مقطفات مني

يعني ممكن حاجة بسيطة اوي زي اني اصحى من النوم و احط كحل في عيني فاكتشفت ان بياض عيني ناصع النهاردة و شكلهم حلو،فانبسط. كم هو سهل الرضا

***************

 

‎مكنتش اتخيل ان فيه حاجة تشبه الحب ممكن تنحت الواحد بكل سلاسة موجعة الا دلوقتي، جسدي تحول الى قطعة طين لا بيابسة ولا بندية، حالة برزخية من نصف الاكتمال و نصف الكمال، مجهول بينحتني، بينحت كل لحظة فيا، كل خطوة، كل شاردة فكر او لهفة عين، كل تخيل مميت و غيرة حزينة عاجزة عن التفاعل، حرقة كتمان سؤال " انت فين؟" " مع مين دلوقتي؟ " التظاهر البشع اني متماسكة، التفاعل تحت وطأة "ولا يهمني" ، الشوق اللي لازم يفضل بارد و اخفض حرارته، الوجع اللي مالي القلب من بُعد مسافة من بعد قرب و انفاس حميمة، الوقوف مصلوبة بس بكل استكانة، بكل استسلام، بكل تسليم للقدر اللي مش حيحصل ابدا، دلوقتي بس اقدر النحاتين و المثالين، دلوقتي بس عرفت ايه شعور المنحوتة و هي بين حياة و موت

 

**********************

 

بحبك، بحبك عشان مافيش اي شروط او متطلبات بينا، بحبك عشان مش بضطر اشرحلك او افسرلك ليه و ازاي، بحبك عشان مش بضطر اخبي حاجة عشان ابين حاجة تانية، بحبك عشان واثقة فيكي و انت واثقة فيا، عشان اقدر اعتمد عليكي و تعتمدي عليا، عشان بكون متعصبة و خلقي ضيق فانت بتفهمي و مش بتزعلي و انت بتكوني متضايقة فانا بفهم و مش بزعل او على الاقل ببعد، بحبك عشان قريبين اوي من بعض بس لسه كل واحدة محتفظة بحدودها الشخصية الخاصة من غير غزو خارجي ثقيل الظل او حتى خفيفه، بحبك عشان مستريحة، السؤال هو ليه باقي الناس مش كدا؟ و باقي العلاقات مش بالسهولة دي؟ هي صعبة للدرجة دي؟‎"

***********************