احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Monday, August 20, 2007

الجمهوريات المليكة


ما هي الجمهوريات الملكية؟؟ هي احدث أنواع و أساليب الحكم، فلقد جمعت ما بين النظام الجمهوري و الذي بمقتضاه يتم انتخاب الحاكم عن طريق استفتاء للشعب و بناءا على رغبته في ذلك، و جمعت بين النظام الملكي و الذي بمقتضاه يحكم فرد من أسرة عرفت بالملكية و يرضى الشعب بهذه الأسر فيتوالى على الحكم من ملوكها و أمراءها.
و لنا نحن الشعوب الجمهوملكية أن نفخر بأننا قد ابتدعنا هذا النوع الحديث و الفريد على أعلى مستوى في العالم و هو أن تكون هناك دولة نظامها جمهوري المظهر ملكي التطبيق.
و قد يتسال البعض و يقول كيف يتم تطبيق هذا النظام؟؟ و للرد على هذا السؤال يقتضي بنا الأمر إلى تصنيف أنواع الحكم على طريقة الجمهوريات الملكية
فهناك نوع تكون الجمهورية واقعة تحت سيطرة حزب أو جماعة معينة ذات فكر ومعين و هدف لا تحيد عنه فهؤلاء يرثون الحكم حتى و إن تبدل الرئيس الشكلي عدة مرات و تكون هذه الجماعة هي التي تحكم فعليا و لا تعترف بنتيجة الانتخابات إذا كانت ضد مصالحها و على سبيل المثال خد عندك أمريكا
و هناك نوع أخر من الجمهوريات الملكية و فيها يقوم حاكم برئاسة دولة ثم يجد أن مهنة الرئاسة و الله جميلة جدا و مفيدة على أعلى مستوى فيستمر و يستمر و يستمر و لكن لأنه مؤمن بالله عز و جل و مؤمن بالقضاء و القدر و أن الموت علينا حق فتصعب عليه نفسه انه يوما ما سوف يترك المنصب و ذلك عن طريق الوفاة فقط لأننا مدن و دويلات متحضرة تعيش في سلام فلا يوجد عندنا ما يسمى اغتيال زعيم أو ما شابه.
المهم و كما يفعل أي والد مع أبناءه بإعطائهم خلاصة جهده و خبرته في الحياة
فبالمثل يعطي الحاكم أبناءه الحق في الخلافة من بعده.
و لم لا؟؟ فهل تريدون للسيد بعد أن يشقى و يتعب و هو يضع أصول فلسفته في طريقة الحكم أن تذهب هباء و يأتي غريب فيعدل فيها ما شاء الله و ينهي كل ما فعله سابقه بجرة قلم؟؟؟؟؟ لا والله لقد بذل هذا الحاكم كل جهده لكي يضع نظاما ثابتا و متينا كي يمسي على نهجه أبناء شعبه الذين استو رثهم كحق غير قابل للتفاوض خالصا مخلصا مع مميزات كونه حاكم.
فهل نريد لهذا الصرح العظيم أن ينقض بناءه؟؟ بالطبع سوف تكون إجابتك بلا و إلا اعتبرت خائن و عميلا للأجانب الذي لا صديق لهم فها هم لا يتوانون عن تغيير رؤسائهم بشكل سريع كلما واتتهم الفرصة فلا يقيموا وزنا للقمة العيش التي شحتوها في عصر علان أو فلان و هم بالفعل ماديون و لا يفكرون إلا في الطريقة التي تمكنهم من العيش بطريقة أدمية.
وفقكم الله سيدي الرئيس الملكجمهوري رئيس دولتنا المفتكسة.
احكي لكوا بقة نبذة بسيطة عن المكتوب فوق
الكلام اللي فوق ده كتبته سنة 2000 لما الرئيس مديد العمر و من بعده أولاده بشار الاسد ورث الحكم عن ابوه حافظ الاسد و اللي هو فهلا اسم على مسمى فهو كان حافظ و فعلا فضل محافظ و حلف اليمين على اساس انه ما يتعتع عن الحكم في سوريا الا لو مات و برضك ساعتها حيسيب الحكم لابنه
و وقتها كان ليا صحاب سوريين فضلا عن بعض الاقارب اللي ليا بهم صلة قرابة من بعييييييييييييد و من اول ما مسك بشار الحكم نزلت فيهم تريقة و تهكمات و فلحسة من قبيل انه يا عمي على الديموقراطية اللي انتوا عايشين فيها
و يا سيدي من قدكوا الرئيس ريحكوا من مشقة التفكير في رؤساء كتار و وفر عليكوا فلوس حتضيع في انتخابات
ومرة من ذات المرات بنت من صحابي السوريين دول قالت لي امال مبارك قاعد على قلبك بيعمل ايه لغاية دلوقتي؟؟
قلت لها لا مبارك ايه؟؟ حدك لغاية هنا معايا؟؟ مبارك قاعد على (ارادة الشعب) بكيفنا يعني لكنه لما يموت حتبقى فيه انتخابات
اصل احنا خلصنا المدة المقررة اللي علينا
فهي قامت ردت عليا بغيظ (معلش اصل كنا بنمووووت في دباديب بعض) و قالتي لي بشماتة لا يا حبيبتي بكرة حتشوفي انه حيمسك العرش قصدي الحكم لابنه من بعده و يورثهولوه
طبعا أنا شخط فيها و قولتلها بسك كفاية متفوليش و انت اصلا عينيك خضرا و سنانك فرقا و دي علامة الحاسد
و اتاريني أنا اللي عايشة في احلام لونها بمبي و فاكرة ان بسلامته حيمشي و من بعدها نفك الضيقة و نصرف الوديعة
احسن حاجة في الموضوع اني مبقتش عارفة اراضيها فين الولية السورية اياها و الا كانت شمتت فيا بجد و بالمفتشر و ان كان لو عليا حقولها المثل الشعبي بالكسرة على الشين بيقولك ايه؟؟ لا تعايريني و لا أعايرك الحكم المورث طايلني و طايلك و تحية للعشب الليبي العظيم خريج عمر المختار الذي يرزح تحت أعباء احتلال الغباء و العمالة القذافية المتوغلةو على سيرة ملعون الاسم القذافي ورد بتاريخ 19 اغسطس ان الاعقيد بجلالة قدره بيطلب حماية امريكية من الرئيس الامريكي في حالة تعرض ليبيا لهجوم خارجي!!!!!؟؟
مش قادرة افهم الراجل ده و الاكتر مش قادرة افهم ازاي هو لسه قاعد في الحكم و الناس و الحكام ساكتين عليه بس بجد يا بخت من امريكا كانت ممسكاه الحكم.
حسرة عليكي يا مصر اللي زمان كنا بنقولها محروسة دلوقتي بنقول مفعوصة من ليبيا في ناحية و السعودية من ناحية و فلسطين/ اسرائيل من ناحية و اخيرا بغلب السودان من ناحية
في رايي احنا نروح نرمي نفسنا في البحر حتى تصدق علينا مقولة طارق بن زياد البحر من امامكم و العدو من ورائكم.
عمتم مساءا

10 comments:

Mohamed A. Ghaffar said...

ولا نرمى ولا حاجه احنا شربنا هذا النظام بكل صوره حتى النخاع

راجعى التاريخ وقولى لى امتى مصر كانت حره

Marvel - واحد زهقان said...

وانا في سنة اولى في الكلية كان معانا طلبة سوريين ومن ضمن الكلام كنا بنسالهم ازاي سكتوا على التوريث عندهم...كانوا بيحرجوا وبيتكسفوا ويقولوا ان الامن والمخابرات نزلت الشوارع يومها لمنع قيام اي مظاهرات وان كان في حظر تجول غير معلن في دمشق

وكان ضمن دفاعهم ان ده هيحصل في مصر مع جمال و في ليبيا مع سيف الاسلام"لسة شايفه من يوميين على الجزيرة بيخطب في الجماهير الغفيرة اكنه عبد الناصر في عزه"
وهيحل برضه في اليمن بس مش فاكر ابن الريس كان اسمه ايه..وكان هيحصل في العراق لكن امريكا ما ادتش لصدام فرصة

ربنا يستر على العرب جميعا

Ahmad Badawy said...

لا طبعا يا حفصة احنا عندنا ديمقراطية بيروقراطية كاريكاتورية فظيعة ... دول بدأوا من دلوقتى فى تضبيط آل ايه انتخابات جوة الحزب الوطنى

هآآآآو و الأمين العام المساعد - اللى هو العريس الوريث الفكيس - بيطالب بالتغيير و التطوير و الخوابير و كل حاجة

بس بزمتك مش ده دليل على ريادة الدول العربية فى اختراع و ابتكار نظم حكم فول اوبشنز تريح الحاكم و هو مستكنيص على الكرسى ع الآخر ؟؟؟

على رأى عبدالرحمن يوسف ... فى الغرب يعملون من أجل رفع دخل الفرد و عندنا نتعب من أجل رفع دخل فرد

HafSSa said...

شربنا النظام؟؟
يعني مافيش امل يا عبغفار؟؟
مصر كانت حرة امتى يا حفصة
امتى يا حفصة؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
مممممممممممممممممممممم

يمكن ايام حتشبسوت؟؟


مارفل ربنا يستر على العرب لكن على ايه بالظبط؟؟
احنا خلاص سلمنا كل اللي عندنا مافيش حاجة ربنا حيستر عليها خلاص
و ارجع اقول احنا يا نموت يا ندفن نفسنا في البحر

بدوي كويس انك جيت لان اللينك الجديد اللي حضرتك حاطه بيوصلني على بروفايلي انا مش عارفة ازاي لكن اللهم ادم لنا التكنولوجيا
و مادامك بتقول انه في ديموقراطية يبقى خلاص مش من حقك تتكلم بعد كده عن اي شئ وحش في المفعوصة
انت كده تخليت عن حقك ف يالشجب و التنديد و الاعتصامات

Hassan El Helali said...

حافصة العزيزة

مش عارف ليه حاسس بإنه لو ما استلمش جمال الحكم، البديلين المتوافرين حالياً (الإخوان والعسكريين) مرعب جداً... مجرد إحساس

وعلي فكرة أنا عملت إستطلاع رأي في مدونتي المتواضعة واندهشت من إنه بالرغم من كل الكلام إللي بنسمعه عن رفض التوريث، إلا إن نسبة إختيار جمال هي الأعلي... وبكتير... طيب فهميهالي دي؟

مع تحياتي

ذو النون المصري said...

و الله انا خايف جدا من تولي جمال الحكم لانها كده تبقي باظت خالص و مفيهاش اي امل
المفروض البلد يبقي مفيهاش رجاله لو ده حصل
لكن برضه ارجع و اقول جايز يكون فيه خير علي اساس ان قبضته استحاله تكون زي قبضة ابوه في الحكم و ده هيخليه غصب عنه يبحبحها شويه
و احتمال تقع في ايد الاخوان من بعده و بسببه و ضعفه

DantY ElMasrY said...

اعتقد ان جيمى ممكن يورث وليه لأ
وبعد ما يورث ممكن يحصل فى أى وقت جرح للكرامة العسكرية للجيش ويحسو ساعتها انهم ولا حاجة يقوم شوية ظباط نافخين ريشة جمال ويقعدوا هما على الكراسى.ويسموها ثورة . ويحصلوا بعض الإمتيازات ليهم وينتشر جو التوتر فى المنطقة ويستمع الشعب لأغانى وطنية جديدة تهدد أمريكا واللى جابو امريكا ولما امريكا وحليفتها اسرائيل تخاف ينصبوا فخ للثورة ونسميها نكسة _أو _وكسة وبعدين السادات يحرر سينا ونقتله ونشمت بكل برود
بعدين ييجى واحد يطبطب على الكل ويدلع ومهواش عاوز يحارب ولا مايحاربش ولما يكبر فى السن يحب يطمن على مستقبل ابنه الشبطة ويعينه رئيس جمهورية لحد ما يجرح كرامة الجيش العسكرية ويقوم شوية ظباط عاملين انقلاب نسميه ثورة ويعملو اغانى وطنية جديدة ويخوفوا امريكا .......................

HafSSa said...

في مثل خليجي بيقول
" يود مجنونك ليجيك اللي اجن منه"
يعني امسك في المجنون اللي عندك بدل ما يجيلك اللي انيل منه
طيب لو ده صح يبقى هل فعلا حنرضى بجمال مبارك؟؟
طيب ايه الضمان انه ميطلعش زي ابوه او انيل و يطلع ضعيف و يضحك عليه و فعلا الحكم يقع في ايد الاسلامين ؟؟
و المشكلة ان فعلا شفت الاستبيان عندك يا حسن و الناس فعلا مختاراه لانه افضل السيئين
و لو توقعات نون صح يبقى دي كمان مصيبة و لو سيناريو دانتي فعلا حيتكرر يبقى خلاص ارجع اقول
نرمي نفسنا في البحر احسن و تفضى البلد و يعاد بناءها من اول و جديد و ليكوا عليا ابقى انا اارخ المرحلة دي عشان اساميكوا متروحش في بطن القرش هباءا منثورا

نفسي الطم و اصوت بس حرانة
معلش
الكأبه محاوطاني

ebn_egypt said...

والله أنا ببص للموضوع من زاوية تانية .. أنا لو بدى جارى كل يوم على قفاه وأخد منه فلوسه وهو ساكت ومتأنتخ وبيقول المهم انى عايش .. ايه يخلينى أبطل إفترا على الراجل ؟؟

بإختصار إذا كان جلالة الرئيس م ح م صاحب السمو الملكى بيبرطع وهايص تلطيش فى خلق الله والناس مدية قفاها ومقفلة بقها بالشمع الأحمر .. يبقى غلطان ومبيفهمش حاجة لو عمل غير كده ..

ولا ايه ؟؟

مصر من تانى
http://misrtany.blogspot.com/

hurricane_x said...

أنا تقريباً بطلت أتكلم فى الموضوع ده لأنه لا بيودى ولا بيجيب غير الشعور بالمرارة