احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Sunday, January 27, 2008

عاجل الى الأباء الأوائل علاء و منال



اولا احب اهنيكوا ان بلوجر رضخ للكم الهائل من المدونيين العرب و بقى يفتح صفحة التعليقات بالعربي الا اذا ده كان اختيار قديم و أنا مشفتهوش الا دلوقتي
و طبعا جوجل رضخت بعد الزيادة التدوينية الرهيبة اللي حصلت في خلال السنتين اللي فاتوا و الشكر كله ليكوا لفتح الحنفية العمومية دي قدامنا
اجي بقى للمهم
أنا كان نفسي تعملوا حاجتين مهمين جدا في عالم التدوين العربي و مقدما أنا عارفة ان كلامي مش حيلد ليكوا او لأي شخص بيحامي عن حقوق الانسان او حرية التعبير عن الراي او المساواة بين المعزة و الرجل او حقوق المواطنة الخ الخ الخ الى اخر اللستة اللي كلنا عرفناها بعد ما السما فتحت لنا ابوبها و بقينا نغرف الحرية بالجيجابايت
و لكن بما ان حرية الراي مكفولة ليا حتى و ان تم تصنيفي في خانة المعاتيه فانا مصرة على توضيح رايي و اخذه في الاعتبار حتى و ان اترشحت لانيل مستخدمة للسنة الجاية


اولا كان نفسي تنشئوا حاجة نمنع بيها الاطافل( من طفيليين) من التدوين ، يعني كل من تم الشهود عليهم بالعته او الذهان التدويني او التخريف الفضائي سواء تعليقيا او تدوينيا فيتم عزلهم فيما يشبه الحجر التدويني كمجال موازي للحجر الصحي و ايضا كل من توافرت فيهم صفات الغباء الثقافي او العنطزة الغبية ممثلة في صورة انسان
طبعا ان مش بقول الكلام ده و السلام و انما عندي براهين و ادلة
فمثلا يعني مثلا
لما مدون او مدونة يكتبوا مواضيع تتصنف تحت ما سبق ذكره مش ده من شانة انه يصيب البعض بفقع في المرارة او انفجار بويضات صغيرة كانت تنظر للمستقبل بكل امل؟؟ و بناءا عليه الا يعتبرهذا تعديا على حقوقي في المعيشة الكريمة الامنة من غدر التدوينات الفقيعة اياها؟؟ اعرف ان حرية التعبير عن الراي مكفولة للجميع لكن الا تنتهي حريتي عند حدود الاخرين؟؟
اعود فاكرر انه لابد من انشاء هذا الحجر التدويني بطريقة او باخرى حتى يتم منع نشر التدوينات التي من شانها افزاع الاخرين او اصابتهم بامراض مزمنة جراء قراءتهم لتدوينات من هذة النوعية
و من ثم ايجاد اليه عمل موحدة و طرق قياس معتمدة لكل البلوجات من شانها تحديد مدى عته المدون المصاب حتى يتم عزله و حصر المرض في قطعة معينة من الفضاء الافتراضي لا تزيد عن جرم سماوي او نجمتين في اسواء الاحوال. و الى ان يتم شفاءه فلسوف تظل مدونة الشخص المصاب بمعزل عن المدونيين حتى تتطهر تطهيرا سيبريا
الشئ التاني اللي لازم برضو ننشاءه هو صندوق الزواج التدويني
أنا لاحظت ان اكتر المدونيين من الجنسين في حالة بحث عن الحبيب المثالي وبيعبروا عن مشاعيرهم دي بطريقة واضحة جدا لدرجة اني بستغرب ليه مش حاطين العنوان المناسب للتدوينة دي ، ليه ميحطوش أنا بدور على عروسة او عريس
وحيدة فقط هي من فعلت ذلك وأحييها و هي خارج مجال المناقشة . لا تستهينوا بموضوع صندوق الزواج ، ليه؟؟ لاني اكتشفت رابط غير مباشر بين كل المهرتلين السابق ذكر نوع تدويناتهم و بين عدم حصولهم على شريك الحياة الى الان و بل يا للعجب فلقد اكشتفت ان منهم من يعبر عن صفات الزوجة الصالحة او عن راية في كيفية التعامل مع المراة و وجدت ايضا من المدونات من تصف كيف يكون حبيب القلب و كيف تريده ان يتعامل معاها و يحضرني الان اتنين من المدونيين أنا عن نفسي شايفاهم متطابقين تماما مع بعض لكن يمنعني الادب التدويني من ذكرهم و في النهاية المثل الشعبي بيقول يا بخت من وفق مدونتين في الفضاء

اخيرا و ليس اخرا
ارجو انكوا تنشروا تدوينة جديدة على ان نعتبرها بمثابة تحديد عهود او توثيق بيان التدوين و نوضح فيها الاتي
1- مش معنى انك مدون يعني لازم تبقى صحفي او فنان او روائي او شاعر، طبيعي جدا انك تكون انسان عادي و بتكتب في اي موضوع و عن أي شئ، والله ما عيبه في حق بابا بلوجر
2- مش معنى انك مدون تبقى خلاص بقت مهنة او وظيفة نتعايش منها
3- مش معنى انك قريت كتب تبقى مثنقف و تقدر تفتي في امور
4- عيب اوي تحط القران ككتاب مفضل في البروفايل بتاعك، لا سبيل لمقارنة
5- يمنع منعا باتا التعليق اذا كان بنية تسجيل حضور و السلام او كان بغرض فتح باب للمجاملات الفضائية لا يتسع لها وقت الفضائيين

شكرا مقدما و على العموم الله من وراء القصد
دمتم
الله التدوين جوجل


33 comments:

جبهة التهييس الشعبية said...

:D
انتي مين اللي غايظك النهاردة؟
هاهاهاهااااااااااااااا
فطستيني من الضحك

طيب ما فيه حل افضل
المدون اللي يضايقك الى هذه الدرجة ما تدخليش عنده تاني واعملي مودريشن وما تنزليش التعليقات اللي تضايقك

HafSSa said...

بصي يا نوارة
انا مش متغاظة النهاردة و بس و المشكلة مش في مدونة واحدة و لا اتثنتين بل ما هو اكثر من ذلك
تحسي زي جحر صراصير و انفتح

على التعليقات حاريح نفسي منها ماشي
لكن لما تكوني رايحة مدونة صديقة وتنفقعي من تعليق واحد بيييييييض فاسد
تعملي ايه
و على راي المثل يا مدونيين يكفيكوا شر المعلقين
و لما تكوني بتحاولي تكتشفي عوالم اخرى و تنتقلي من نجم تدويني للاخر و تصبي تلاقي واحد زي الفسيخ المعفن طالعلك في النص زي ما شوك الرنجة يقف في الزور
اي نعم مخنقكيش لكن مزغزغك في حلقك
ده تسميه ايه؟؟؟

جبهة التهييس الشعبية said...

هههههههههههههههههههههههههه
والله انت عسل

هاهاهاها
عموما يا صفصف ما حدش يا حبيبتي ح يسمع كلامك
لكن اديكي فشيتي غلك
ههههههههههههههههههههه
وموتيني من الضحك
هاهاهاهااااااااااااييييييييي

karakib said...

ممكن نعمل حجر صحي فعلا
دي فكرة ممتازة
بس في الحالة دي
اللي هيتعمل عليهم حجر صحي
هيعملوا علينا حجر صحي برضه
سيبي الناس تقول اللي عايزين يقولوه

GEMYHOoOD said...

العب العب العب العب

هيه الحالة ايه اشتغلت

نيهاهاهاهاها

أبوشنب said...

اقسم بالله العظيم

1- بأني لست صحفي او فنان او روائي او شاعر ولكني انسان طبيعي وشغال مهندس بمرتب معقول وليس لدي شقة وغير مرتبط

2- اني اتعايش من مهنتي وليس لي دخل اخر

3- انا لا افتي الا في الاشياء التي لم اقرأ فيها اي كتب ولم اتلقى فيها اي علم حيث تكون الفتوى اسهل بكتير بكتير بكتير

4- لا اضع القرآن ككتابي المفضل حيث لا مجال للمقارنة واقر ان كتابي المفضل هو الصرف الصحي التجميع والمعالجة والتنقية واعادة الاستخدام الصادر عن ايدي ان مك ليف

5- ان هذا التعليق ليس للمجاملة او ملأ الفضاء الالكتروني او محاولة للبحث عن عروسة حيث اني غير متزوج وأعول

الله

التدوين

جوووووووووجل

Gid-Do - جدو said...

الابنة العزيزة حفصة

احنا كاافراد كل يوم بنتعامل مع الناس ونشوف اشكال والوان ورغم كدة بنتعايش معاهم بالرضى او بالغصب فى بعض الاحيان ـ والمجتمع التدوين لايختلف عن المجتمع الحقيقى بل ان المجتمع التدوينى فيه مميزات مش موجودة فى المجتمع الحقيقى ـ مثال فى المجتمع التدوينى تقدرى تكتبى وتقفلى التعليق ـ او تمسحى اى تعليق تخطى الحدود اللى انت رسماها لنفسك ـ تقدرى تروحى عند اللى يعجبك وتنسى اللى مش عجبك ـ انا فى رائى ان احنا عاوزين حجر على بعض الناس فى الواقع ومش محتاجين اى حجر فى المدونات ـ

ارجع واقول انك ضحكتينى بجد على ردك وتشبيهك لبعض الناس بشوك الرنجة والبعض الاخر بالفسيخ المعفن ـ رغم ان الفسيخ ناس كتير بتحبة ـ روق ياجميل ولا يهمك وقولى مين مزعلك وانا ولا بلاش الطيب احسن ـ تحياتى

HafSSa said...

يا كراكيب
لو احنا عملنا الحجر الاول يبقى سبقناهم و اتغدينا بيهم قبل ما هما يتعشوا بينا

جيمي انهي حالة بالظبط
بذمتك مش بيجيلك ضغط من بعض المدونات؟؟

ابو شنب
قسمك اتسجل و مشكور على وقفتك


جدو حبيبي يا احلى جد صدقني عارفة و متفهمة للي بيحصل بس بالذات الكام اليوم اللي فاتوا دول شفت فيهم شوية تدوينات و غطى عليها شوية تعليقات في انحاء متفرقة من الفضاء التدويني خلت مخي يطير من مكانه

معلش و اتاسف للجميع بس انفعلت و كان لابد من ايصال صوتي في ارجاء المطيورة


تحياتي

S H A H said...

يعني معنى كلامك ده مينفعش ادخل هنا و ارمي السلام بقى و اثبت حضور عندك ولا ايه؟

متشيلي البند ده يا حفصة

وسلام مؤقت

محمد عبد الغفار said...

انت بتقولى حجر ومنع يبقى انت الى قتلت ببايا

HafSSa said...

لا لا لا يا شاه
مؤكد مش انت و لا تعليقاتك يا راجل
انا بتكلم عن ناس بترمي تعليقات مالهاش دعوة بالموضوع و بيوقلولك بمنتهى الجراة تعالالي بما انا اجيتك
لكن انت غير
متخدش الكلام على نفسك


محمد
قتلت مين يا محمد متلبسنيش مصيبة انا في عرضك؟؟


حفصة

Ragi said...

ليه التطرف ده يا حفصة حتنصبى محاكم تفتيش فى الفضاء السيبرى
اللى ما يعجبكيش تعليقه اديلوه على دماغه واللى مدونته بايخه يبلها ويشرب ميتها واتروحيش عنده
وليه عيب ان القران يبقى الكتاب المفضل؟
وبعدين الناس بتتغير من بوست لبوست وبتتعلم من زيارة المدونات الكويسة فاديهم فرصه
انما نعمل محور للشر نصنف فيه المدونيين زى بوش ماصنف العالم ؟ فكرة بطالة وشريرة وفيها تعالى على خلق الله
وبعدين اللى عايزة تتجوز او اللى عايز يتجوز بيروح الفيس بوك يا عزيزتى يحط عنوانه ورقم تليفونه وصورته ويبعت اس ام اس على نجوم اف اف ام

HafSSa said...

والله يا راجي مكنتش اعرف اني متطرفة و شريرة و متعالية بالمنظر ده بس انا حاخد كلامك على اساس انك بتهزر معايا و الاقتراح بتاع الفيس بوك ده ممكن تساعدني وتبقى تنشره للمدونين اللي عاوزين يتجوزوا مش انا لاني انا اللي اشتكيت من الظاهرة دي
مش العكس
و حرجع اوضح تاني ان القران مينفعش يكون كتاب مفضل لانك بكده بتدخله في مقارنات مع كتب تانية و بالنسبة لي ميفنعش اقارن القران بكتب تانية

تحياتي

MAKSOFA said...

فعلا
ممكن يبقي فيه حجر صحي

بس الله أعلم ممكن يحطوني أول واحده فيه


================
عجبني ردك علي نواره
بتاع مثل يا مدونيين يكفيكوا شر المعلقين

Ragi said...

لما الخواجه جوجول يقول لى ايه كتبك المفضله ؟ تكون الاجابه هى القران الكريم وكفى يعنى مافيش غيره فل ستوب وبكده يبقى لاتوجد اى مفاضله بين الكتب الاخرى وبين القران الكريم
وان كان طول الوقت يتم مقارنه ماجاء فى كتب الاديان الاخرى بما ورد فى القران الكريم من ايات ، ايضا تعرض الاراء والاجتهادات لمقارنتها بما جاء به القران لبيان الغث من السمين فهذا لا يحط من قدر القران ولا قداسته
وانتى بتحطى فى مكتبتك المصحف الشربف بجوار كتب اخرى
فلو الخواجه جوجل غير شوية من صيغة السؤال وسأل عن اسماء الكتب فى مكتبتك فهل يكون من الخطأ انك تذكرى انك تضعين القران ومثلا قاموس اكسفورد على رف واحد؟

اما الفيس بووك فالمقصود ان المدونيين الراغبين فى الزواج عندهم وسائل اسهل للاعلان عن رغبتهم غير التدوين ولم اكن اخصك بهذا الكلام حاشا لله
وبعدين فيها ايه يعنى لما الواحد يخطر على باله فكره شريرة او متطرفه اهى فكره تفوت ولا حد يموت
بس انا عند رايى اننا نخلى الجماعة يكتبوا اهو كله على حساب صاخب المخل

بنت القمر said...

هههههههههههههههههههههههههه
ههههههههههههههه
هههههههههههههههههههههههه
يا لهوتي عسل
شربات مش بحبك من شويه
لو صحيح في حته في لسانك ممكن ندخل في موسوعه جينيس تبع الاطوال المتميزة عالميا
بس قلبك اكثر نضافه من المغسول بفانيش وكلوركس معا
***************
بصي يا صفصف
انا من فترة اطلعت جمهوري الحبيب اني مجوزة ومعايا عدد اتنين كائنات بشريه خلفتهم مش كائنات فضائيه والله
ليه؟؟
عشان مش عاوزة تعليقات واحلام من خيالات ناس عندها مراهقه متقدمه ومتأخرة طيب وكل بوست اجيب سيره ادم بمناسبه ومن غير مناسبه شان الذكري تنفع المؤمنين
واعيد وازيد يا اخي
واخي الفاضل
وانتي عارفه اني لا اخوانجيه لا لي في البطيخ بس عشان ايه؟؟
انا يا جماعه مش داخله اظبط ولا ادور لا علي عريس ولا عشيق
طبعا يا صفصف
انتي عارفه وست العارفين ان اللي اتلسع من الشوربه...ينفخ في الزبادي
ولا يلدغ المؤمن مرتين
من نفس الجحر ور اي جحر اخر
ليه يا صفصف
بعد كل ده يجيلي تعليق من باب انتي بنت قمر ولا بشر ولا من املايكه
وهااسافر بمركبه قلبي ليكي
وابقي تعاليلي زوريني في مدونتي!!ا
يعني عبده سخصيه ضرب معايا معاد علطول
هههههههههههههه
خخخخخخخخخخخخخخخخ
اوووووووووف
اقول ايه بس
حسبنا الله ونعم الوكيل
انزل القسيمه في المدونه ؟؟
اكتب اقرار اني عندي حساسيه من كلام الحب والوله والهبل
ولا احط صوابعي العشرين في
الشق؟؟
وبما ان احلامك في الحجر الصحي مستحيله يا كوكو
لينا ربنا بقا
عسل والله انتي يا صفصف
تحياتي

مصطفى اسماعيل said...

وعلى الصعيد التدوينى افاد مراسلنا ان الاشتباكات مازالت مستمرة بين القوى المتحاربة فى بلوجر مما ادى لسقوط مدونتان هما لــ " س . م ــ مدون شيوعى ــ " و " م . م ــ مدون شيوعى ــ "
وقد ارسلت مجموعة احا احا لا تتنحى " مدونين ناصريين " تعازيها لكل المدونون الشيوعيون فى شهدائهما وذلك فى كومنت حمله مندوب المجموعة فى التجمع التدوينى الشيوعيى
ومن ناحية اخرى تقدمت قوات الاخوان التدونيون " تحالف تدوينى اسلامى " عدد 13 مدونة وذلك فى سباقها مع القوى الاخرى الهادف للسيطرة على المجتمع التدوينى متجاهلة والقوى المتحاربة تحذيرات موقع بلوجر والذى يعد احد اكبر المجتمعات التدوينية تأثيرا وانتشارا لها من خظورة الزيادة الرهيبة فى عدد المدونات والذى غالبا يستخدم فقد فى عملية فرض السيطرة فى الصراع القائم
وجدير بالذكر ان السبب الرئيسى لتلك الاحداث يرجع لدعوة المدونة حفصة لفرض حجر على المدونين مما اضطرهم اللى تكوين لوبيهيات خاصة بكل منهم فى انتظار لحظة الصفر والتى اشعلها مقال لأحد المدونيين الساداتين
هذا وسوف نوافيكم باخر الاخبار تباعا

نشرة اخبار التاسعة
2008/11/18

HafSSa said...

مكسوفة
لا انتي ولا ممكن ابدا يحطوكي في الحجر
ليه بقى ان شاء الله
لا لا لا لن اوافق

عزيزي راجي
حفضل اني مدخلش في مناقشة عن وجهة نظري في حكاية تفضيل القرؤان لان الهدف من التدوينة دي فشة خلق و طقة حنك زي ما بيقولوا الشوام
لكن عن نفسي القران عندي مش بيتحط في نفس المكتبة لسبب بسيط و هو اني فوضوية جدا نوعا ما و مكتبتي حتقع على بعضها من كترة الكتب و اخاف احط القران مرة و انسى و اجي احط فوقيه كتاب تاني لاغلط
دايما بحطه يا جنبي على الكومودينو او في الدولاب
بالنسبة لحكاية فيها ان الواحد تخطر على باله فكرة شريرة و بعدين تروح لحال سبيلها
فهي عادية بس انا خفت ان انت او مدونيين تانيين فهموني بالشراسة دي
بس
لكن ايه حاشا لله دي يا راجي
احنا في مسلسل تاريخي هنا و لا ايه
هههههههههههههههه
بهزر حاكم انا عارفة برج السرطان مش بيفهموا اتلهزار ، لازم تديهم كلاكس الاول و اشارة حمرا و بعدين يعرفوا
هههههههههههه
بهزر تاني


بنت القمر
كويس ان البوست ضحكك اوي كده
:D
بس مفهمتش يعني في حتة في لساني؟ قصدك بواقي اكل محشورة و لا ايه؟؟
و ايش دخلها بالاطوال ؟. انا في حاجة غايبة عني ولا ايه؟؟
اما عن النوعيات اللي بتحكي عنها فهما كتار و الحمدلله مشفتش منهم هنا انا بتكلم عن اللي بيدونوا بأيد و عنيهم بتسبل بالأيد التانية
فعلا لنا الله


مصطفى
انت فهتمني غلط سيادت يا فنتم
انا مش بتكلم خالص عن التيارات السياسية الموجودة و ان كنت بختلف مع اكثرها
انا بتكلم عن اسلوب البعض و طريقته في الحوار
و الحاجة التانية مافيش حاجة اسمها ساداتيين
بس فيه ناس بتحب السادات و مؤمنه بنظريات فكرية معينة قد لا تتفق كليه او جزيئا معاه لكن لها نفس الهدف و لسنا الان بصدد التقسيم الفكري لانه لا مكان لهذا القول هاهنا و لكن ما حدث هو مجرد افراغ نظري لتفكيرات مستعصية على الفهم و الله الموفق
الله التدوين جوووووجل
يحي العدل
اتفضل الميكروفون معاك


دمتم بكل خير

Aardvark EF-111B said...

أعتقد إن مسابقة أفشخ مستخدم كانت تجربه قويه, أنا شخصيا تلقيت ردود فعل عنيفه على ترشيحاتي..و كنت سعيد بيها جدا خلتني أتخنق من الضحك

Nsreen Bsunee said...

الله ينور عليكى يا نفيسه
الله ينور
الله ينور
الله ينور
بجد الخراء التدوينى تعبللى اعصابي جدا بجد الواحد بقى بيشوف بلاوى
دول كفرونى عشان بحب يوسف شاهين تقوليش يا اختى كانو جرجرونى بالملايه انا وهو
عالم مرضي ونقطه البحث عن عريس دى حقيقيه جدا ومش عارفه استاذ راجى بينكرها ليه لا بقى فعلن معظم المدونين البنات تحديدا فى حاله بحث عن عريس وتقعد تغنى على قيسها وهو يغنى على ليلاه
بس كله كوووووووووووم
والمتأسلمين كوم واللى معينيين نفسهم اوصياء على قلوب العباد منهم لله واللى تدخل تقولى ربنا يهديكى واتقى الله وتبتدى كلامها باسم الله وبعدين تقعد تسب وتلعن فيا و فى اللى خلفونى
بالزمه مش حاجه تجيب انتحار للمبايض
وفقعه للمراره
وفيه ناس مش حاسه بالموضوع ده لانه لسه ممسهمش بشكل شخصي لكن المتأسلمين والمشوهين فكريا ينتشرون كالنار فى الهشيم فا متقلقيش فى ظرف سنه بالكتير بعد ما مراره اغلب المدونين تتفقع حتلاقيهم كلهم بينادو باللى انتى بتنادى بيه دلوقتى لكن اصبري شويه كل اللى بيقولولك انك فاشيست والكلام ده بكره يعملو البوست بتاعك ده حجاب
واولهم مصطفى اسماعيل
:)

ذو النون المصري said...

ضحكت جدا علي البوستو التعليقات
لكن مش هعلق الان لاني عاوز اتفرج علي التليفزيون شويه قبل ما انام
و ارجع اعلق في وقت روقان
هههههههههههههههههههههه

HafSSa said...

سلام يا ارض فارك
اعتقد ان مستابقة افشخ يمكن تكون مختلفة شوية عن اللي بتكلم عنه
و لكن في امكاننا ان احنا السنة الجاية نضم ليها مدونات جديدة يمكن لما يتشهر بيهم يتعظوا و يختاروا من بين حلين
يا يبطلوا تدوين
يا يحسنوا من مستوى الاداء
هههههههههههههههههههه


نسرين
قلبي معك يا اختاه بس هدي نفسك شوية
متخليش حد يخرجك عن طوعك و يوصلك لمرحلة هرتلة
انت لسه مشفتيش حاجة
صبرا ال بسيوني


ذو النون اهلا وسهلا بيك يا خويا
اتفضل علق في اي وقت
بس ايه رايك؟ مش بذمتك كلامي صح؟؟
انا عارفة ان كلامي صح


تحياتي

يَحيى المِصري said...

يا حفصة الموضوع مش مستاهل
أنا إتعلمت حاجة مهمة أوي الشخص اللي أعلم عليه مقرالوش تاني و مادخلش مدونته و لو لقيتله تعليق ماقرالوش

زي ماقولت حاجات كتير لما بشوفها أقول خسارة فيهم شوية الزعل اللي هازعلهم

MKSARAT SAYED SAAD said...

حفصة ازيك
اللي بتقولية مش غلط وممكن يتحقق بس المشكلة اللي تمنع ودي وجهة نظر مش اكثر ان كل التدوينات نسبة كبيرة منها زي ما انت قولتى لكاتب او صحفي او واحد بيهيس او لناس فعلا مبسوطة انها بتكتب حاجة وبتعبر وبتشارك برأيها فعلا
بس كل دة مبنى على الاهداف الشخصية
انا صحفي وعايز اتشهر اكثر انا فنان او كاتب وعايز الناس تعرفنى وكمان مفيش القالب اللي اتوجد يحدد الية التدوين ونظامها
فبقى الحال زي ما انت بتقولي تهيس من ناس كتير كنت عاملين لخبطة في وسط ناس هدفها تعمل حاجة كويسة
انا شايف اللي بتتمنية او بتعبرى عنه صعب يحصل
لأن في الاخر المثل اللي انا شايفة من خلال مدونتى ومدونتك
سواء انا او انت او بقيت المدونين اللي موجودين ومضافين عندنا تقريبا طريقة تفكرنا متقاربة وتفضيلاتنا كمان
انا شوفت مدونات كتير متعرفيش صاحبها ولا صحبتها عايز اية
ومدونات تانية هدفها العك وخلاص
فبالنسبة ليا بختار مين اللي ازور مدونته وانا مبسوط ومين اللي لو علق عندي مليون كأنه مدخلش وعلق اصلا
في الاخر هتلاقي الموضوع بقى عبارة عن مجموعات كل مجموعة هي اللي عارفة بعضها وبس وحسب حجم المجموعة وحسب الترابط بينهم
المهم طولت عليك معلش بس موضوعك عايز كلام اااااااااد كدة
تحياتي ومودتى

واحد مش فاهم حاجة said...

الاول انا عاوز اختلف معاكى فى فكرة الحجر التدوينى

او الحجر الصحى للتدوين


مش عارف انا عاوز اختلف معاكى فيها دلوقتى

مع انى معنديش اسبابى الواضحة

بالنسبة للبنود اللى انتى عرضتيها

انا متفق معاكى مية المية

وعندى المرة دى اسباب
واقدر ارد بيها

واسمحيلى اخدها منك

وتكون شرط لاى حد يعلق عندى

واخليها

قوانين امشى عليها لما اعلق عند حد


فى النهاية

البوست جميل

تحياتى

HafSSa said...

يحيي عزيزي
انا مش بروح عند المدونات اللي بتفقعني بنفسي
لا
انا بكعبل فيهم بالصدفة و المصيبة انهم كل يوم بيكتروا
ربنا يعننا


صاحب المكسرات
اشكرك انك موافق معايا على الفكرة
بس انا احب اوضح شئ
انا ابدا مش قصدي ان المدونيين الشعراء او الصحفيين مش كويسين او انهم بستغلوا مدوناتهم في الااعلان عن فنهم
لا
ابدا ده مش قصدي
كل واحد حر في مدونته لو حب يكتب فيها
انا قصدي ان فيه ناس افتكرت ان التدوين لازم يكون يا تبقى صحفي يا فنان يا روائي يا شاعر عشان يبقى لك لازمة انك تفتح مدونة
ونسيوا الهدف الرئيسي من المدونات
الا و هو ان التدوين اللي هو كنا بنعمله زمان و نكتب في كراريس و نزوقها و تبقى خاصة بينا بقى حاليا ده شكله و بالتالي اذا مكنش فيه هوية معينة للمدونة يقولولك دي اي كلام
عن نفسي مدونتي لا تحمل طابع معين
حسب اللي يجيي على بالي و من هنا كانت التسمية بتاعت الناس و العالم
بشوف الناس بيحصل معاها ايه و بيحصل معاهم في انهي حتة في العالم
منتشرة يعني
و طبعا انا من ضمن الناس فبشوف بيحصلي ايه مع الناس و مع العالم اللي انا عايشة فيه


واحد مش فاهم حاجة
كويس انك جيييييييت
انا حطيت لك لينك و طلع غلط عندي و من يومها و انا دايخة الاقيك فين تاني و اديك جيت برجليك
فأهلا وسهلا
سيادتك تختلف معايا و لا يهمك و معنديش اي مشكلة لو عاوز تنقل اي حاجة من المدونة بس شرط انك تذكر مصدرها
و حاول تفتكر انت كنت عاوز تختلف او تعترض معايا على ايه


تحياتي للجميع

hartaka said...

ازيك يا حفصة
موضوع المجاملة الفضائية دة منتشر اوى
وفقعنى جدا وخصوصا لما واحد جديد يكتب تعليق ويقولك فى الاخر
يلا خلينا نعرفكم وتعرفوونا
بتبقى خلاص ورمت من جوا

عندك نظرة مستقبلية جميلة
وبعض السادية المحببة الى نفسى

بوست جميل

واحد مش فاهم حاجة said...

انا كنت عاوز اقول فكرة الحجر الصحى دى

هاتمنع الاقل فى الثقافة

او اللى فاهم حاجات غلط

ومحتاج يفهمها صح

او اللى مش فاهم حاجة

انهم يستفيدوا من الناس اللى فاهمة

او اللى حاولت تفهم


انا اتخيلت فكرة الحجر اللى فى دماغك

بانك متزوريش مدونات

حد مثلا انتى مختلفة معاة فى التفكير

يعنى مثلا انا بحب السادات
مش هازور حد بيحب عبد الناصر


اعتقد ان الفكرة تكون احسن

لو اعتمدنا على اللينكات
اللى موجود فى مدونة كل واحد

بانة ميحطش لينك

لواحد افكارة شاذة
او ساذجة

يعنى اللى دماغى تستريح لتفكيرة
احطلة لينك عندى

-----------------------------

سعيد جدا بوجود اسم مدونتى عندك

تحياتى

ادم المصري said...

ههههههههههههه
الله التدوين جوجل
.
.
اذن عليك البايت بالميجا
ولرحمك الله من خبث الهاكرين والهاكرات
المدونين منهم والمدونات
المفروسين والمفروسات
وليحميكي يا اختاه من شر الفيروسات
.
.
واما بعد
مع احترامي لاسبقية علاء ومنال
اشمعني هما اللي يتخذوا الموقف دا

ثم مين اللي هيقول ان البوست دا بدين باستخدام الضاض او مش بدين باستخدام الضاض برده

وايه التصرف اللي هيتم ياتري هنتفق مع احد الهاكرز يهكر لنا علي الواد اللي امه داعية عليه دا ولا هنتصل بجوجل راسا نشتكيها


ثم الحكاية دي عايزة متابعه شدية جدا ولازم وقطعا تتمزي بالحياد ياعني مش عشان صحاب يعديولو ولو زعلان يحطوا في لسه الحكر التدويني


وبعدين زي ما انت قولتي مش معني ان واحد بقي عنده مدونة بقي عبقري وبالنسبة لشهرة بعضهم فدا ناتج عن جهد وعمل مش من فراغ


ثم حتي البدانه في دماغ اي مدون او حتي في كتاباته ممكن تكون في حد ذاته شيء بيمثل حاجة للولد دا .. وممكن الفرسة تجيب سكة قلبية لما تلاقي حد متعاطف جدا وبيرد علي اخينا في موضوعه


في الاخر احب اقولك
حوشتيني .. انتي ودانتي
وحوشني العدس كمان
تحياتي والسلام

HafSSa said...

هرطقة
عجبتين اوي حكاية السادية اللي عاجباك
بس يا ترى ايه هي السادية دي
متكونش حاجة وحشة
هههههههههههههههههه


واحد مش فاهم حاجة حقولك تاني ان المشكلة مش في الناس اللي انا حطالهم لينكات عندي
ما هو مؤكد مش ححط لينكات لناس بتفقعني و ااذي نفسي بنفسي
انا بتكلم عن المدونات اللي الواحد بيتكعبل فيهم و هو ماشي
بس



ادم المصري
انت شكلك فهتمني غلط
انا مش بعيب على بعض المدونيين انهم بقوا مشهورين
لا طبعا
اتمنى لهم كل خير
انا بعيب على كل واحد فاكر نفسه مدون يبقى خلاص بقى ملك زمانه و بيتعاملوا معاك على الاساس ده

بالنسبة لعلاء ومنال فده واضح من العنوان
اباء اوائل و محدش يقدر ينكر انهم اول من ادخل صناعة التدوين لمصر و مش بعيد العالم العربي كله
و بالنسبة لاستخدام الهاكر فطبعا ده مش حيتم لانه عيب
لكن ممكن لو جطينا المدعو في الحجر و تم شفاءه يبقى ساعتها يقدر يرجع يدون تاني
و اخيرا اقولك
انت كمان وحشتني و لو على العدس ففيه منه كتييييير
هههههههه


تحياتي

أُكتب بالرصاص said...

طيب انا جاي اسجل حضور

:)

شاكلك مفقوعة من كام واحد وقلتي نخلي الموضوع عام

يا سيدتي..كل واحد حر ، وانا حر اقلب القناة
قصدي اقلب المدونة

وبعدين ..مدونة في الاساس علشان التهييس..اقصد ..البعبعة ، يعني .. الواحد يدون يومياته حتى لو ان نزل يشتري كيلو جبنة استانبولي من عم محمود البقال فا ملاقش استانبولي فاراح عند عم قلدس إللى في شارع مسرة

وبعدين وهوا راجع مالاقش الاتوبيس فا ركب التروللي باس

كل سنة وانت طيبة
وبعودة الايام

شـــــهــــروزة said...

بصى يا ستى
بحكم العشرة القديمة نسبيا" ببلوجر واللى عليه
لقيت شوية أشكال تدخل عندك تعلق وهم برضة اصحاب مدونات
وراس ابوهم وألف صرمة قديمة انك تقتنعى بكلامهم بالعافية بالذوق
غصب عن عين اللى جابوكى وتدخلى حسبة بتوع قال الله وقال الرسول ولازم يكسبوا ثواب فى هدايتك

ولو معملتيش
يترصدوا لك فى الكبيرة والصغيرة لحد ما يشقطوكى فى حاجة منهم وتبقا ليلتك بيضا بيضا يعنى

وفيه ناس تانية تدخل ظريقة ولطيفة كدة
وتديكى من الألفاظ المنقى يا خيار
وكله باسم مجهول رغم انهم مدونين لكن انتابتهم رغبة فش الغل فيكى لمجرد ان كلامك مش على هوا اللى جابوهم


فكرة بقا الحجر الصحى او العقلى على انماط معينة من المدونين مش حتجيب فايدة
لأن الاعجاب والتأقلم عم الأفكار نسبى
انتى بتنفرسى منهم
فى حين انهم لهم شلة او جمهور على الجانب الآخر نازل تصقيف وطبطبة وأعد يا مولاناا وزيدنا الله يكرمك
وخلافه من اللى انتى فاهماه
و من الجانب التانى حتكونى انتى مثلا او أنا أو حد من المعادى لأفكارهم محكوم عليه زى ما انتى حكمتى عليهم كدة انهم معاتيه وطفيليين الخ الخ
حنبقا احنا مثلا المعاهية والمهاطيل
ويحق علينا حد الفلترة من على بلوجر وجوجل مع بعض فى أعينهم

لكن أهو فشة غل كويسة بدل ما النفر يطق برضة
انا بأريح نفسى ومش بأتعب نفسى فى القراءة لحد ممن تنطبق عليه تلك المواصفات

اشتريت دماغى

تحياتشى

HafSSa said...

اكتب بالرصاص
فينك يا راجل مختفي فين
بص يا سيدي مش حقلك غير حاجة واحدة
انت لو كنت اتفقعت زي ما انا اتفقعت كنت فهمت قصدي ايه مش حقولك غير كده

شهروزة
حرجع و اعيد رابع اني مش بقصد اروح عند اسافل المدونيين
هما اللي بيقعوا في طريقي
للاسف
و زي ما قلت لهاني نلحق نتغدة بيهم قبل ما يتشعوا بينا


تحياتي