الملك، بيفضل ملك

عزيزي

ححاول باكبر قدر من الاختصار اشرحلك وجهة نظري كرد على كلامك اعلاه

انا كمان شايفة منير كايقونة، و لسه ايقونة

الاول حقولك على شوية معلومات يمكن تكون مش عارفها او عارفها

المهم

1- منير سنة 2011 عمل حفلتين في دول خليجية، دبي في مايو و قطر في اغسطس ، حفلة مايو كانت بحجمه و مكانته، بس حفلة قطر كانت مهزلة و اهانة و توقعت انه ينسحب و اتفاجئت اوي انه طلع عالمسرح يكمل غناه، تاكدت وقتها ان فيه مشكلة احنا مش عارفينها

لو تلاحظ مع ان كبر في السن بس عدد الحفلات زاد

كمان اخر تلات سنين وقع عقود تجارية مع شركات اتصالات الموبايل و ده اللي كتير مننا شفناه حركة "عيب" تخرج من الملك انه يعمل اعلان و يبقى مرطرط كدا زيه زي الباقي و انه صاحب مبدا

بس خد بالك من التالي:

1- منير لو غنى عشان فلوس ، فيا ريت نفتكر قد ايه احنا بنشير البوماته و بنسبب خسارة ليه،

2- الملك دوره اكبر من انه يغني و يحضر حفلات، ما بين مركز فنون في اسوان و قريبا فندق في اسوان برضو، يعني الراجل يستحق مننا القليل من المغفرة

3- كون انه حيا مبارك زمان فده مش مبرر لكن مفهوم، فيه فرق، مش شطارة اني اعاند لغاية ما انكسر و يخفت صوتي خالص، لما تجيلك ريح، وطي قدامها عشان متطيرش فيها و تتوه.

4- الملك عمر ما كان اسلوبه حنجوري او جهجهوني و بتاع شعارات، انت نفسك كتبت كدا

5- اللي يشوف حال البلد بعد الثورة، حيراجع نفسه الف مرة، ده مش معناه ان الثورة وحشة، بس هي خرجت لينا اسفل مخاليق مصرمن تيارات اسلامية كفرتنا في عيشتنا و خلت العسكر يتحكموا بزيادة، مؤكد ده اثر عليه خليته في حالة عدم اهتمام، هكذا اعتقد كونه حساس جدا

6- حرجع تاني اقول انت نفسك قلت انه محرض و خطير كمان اكتر من كونه بيخرج يعبر عن راي معين، و ده عندي اقوى من الف رمز صدقناهم و صدقنا كلامهم و نزلوا على مافيش،

7- مش عيب ابدا اني اقع، وارجع احاول اقوم تاني لو قدرت.

8- اخيرا، لو الالبوم نفسه سيء للدرجة دي ، فالبوم ايديا في جيوبي كان اسوء ما يمكن سماعه لمنير و ده بكلامه هو نفسه، مع ذلك خرج بعديه و رجع لتوازنه

معلش انا عارفة اني ممكن اكون فتحت مواضيع كتيرة انت نفسك مجبتش سيرتها، لكن لاني ملاحظة تهكمات عليه من ناس كتيرة لمختلف الاسباب و حبيت اسردهم هنا مرة واحدة

اسفه للاطالة، فشلت في تلخيص التعليق

 

ما ورد اعلاه هو تعليقي على هذة التدوينة