احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Wednesday, December 17, 2008

اثار النعال


باتا



راحة الجسم تبدا من القدمين


اثر اول:
مال لا يقل عن ثلاثين تدوينة تتحدث عن الحذاء الطائر بما فيهم انا اذا تم اعتبار ما نقلته من مقاطع فيديو بوست من اصله و العديد من مجموعات على كتاب الوشوش لمساندة منتظر الزيدي ووصلت لوقفة تضمانية و مؤكد موقعها على سلالم نقابة الصحفيين.

اثر ثاني:
ايه ده؟؟
بالنسبة لي الموقف كان مضحك، بجد ، مسخرة، مش شماتة في بوش و ضحك بلؤم يعني، لأ، ضحك لانه موقف غير متوقع بتاتا و عامل زي افضل فيديوهات امريكا الكوميدية اللي بتعرض على التلفزيون و تكسب و تخش مسابقة
يعني بالنسبة لي مكنش موقف يستحق اكتر من اني اضحك عليه و خلاص
لكن من اول الايميلات الوصلتني للمدونات للفيسبوك للمنتديات حسيت اني شفت فلم تاني غير كل البشر اللي شافوه

اثر ثالث:
منتظر ضرب بوش بالجزمة
مش حتناقش ده عمل اخلاقي ولا مش اخلاقي و عشان ما كل واحد فينا عايش دور الملاك المفكر فقالك عيب يعمل دي حركة و دي قلة ادب باردون يعني و مش تربية عرب، طيب بس انا معنديش مشكلة و اقول اني لو مكان منتظر كان ممكن جدا و بنسبة كبيرة اوي اعمل في بوش كدا او اكتر، حسب الاداة المتوافرة في اي ايدي
و معلش محدش يقلي اصل ده تصرف مش حضاري، بلاش ننهق على بعض
حضاري مين و ايه بس اللي بنحكي عنه ، على العموم شئ لله يا حضارة

اثر رابع:
بعد كدا هناك من قالوا ان شعور العرب بالفخر لضرب بوش بالجزمة و حالة الكونسلطح اللي جات لهم متدلش غير ان العرب حالتهم تصعب على الكافر، طيب و هي دي محتاجة قوالة؟؟ المثل بيقول الغريق يتعلق بقشة، فما بالك بجزمة و فردتينها بحالهم؟؟
ده مش مبرر ان الاخ البليونير السعودي يشتري الجزمة بعشرة مليون دولار، يروح يوكل و يعلم بيهم اطفال العرب كلهم بدل الفشخرة الكدابة. بس عادتنا ولا حنشتريها؟؟ لازم يطلع لنا عبيط العيلة اللي مخبينه في القبو و يفضحنا على الملا و ريالته تطول الكل مع اعتذاري الشديد لاي مواطنة او مواطن سعودي محترم.

اثر خامس:
و فيه فريق تالت قالك لو كان منتظر عايش وقت صدام، هل كان قدر يعمل كدا؟؟ و ده طبعا و مؤكدا مينفعش لسبب بسيط ان منتظر كونه شيعي كان حيبقى برا البلد اصلا كمهاجر للسويد او لو فضل في العراق كان حيبقى من الشيعة اللي منعرفش ازاي عاشوا تحت حكم صدام و هما اغلبية و مع ذلك حاربوا معاه في حربه ضد ايران الشيعية؟؟؟؟؟؟لاني للان مش قادرة افهم ازاي كانوا مطضهدين و انه كمان واحد من اشاوس صدام كان من الشيعة، صحيح هي حجة بايخة و كان عاملها كاموفلاج، بس محدش يقدر ينكر ان صدام حكومته كانت تضم الشيعي و السني و المسيحي و الكردي، طيب نعمل ايه؟؟
و انا اعتقد ان منتظر لو كان يقدر يضرب صدام بالنعال كان ضربه لو كان عارف ان امريكا حتخش بعد كدا و تبهدل الشعب العراقي و تذله و تخرب بيته و بيت اغلب الدول العربية اللي حواليه ان مكانش كلها.
مؤكد انا لو عارفه ان صدام كان حيسبنا لغاية المستوى كنت شخرمته بالجزم و اموت بعدها
و محدش يرتبلي كلمات زي ديموقراطية و امريكية و نشرت و دافعت و عن و الشعب و العراقي في جملة واحدة. التمرين ده شطبناه.
اللي شفته بعنيا بيقلي انه حتى الشيعة العراقيين اللي عارفاهم و كانوا مهاجرين السويد و غيرها لما صدام اتمسك بكوا، اللي مش عاجبه مقولة بيدي لا بيد عمرو، براحته. اسفه بس يعني احيانا كثرة العقل متنفعش خالص وقت الشعور.
عن نفسي معنديش مانع اضربه باي حاجة و بعدها اكمل معاه الحوار و اسئله بعدها عن معاد خروج القوات الامريكية من العراق. و تاني مافيش حاجة اسمها صحافة محايدة، فيه صحافة ذكية و صحافة غبية، لا اكتر ولا اقل.
ذكية بمعنى انهم بيعرفوا يخفوا توجهاتهم لاقصى درجة و غبية بمعنى انهم مفضوحين زي حال اغلب الصحافة في الوطن الاسكافي العربي.
حد حيحاول يفسر فلسفة الشعور الغريب اللي سيطر على اغلب الناس بالفرح كون بوش انضرب، فحقول ان الشعور لا يفسر و لا يتم تأويله، فقط كيميا لها العديد من الاسباب و التفاعلات و طغيان المادة المؤثرة فيحدث انفجار.

اثر سادس:
كون ان اغلب البشر محموقين اوي على الحذاء و صاحبه واللي عمله فانا متاكدة ان ده شعور اغلب الناس و اولهم الامريكيين، من فترة شفت كرتون في الفيسبوك لكن مش متاكده من مكانه دلوقتي، المهم فيه صورة لبوش واقف و فاتح باب البيت الابيض و كل امه العالم واقفين قدامه وواحد بيقله احنا جايين نساعك تلم عزالك.
طبعا نساعده يلم عزاله شئ و اننا نرمي عليه جزمة شئ تاني، لكن لازم ناخد في الاعتبار شوية عوامل زي:
1- العربي بطبعه حامي و دمه خفيف في نفس الوقت بينما الغربي بارد و ميفهمش المزحة.
2- بوش محتلش امريكا، و اذا اعتبرنا تزويره في اي من انتخابته احتلال غير شرعي، فاقله ان الشعب الامريكي عارف ان له قانون بيقدر يغير بيه قوانين تانية و بيقدر يهتف ضده، لكن العراقي اللي خرج من حكم خنيق لاحتلال حقير، يعمل ايه؟؟؟؟؟؟
3- اللي ميعرفش، اقوله ان موكب بوش يوم لما كان بيتولى الحكم كان من اسرع المواكب تحركا و الجري بعدا عن الجمهور لانه انضرب بالبيض الطازج و الطماطم، انسى ان ده يحصل في اي بلد عربي لشح الطعام و لثقافة ان الطعام نعمة من عند ربنا و هو كذلك بالفعل. فنقدر نقول ان كل واحد بيضرب بالرخيص اللي عنده.
4- في تعليق لمراسلة السي ان ان ان ضرب الشخص بالجزمة فيه اهانة كبيرة للشخص المضروب،و وضحت الموضوع لانه الظاهر ان امريكان كتار مكنوش فاهمين ايه دلالة الجزمة. فباين ان الضرب بالجزم عند الامريكان يساوي عندنا هزار الصعايدة بالشوم، عادي يعني، نوت ا بيج ديل.
لي سؤال، هل لو كان منتظر ضرب بوش بحاجة تانية غر جزمته ، يعني بمنديله، او فقع عينه بالقلم، او خلع عليه جاكتته كان حيغير من الامر شئ؟؟
يعني هل اعتراضنا على الجزمة بحد ذاتها و لا على انه ضرب الرئيس اللي نكد عيشة ملايين المواطنينو استفحل شره شرق و غرب؟؟

اخيرا
اذا كان ذلك الفعل غير اخلاقي، فما هو الاخلاقي يا سادة؟؟

8 comments:

على باب الله said...

التصرف في حد ذاته لا يليق

و ما لهوش لزمة .. يعني اللي رمي الجزمة ما أستفادش حاجة - اللهم إلا شهرته الخاصة - لكن القضية نفسها هي هي ... ما ساعدش في أي حاجة

يعني
at the end of the day

الكابتن أبو جزمة هو أول و آخر المستفيدين

مبروك عليه العشرة مليون جنيه تمن الجزمة و السبعتلاف قناة اللي ها يجروا وراه علشان يستضيفوه في برامج التوك شو

---

ehsanbros said...

إزيك يا حفصة؟

Migo Mishmish said...

الاستاذه العزيزة حفصه
ايه ياحاجه ..يعنى لو مجيناش نسأل عليكى ماتسأليش انتى ؟ طب احنا عندنا ظروف وانتى عارفه كدا ..بقالك كتير مش مشرفه البلكونه .مشمش ياعينى مشغوله طول النهار ب البنت ساندو ..عالعموم اعرف صاحبك وعلم عليه
ماشي ياحفصه
عالعموم مشمش بتسلم عليكى جدا ..وهى من اول السنه هاتنتظم فى الكتابه والزيارات العائليه التدوينيه
احترامى ليكى
ميجوووووووو

Lounge Abu A7mos Al Tibi said...

Ana mish mabsoot...Ezay ya Hafssa tesawy darb el jezam bedarb el shoom, AKA el zagal jam3 zagla..

Darb el shoom da fann yarja3
lel fara3een...


1- Darb el shoom mwajah li amaken mo7adadah fil rass..

Ya3ni el sa3eedi minna 3arif eza kanit el shooma ray7a lil frontal lobe fil mokh walla lil temporal lobe walla lil cerebellum we aih elli momkin ye7sal min kol darba...3aha mostadeema...balah maghooli....deep coma...wa halomma jarra

2- Darb el shoom leeh asaleeb mokhtalifa, zai el taikundo..honak darbit kabs..darbit jarr...darbit hazz...


you can find out more if you google " sa3idi marshal arts"...

Cheers kiddo

^ H@fSS@^ said...

اهلا يا على
انا متاكده ان منتظر مكنش بيعمل كدا عشان ياخد العشرة مليون دولار
و الحكاية مش ان فيه لازمة او مافيش
او انه حتى حيستفيد من الموضوع ده بحل قضية الشرق الاوسط
اللي عمله ده كان فعل انساني بحت
زي مثلا ما فيه واحد متقيح نفسيا بيبعتلي ايميلات هبلة و فاكرني حغير رايي في فعلة منتظر اذا ثبت انه مسلم سلفي او قومي عربي
هي دي مشكلة الموضوع كلها
ان الناس مفسرة الحادثة بشكل كبير اوي و هي الحكاية بسيطة خالص
شعور انساني بالكره و العجز ادى لضرب الجزمة و احنا بكتيرنا نضحك عليه
لكن اللي حصل من الناس سواء مؤيد او رافض كان فوق الحد



احسان
انا الحمدلله بخير
ازيك انت و كل سنة و انت طيب بمناسبة اليوم الوطني للبحرين
يا ترى ايه ردود افعال النعال عندك؟؟


ميجو
وما ليك عليا حلفان
انا لسه حلمانة بالبت مشمش من يومين و قال ايه بناكل المغات و كنت ناوية اجيلكوا البلكونة اطمن ايه الاخبار
بس بعيد عنك انا دلوقتي شغالة على خط وايرلس لقيته تايه في السكة
فالكونكشن شوية كويس و شوية موش كويس
و سمتوها ساندو على اساس ايه؟؟
و ايه دلالة الاسم؟؟
انا اول مرة اسمعه
و حياة ساندو ما تزعل مني
و مشمش على راسي من فوق


ابو احمس
انت سخسختني من الضحك
انا اسفه يا سيدي اني ساويتلك الضرب بالشوم زي الضرب بالجزم
غلطة و ندمانة عليها و اعتذرلك بشدة منها
ده اتاريه كان علم و انا معرفش
لكن جوجل الظاهر باين عليها خيست، ملقتش عندهم اي شئ عن الصعيدي مارشال ارتس
مشنكرين يا معلمي


تحياتي للجميع

ذو النون المصري said...

انا كل ما ادخل مدونه الاقيها كاتبه في الموضوع ده و لاني مكتبتش فيه و لانه اصبح الاهم علي الاطلاق الان
فانا حاسس اني كافر في وسط مؤمنين بجزمة المنتظر

^ H@fSS@^ said...

ذو النون
اعتقد ان تعليقك ابلغ تعليق اتقال على مجمل الموضوع من بدايته
بليغ جدا
تحياتي و اياك تكتب عنه
خليك برا القطيع
حتى عشان متندبحش
ههههههههههههههههههههههه

Migo Mishmish said...

الاستاذه حفصه
عداكى العيب وأزح ..البنت ماسمهاش ساندو ..دا اسم حركى ودلع ..البت اسمها ساندرا ..ومعناه : المدافعه عن الناس
شفتى البت هاتطلع مناضله ازاى ؟ انا مش عايزها تبقى عبيطه وتنضرب على افاها زينا