل فكرة نظرية؟ و إيه تاريخ الفكر الإنساني؟
مش دي كلها موضوعات ممكن الناس تكون عاوزة تبحث فيها و تعرف عنها؟ ويكيبيديا موسوعة.
و رجوعا لمصري: عايش في مصر ال أولها فين و آخرها فين بالضبط يعني؟ طيب و قبل الدولة المصرية المعاصرة كان من هو المصري؟ طيب و ايام الجنسية العثمانلية؟ و قبل الجنسيات؟ و قبل التاريخ؟ إيه أصل المصريين إثنولوجيًا؟ لغاتهم و دياناتهم؟ توزيعهم في العالم؟ اقتصادهم و سياستهم عبر التاريخ؟
مش شرط أن كل المعلومات دي هتكون موجودة في مقالة "مصري" لكن هتكون في روابط توصل إلى مقالات تتناول جوانب منها بتفصيل.
مش قصدي أغتت، لكن مش شايفة معي؟
اهلا الف
مافيش اي غتاتة هو موضوع قابل للنقاش و تختلف فيه وجهات النظر
بس الاسئلة اللي انت ذكرتها و ان كانت حقيقية و موضع حق سؤال بس مكانها مش نبذة عن فلم مصري
يعني انت دخلت في ناحية الفكرة و التفكير و علاقتة بالذكاء
ماشي
بس هل شايف ان ده له علاقة مباشرة و قوية بالفلم و قصته؟
و نفس الشيئ بالنسبة للمصري اللي يحب يعرف عن اصول المصريين و تاريخهم و جغرافيتهم و تنوعهم الانثروبولجي ميفتحش فلم البرئ و يفتح كلمة المصريين مثلا
عن نفسي و ده رايي الشخصي و اللي بسببه عبرت عنه في التدوينة هو كثرة التعريفات اللي حسيتها زي فواصل كيترة بتقطع حبل القراءة و ثانيا مع احترامي الشديد لويكي و انها موسوعة بس معتمدش عليها كمصدر صادق كون مصادرها و كتابها مختلفين و مفتوحين و بيتبعوا في الغالب رايهم الشخصي
صحيح جهد يشكروا عليه
بس بالنسبة لي لو حبحث في الموضوعات السابق ذكرها من ناحيتك مثلا حرجع لمصدر موثوق منه اكتر
من كدا
و لو حنعرف كل كلمة قد نعتقد انها مستغلقة الفهم او يمكن فيه شخص يحب يعرف معناها يبقى نضلل كل كلمة في كل مقال و نرجعها لاصلها بما في ذلك الافعال و نذكر جذرها و تصريفاتها و اصل الكلمة و معناها و تفريعاتها
مش قصدي ارزل بجد بس الشيئ بالشيئ يذكر و مادام عاوزين نفيد الناس اللي فتحت فلم البرئ و نشرح لهم كل كلمةموجودة يبقى نفيدهم من جميع النواحي احسن
لا ايه قولك؟
في انتظار تعليقك و شرفتني
تقبل تحياتي
الي ان يشاء الله
لكن التعريفات يا حفصة في روابط و مش بتقطع الكلام في رأيي، و دي ميزة الروابط، إلا إن كان قصدك على اللون يعني، و حتى دي لها حلول و ممكن كل واحد يغيّر اللون.
الفكرة هي أننا ما نعرفش فارئ المقالة مهتم به إيه و لا نفسه يستزيد من إيه، و إيه هو معيار المهم و غير المهم علشان نحدد الروابط المناسبة. حاجة زي دي تبدو بسيطة لكن مش هتتخيلي قد إيه الوصول لإجماع عليها صعب.
فيما يتعلق بالربط بالأفعال و كل الكلمات فدا مش مستبعد. فيه ويكيمعجم بيقوم بالدور دا، نقدر نربط يدويا و ممكن في المستقبل تكون فيه آلية تخليك تنظري تفاصيل أي كلمة، مش لازم تكون رابط بالضبط يعني، لكن المسائل دي يتتطور باستمرار.
هل دا مشتت أو لأ، مش عارف، لكن أعرف أني عرفت عن أشياء كثيرة جدا ماكنتش أعرفها بمجرد أني ابتديت من مقالة و مشيت ورا الروابط ال فيها، أحيانا باقعد أيام فاتح عشرات المقالات المربوطين ببعض..ضياع وقت؟ دا أكيد :(
دقة أو مصداقية ويكيبيديا مش موضوعنا هنا.
:)
مؤكد يا الف مشكلتي مش مع الوان الروابط
لم اصبح بهذه التفاهة بعد
و صحيح اننا منقدرش نحدد ايه المهم مش من المهم بس انا كنت شايفة الموضوع من نظرة قرب صلته بالموضوع الاصلي
و لو فيه الويكيمعجم فده شيئ كويس اتمنى اننا نستفيد منه
انا كمان عرفت حاجات بزيادة لما فتحت مقالة معينة و تتبعت الروابط المحطوطة فيها
فكرتي ان الروابط كان ليها علاقة و بشكل مباشر
و معتقدش ان الاستزداة من الروابطمضيعة للوقت خالص
كل معلومة لها اهميتها
تحياتي و نورتني و اشكرك على الحوار الهادي ده
عزيزي
ويكيبيديا تعمل بهذا النظام تلقائيا
كل كلمة تُحرر عليها ويكون لها تعريف سابق على الموسوعة تتحول إلى رابط بشكل تلقائي
عندما نقرأ عليها لسنا ملزمين بضغط كل رابط لأن بعض الأمور بديهية
ولكن تظل هذه الروابط مفيدة للشخص الذي يعد لعمل بحثي أو أكاديمي حيث يكون أحياناً بحاجة إلى تعريف أو خلفيات علمية لشيء معين حتى لو كان معروفاً وشائعاً
تحياتي لك
Post a Comment