احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Wednesday, April 1, 2009

الايموفوبيا

حين تصاب امة برهاب الافصاح عن مشاعرو اعتبارها رجس من عمل الشيطان

خير اللهم اجعله خير كنت نايمة و صحيت على الناس بتتكلم انهم ضد الايموو مظاهرات بقى و بيانات من البي بي سي و مارشات عسكرية و قران
و ان الايمو خطر ضد الامة
و حلل البعض انهم امتداد لعبدة الشيطان
و ذهب البعض الى انهم مشروع صهيوني امبريالي للقضاء على الشباب العربي و تمييعه مابين الجنس الاول و الثاني و خلق نوعين جداد تانيين
بل لقد انشات حملة على الفيسبوك لجمع توقيعات مليون و واحد شخص للمطالبة بازالتهم من خريطة الوطن العربي
و ناقش عضر البرلمان اهمية القضاء على هذه الظاهرة الاخذة في التفشي حتى لا يضمحل المجتمع العربي و يتردى لقاعية الهوى
و في برنامجه العميق " الحقيقة" استضاف وائل الابراشي افراد من جماعة الايمو ليتكلموا عن اهداف حزبهم المعلن و ما هي خطتهم الحزبية و من سيكون المترشح عن الحزب و في اي منطقة سوف يمثلون
ده كان ملخص اخبار الموضوع
بس انا قلت مبدهاش، لازم اعرف ايه حزب الايمو دول و نشوف بيقولوا ايه، ما هي خربت اصلها وهو يصح كل من افتكر انه قرا دستور بلده يقدر يفتح حز ب ولا ايه، شكلها سابت
مش عارفة ايه الصعب في تحديد جنسهم
اما هويتهم الجنسية فمليش دعوة بيها

المهم حطيت كلمة ايمو على محرك البحث و لقيت انهم شوية عيال بيطولوا شعرهم بشكل معين و بيحطوا مكياج غامق و مناكير الوانات ملخبطة على بعضها و بيعبروا عن مشاعيرهم بكل حرية و لذلك اتسمو ايمو اختصار ايموشن يعني و عايشين حالة يعني و بتنتهي عند سن 17 لان ده سن الاحالة على المعاش بالنسبة لاعضائهم و مسمعتش عن انشطة معينة ليهم.
طيب حلو اوي
احنا ليه خايفين اوي منهم كدا؟ يعني ايه المرعب فيهم للدرجة دي حتى ان وائل الابراشي يستضيفهم في حلقة في برنامجه؟ خلاص خلصت مشاكل الدنيا و مصر و الوطن العربي ففضينا لشوية ولاد و بنات عايشين الدور و مقلدين اشكال مسلسلات و افلام بيشوفوها؟
بعد كدا قلت اخش اشوف "المنتديات" بتقول ايه عنهم
يا مامي، دول بيخضوا بجد، اشرار

ايه السطحية و الهبل دول؟
حتى موضوع اهبل زي ده محدش من شباب العرب الهمام عارف يجيبله اخبار صحيحة او على الاقل يتكلم بشكل علمي لما يحط تعريفات؟

في الموقع ده

كاتبين التالي
"
ولكي نعرف أكثر عن مراهقين " الأيمو " كان لابد وأن نقترب منهم فهم يتميزون ببعض الصفات مثل الحزن والاكتئاب .. والخجل .. ويعانون من التشائم والصمت ويطلق عليهم في علم النفس Emotive Driven Hardcore Punk أى ذو نفسية متمردة حساسة.
"
يعني لا احنا عرفنا الاخ ا و الاخت صاحبة الكلام قربوا من شباب الايمو ازاي مثلا؟ زاروهم في جنينة الحلونات؟ ولا قربوا منهم قد ايه؟ ولا ازاي
بس هما قربوا، يبدو انهم قربوا من شاشة الكومبيوتر فقط عشان يحللوا الوان كحل عنيهم
و اللذيذ في الامر ان صاحب الكلام اعلاه قالك علم النفس بيطلق عليهم، يعني وصلت اننا بقينا نستحضر فروع جديدة في علوم حسب الطلب و ان حالة الاطفال دول اسمها، حسب علم النفس اللي بيقول، ذو نفسية متمردة و حساسة، يعني الحكاية بقت مرض رسمي بضغطة زر

بينما اسمهم ده لا هو تعريف علم نفس و لا علم منطق ولا هو علم من اساسه، هو تطور خلفيتهم الموسيقية و خلاص

خدوا بالكوا الجزم دي شريرة و بتؤدي للوقوع في الخطيئة بالذات السودا اللي في النص دي، حقوم ارميها حالا درءا للمفاسد


و الموقع ده
بيحذر انهم خطر على الامة الاسلامية، يعني يعقل برضو ان امة مليار و شوية حتخاف من كام عيل تافهة عايشين حالة بتروح لحال سبيلها بعد كام سنة و لو حتى مراحتش مش عارفة هل سبب خوفنا هو علمنا بضعفنا و هشاشة عظام اساسنا ولا ايه؟ ايه اللي يخلينا نخاف و نهتم اوي بظاهرة زي دي؟
طبعا كل ده غير اتهامات مكيلة ليهم انهم امتداد لشارع عبدة الشيطان اللي اتهموهم من كام سنة بس عشان بيسمعوا موسيقى الهارد روك و الهيفي ميتال و طلع انهم لا عبدة و لا شيطان و لا اي حاجة
و اتهام تاني انهم شاذين جنسيا بسبب قصة شعرهم و حركاتهم و رهافة حسهم و المكياج اللي البنات بيحطوه على عيونهم
يعني الهوية الجنسية عندنا انحصرت في كونها شكلك ايه؟
للدرجة دي؟


و في نفس الموقع ده
بيكمل الاخ تحليله العبقري لموسيقى الهارد روك و الهيفي ميتال و بيقول " ومراهقين الأيمو دائما يسمعون موسيقى الروك أو الميتال، حيث تتحدث كلماتها عن الحزن والألم وتدعو إلى العزلة وعدم التعامل مع الآخرين وأخرى تدعو إلى الكفر بالله."
و انا بعد الوصف الجبار ده اقدر اقول ان السخص اياه ده مؤكد مسمعش الاغاني دي خالص و لو سمعها مفهمهاش و لو شافها ماشية قدامه في الشارع مش حيتعرف عليها بتاتا.
كل ما في الامر انه ماشي حسب قاعدة العرب الاولى في تقصي جميع الحقائق و النظريات

المسماة اختصارا ب " قالوا له"
لا تعرف مين قال ايه لمين و لا ازاي و لا ليه
المهم قالوا له

و تصفحت كمية منتديات مهولة، مصري و سعودي و مختلف الجنسيات العربية و بعدها تسائلت
مين اللي بيمثلوا خطر حقيقي على الامة؟ جيل الايموام جيل المنتديات الفارغة اللذي لا يفعل شيئا الا نقل المعلومات و غلط كمان و عن دون فهم او تقصي او اي نوع من انواع البحوث؟
من الذي يضيع وقته في مواضيع مثل هذا المحتوى التافهة و يهول من امرها حتى تصبح مثل بالونة تحجب عنا نور الشمس؟
الى متى التغييب؟
*****



ملحوظة: في احد المواقع،للاسف تاه مني و معرفتش اجيبه تاني، و انا بتصفح، لقيت ان من ضمن علاماتهم انهم بيلبسوا جزم converse، يا خراشي يعني انا ايمو و انا مش عارفة؟ طيب مش حخش عندك يا عباس العبد تاني خلاص.

13 comments:

magi said...

انا شفت الحلقه بتاعت وائل الابراشى
المهم هو مكانش فاهم حاجه و عمال يحاورهم كانهم الاخوان المسلمين يعنى اتجاه دينى واجنده سياسه
والدكتور النفسى الى كانو مستضيفينه سأل احد الايمو انت بتصلى بمنتهى الاستغراب يعنى معد الحلقه ومذيعها والدكتور النفسى ميعرفوش ايه الايمو وعملين حلقه يحللو فيها نفسيه الايمو
انا بقى عملت زيك بس دورت فى الجروب بتاعهم وكلامهم عن نفسهم وعدد من المواقع الاجنيه والحقيقه انا شايفه انهم مش بيضروا حد ولا بيدعوا لدين جديد مثلا اظن ان فى الاغلب انهم حاسين بالاغتراب وبيدورا على اى حاجه تخليهم يحسوا بالانتماء
تحياتى واعتذارى عن التعليق الطويل

Migo Mishmish said...

ميجو حكالي عن الحلقه ديه
انا مش شايفه ان في مشكله. المشكله ان الايمو دول اسمهم جاي من الـ
Emotion
زي انتي ما قولتي. والمشاعر عندنا حرام. انت بني ادم مؤمن يعني حيطة لا تعبر عن مشاعر ولا تحس ولو جالك اكتئاب او تعبت من حاجة تبقى كافر وتارك للصلاة
الناس اللي خايفين من الحرية بيعملوا كدة علشان ما يقدروش يواجهوا الفكر الحر وحافظين مش فاهمين فلما يشوفوا حاجات زي كدة يتخضوا علشان مش موجودة في المقرر
Love,
MishMish

A.SAMIR said...

ايوةةةةة
كل حاجة هنا سليمة وصح
ومفيش حاجة غلط في البلد دي غير العيال الايموز دول
حاااااااااااااجة عجيبة

عباس العبد said...

صديقتى التى لم تعلق حتى الأن
شوفى كان نفسى اجيبلك بعض مقاطع من ميشيل فوكو و جاك دريدا و هايدجر و لا حاجة بتناقش قضية الإيموز بس للأسف مردتش اتقل عليكى , غير انهم ما جبوش سيرة الإيموز كمان
هههههههههههههههههههه
===
بينى و بينك فى موضوع الأيمو ده
هى من ناقصة عيال " خو..." بجد
الوطن العربى فيه اللى مكفيه من الصنف مش طالباها يزيدوا

^ H@fSS@^ said...

ماجي
اولا اهلا وسهلا بيكي نورتي البلوج
اتفق معاكي في كلامك
هما عبارة عن موضة لبس
واقطع دراعي ان كان نصهم اصلا عارفين هما بيلبسوا كدا ليه
هي موضة فقط
و بتبتدي في سن صغير و تخلص في سن صغير
تعليقك مش طويل خالص و اكتبي براحتك
المساحات ببلاش
:)


مشمش هانم
عاش من شافك يا ابله
يسلم فمك يا استاذ نفيسة
احنا بنخاف من الحرية و التعبير عن مشاعرنا
و متنسيش بوسة و عشرة و مليون للبت ساندو
اسم الله عليها بقى شكلها يجنن


احمد سمير
اهلا بيك
حقولك ايه
اصل احنا خلصنا كل المواضيع
لو عندك اعتراض على لون زهور الربيع روح بلغه للابراشي
والله ممكن يصدق فيها و يعمل حلقة عنها
:)

عبس
بذمتك قلي هما حيزودوا ايه او يقللوا ايه والنبي؟
قلنا انها موضة جالها وقتها و بكرة يروح
ليه نقول مش ناقصين و ناقصين
بس انا حخش البلوج عندك برضو و انا لابسه الكونفيرس بتاعتي
ماليش دعوة
ههههههههههههههههههه

تحياتي للجميع

nonsence said...

مسألتش نفسك ليه سن تحت ال 17؟؟
يعني فتره المراهقه بكل تخبطها ولا وعيهاا
الاطفال دول احنا بنديهم للايمو معندهومش وعي ولا فكر ولا ثقافه يتشكلوا على ايد ناس الله اعلم هدفهم ايه نفس السن ونفس الفتره اللى اتعمل بيها الطائفه الوهابيه لو كنت قريت عنها احنا مجتمع مسلم الامان والحمايه لاطفالنا لازم تكون مننا مينفعش نترك طائفه تهيم على وجهها وبعدين نرجع نندم حيث لا ينفع الندم

عباس العبد said...

هم مش بيعملوا حاجة و لا حيعملوا حاجة و لا ليهم لازمة
دى عيال اهاليها مستريحة .. بعد ما تنفض الليلة , كل واحد منهم حيكبر و يصيع و يشتغل مع ابوه يااما حيسافر بره و خلصت
فبلاش يوجعوا دماغنا بيهم بقى

^ H@fSS@^ said...

nonsence
اهلا وسهلا

هو الايمو بقى طايفة؟
حضرتك شايف كدا؟
طيب تبع انهي دين؟ و ايه الدليل على انهم من الدين الفلاني؟

هل سمعنا عن شاب ايموز فجر نفسه في مدرسة او مسرح او محطة مترو؟
حد سمع عنهم سرقوا او قتلوا او نهبوا؟
كون ان شكلهم غريب فده ميدنيش حق اني احجر عليهم
و الغريب ان حالتهم دي بتحصل وقت المراهقة اللي اعتقد اغلبنا عدى بيها و كانت بتحصله صرعات كل حسب عصره و بيخرج منها عادي بعد كدا
يعني مثلا مؤكد انا مختلفة عما كنت عليه وقت مراهقتي
و الا معنى ان كل واحد عدت عليه صرعة او موضة وقت مراهقته حيفضل متاثر بيها لكبره؟
و اخيرا ايه هو الفكر اللي بيقدمه الايمو اصلا؟
حقولك
ولا حاجة
موضة و بس
لا بينشروا افكار
و لا بيحضروا بشر و لا اي حاجة خطيرة

انا مش فاهمة احنا ليه بنصر نكبر الامور؟
لو حضرتك عندك اولاد ربيهم على انهم ميبقوش ايموز
بس مش نهاجم شباب قرروا يتبعوا موضة معينةو هبلة عشان احنا خايفين منها
لو احنا متاكدين ان اساس تربيتنا قوي مش حنخاف من حاجة

تحياتي

Desert cat said...

حفوصة هو انا مش من هنا ولا ايه يا خراشى
انا حاسة انى من كوكو آخر مختلف اختلاف تام .. بما انى مش متابعة تلفزيونية خالص نوهائى الا فى الحالات النادرة وبالتالى مش شوفت حلقة وائل الابراشى ولا شوفت اى حاجه خالص الا شوباب الايمو دول ايه بقى وجه خطرهم على الامة الاسلامية الشوز اللى بيلبسوه الخطير اوى خالص ده ولا الشعر الطويل ولا المكيب .. هى الامة الاسلامية دى كل حاجه خطر عليها كدا لو حد كح يقولك الراجل اللى بيكح ده خطر على الامة الاسلامية بيفكرونى بالست الحامل بعد عشرين سنة جواز واول حمل ليها تنفضل نايمة على ضهرها علشان خاطر الجنين اصل الحركة خطر خطر خالص عليها

ذو النون المصري said...

.................
يتميزون ببعض الصفات مثل الحزن والاكتئاب .. والخجل .. ويعانون من التشائم والصمت

ومراهقين الأيمو دائما يسمعون موسيقى الروك أو الميتال، حيث تتحدث كلماتها عن الحزن والألم وتدعو إلى العزلة وعدم التعامل مع الآخرين وأخرى تدعو إلى الكفر بالله.
>>>>>>>>>>>>.
نفس المقطعين قبل ما اكمل قراءة باقي البوست كنت ناوي اعلق عليهم لقيتك علقتي عليهم
التحليل غبي فعلا و مش عارف قربوا منهم ازاي؟؟؟؟
الغريب انه قال يتميزون ببعض الصفات مثل الاغتراب و خلافه هل هي ميزه في جماعه بعينها
و ايه الجزم و اللبس الاسود؟
قالوله،،، هنا متنفعش في الكلام ده

عين حمئة said...

الدّفاع عن الشباب و همومه أنبل المهام الإنسانية
كلّنا ذات يوم كنّا شبابا
و لا يقف ضد طموحات و رغبات الشباب إلا مكبوت مقهور، ومسبوق عاجز جهول

تحية إكبار لك و لجميع أحبتك في هذا المنبر السعيد
أبو قثم

S H A H said...

بقالي كتيييير جداا مزورتكيش

لنا لقاء بعد قراء البوست

بس حبيت اسلم الاول و اقولك ليكي وحشة

سلام مؤقت

نبراس العتمة said...

العزيزة حفصة
موضوع شباب الايمو
موضوع جديد على ما يبدو أول مرة أسمع به..ربما لكثرة الموجات التي تمر بالشبا في هذه الأيام
لكن الدي أثارني في موضوعك هو أهمية الموضوع بالنسبة للكثيرين الدين نص2بوا أنفسهم سادة العقلاء
حقيقة الدي بيته من زجاج يخاف من كل شيء
وهذه أخطر الأحزاب
مودتي العميقة