احكم الحكم
إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود
حكمة جديدة
ميموتش حق وراه مطالب
انا افكر اذن انا حاموووووت
حفصة
17 comments:
امين
امين
امين
اللهم امين
هو بيمثل حبتين لكن باموت فيه
كان سابق زمانه بكتير أوي
الله يرحمه هو برضه سيب علينا الحثاله اللي قتلته واللي مش عارفين نلمها لغاية دلوقت
ادم المصري
يسمع منك ربنا
حسن الهلالي
هو مش بيمثل بس تقدر تقول هو كاريزماوي شوية و بيحب الخطابة و جهازة الصوتي عبقري
انا كان نفسي انشر خطابة و هو بيحدد اقامة البابا شنودة مش علشان حاجة بس عشان طريقته و صوته و هو بيقول
" تمانية" زي الاسد الجسور
كان رجل و الرجال قليلو
هو سيب الاخوان المتاسلمين فاكرهم حيفيدوا الناس و يحترموا نفسهم
لكن المثل بيقول
ديل الكلب عمره ما يتفرد و لو علقوا في ديله طوبة
و هما بكل خساسة راحوا اتفقوا مع الشيوعيين اللي هما مكفرينهم و عملوا فيها وطنيين
ربنا يرحمه و يرحمنا
تحياتي
كان طاير فى السما ورجلة لامسة الارض
ازاى معرفش
اقتباس
هو سيب الاخوان المتاسلمين فاكرهم حيفيدوا الناس و يحترموا نفسهم
احم !!!
هو إنتى ممكن تغمى عينيكى عن الحقيقه للدرجه دى علشان بتحبى السادات ؟
ليوناردو
هو ممكن انت تكون اللي مغمي عنيك عن الحقيقة عشان تكون مش شايف بلاويهم للدرجة دي؟؟؟
و في النهاية كل واحد فينا له راي
لو انت شايفهم كويسين
خلاص يبقى حلال عليك
لكن سيبني براحتي اعتقد في السادات اللي اعتقده
ولا ايه؟؟
واحد مش فاهم حاجة
مع اني مفهمتش قصدك ايه بالظبط لكن اهلا وسهلا بيك
نسيت اضيف اني كنت حابة انشر كليب المقطع اياه بس مش عاوز صحابي الاقباط يتضايقوا مهما كان السبب و مش لاي سبب فقط عشان اسمع صوته
كانت له طريقة معينة جدا ف يالنطق و الضغط على كلمات دون غيرها للدلالة على معنى تاني
ربنا يرحمه
التغميه اللى أقصدها مش على الإخوان يفيدوا الناس أو مايفيدوش
اللى باتكلم عنه واللى قصدته بتغمية عينيكى حكاية إنه سابهم فاكرهم هيفيدوا الناس ويحترموا نفسهم
وكإنه ماسابهمش علشان يضرب بيهم فصيل تانى من أجل استقراره هو سياسيا وتحقيق مصالحه
وكإن السادات ده كان ملاك برىء !!
بغض النظر بقى الإخوان عملوا إيه أو ماعملوش إيه مش ده اللى أنا أقصده
طبعا من حقك تعتقدى فى السادات اللى يريحك معنديش مشكله .. أنا بس باقول رأيى فى حاجه إنتى كتبتيها ومفتوحه للتعليق
لو ده ضايقك .. أنا آسف
!
اللهم أمين أمين أمين
ممكن بس أقول ليوناردو حاجة؟؟
السادات بالطبع ماكنش ملاك برئ
بس أنا شيفاه أحسن من اللي كانوا
قبليه و اللي جه بعديه
مافتكرش إن مرة مبارك طلع قال دعاء أو إستشهد بحديث أو بأية من القرأن الكريم؟؟
و ماظونش برضه إن اللي قبل السادات عمله كده
اه يا سادات الله يرحمك امين
امين
امين
بالتاكيد السادات مكانش ملاك برئ
بس ممكن تقول ملاك عبقري
ملاك بيحب مصر
ملاك بطل
المهم انه مكانش شيطان زى اللى قبله وبعده
استاذ ليوناردو
ارجو ان لما حضرتك تيجي تعلق تقول كلامك واضح من اول مرة عشان منفضلش تايهين من بعض
نيجي بقى لمتن التعليق بتاعك
اولا في حاجة اسمها سياسة و ده مش اول رئيس يقوي حزب او طايفة معينة عشان يوزن بيها وضع كان هو فاكر انه حينصلح لو اطلقهم
يعني هو معلمش خطيئة مثلا
و لانه بالفعل كان فاكر انه و باعطاءه حرية للاخوان حيستخدموها صح مش بكل سفالة زي ما حصل في الاخر
و انا اذا حمسك عيب وحيد خطير على السادات فهو انه اطلق سراح حثالة الاخوان و اداهم حقوق هما مش قدهاو الشئ التاني ان الفصيل اللي كان السادات عاوز يخلص منه مكنوش صادقين ف يدعواهم للتحرر و اليسار كما يجب
و للاسف اليسار كله في بر مصر فاسد و بايظ و لابس افكار مش يسارية بالمرة و من حقه انه يتخلص منهم
و اسفه اذا رايي بان لك انه سادي شوية اوشديد اللهجة
تعليقك مرحب بيه و اهلا و سهلا
مريم بنت عمران
اسمك عاجبني اوي
المهم
بصي الحكاية مش بمقياس كام مرة طلع يقول حديث او يستشهد بايات من القران
لو كده حتلاقي كل رئيس يقولوه ايتين على كام حديث و نبقى مظبكين الموضوع خلاص؟؟
لا طبعا
هو الموضوع و بمنتهى البساطة اني بحب السادات و بح بطريقة القاءه و اسلوب حديثه
الدعاء اللي هو قاله متاخد من اخر ايات سورة البقرة و عجبني اني احطه
انا مش بحبه عشان هو بيقرا قران او بيستشهد بيه يا مريم
انا بحبه عشان ده عمل ثورة تصحيح في مصر في 11 سنة بس و كان عاوز يرجعلها مجدها زي ما محمد علي باشا عمل
و بس
نيسو
حلوة ملاك عبقري
و ممكن تقولي ملاك مدقرم و صايع حبتين
ابقي شوفي الكليب بتاعه لما بيتمسخر على القذافي
مسخرة
تحياتي
وربنا لوكان كمل فى التمثيل لا كان بقى مصيبه
يلا حظنا كده بقى
ـــــــــ
لو الاخوان المسلمين بالقدر ده من القذاره زى ما انت شايفه وحطوا ايديهم فى ايد الشيوعين
بس فيه ناس تانيه ايديها متلطخه بدم بناتنا واولادنا واهالينا فى بحر البقر وقانا ودير ياسين وابو زعبل
اذا كان الاخوان متاسلمين فى نظرك
لانهم يقولون ما لا يفعلون
اللى يقول على نفسه الرئيس المؤمن وبعدين يرجع يقول لا سياسة فى الدين
يبقى ايه؟؟؟
احنا
شايفاه في قمة العدل و الذكاء
لانه بيصف نفسه انه مؤمن
لكن مش بيفرض يدانته او فكره على حد تاني بالحديد و النار و لان مقولة لا سياسة في الدين معناها فصل الدين عن الدولة حتى لا يتم تمييز الشخص على اساس دينه و الكل ياخد حقوقه بشكل متساوي مش زي ما بعض الفصائل المتاسلمة القذرة عاوزة تعمل
و شكرا
حافصة إنتي مافهمتيش قصدي
أنا برضك زيك بحب السادات عشان كانت عنده دماغ صح و كان بيفكر صح
و كان عايز يطلع بالبلد دي صح
أنا بقول عليه إنه سابق عصره و زمانه بصراحة
أنا أما إتكلمت على إستشهاده هنا أو الدعاء اللي إقتبصه من أخر سورة البقرة ماكونتش أقصد إن هو ده سبب حبي فيه
بس معلش يا حافصة إحنا دولة المفروض و حطي ألف خط تحت المفروض إسلامية
يعني مش هيضر رئيس الدولة إنه يستشهد بأية قرأنية
أقصد كمان إن طووول فترة حكم مبارك مش فاكرة إنه مرة صلى على النبي مثلا ههههههههه
مش بطريقة سمير رجب كمان الله يكرمك لاتخبطيني في الحيط
و مقصودش بكلة إسلامية أي إهانة أو تعدي على امسيحين بالعكس ليهم إحترامهم طبعا لحسن تلبسيني دلوقتي إني بقوم فتنه طائفية
ههههههههههه
و عن إسمي الحاج عمران سماني مريم لأن وقت ولادتي كانت سورة مريم شغالة في الجامع اللي جنب المستشفى فبقيت مريم بنت عمران ... الحمد لله كان هيتجنن هو و أمي و يسموني هايدي الحمد لله
هههههههههههههه
هايدي؟؟
لا افضل مريم احسن بكتير
ههههههههههههه
متفقة معاكي في اغلب اللي قلتيه بس حكاية دولة اسلاميه دي محتاجة كلام كتير
و مش وقته حاليا لانها تحتاج شرح كتير
صحيح
اسمي حفصة من غير الف يا مريم
:)
تحياتي
امين امين يارب العالمين
رحم الله الرئيس المؤمن
Post a Comment