مرحلة ما بعد خلع الحجاب

في مرحلة مهمة اوي بتعدي بيها بنات كتار بعد ما بيقلعوا الحجاب، عند البعض بيكون الموضوع عادي، بس لاحظت اغلبية بيكون حاصلهم زي ما نقول صدمة بصرية انها لسه متعودتش على شكلها من غيره خصوصا لو كانت لبسته من صغرها او لفترة طويلة، عن نفسي جربت اقلعه كذا مرة قبل ما اقرر اني فعلا حخلعه للابد ، اول مرة خلعته كنت مسافرة و مكنتش حابة اني اتميز وسط مكان غريب عني، و قلت برضو وقتها حجرب نفسي، اول صراع بيكون مع النفس، انهيه بعدين واجهي الناس، الباقي سهل

اول مرة خلعته كنت مخضوضة، كنت حاسة اني مش عارفاني، طبعا انا كنت بخلعه جوا البيت, بس فكرة اني مش مغطية شعري.

برا البيت كانت مرعبة، ازاي معرفش، بس كانت مرعبة، انا لبست الحجاب و سني 13 سنة، او 14، و خلعته و انا 31، عمر بحاله يعني، اجمل سنين عمري خفيتها تحته. 

لما اتعودت كذا مرة اخلعه حتى لو لايام معدودة، كسبت صراعي الداخلي، و ده كان بالنسبة لي مهم جدا. 

المرحلة اللي بعد كدا هي اللبس، ممكن تعدي عليكي فترة سنة او اكتر كمان مش حتلاقي اي تغيير جذري في لبسك، اكنك بس خلعتي طرحة، و ده عادي، بس حتلاقي نفسك بتقولي الله، هي الحكاية حتة قماش على راسي، اه، هي تقريبا كدا، و في اوقات كتيرة البنات بتستسهل و ترجع تلبسه تاني. 

ما بين ان اسلوب لبسك ممكن يتغير او يفضل زي ما هو، دي حريتك الشخصية، بس جربي تغيري ستايلك، مش بقول قصري جيبتك او البسي ضيق، كل واحدة تلبس اللي تحبه، انا بقول جربي حاجات مكنتيش تقدري تلبسيها عشان كنت محجبة، يمكن انا بقول كدا عشان وقت لما اتحجبت سنة 1990 مكنش فيه لبس محجبات اساسا غير نادر و كنت بعاني و مع ذلك كنت ملتزمة، بلوزات واسعة و طويلة، بنطلونات واسعة، كله كم طويل، مافيش حاجة اسمها كارينا، ولا حجاب النص كم لا مؤاخذة، كنت ماشية زي الكتاب ما بيقول.

حاجة تانية مهمة، الشعر، سواء خلعتي الحجاب عشان تظهريه او عشان مش مؤمنة بالفكرة كفكرة، حتلاقي صعوبة فيه، متخيلة يعني ايه شعرك بيتغسل و يتلم و يتغطى لسنين و فجاة مطلوب منك تهتمي بيه و تظهريه في احسن صورة مقبولة

طبعا مش كل يوم حنروح للكوافير، و اول فترة حتكون تحدي كبير ليكي، سواء شعرك ناعم او خشن، عندك وحش لازم تروضيه، ايوة وحش، ممكن حتلاقي نفسك في مرحلة انتقاليه بتاعت اللبس، لمدة سنة او اتنين، بتلميه ديل حصان و خلاص، متياسيش، دلوقتي منتجات العناية بالشعر من سشوارات و اكسسوارات و شامبوهات و خلافه قد الهم عالقلب، جربي، حاولي كل شوية حاجة مختلفة لغاية ما تشوفي ايه يناسبك، مقدرش اقول ان الدنيا رخيصة و سهلة، بس مليان تجارب و طرق نقدر نهتم بيها بشعرنا. 

اخر نصيحة، متنسوش الحلقان، اول فترة بعد ما قلعت الحجاب، زي ما يكون عندي جفاف من الحلقان، كنت بجيب اي حلق تقع عيني عليه، كنت حاسة اني لازم اعوض ودني باكسسوارات تحليها، زي ايدي و صوابعي، بعد الودان، الرقبة، حلق بسيط و عقد لطيف بيغيروا في الشكل و ينوروا الوش. 

خلونا نساعد بعض و نتعرف على حلول عملية و بسيطة تساعد كل واحدة تتكيف مع المرحلة الانتقالية اللي بتمر او حتمر بيها.

المهم

- متخافيش من نفسك.

- متيأسيش.