احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Saturday, July 14, 2007

البرص ده حيجنني

من يومين خير اللهم اجعله خير زارني في اودة القعدة برص
بتقولوا ايه يا ولاد؟؟؟ بنقول برص
وانا شفت البرص من هنا وتزاحمت فى راسى كل الأفكار السوداوية المناهضة للبرص
و اللي مش عارف يعرف اني ممكن احاول استجمع مفاصل ركبي و اواجه اسد و لا انيش اقابل برص و لدي اسبابي
الاسد كبير حشوف هو رايح فين و ناوي يلتهمني من انهي حته يعني حيبتدي بالدراع و لا حيخش على الراس طوالي و كده يعني لكن البرص صغير و مفعوص لكنه داهية، يفضل يناور و يناور و يستخبى و يلعب لي بديله بيغيظني
وماما كانت بتحكيلى زمان ان البرص حيوان شرير لأن الحيوانات كلها كانت زعلانة على سيدنا ابراهيم لما البابليين رموه فى النار وكانو كلهم قاعدين يعيطو إلا البرص كان شمتان يعنى لما الزرافة كانت عندها اكتئاب والحمار اصيب بالوسواس القهرى ابو الأبراص كان قاعد ينفخ فى النار وفرحان اوى
وتشجعت تحت تاثير الأثر اللى بيقول ان اللى يموت برص ياخد اوبشن زيادة فى الجنة و كانت كل الافكار و المعتقدات الشعبية قدام عيني بتقلي يا انا يا البرص ده النهاردة
انا بقى حاوريه اخرة تدخله في حياتي و اقتحامه وكري و مسكن عيشتي و بما انه يوم خميس و برامج التي في بجميع محطاته الفضائية و الارضية مملة و سخيفة فكان هو محور اهتمامي فاضية بقى و المثل بيقول الفاضي يعمل قاضي
اولا بدا البرص في الظهور و اطل براسه من الشباك بتاع فتحة التكييف
انا قلت يا اهلا بالمعارك لكن بعد ما كنت رقعت بالصوت و لميت اهل القبيلة كلهم

ايوة النقطة السودا دي هي راسه الكريمة اول ما هل

و بعدين بدا يتمشى و يستكشف المنطكة

و بالفعل حس ان الدار امان و بدى يتجول في محيط اكبر شوية يا حرام مش عارف اللي مستنيه


و راح اخد يمينه




و بعدين زودها اوي و بدى يتسرمح و بعد عن وكره بمسافة كبيرة






و هي دي كانت غلطة عمره الاخيره لانه سمح لرشاش الديتول انه يوصله و نال منه ما نال
و نزل مخنوق و بيفرفص و نط على الارض
و كملت عليه و نزلت على فص مخه الامامي بالمقشة فانقلب ميتا و محروق
للاسف ملحقتش اصور اللحظة اللي كان بيرمي نفسه فيها من اعلى علو فيكي يا حيطة على الارض فاكر انه بيهرب مني
هههاؤوووو

و دي كانت نهاية البرص اللي يخش اودتك يا حفصة و انا من بلؤي ده بدعو كل الابراص انهم يعتبروا اللي حصل ده انذار خفيف و توعية للنشئ القادم في الصيف انهم يفكروا مليون مرة انهم يقتحموا على بيئتي او يدخلوها

و على راي المثل صباخ الخير يا جاري انت في جحرك و انا في حالي





17 comments:

Anonymous said...

حفصة الأول كل سنة و إنت طيبة و عقبال 900 سنة لسة شايف البوست اللي فات دلوقت معلش إتأخرت
ثانيا مبروك إنتصارك الخال في تاريخ البشرية على إمبراطورية الأبراص اللعينة

hosnysoliman said...

حفصة
ليه كده يابنتى حرام عليك ده البرص شخصيه وديعة مسالمة..الكلام اللى قالته جدتك ده كان مقصود بيه الحية مش البرص..وعلى كلن ممكن تستغفرى ربنا وتصلى ركعتين تكفير عن ذنبك بدل ما يطلعلك يوم القيامة ويطلب القصاص منك ويرشك بدل الديتول ماية النار

انحلت سيور العربه وسقط المهر من الاعياء said...

هههههههههههههه
حلو البوست دا يا حفصه لذيذ مش غريب عليكى خفة الدم واهم حا جه فيه الصوت اللى لم القبيله
ايه الشجا عه دى يا بنتى
هههههههههههههه
احيكى على كفا حك النبيل من اجل القضا ء ع البريصه وانقل لكى تحيا ت شعبنا العظيم ووقوفه ضد حقو قكم العا دله فى القضاء على جمهورية البريصه كما قضيتى من قبل على جمهورية الفيران اللعينه ونهيب بكل الاحرار من كل الاقطار التى تبحث عن عا لم بلا بريصه ان يتحدوا معنا ضد هذه الحمله الشرسه التى يقوم بها البريصه الملا عين ضد رمز من رموز الكفا ح النبيل
ممثل فى شخصكم النبيل

ونجدد ثقتنا الغاليه فى قيادتكم الموقره الحكيمه فى قيا دة شعبنا المقهور فى نيل حقوقه المشر وعه
فى وجود عالم نظيف بلا ابراص

تحيا تى

hosnysoliman said...

حفصه
تصحيح المقصود بهذا الكلام الحرباء وليس البرص او الحية

محمد عبد الغفار said...

قتل مع سبق الأصرار والترصد والرعب ايضاً

S H A H said...

ههههههههههههههههههههه, يا جدعان سرطان يعني خفة دم مفيش زيها طبعا

بس معرفش انهم مسجلين خطر كمان كدة؟

وبعدين ده شكله لسة من البراعم الاشبال؟؟ انا عندي البرص هنا بيبقى قد القطة كدة

و ساعات ابن صاحبي الصغير بيركب عليه لما بيجلنا

انا مسيمه جونيور

و سلام مؤقت يا قمر

ذو النون المصري said...

و اللع عال جدا جدا هذا البوست
مهو مش لازم كل مره نكتب ننكد علي بعض
ممتازه جدا المعركه و النتصار طبعا اكثر روعه
ضحكت كتير جدا علي خفة الدم المعتاده الواضحه في التدوينه و سعيد اني خرجت و لو لدقائق خارج الجو الكئيب المفروض علينا للابد تقريبا
و هرجع اقرا البوست مرات اخري
تحياتي

ذو النون المصري said...

المفروض البرص الجاي يغني و يقول
حفصه دي هتجنني

DantY ElMasrY said...

اصلها خيالية وحساسة
وخيالها مركب نفاثة
عزمتنى فى يوم على فنجان شاى
مرسوم على ورقة كراسة
ياإما أشرب واستطعم
يا إما تزعل وتبرطم
ودى كانت نهاية كل من سولت له نفسه الدنيئة أن تزعج الملكة حفصتشوت
السابعة والسبعين بعد الألف الثانى
تحياتى

ehsanbros said...

يحميج انشاءالله من البرص وعمايله...

Unknown said...

حرام عيكى يا مفترية دى الأبراص دى مش بتأذى حد

^ H@fSS@^ said...

اشكر الجميع على مؤازرتهم في حملتي لقتل البرص الدخيل على بيئتي
و نفس الوقت ادعو الاخوة اللي صعب عليهم البرص انهم يراجعوا موقفهم من الموضوع و يتعظوا و يقولولي حصل لهم ايه لو دخلهم هما برص و فضل ينكد عليهم عيشتهم؟؟
هههههههههههههههههه

تحياتي للجميع

Doaa Ebrahim Aaql said...

هههههههههه
لذيذ جدا البوست ده
دمك خفيف مووت

Enas Mossa said...

يا روقانك يا حفصه هههههههههههههههههههههههههههههههههه يعني شايفة برص قاعدة تصورى

و ال بتخافي ال :D

بس بجد بوست يجنن ;)

^ H@fSS@^ said...

اهلا بالاميره دودو و ايناس

اشكركم على الزيارة و والله انا بجد بخاف من البرص لكن لما يلازمني 6 ساعات طالع داخل يبقى لازم اتكيف مع الوضع

تحياتي

KHAIRALLAH said...

انا عندى فيلا فى كنج مريوط لم بنروح هناك عائلات من الفئران والابراص تحتفل بينا . فى الحقيقة ان الصحراء دى بينهم الطبيعى واحنا بنو البشر اللى احتلناها . مثلا فى مدينة نصر بالقاهرة اصلها صحراء فلا عجب .احنل بنحب البرص لان دمه خفيف وبنكره ونخاف من الفار لانه مؤذى وخطير . لما تضربى برص يسيبلك ديله بيلعب ويهرب الديل يلعب من غير جسم ولا رأس تنشغلى انتى بيه لحد البرص ما يهرب . هو حيطلعله ديل ثانى بعد اسبوع .انا كنت فى الهند فى مركز ابحاث فى الغابة وكان جيرانى القرود والابراص والسنجاب . مدير عام مركز الابحاث مضانى على تعهد بعدم قتل اى حشرة او حيوان والا ادفع تعويض )دية( للبرص 200 روبية .اذا احد من الهنود شافك بتقتلى برص يتنطط ويصرخ ويلم عليكى الحى كله ولازم تدفعى التعويض . السر انهم بيعبدو البرص زى ما بيعبدو البقر والنار . مرة المروحة فى السقف دخنت طلبت الكهربائى ولما فتحا تساقط مئات الابراص المشوية من السقف على الارض . الحمام كله ابراص تتجول فى الطراوه . فى موسوعة ويكيبيديا تلاقى البرص حفيد الدينصور.والى اللقاء فى الحلقات القادمة

^ H@fSS@^ said...

الحقيقة وصفك التفصيلي قشعرلي بدني يا خيرالله
كل دي ابراص
يااااااااااااااااااااع
ميرسي انك تعبت نفسك و علقت على موضوع قديم كدا
شكرا لاهتمامك بجد