احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Sunday, December 16, 2007

عنصرية المسحوقات

فجاءة لاحظت شئ غريب ، ليه شركات مساحيق التنظيف بتكتب التعليمات بصيغة المؤنث فقط؟؟ يعني هل ده لترسيخ ان بنات حوا هما بس اللي مسؤلين عن التنضيف و كأنه مهمة منوطين احنا بيها بس زيها زي الحمل و الولادة مثلا؟ يعني هل اخوانا من الرجال مش بيغسلوا هدوم مثلا او بينضفوا بيوت و يهتموا بيها زينا زيهم؟؟و لا هي خدمة شاقة مؤبدة فبالتالي تنضاف لمسلسل القهر و العادات المتخلفة اللي احنا عايشين فيها؟؟
انا جبت مثالين على نوعين من اشهر انواع مسحوقات الغسيل اريال و تايد يغسل افضل و لقيت مكتوب عند اريال اسحبي من هنا و عند تايد مكتوب لفتح العلبة اضغطي هنا يعني كان ممكن يتكتب يرجى الضغط هنا لفتح العلبة او يتم السحب هنا لفتح العلبة بس النص العربي عنصري اوي ضد الستات. للاسف مش حينفع نقارن ده بنفس المساحيق اللي مكتوبة بالانجليزي لان الخطاب الانجليزي محايد فكلمة انت مينعرفش منها اذا كان المتحدث اليه انثى ام ذكر و ايضا طريقة اعطاء التعليمات لكن الفرق ده ممكن يظهر في لغات زي الالمانية و الفرنسية و غيرها لان عندهم تمييز في الخطاب بين ذكر و انثى، فمبدأيا حد عنده مسحوق غسيل من بلاد السابق ذكرها عشان نشوف الخيبة اللي احنا فيها دي متكررة هناك كمان و لا بس هنا؟؟
الحاجة التانية اني حاولت اصور الكلام المكتوب على علب الشامبو لكن مكنش طالع واضح بتاتا بس لقيت الخطاب الموجه في التعليمات برضو متوجه للانثى، طبعا ممكن يجيي بال اي حد انه عشان الستات بيحبوا يعتنوا بشعرهم اكتر من الرجالة بس انا بقول اني اعرف رجالة بتغسل شعرها اكتر من الستات لدرجة انهم اصلعوا. اذن هل نية شركات الشامبو انهم ينضفوا الستات مثلا؟ او هل ده فيه اشارة خفية انهم بيلمحوا اننا محتاجين عناية اكتر من البشر التانية؟ فين حملة كلنا ليلى من ده كله؟ و ارجع تاني لمسحوقات الغسيل و اقول اني لما اجي اناقش في حكاية المساواة في شغل البيت بين الرجل بالمراة ممكن حد يقولي بس اسكتي اذا كان حتى شركات التنظيف بتقول ان انتوا اللي تفتحوا العلبة و انتوا اللي تنضفوا و انتوا اللي تغسلوا يعني العالم كله ضدك
ارد انا بأيه ساعتها؟؟فين حجتي هنا؟؟ يعني تكريس لفكرة ان شغل البيت مفوضة بيه الست و بس مترسخة في عقل باطن الجمهور ستاته قبل رجالته
اسحبي من هنا

يرجى الضغط هنا لفتح العلبة

هو في كده يا ربي!!؟؟
مين فينا المسحوق دلوقتي؟؟؟؟؟؟؟؟؟



17 comments:

يَحيى المِصري said...

إحمدي ربنا إنهم ماكتبوش عليه ممنوع الإستخدام للملونين

:D

بيسوو said...

طبيعي بما اننا في وطن عربي
الست لازم تغسل وتمسح وتطبخ الخ..الخ
صحيح عنصرية من وجهة نظر شريحة من الناس بس في نفس ذات الوقت هو ده الطبيعي من وجهة نظر شريحة تانية خالص

الجحيم هو الحقيقه said...
This comment has been removed by the author.
الجحيم هو الحقيقه said...

بصى بقا من اوله انا صح وانت غلط التثبيت اللى فوق دا مبكولش منه

ههههههههههه

اختلفى فى كل شىء الا دا لازم
تسحبى وتغسلى وتشطفى وتكنسى وتطبخى وتربى وتسهرى على راحة شهريار اما ل انت عاوزه ايه؟

مبقاش الا كده كمان

عاوزهم يكتبوا
اسحب

واشطف

ههههههههههههه

والله عال يا حفصه


لو الخبر دا وصل حدانا الكفر ان فيه بنته بتجول الكلام ده هطير فيه رجاب وان مش عاوز ك تموت الموته دى يا ماى فاهمنى عاد؟

اكفى ع الخبر ماجور واقفلى خشمك لحد منشوفلك مكان نخفيكى فيه اليومين دول

تحيه

Mohamed A. Ghaffar said...

فطستينى من الضحك بس عندك حق الصراحه

Nani said...

السلام عليكم
حفصة مساحيق التنظيف مش مسؤولةعن الترجمة فهي بتستخدم صيغة المجرد
للفتح...للتنظيف
المشكلة في المحترم الي ترجم
بس انا باخدها من ناحية ثانية
انو احنا الستات اكثر نظافة وعناية في حين انه الرجل بالعموم وسخ وهمجي
:)

ذو النون المصري said...

الهنا ما اعدلك
مليك كل من ملك
............
لبيك قد لبيت لك
لبيك ان الحمد لك
............
و الملك لا شريك لك
ما خاب عبد سالك
...................
انت له حيث سلك
لولاك يارب هلك
..................
لبيك ان الحمد لك
و الملك لا شريك لك
.....................
كل نبي و ملك
و كل من اهل لك
...................
و كل عبد سالك
سبح او لبي فلك
................
لبيك ان الحمد لك
و الملك لا شريك لك
...................
و الليل لما ان حلك
و السابحات في الفلك
.................
علي مجاري المنسلك
لبيك ان الحمد لك
.........................
و الملك لا شريك لك
يا خاطئا ما اغفلك
....................
اعمل و بادر اجلك
و اختم بخير عملك
...............
لبيك ان الحمد لك
و الملك لا شريك لك
....................
هذه القصيده لشاعر الخمريات الشهير ابو نواس، احببت ان اهديها لكم بمناسبة وقفة عرفات و عيد لاضحي المبارك، كل عام انتم بخير ،تقبل الله منا و منكم طيب القول و صالح العمل
.........................

ذو النون المصري said...

هعلق علي الموضوع ده و اللي قبله بعدين علي ما ابعت هدايا العيد و ارجع تاني
كل سنه و انتي طيبه

بنت القمر said...

ها هي هو ها هي هو
فاكرة كان في اعلان زمان عن ريري طعام الاطفال
بيقول ها تفضلي تنزلي وتدوري تغسلي وتقشري
تشلقي وتحمري
هاتي ريري
خخخخخخخخخخخخخ
يا بنتي امال اعلانات الميك اب عشان المان ما يبصش بره ولا حبوب التخسيس
ادويه تساقط الشاعر ودلوقت مش بغطي شعري ادام حمادة
كله يدور في فلك المان من المان والي المان
زي من التراب والي التراب
والي من غير مان حسره عليها يا حسره عليها
طب بزمتك جوزك عمرة شغل الغساله الوتوماتايك
ولما بتتعبي عمرة طبخ ولا اخرة بيجبلك بيتزا رغم انك عندك برد ونفسك في شورببه بليمون
بيقلع ويعلق هدومه علي الشماعه ولا بيكومها ويرجع يقول مين كسر هدومي
بيرحمك من مذاكره حفصه الصغيرة ولا مشغول وحياتك مشغول ولاخر الاسبوع قصدي العمر شغول
يا نهاري سيبيني ساكته احسن
مش الاعلان اللي غلط دا متوافق مع الواقع جدا
الواقع اللي غلط
وانتي ازيك بقا عيد سعيد

ehsanbros said...

لازم كانوا يكتبوا

اسحب/اسحبي من هنا

عشان محدش يزعل...

HafSSa said...

يحي المصري
هو احنا لسه في القرن الفات عشان تبقى فيه لسه عنصرية؟؟
دي تبقى مصيبة

اهلا وسهلا ب بيسوو
و بالنسبة للعنصرية اللي واقعة علينا نعمل فيها ايه بالظبط؟؟

ايه يا جحيم
انت شغال تهديدات من زمان كل شوية توصلي خبر المطالبة براسي من جهة شكل
داهية لحسن تكون معاهم و انا مش واخدة بالي
عااااااااااااااااا
و حتاويني متى يا ابن عمي؟؟


محمد عبدالغفار
والله اني انجح في اضحاك شخص واحد في زمانا الاغبر ده تبقى حاجة حلوة جدا و وسام شرف لان رايك اعتز بيه
شفت ازاي عندي حق
هههههههههههههههههههههههههههههه


ناني و عجباني
المدونة نورت يا فندم
بس سؤالي يا ناني
المترجم ده حط الترجمة في الخباثة كده من غير ما الشركة توافق عليها؟؟ و صحيح احنا الستات اكثر نظافة و بنهتم بالجمال و العناية بالمنزل اكتر لكن ده ميديهومش الحق انهم يوجوه الخطاب فقط للمؤنث
جتهم داهية شركات التنضيف دول


ذو النون
و كل سنة و انت طيب و بالف خير و صحة و سعادة انت و ابن عمك ابن النيل و ابن عمك التاني الدكتور احمد الشناوي و عموم ال بيتكم الكرام
ان شاء الله تحج السنة الجاية و ربنا يتقبل منكم و منا صالح الاعمال لنا جميعا
علق براحتك و خد وقتك و علق على كل موضوع في بوسته و انا حوصلك ميهيمكش

بنت القمر
تخيلي انا افتكرت الاعلان من هنا و فطست على روحي من الضحك و احب اضيف اعلان بسكو مصر
يا اختي هاتي كحك و غريبة بسكو مصر و لا عجن و خبز و لت و نتيجة حسب اللحظ
يا ختي دا بسكو مصر معمول بالسمنة البلدي الخ الخ الخ
خخخخخخخخخخخخخخخخخخخخخخخخخخخخخخخ
فييييييين ايام زمان يا وهيبة
معاكل حق موافقكي كلمة كلمة بالمللي

احسان بروس
اهلا يا جاري بقالك فترة كنت مستخبي
الذ حاجة في تعليقك انه مكتوب بلغة مصرية متخرش الميه
غلبتهم يا راجل
هههههههههههههههه

كل عام و انتم بالف خير و ان شاء الله يعود عليكم باليمن و الخير و البركات و تنبسطوا فيه و تقضوا وقت سعيد مع حبايبكوا و اهلكوا و اصحابوا
و متنسوش العيد فرحة
مااااااااااااااااااااااااء

ام العيال said...

i am emailing you all the time leh mosh betrody 3alaya ya amar :)

Marvel said...

حتى لو كانوا كتبوا التعليمات بصيغة محايدة برضه هتفضل الستات هما اللي يغسلوا ويطبخوا ويمسحوا...دي حاجة كده من ايام الفراعنة واحنا معروف تمسكنا بالاصالة والعراقة حتى لو هتطير فيها رقاب

اما بقى لو كانوا كتبوها بصيغة المذكر كنت هتلاقي الستات متضايقة لان الشركات بتتجاهلهم وبتخاطب الراجل اللي مش بيعمل اي حاجة في البيت..وكانوا هيطالبوا بان الخطاب يكون بصيغة المؤنث

:DDD

كل سنة وانت طيبة...عيد سعيد

HafSSa said...

ام العيال يا حبيبتي
ايميلاتك لسه واصلني امبارح و مش عارفة افتحهم لان واحد تحميل الفيديو فيه محتاج سرعة كويسة و ده م شمتوافر عندي التاني كنت لسه حقولك انه مش بيبين عندي حاجة بس كل سنة و انتي طيبة يا قمر

اهلا بمارفل
بصي يا ستي هو ده اللي كان قصدي عليه
انخ تنكتب الصيغة بشكلمحايد علشان لا دول يزعلوا و لا دول يزعلوا

تحياتي للجميع

m5m said...

بصى يا ستى..احنا خدنا منكم الطبيخ وبقى أحسن الطباخين والشيفات رجالة..واتنوا خدتوا الغسيل

واحدة قصاد واحدة يعنى..خالصين

وكل سنة وانتى طيبة

بحلم said...

علي فكرة انتي سكر قوي

HafSSa said...

ام فايف ام
حكاية الطبخ دي بتبقى في الفنادق و بس لكن في البيوت احنا برضو اللي بنتعك
خبرني اي قسمة عادلة تلك؟؟

بجلم
والله حضرتك اللي زي السكر
اصل السكر بس هو اللي يعرف رفيقه السكر
هههههههههه
تحياتي للجميع