warriors of light

Warriors of light don't give up, don't surrender. They take a break to reorganize their force, their army, and draw their maps again. Warriors of light never give up, for light is their reflection on earth, without them, others die and go in vain.

ايران ، حماس، حزب الله، الاخوان المسلمين الثلاثي المرح

تحت شعار

" دعونا نفكر معا"

على نظام مسائل الهندسة بتاعت اعدادي و ثانوي حقول المعطيات التالية:

1-الاخوان المسلمين بيطالبوا دايما بمناصرة اخواننا في حماس و فلسطين حتى لو على حساب اي حاجة تانية ان شاء الله كانت مصر

2- حماس و من والها بيطالبوا الجميع بتاييدهم و اللي مش حيأيد حنديله علقة و حنعتقله

3- ايران بتايد حماس و بتمولها بفلوس عيني عينك و ايدي في جيبك

4-حزب الله بيأيد حماس و الاخوان المسلمين و هما بيأيدوه

4-الشيعة ضد السنة و السنة مش بيطيقوا ام الشيعة

4-السعودية بتحارب ايران على ارض العراق و لبنان و قريبا مصر الحمدلله

4-طبعا اللي ميفهمش يقول عدس و بتشنجان كمان، بس ميفهمش ان امريكا لابسه عروسة ايران كبعبع تخض بيه الدول الخيجية عشان تبني عندها قواعد، لكن ده مش مهم اوي دلوقتي

5-حماس و من والاها من اخوان لحزب الله لايران، كل ما حد يقولهم حاجة يقولك بس احنا جينا بانتخابات ديموقراطية، و على وزن ده تور، يقولولك و ماله احلبوه، تقلهم مينفعش، يقولولك خلاص يفقس بيض او يخلف فراخ

6-مصر فيها معارضة قوية من ايام مظاهرات ضد تزوير الانتخابات

7-كل الرفقاء اليساريين و الشيوعيين و الاخوانيين ضد التوريث و ضد تزوير النتايج و ضد مبارك و الهتافات الله ينور، مسابقة شعر زجلي متعمرة كويس

طيب نفهم من كل اللي وارد اعلاه ايه؟؟

نفهم التالي:

1- ان جماعة الاخوان المسلمين جماعة وسخة

2- ان حركة حماس و من والها من فصائل تانية اوسخ

3- ان حزب الله ميفرقش عنهم ملي واحد وسخ

4-ان ايران ام الوساخة كلها

5- ان المعارضين الشرفاء عندنا مخهم شغال لوز لوز لوز

6- ان احمقي سجاد ده ديكتاتور من يومه و ميفرقش اي حاجة عن دين كلب هتلري عنصري و يكفي موقفه ايام حرب غزة الاخيرة، بق كبير عالفاضي، بكرة ينحشي نعال جزم

ليه بقى؟؟

عشان لما حماس متمسكة "بالديموقراطية" بتاعت الانتخابات و ان شاء الله كل سكان غزة يموتوا

و عشان لما حزب الله و الاخوان و ايران يكونوا بيايدوها في جميع الاحوال

و عشان لما نتايج الانتخابات في ايران تتزور و الناس تثور بالشكل ده و اخرها بقوا يقتلوا الطلبة و يخطفوهم زي ما هو مكتوب هنا

و عشان لما الاحزاب السودا الاربعة دول يكونوا بيتمسكوا بس بالحاجة اللي تفيدهم مهما كانت ناقضة لمبادئهم ان كان اصلا عندهم مبادئ

و عشان لما السنة يتحالفوا مع الشيعة لتحقيق هدف معين لكنهم بيتقاتلوا قتال حرب داحس و الغبراء في العراق و لبنان

دي تبقى اسمها ايه؟؟

في هنا كمان

نظرية الذكرى السنوية

بتمر علينا كل سنة بنفس التواريخ مع اختلاف السنين
طيب كويس والله مكنتش واخدة بالي
و كل سنة كل واحد مننا عنده كمية تواريخ بيحب يتذكرها و يتكلم عنها من اول يوم ميلاده لذكرى وفاة حد عزيز عليه او اي مناسبة تانية خاصة بيه و فيه احيانا مناسبات عامة لكن بيتناولها من منظوره الشخصي زي مثلا يوم 5 يونيو و 6 اكتوبر و هلم جرا
و مننساش ان كل سنة في تواريخ معينة تختلف باختلاف متذكرها بيطل علينا عدد من الكتاب و المحللين يحللو او يناقشوا اسباب حدوث كذا و كدا من الاحداث، برضو ماشي اتباعا لمقولة ان الذكرى تنفع المؤمنين.

كون اننا بنفتكر مناسبات فده كويس، لكن المش كويس اننا بنتبع نفس الاسلوب ده في دفاعنا عن قضايانا. بمعنى اننا في اغلب بلاد الشرق الاوسخ ،على راي صديقتي كاميليا، بنتعامل مع اي قضية مهمة لينا و تغييرها حياثر علينا بشكل جذري و ضروري بطريقة الذكرى السنوية. مش عارفة اذكر امثلة للموضوع و لا اريح دماغي من ذكر تواريخ؟؟
حقول مثلا ذكرى قتل اللاجئين السودانيين، افتكرناها بس سنتين بعد حدوثها في الذكرى السنوية لحدوثها. ذكرى ستة ابريل، برضو استنينا ليوم حدوث مناسبة معينة و اللي هي كانت اضراب من العمال لوحدهم فانتهزنا الفرصة و عملناه معاهم و نفس الشيئ مع يوم عيد ميلاد مبارك
الفكرة اننا سلبيين
بنستنى حدوث مناسبة عشان نتفاعل معاها و نستغلها، بينما اي حد مؤمن بحق او قضية معينه حيفضل يناهض وو يتظاهر عشانها كل يوم، بمعنى الكلمة كل يوم، ياما سمعنا عن ناس في بريطانيا او غيرها مخيمين في مكان ما عاوزين يعبروا عن رايهم و حقهم في قضية معينة
في قضية تل منوذ في بريطانيا، اللي هي قضية القواعد الامريكية في مناطق عديدة على الارض الانجليزية اعرف ان فيه ستات هناك مخيميين بالسنين لغاية ما البوليس جه شالهم بالعافية.
في امريكا و قدام البيت الابيض فيه معارضين لكل سياسات امريكا و مخيمين هناك قرب ال25 سنة
ناصبين خيمة و خلاص
قرر انه يبقى لقمة صعبة في الزور
شوكة بالعرض في حلق الحكومة
الالذ من كوننا بنتظاهر او نضرب عن شيئ في يوم الذكرى بتاعته او اي مناسبة تانية هو مكان المظاهرة.
يعني انا عاوزة اعرف حاجة بالذات في مصر، ليه اغلب الوقفات الاعتراضية و الاضرابات بتم على سلم نقابة الصحفيين او بكتيره في منطقة وسط البلد؟؟
هل مثلا لتخفيف حمل مصاريف التنقل على الاخوة الصحافيين ؟؟ ولا عشان نضمن اكبر عدد من الكاميرات للتصوير؟ ولا عشان سلم النقابة شيك و جديد و عرضه واسع؟؟
يعني افهم ان المتظاهرين يختاروه مكان ليهم اول مرة او اتنين
بس لما نوصل لمرحلة ان بس تنتشر اشاعة مظاهرة او وقفة او تضامن ان امن الدولة يجري يقفل شوارع المنطقة دي و يحاصروها، فده للاسف و معلش و اسفه، غباء. يعني كأن لسان حالنا بيقول، احنا حنروح سلم النقابة يا امن دولة زي ما انتوا عارفين و انتوا حتقفلوها علينا زي ما احنا عارفين، و احنا حنقاومكم زي ما انتوا عارفين، و احنا حنفلفص منكوا زي ما احنا عارفين، و انتوا حتضربونا بالشوم و العصيان و تطلقوا علينا جواسيسكم زي ما انتوا عارفين، و الصحفيين حيصورونا زي ما هما عارفين، و يتقبض على كام واحد مننا زي ما كلنا عارفين، و تنزل كام تدوينة تنشر اسماء المعتقلين زي ما المدونين متعودين، و يروح جمال عيد وواحد من مكتب مبارك للمش عارفة ايه زي ما هما متوقعين. و يقلق من هو خارج البلاد على صحابه زي ما هما متاكدين انهم بخير بس حيفضلوا قلقانيين.
طيب ايه سر الاصرار على نفس المكان مع اننا عارفين انه متحاصر حصرة سودا؟ و لا هو توم و جيري و السلام؟
ليه مش كل مرة نتفاجي بمكان جديد طالعة منه الوقفة الاحتجاجية و تخلوا الامن دايما في حالة انبهار على راي سميرة سعيد؟؟
ليه ميتمش عمل الوقفات دي كل مرة في مكان مختلف؟ ده حتى تكسبوا ناس جديدة و تنشروا الوعي اللي احنا عاوزين الناس تحس بيه و تعرف ان فيه غيرها بيدفع تمن حريته و وقته و مكرس كل جهده للدفاع عن قضية مواطن تاني عايش في البلالا.
و ليه ميتمش تخصيص جهد كل مجموعة للوقوف احتجاجا على قضية معينة كل يوم
بدل اقامة سرادق العزاء لمدة اربعين او غيره؟؟
طبعا كل ده وارد انه يحصل بس اذا فكرنا او حد فعلا عاوز يغير بجد و نفسه طويل و بيبص لقدام اوي مش تحت رجليه
و لان ده مش فينا
و لان احنا شرقيين مخلصين و منحبش نستورد عادات و تقاليد من برا
فمش حيحصل
اوعدكوا حكتب حاجة عن الموضوع ده كمان سنة ان كان لينا عمر

تحياتي

مراد بيحب مصر

هو يتحدث عن مصر كما لو كانت حبيبته

مش كدا و بس

ده كمان بيوعينا بشكل عملي كيفية التحصين من مرض انفلونزا الحلاليف

تابعوه

و ماذا عن العالم المسيحي؟؟

ما هما ولاد ناس برضو والله

من فترة اتناقش معايا صديق مسيحي لبناني
فقالي فيما معناه ان بوش لما قرر يوجه هجومه و حروبه على الشرق الاوسط و يحط الموضوع كحرب "صليبية" مكنش فارق معاه ال15 مليون مسيحي عربي شرقي بنكلة، يعني بوش مكنش عنده اي مانع انه يضحي بيهم في سبيل حروبه المزعومة
طبعا ده كلام صديقي ، فلا هو كلام و له دليل، او كلام متاخد من كتاب بمرجيعة او هو مثلا هيكل او فسك في التحليلات البضينة و الاستشرافات المغيبة للعقل و نظام حواديت ما قبل النوم
ما علينا
نرجع لموضوعنا الفكرة ان مش عاوزة حد يقلي و انتي جبتي الكلام ده منين، لذلك انا بقول انه كلام مش مقدس، ده مجرد راي لصديق قد يحتمل الصواب او عدمه و انا اشترك معاه في صحة الراي ده من وجهة نظري. انا شايفة ان بوش و سياسته اضروا بمسيحيين الشرق الاوسط زي المسلمين ان مكنش اكتر، لانه اتحسب عليهم مسيحي و هما منه براء، و انا مش بعمم ان ده لازم يكون شعور كل مسيحيين الشرق الاوسط، عشان محدش يزعل مثلا او يقولي لا انا موافق على افعال بوش، معنديش مشكلة طبعا كل واحد حر هو شايف بشبوشي ازاي

عدت تمن سنين عجاف من حكم سيدنا بوش، داق فيهم العالم مرار كتير.
جه اوباما و الناس هللت مش عارفة على ايه، بس اعتقد احنا دخلنا في مرحلة الهطل لدرجة ان ناس مؤمنين بيه على اساس انه المهدي المنتظر. جه اوباما عندنا في التلفزيون و اذ بي افوجئ انه حيخاطب العالم الاسلامي و بدا مقالته بالسلام عليكم و ايات قرانيه و استشهد باحاديث من الرسول. طيب هو ده جميل جدا على مستوى الشعبي السهل السلس، بس مقدمش حاجة مفيدة، هو خاطب عواطف. في مسرحية من مسرحيات الشيخ زبير كانت في وقت الرومان و القياصرة، فحصل فيها مشهد عبقري اوي، اتنين من قواد الجيش خبطوا في العامة من الشعب. واحد خاطب العقول، التاني خاطب القلوب و المشاعر، لكوا ان تستنتجوا مين كسب، المشاعر طبعا و التاني اتخلصوا منه اذا مش غلطانة.
لا بوش كلمنا بالعقل و لا اوباما اتكلم بالمنطق
واحد غبي و التاني حلنجي و واد تقيل و شكله زي ما ناصر اكل بعقل و شرف بنات مصر حلاوة، ان اوباما شكله ناوي يعمل نفس الشيئ.
لكن انا استعجبت ان حتى اوباما خاطب العالم الاسلامي و بس. في خطابه يوم تعيينه رئيس اعتقد انه قال حاجة عن لم شمل كل المواطنين الامريكين سواء مسيحيين او يهود او مسلمين و حتى كمان الملحدين و دي سابقة محصلتش حسب معرفتي قبل كدا من رئيس دولة انه يعترف بحق الملحدين او يوجهه لهم كلام.
طيب ليه سي اوباما معبرش العالم المسيحي الشرق اوسطي بكلمة؟؟

يعني هما لا حصلوا بلح الشام و لا عنب اليمن؟ لا بوش فادهم بحاجة و لا اوباما لمهم للقطيع اللي حيصالحه و ناكل سمن و عسل مع بعض. يعني انا حسيت بعد ما شفت كلامه انه بيقول انا جاي اكلم المسلمين و بس، انتوا بقى مش مشكلة اتصرفوا براحتكم، يعني مش عارفة، مستريحتش اوي لكلمة العالم الاسلامي و اقصاء العالم المسيحي، ما هو مادام اوباما قسم و سمعنا، فاحنا حنضطر نمشي بنفس المسميات، حكم القوي على الضعيف. و حنتقسم لعوالم و عالمين و عالمات.
اذن ، يا ايها العالم المسيحي، راحت عليكوا يا ضينايا سواء جمهوري و ديموقراطي.
اللهم اني لا أسائلك رد القضاء و لكني اسائلك البعد عن مغبة سحر الرؤساء، المحدثين منهم و الخطباء، الاغبياء منهم و الاوباماااااء

تيسير بركات....حين يكون الفن رسالة سامية بحق

تيسير بركات- فنان تشكيلي فلسطيني: دائما الظروف الصعبة هي سيف ذو حدين تجبر الإنسان مرات على الإبداع والابتكار طرق جديدة في الاتصال والتواصل رغم كل الجنون اللي بيسووه إلا إنه إحنا قادرين إلى أن نوصل صوتنا ورسالتنا إلى العالم مضبوط في صعوبات كثيرة ولكن العقل الفلسطيني في هذه المرحلة يبدع طرق متنوعة لهذا الاتصال

حين يكون صاحب القضية عالمي التفكير اكثر من مدعي المؤازرة
من فترة شفت تقرير في الجزيرة عن فنان فلسطيني افتتح معرضه في الضفة . الاول استوقفني ان نفس نوعية فنه غريبة جدا مسمعتش عنها من قبل، برادة الحديد، بيصنع منها اشكال و لوحات متعددة و كل لوحة لها فكرة و قصة و روح. بصراحة انا مش بفهم في الفن، و لكن بتفكير منطقي اعتقد ان الشغل ببرادة الحديد يستلزم صبر طويل التيلة اوي و كمان مخ خيالي ابداعي من الدرجة الاولى بحيث انه قدر يشوف الناحية الجمالية في برادة الحديد.
عادة الحديد مرتبط معانا بكل ما هو قوي و قاسي و صلب، و كل ما هو تصنيعي و مشروعي الطبيعة و ضخم الانتاج، طيارات و سفن و الات حرب و خرسانة بناء، لكن ان تتحول برادته لوحات فنية دقيقة التفاصيل و المنمنات، فده الجديد بالنسبة لي.
ما بعد الجديد في خامة اللوحات كان عقلية بركات نفسه، مؤخرا اصبحت لا اطيق الكثير من حديث الفلسطينيين عن نفسهم، و علي ان اوضح للقارئ المار من هنا لاول امرة اني نصف فلسطينية، الكثير من الانانية هي طابع الحديث، هم محور الكون، قضيتنا هي محور العالم، ماساتنا هي اهم ماساه، اما ان تؤمن بالقضية و تتحدث عنها في كل مكان و زمان و تحارب من اجلها و توجه كل الجهود و الامكانيات للاعلان عنها، و اما تصبح عميلا او طابورا خامسا او غير وطني او غيور على قضيتك. اصبح هناك مصريين يهتموا للشان الفلسطيني اكتر من اهتمامهم بشانهم المصري بل اكثر من اهتمام الفلسطينيين بشانهم هم انفسهم. ليس المصريون فقط بل جنسيات مختلفة، حتى اندونيسيا التي ترزح تحت خطوط فقر و تخلف و جهل كثيرة، تضامنت مع فلسطين في حربها الاخيرة و لم نسمع من قبل عن تظاهرهم بهذه القوة اعتراضا على نظام انتخابات غريب لا ينتهي و ما ان ينتهي حتى يشرعوا في الانتخابات اللي بعده.

من مجمل اقوال تيسير في لقائه في الجزيرة انه عندما يخلق لوحاته و اعماله فانه يفكر في من هم بعيدين عنه في المكان، مختلفين عنه في التوجه او اللغة، لكنهم يتوحدون معه في نفس العناء و الشقاء و الحزن.

فيقول هنا:
"ليست فلسطين وحدها الجريحة لذلك ‏هناك جراح اخرى في العالم في العراق ونوكشط كما تجولت في القرون الوسطى في ‏زمن نبوخذ نصر".‏

و في هذا الموقع يقول فيه تيسيرعن نفسه الاتي:
"

ومما جاء في نص سيرة ذاتية وضع على مدخل المعرض

"لا اسم لي ولا شكل لا ‏قيمة لي في هذا الزمن يمكن ان تجدوني ميتا في نفق على الحدود المصرية او ‏متسولا في احدى شوارع نوكشوط او حاوية قمامة في جباليا.. او طائرا مبللا ‏بالبترول على شواطئ الخليج العربي.. انا كيس طحين انا بيت مهدوم انا جرح نازف ‏انا جرة غاز.. انا جدار يتنظر الهدم..".

اي نعم لم يتوغل بعمق في بقية بقاع العالم، لكنه على الاقل فكر و توحد مع خارج حدود فلسطين كقضية او حتى كهم .

و غير تصوراته و مشاعره، فهناك حربه اللطيفة ضد عدوان اسرائيل على فلسطين و الفلسطينيين. يرى بركات انه يمكن ايصال صوته للناس عن طريق فنه فما دفعه لاستخدام برادة الحديد هو محاولته ايجاد حوار لمناقشة الغبار الناجم عن الدمار".
احقا مازال يوجد فلسطينييون يقدمون فنا؟ و يعبرون عن معاناتهم و ماسيهم بالفن؟؟ احقا ما زال هناك فلسطيني يعتقد ان الفن معبر و باقي اكثر من العمليات الانتحارية التي لا تزيد الوضع الا سوءا؟؟
احقا يوجد فلسطينيين اخرين يؤمنون بعدم جدوى القتل و التفجير و عوضا يؤمنون بالفن ؟؟
اود تسليط الضوء عليهم اكثر من ذلك
اود ان يعرفهم العالم كما يعرف اسماء قميئة مثل حماس و هنية و مشعل و عباس و تفجير و مظاهرة و تنديد و شجب و رصاصات طائشة و قنابل غبية لا تصيب اي هدف الا قتل ابرياء و سفح دم طاهر
تيسير بركات، شكرا لك
تيسير بركات ، بوركت مبدعا مؤمنا بالحياة

""يقولون عني شهيد انا ‏لم ارغب في الموت انا من بيت لاهيا احب الحياة.. انا لا اريد الموت انا ربيع ابن ‏الثامنة عشرة وجدوني بين الركام في العشرين من يناير كنت ميتا باحلامي وعندما ‏مت كنت وحيدا وخائفا بلا خبز".