احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Tuesday, May 19, 2009

محمد علاء مبارك


بداية لازم نستوعب ان فيه فرق بين الشخصيات العامة و الشخصيات الخاصة

شخصية عامة يعني حد زي الرؤوساء و الفنانيين و الادباء و اي شخصية لها ظهور مستمر على ساحات الاعلام

احيانا الشخصية العامة دي بيوصل تغطية اخبارها لبقية عيلتها

عمرنا ما سمعنا عن اخبار بتغطي رئيس او ملك دولة ما لوحده

دايما فيه اهتمام بكل تفاصيل العائلة

و في احيان كتيرة بيكون اي فعل لفرد من افراد العائلة محسوب على الشخصية العامة دي

و بما ان دي مظاهر عامة للشخصية العامة فمؤكد الشخصية الخاصة عكس كدا

و الشخصية الخاصة اللي هي انا و انت و الجيران الا اذا كانوا من اصحاب المهن السابق ذكرها

او اعلاميين بشكل او باخر و هلم جرا

دلوقتي حفيد حسني مبارك اتوفى

اللهم لا شماتة في الموت

لا في حفيد مبارك و لا في مبارك نفسه لما يموت

لان مهما الواحد اختلف معاه و كرهه بس الموت له شيئ من الاحترام

احترام الحزن عليه و ان الموت حيحصل لينا كلنا

ان قصر الامد او طول

صحيح ان الناس مش فاهمة ليه اتعملت للحفيد جنازة رسمية

بس ده المتوقع كنتيجة لطريقة حكم مبارك لمصر طول السنين اللي فاتت

اللي انا مستغرباله هو كمية التعليقات اللي شفتها و سمعتها من ناس واخدين الموضوع ببساطة اوي و مستكترين الحزن على الولد

طيب ليه؟

اي نعم هو مكنش حاجة جبارة في البلد و اهميته مستمدة من جده و جدته

لكن ده مش تفسير للناس اللي مهونة الموضوع اوي و شايفاه عادي

طيب ما احمد زكي مات

و نجيب محفوظ مات

و زكي جمعة مات

و اتعملت لهم جنازات و الناس زعلت عليهم

ايشمعنى وقتها مقلناش ليه الحزن و مش ليه الحزن؟؟

حزنا و عبرنا عن حزننا بوافتهم لانهم شخصية عامة و يعنوا الكثير لينا

صحيح ان محمد علاء معملش حاجة لينا بس فكرة موت طفل بتهز اي شخص على ما اعتقد

و غير كدا

مواضيع زي الموت و اذا كان مهم او مش مهم ماهياش حساب 1+1=2

بس الموت في عادته بيفرض حزن و شيئ من الاحترام

يعني امي مثلا لا تعرف محمد علاء ولا عمرها ليها في السياسة و لو ليها بتبقى قرفانة من اللي بيحصل

بس امبارح طول الوقت كانت بتعيط

و لما شافت علاء بيصلي على ابنه و وشه مخطوف

عيطت

و لما شال نعش ابنه انهارت تقريبا

هي قبل كدا عيطت على اشي مصيبة الدويقة

و اشي العبارة

و الحكم بتاع العبارة

و كل ما تتخيله يا مواطن من مصايب حلت بينا

يعني في النهاية الواحد بيتعاطف بشكل انساني بحت مع مصايب غيره ايا كان وضعهم

مينفعش نقول في وقت زي ده ان يمكن ده عقاب من ربنا للجد

او اننا مالناش دعوة ليه يعزوه بطريقة رسمية

خلاص اللي حصل حصل

اي نعم انقهرنا في قضايا زي العبارة و قطار الصعيد و الدويقة

بس خلاص

لا تزر وازرة وزر اخرى

ولا ايه الحكاية؟؟


12 comments:

Desert cat said...

الموقف صعب جدا مع انى مش ام بس مش قادرة اتخيل ازاى طفل كان بين احضان اهله وفجأة يخطفه الموت هو اينعم ربنا اللى خلقنا ومن حقه يسترد امانته فى اى وقت لكن الفراق صعب اوى
ردود افعل الناس لاقيتها كويسه جدا فى المواقع الاخبارية رغم حالة السخط العامة لكن البعض اللى مش ليهم قلب لاقيتهم بيقولوا علشان يبقى عبرة لجده
وعلشان يكفر ذنوب عن جده وكلام من هذا القبيل
الناس دى بقولهم انتوا اصلا مش بنى ادمين انتوا كائنات فاقدة للادمية انا قلبى كان بيتقطع وانا بشوف الجنازة وعلاء شايل ابنه ورايح يدفنه يعنى كان من يومين بس واخده فى حضنه وبيبوسه او بيالكه والنهارده رايح يدخله القبر حاجه صعبة اوى

على باب الله said...

أصلاً فكرة الشماتة في الموت فكرة سخيفة لأن كلنا ها نموت

و فكرة أن ده إنتقام من ربنا أسخف و أسخف لأنه بالمنطق العجيب ده ربنا بينتقم مننا كلنا في عائلاتنا و معارفنا و فينا إحنا شخصياً لما ييجي أجلنا و نموت

bluevoid said...

i TOTALLY agree!
it's sad. and the fact that some people can't sympathize is even sadder.

لا تزر وازرة وزر اخرى
bezabt keda.

grief is to be respected.

^ H@fSS@^ said...

انا اللي مستغرباله ان الناس جاية دلوقتي و تمنطق الامور
و هو ده وقته بالذمة؟؟
يعني اللي يشوف منظرهم امبارح يصعبوا عليه بجد
المعتاد ان الابن يشيع ابوه
لكن العكس دي صعبة اوي
و مستغربة من نشفان قلوب الناس اللي الواحد شاف منها ردود افعال غريبة فعلا
و كان عادي ان طفل يموت و طان غريب اننا منزعلش عليه
الحمدلله ان الواحد اتقهر و زعل على ضحايا العبارة و الدويقة و قطار الصعيد عشان ميتهموناش بالمحاباة او غيره
تحياتي ليكوا جميعا و نورتوني

Bastawisi said...

ده عقاب ربنا لمبارك على اللى عمله فى خلق الله بتوع الخنازير
ربنا يحرق قلبك كمان و كمان يامبارك الكلب

^ H@fSS@^ said...

و هكذا ايها السادة
اديكوا شفتوا عينة حقيرة من امثال الاستاذ بسطاويسي اللي بيتكلم عن التسامح و الفضائل الاخلاقيه و في الاخر شمتان في صبي عمره 12 سنة و بيقولك ده عقاب ربنا عشان الخنازير
طيب ربنا ليه مموتش مبارك نفسه يا فالح؟؟
غير قلة ادب الاخ
شوية يشتم اسور في بلوجها
و شوية يبعت لي تعليقات قليلة ادب زي لسانه بالظبط
و في الاخر بيتكلم عن التسامح

يا اخي احا عليك و على التسامح اللي بتتكلم عنه
انا حستنى لما انت تموت و اقول بصوا
اهو ده عقاب ربنا على شماتة بسطاويسي في موت طفل مالهوش ذنب في افعال جده
جتك القرف مليتوا البلد انت و اللي زيك

عماد said...

و أنا أضم صوتى إليكى على هذا الإنسان الحقير بسطاويسى إللى داير على بلوجات الناس الأحسن منه يشتمهم
إستغل الحريه إللى بتديها أسوور فى مدونتها للناس و شتمها و يفعل ذلك معكى فى بلوجك و لا يخجل و يعود من جديد
إنشاء الله نرى حكم الله فيه قريبا

Bastawisi said...

و هو انا اتكلمت عن التسامح امتى؟؟

Wandering Scarab said...

Hafssa..

I agree with you. The premise that God punishes people by proxy is ridiculous. People are petty aren't they. I think Desert cat provided an accurate description. Those who believe that the death of a child makes up for the sins of adults, lack humanity and compassion. I hear that this is the stuff that makes us highly evolved. I wonder, what are we when those traits are absent?

ذو النون المصري said...

اظن ان الانفعال المبالغ فيه نتج عن رغبة الناس الدفينه في سماع خبر وفاة الجد و لما سمعوا اشاعة موت في بيت الرئيس توقعوه هو لا حفيده فكانت المفاجاه فوقع البعض تحت زهول المفاجاه فحزنوا جدا لطفل مات و جده اولي منه بالموت من ناحية سنه و من ناحية امانيهم الدفينه

نعكشة said...

أتفق مع هذا الرأي

Migo Mishmish said...

انا فعلاً فعلاً كنت مضايقه جداً
الموضوع ده كمان ميحٍسش بيه اوي غير الاب او الام
ابنك / بنتك فعلاً كانه حته من قلبك ماشيه قدامك. روحك بتبقى خارجة من جوه جسمك وهايمه حواليها
موت الابن كان الواحد اقطعت منه حته وادفنت في التراب
عمر جرحها ما بيخف
بجد ربنا يرحمه ويصبر اهله كلهم
وبعدين الناس اللي بتقول ان ده انتقام من ربنا ديه ناس معندهاش دم
هو ربنا بتاعهم ده شايط طول الوقت وغضبان عالكل
وبعدين غضبان على مبارك يضر مبارك مش يضر ابن مبارك في ابنه
وبعدين اللي بيرغي ده عايش طول عمره في سلام. ربنا مابيغضبش على اللي جابوه ابداً
يلا
ربنا يرحمه ويصبر اهله
Love,
MishMish