قبل قراءة الموضوع ده احب اوضح بعض النقاط التالية:
1- انا مش مؤيدة للبرادعي و لا مقتنعة بيه كشخصية فاعلة فعالة، ليه بقى دي لها اسبابها و اولها عدم وضوح خطته، عدم اخدانه موضوع الترشح للرئاسة بجدية ، ده بس اللي على وش القفص، البقية تأتي
لكن
لكن
لكن
انه يتقبض على الطفل الواردة صورته تحت و اسمه محمود شقير عشان هو و والدته و ناس تانيين كانوا بيوزعوا منشورات بيان التغير اللي زي ما التعليق تحت الصورة بيقول ان القضاء قال انها دستورية و سلمية
فدي مش حاجة الحكومة المصرية تفرح بيها او تفتخر
لان ده بكل بساطة معناه ان الدولة خلاص
سقطت
لما ولد اتوقع من شكله سنه ما بين 12 او 14 يشكل تهديد ما لدولة بحجم مصر
تبقي المشكلة في الدولة مش في المنشور و لا في الولد
و مع ذلك حتفضل الناس خايفة او بلاش خايفة
لان دلوقتي اسهل من النزول في مظاهرات و الوقفات مافيش
بس الفكرة اننا حنفضل نواجه الحكومة برفضنا بنفس الاسلوب الغلط و نرجع نشتكي مافيش حاجة بتتغير ليه
عارفين ليه؟
عشان احنا لسه بنتعامل مع الحكومة على اساس انها حكومة بينما هي مبقتش حكومة خلاص
احنا لسه بنطالب
مع ان المفروض نفرض واقع
لسه بنحتج
مع اننا المفروض نثور و ننفجر
تحديث: الحمد لله الشباب خرجوا بعد ٣ ساعات من الاعتقال غير الشرعي .. شكرا لكل اللي تعاطف وساعد
الطفل ده اسمه محمود شقير دلوقتي محجوز في قسم النزهة مع والدته أماني البرادعي وتمان شباب وبنات تانيين منهم محمد الطيب الشاب الرائع اللي فضح قضية أطفال الشوارع وعمل صفحة لمحاربة الظاهرة دي .. عارفين ايه التهمة بتاعتهم اللي اعتقلوا عشانها؟ توزيع بيان التغيير على الناس في الشارع .. مع ان البيان ده المحكمة الدستورية قضت بصحته وانه من حق اي مواطن نشره. للاسف الجهاز الامني بقه يستخدم لضرب ولاد مصر الحقيقيين .. لكن البلطجية وتجار المخدرات محدش بيكلمهم
التعليق اللي فات ده من الفيسبوك من صفحة كلنا خالد سعيد مش مني يعني
تصبحوا على خير و رمضان كريم
2 comments:
طبعا شيئ مستفز .. والاصعب إن الواحد مايكونش عنده فكرة ويكتشف من النت إن الولد ده يكون إبنه وأن والدته هي زوجته
شيء مستفز جدا
لكن افضل ما قلتي في كلامك
ان مفيش حكومه خلاص و المطلوب فرض واقع لا توجيه طلبات
Post a Comment