احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Friday, January 11, 2008

من اروع مشاهد السينما المصرية

"
يا حلو بانت لبتك
أول ما دابت قشرتك
تحرم عليا محبتك
و راح أتوب عن سكتك
*
القلب منك مليان جفا
و الصبر من قلبي اتنفى
و ضاع معاك كل الصفا
ضيعته بعندك يا قفا
"



ما زالت اضحك من قلبي كل مرة اشوف فيها الفلم ده و بالذات المشهد الفذيذ ده



20 comments:

عباس العبد said...

شوفى الكليب نفسه

عباس العبد said...

http://www.youtube.com/watch?v=I7MSxad_IuQ

يَحيى المِصري said...

حفصة محمود عبد العزيز أداءه جامد جدا

عندك الأغنية بتاعة نهاية فيلم جري الوحوش

فصلى جنيه على قدى
يا ترزى البنك
اتغطى بيه يدفينى
من برد الضنك

ابعزق فيه ميخلصشى
افرتك فيه ما ينقصى
ويعرف سعدى من زولى
ولى يهمه الغلى تملى

وانا ادعيلك يا ترزى البنك

فصلى جنيه مفعوله اكيد
اجيبلى بيه خرفين فى العيد
وجوازة قشظة ولبس جديد
ولبته وتبته وثبته بكلبش حديد
ليضيع فى سرقه ولا تبديد

وانا ادعيلك يا ترزى البنك

ياترزى البنك يا بتاع زمان
بابوا الجنيه المصرى
المنى على الطربيزة
بتاع زمان يعنى ياوى
جنيه دهب من بتاع زمان
ومعاه خمس قروش
هتهولى اعيش بيه
وادى للحبايب والجران
وميخلصش

يَحيى المِصري said...

و أغنية لخبيطة


اصحى للنظريه
دانت عضمة طريه
الحياة لخبيطه
لخبطيطه عبيطة
زومبيه مية الميه

يزمان كولو باميه
اترمينا الرميه
ايه بقى تهمتنا
دى السنين خمتنا
باظة التفنيطة
والحياة لخبيطة
خلطبيطة عبيطة
زومبيه ميه الميه


الزمان تلاكيكو
بس ليه تكتيكو
تكتشف تسليكه
تبقى واد فركيكو
دقى يا طرمبيطة

دى الحياة لخبيطة .
خلطبيطة عبيطة
زومبه ميه الميه
واصحى للنظريه


بكفيانه تلامة
شغلوا الفهامة
حبت الدربكه
تلهط الزلموكه
تعوج البرنيطة

والحياه لخبيطة
خلطبيته عبيطة
زومبه ميه الميه
واصحى للنظريه

والظروف بلا قفيه
ليه جبتلى الكافيه
اتعدمت العفيه
وانا نيتى صافيه
ماشى جنب الحيطة

الحياه لخبيطة
خلطبيطة عبيطة
واصحى للنظريه
دانت عضمة طريه

أبوشنب said...

مساء الخير يا استاذة

كل سنة واانتي طيبة

بمناسبة الاعياد كلها

وزعلانة ان هنا في قطر ما بيحتفلوش بعيد راس السنة الهجرية

يعني همه احتفلو بالعيد الكبير اصلا

المهم

لو كنتي في مصر

امانة يا شيخة البوم منير الجديد

وكمان يا سلام لو فيلم في شقة مصر الجديدة

وليك الثواب يا فاعل الخير

دا احنا هنا الحالة كرب

وانتي عارفة

HafSSa said...

يا عبس انا الفلم نفسه موجود عندي و كنت سهرانة امبارح عليه و هو اللي فكرني بكلام الاغنية
صدقني كل مرة بشوف الفلم ده تلاقي ضحكتي من الودن للودن
لعلمك الصور انا واخداها و الفلم شغال
بس تسلم ايدك برضو انك فكرت في البث الحي المباشر


يحيي طبعا كتي رمن افلامه اغانيها حلوة بس مش عارفة المشهد ده بيضرب معايا ليع
بجد مسخرة اصلية

ابوشنب باشا
اهلا وسهلا بيك يا فندم
على رايك هنا مافيش احساس بطعم اي عيد بس اهو كان من باب العشم
انا رجعت من مصر خلاص و مكنش شريط منير لحق ينزل
نصبر هنا للسنة الجاية لما يكون نزل و نجيب شقة مصر الجديدة كمان
معلش امرنا لله


تحياتي

Mohamed A. Ghaffar said...

الفيلم ملهاة حقيقية وستجديه ضمن قائمة افلامى المفضلة

ذو النون المصري said...

اهلا حفصه
انا كمان بحب افلام محمود عبد العزيز
و مش عارف ليه هو اعماله قليله مع ان اداؤه رائع جدا
يمكن السوق خلاص لقي المهرجين احسن
المهم
من اهم علامات افلامه هي اغانيه لانه برضه بيغني بصوت حلو و دم خفيف

Ahmad Badawy said...

محمود عبد العزيز فعلا من أجمل و أحسن فنانين مصر و أعماله جزء راقى و مهم جدا من تاريخ السينما المصرية

لسة قريب سامع أنه كان مريض و رفض يتعالج على نفقة الدولة و قال أنه قادر على تحمل نفقات علاجه ... بجد الموقف ده رعه جدا فى نظرى بالمقارنة ببقية اللى بيمتهنوا مهنة التمثيل وهما مالهمش علاقة بالفن

MKSARAT SAYED SAAD said...

حفصة ازيك
بجد فعلا المشهد دة تحفة
الكومديا اللي فية مش قادر اقلك قد ايو حلوة انت عارفة المصريين ميضحكوش على اي حاجة بسرعة لازم يكون الافية جميل وجديد علشان يضحكوا من قلبهم وشعب ابن نكتة زي ما بيقولوا وعلشان كلمات المشاهد بجد تحفة والتمثيل كان طبعا رائع من غير جدال فضل الفلم دة من ضمن مجموعة اعمال في السنيما المصرية انا كمصري بفخر انها موجودة فيها
تسلمي على البوست دة خلتيني اعلق وافتكر افهات الفلم واضحك
تحياتي ومودتى

HafSSa said...

محمد عبدالغفار
ده تاني قلم يكون مشترك ما بينا
خلاص انت من الاخيار الصالحين

ذوالنون
عارف
لو محمود عبدالعزيز يعمل افلام تانية بنفس مستوى الكيف و غيرهم مع التقنية الجديدة اللي دخلت على السينما حيكسر الدنيا
لا تقلي محمد سعد و لا هنيدي و لا يحزنون


بدوي الاول عشر
زعلتني يا راجل
ده عمره صغير مقارنة بممثلين تانيين و كمان شكله كان دايما كوي سو صحته ما شاءا لله
شكلي حسدته
و باين ان عنده احساس لكن برضو منعيبش على فنانيين ادو الفن كتير و دلوقتي معهومش زي نظيم شعراوي و يوسف داوود و منهم كمان يونس شلبي الله يرحمه


اهلا هلا بصاحب المسكرات المسلية
عندك الحق الشع بالمصري معرفو عنه حبه للنكته و ان مش اي حاجة تضحكه
لازم تكون عاملة دماغ و متكلفة
:)))
الحمدلله ان الفلم بسطك و فرحك
الضحكة بقت صعبة اليومين دول


تحياتي للجميع

Nsreen Bsunee said...

محمود عبدالعزيز ده حبيبي وبلديات وكفائه

عشان تعرفى ان الاسكندرانيه جامدين اوى

فاكره طيب لما كان بيغنى وهو بيغسل فى الشقه من حق الزوجه
عسل
عليه اسلوب فى الغنا جامد

بس انتى دماغ والله يا صفصف

Nsreen Bsunee said...

مازلت اضحك من كل قلبى كل ما افتكر المشهد الفذيذ ده

انتى بقى الفذيذ دى عن سابق اصرار وترصد ولا جت كده معاكى

بس شكلك قصداها
فذ + لذيذ = فذيذ

HafSSa said...

نسرين مشهده و هو بيغسل مسخرة بس كله كوم و لما يرمي الغسيل على معالي زايد و نعيمة الصغير كوم تاني
ممكن استنى الفلم كله انا و امي عشان نشوف الحتة دي بس
الاسكندرانية معروفين يا فنتم مش محتاجين تعريف حضرتك
بصي فذيذ دي جت معايا من الفذة لكن حطتها على وزن فعيل و ذلك حتى افخم معنى الكلمة و اشدد على قوة الفذة الموجودة في المشهد لكن في قبلك ناس قالت لي على التلفون انها شكلها كانت جاية من فذ و لذيذ مع بعض
انا كنت قصداها على العموم
:)
تحياتي

simple girl.. ..simple dream said...

الفيلم كله تحفة
وانا لمما بشوفه دلوقتى بحس انه لسة بيتكلم عن مشاكلنا
فعلا فيلم كان تحفة وسابق وقته

m5m said...

اتشرفت بتعليقك فى مدونتى وردى فى انتظار زيارتك مرة أخرى لقراءته
تحياتى

karakib said...

اود ان ابلغكم ان الشكرامون طاخ


انت جاي تعزي و لا جاي تهرج
اهو ده بقي مشهد مالوش حل صحيح

HafSSa said...

simple girl simple dream
اهلا بيكي في المدونة شكرا لتعليقك


ام5ام
قرات تعليقك على تعليقي و لا تعليق مني عليه
شكرا و تحياتي

كراكيب افندم
شرفتني و نورتني
بص الفلم كله مليان جمل و مواقف تموت من الضحك و اخر مسخرة
بالنسبة لي المشهد اللي انا حاطاه هو الماستر بتاع محمود عبدالعزيز
و مشهد العزى ده الماستر بتاع يحيي الفخراني
الاتنين اتحف من بعض
مش من شوية انا اصريت اني اشتري الفلم عشان منين ما احب افترج عليه يبقى حاضر

Ragi said...

اول مرة عندك لكن متابع تعليقاتك عند الحبايب
تحية والى لقاء

HafSSa said...

اهلا بيك يا فندم
و احب اهنيك انك دخلت قائمة العظماء لانك و بكل بساطة عظيم بالفطرة
لانك من برج السرطان

تحياتي