احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Wednesday, February 7, 2007

التاج التاج التاج موعودة ياللي عليكي التاج


اتمررلي تاجين
واحد من وئام و بعتتلي تاج الصفحة 123 من اخر كتاب بقراه
التاج التاني من ذو النون و المفروض اني احكي فيه خمس حاجات من ذكرياتي او حاجات مستخبية
المهم
امري لله و اديني حجاوب

تاج الصفحة 123

"

فتحت باب الحجرة فارتمى ضوء المصباح على الارض. تنحت من أمامه و هي تدفعه بيدها. رأى ست قمر جالسة على حافة الفراش و هو الموضع الوحيد الصالح للجلوس

"

من الحرافيش

********************

تاج ذوالنون

اول قصة

و انا في الجامعة كان لازم كل سنة طبعا اعمل تصريح العربية اللي اهلي حيجوا يوصلوني بيه من و الى الجامعة، وقتها كنت في قطر ، فمحدش يفتكر اني كنت بترفع عن السواقة، لا السواقة هي اللي كانت مترفعة عننا، المهم، انا جدي خلقه ضيق و ميحبش حد يقله تلت الخمسة كام، فانا يدوبك اعرف اخد منه معاد عشان اوقع ورق التصريح و امضيه تعهدات و الكلام ده كله، خلصت المهمة بصعوبة و اخدت الورق على مكتب التصريحات، كان يوم زحمة اوي، فانا انتخت على طرابيزة لغاية ما يوصل دوري و جبت كوباية نسكافية، و بس، عاديكوا على اللي حصل، كعادتي لازم ادلق اي حاجة فيها ميه او سوائل، طبعا عشان اتفادى الحرق فعملت حركة بهلوانية مفاداها ان النسكافيه وقعت على الورق و طبعا بقى الورق مينفعش اني اقدمه و لا بقى ينفع اني ارجع لجدي و اقله وقع تاني، حيطلقني، بس قلت مافيش غير حل واحد، ايوة بالظبط زي ما جه في بالكوا، رحت المكتبة و جبت ورق شفاف و ورق كلك و قلم رصاص سن خفيف جدا و استيكه مخصوص للورق الخفيف و للحبر الجاف كمان و قلم من نفس نوع جدي بالظبط و كبرت صورة البطاقة الشخصية بتاعته و روقتها

و اتخذت ليا مكان منزوي و درست التوقيع من جميع ابعاده و فضلت اتدرب زي اللهلوبة و استحضرت كل معلوماتي عن صفات الخطوط و بيان اختلاف اشكالها و كل العلم اللي عندي والحمدلله لما تاكدت من حرفية الشكل قمت طابعاه على طلب جديد و فيشت الهوامش و زبطت الورق كله و دعيت ربنا انه يساعد بنت مسكينة زيي جدها صعب المراس حبتين و انها يعني حتعمل ايه

اقله هي مش بتزور التوقيع عشان تسرق، و الحمدلله وقفت في الطابور تاني و والورق مشي اخر حلاوة بالصلاة عالنبي و ده شجعني اني اخلي جدي يوقع على ورق كتييييييييييييييييييييييير سهلي امور كتيرة اوي ايام الجامعة و من غير ما هو يتعب نفسه او يدرى بالموضوع شئ

و كمان ربيت سمعة كويسة بين البنات وكل اللي تتزنق كانت تجيلي لكن الشهادة لله عمري ما زورت توقيع على موضوع انا شاكة في صحبته

اه انا فتوة لكن في الحق بس


القصة التانية

مرة زمان و انا عندي 10 سنين ماما خرجت مشوار و مش عارفة ازاي قدرت اقنعها اني مش قادرة اخرج، اصلي في التمثيل ولا امينة رزق في عز شبابها، الا صحيح هي ماتت و لا لسه عايشة؟؟، المهم هي خرجت من هنا و انا جبت ورق قديم و قلت لما اجرب اولع فيه نار و اشوف حيبقى شكله ايه، و كل ده بسبب تاثير درس العلوم عليا و عن ازاي ان الحاجات لما بتتحرق بتتحول لفحم و تتغير طبيعتها الفيزيائية و كلام اهطل كده ، فلما انا شرحت لماما اني عاوزة اعمل التجربة دي بنفسي قالت لي اياكي اللعب بالنار مش كويس، طبعا للاسف انا عنيدة و مش بصدق الكلام، فمصدقت انها برة البيت و رحت اعمل التجربة الخطيرة دي، المهم ولعت النار في كبشة ورق بتاع كراريس فيها ادلة اني مكنتش بحل الواجب و اذا حليته بيكون الحل فيه دليل قاطع اني مكنتش مركزة بمليم مع المتيسة، و قلت افضل حل هو التخلص نهائيا من الكراريس دي و اجيب غيرها و انقل الحل من البت هالة الاولى بتاعت الفصل الله يمسيها بالخير بقى، بس انا بقى كنت واعية سالت نفسي لو النار خرجت عن سيطرتي اعمل ايه

فقلت احرق الورق في حوض الحمام عشان لو حصل اي شئ افتح عليه المية قوام و اهزم الخضة، اه اصل انا احب لو عملت حاجة اعملها صح يا بلاش، و طبعا انا اصلي اروبة من يومي و خبيثة و بتفرج على افلام كتير من وانا في اللفة، فبستفيد من غلطات الابطال الاغبياء، اللي هي زي انه يلاقي واحد ميت و الدم نازل و سكينة مغروزة فيه و سامع صوت البوليس بيقرب و برضو بغباءه الجبار يقوم يمسك السكينة و قال ايه يعني مش مصدق و و يعيط بعد كده لما البوليس يمسكه، طب والله لو مش حيتمسك عشان مشكوك فيه انه القاتل انا اقبض عليه بتهمة الغباء العلني المتكرر، المهم نرجع لموضوعنا، انا بقى حرقت اللي حرقته و تاويت اللي تاويته و قمت صبيت ميه بعد الجرمة النكراء و رميت بواقي الورق في التواليت الله يعزكم، المهم ربنا رايد اني انفضح قدام ماما فيقوم التواليت ميشفطش كل الورق المحروق و يتبقى شوية منه على الوش، و انا و لا على بالي، على راي المثل وقعة الشاطر بالف ، ماما ترجع من بره و من خضتها، تنادي عليا بصوت عالي اوي يخضني و تواجهني بكل صراحة

"

ماما:انت اللي حرقت الورق ده؟ و لو حرقتيه ، حرقتيه ليه؟ اتكلمي احسن لك؟

انا:( بكل ما عندي من براءة و جواها خضة و لعن للذات على غبائي من عدم احكام التخلص من الدليل) لا مش انا،

ماما: امال مين؟؟ انت بس اللي كنتي لوحدك في البيت يبقى ازاي مش انت؟؟؟

انا: معرفش( ابتدي اسح في دموع، و مش تماسيحي لاني سهل اوي اعيط) انا فضلت في اودتي اذاكر لغاية ما انت جيتي دلوقتي

اهئ اهئ اهئ

ماما: ( بتخبط كف بكف و مش عارفة تعمل ايه و اعتقد ان برج من فواضل ابراج مخها شفته بيطير)@#$%^&*؟؟

طبعا حلفتلها ايمانات ربنا كلها اني ولا ليا خبر عن اللي حصل و لانها طيبة و بتصدق في حكايات الجن و توابعها و فاترعبت لما لقيتني مصرة في جوابي و بعيد نفس الكلام، اه ما هو ده اللي علمهولي في الجيش، و فضلت يا حرام اسبوع مشغلة قران في البيت اربعة و عشرين ساعة و تبخرنا و تعيط بالليل شوية و شوية تدعي ربنا

المهم انه الان و بعد مرور 19 سنة لسه ماما تحلفني كل فترة والتانية انه مش انا اللي حرقت الورق و انا اقلها انتي لسه فاكرة ارجوكي متفكرنيش لاني كل ما اعرف اني كنت قاعدة مع جني اتلبش فتسكت هي يا حرام و تقلي متخافيش لو اعترفتي مش حعملك حاجة انتي بقيتي كبيرة زي الشحطة و مش حطول اعملك حاجة، لكن السر في الاصرار على الموقف. هههههههههههههههههههههههههههه


القصة التالتة و الاخيرة

و انا في سنة ساتة ابتدائي و كنا اخر دفعة يخلوا فيها الابتدائي ست سنين، المهم كان عندي مدرس خصوصي واخدني مقاولة يجي ساعتين كل يوم يمسكني رياضيات(يااااااااع)و علوم( نص يااااع)و هاتك يا شرح، بس المشكلة مش في كده، انا متعودة اتنح مهما كانت الضغوط، لكن المشكلة كانت في انه كان بيلف طول اليوم على رجليه و يجي عندي انا و يقلع الجزمة و تفوح الروايح، طيب انا ذنبي ايه،، طبعا هو يقلع الجزمة من هنا و انا افصل نفسي عن الواقع طوالي، و بالتالي كنت مش بركز معاه خالص و لا اعرف هو كلمني عن ايه النهاردة، بعد فترة بديت ازهق منه بالأوي و قلت خلاص يا اما هو يجنني بريحة جزمته ، يا اما انا اجننه مني و اطفشه، اصلي اشتكيته لماما فقالت لي اني بتدلع و بتلكك و انه ده تالت مدرس يتغير السنة دي و مش حنجيب غيره

قلت في سري خلاص، انا عملت اللي عليا، و انتي مسمحتيش بحل سلمي، خلاص بقى حوريكي حاعمل فيه ايه، يا انا يا المدرس في البيت ده، المهم جيت في مرة اداني فيها واجب و بعد ما علم على التمارين في كتاب سلاح التلميذ و علم على صفحات الكتاب الاصلي بتاع الحكومة ، قلت خلاص هي دي فرصتي، مسكت الكتابين و شقيت منهم الصفحات المستهدفة و بخفة ايد منقطعة النظير، و سهرت ليلتي انضف بواقي الورق من جذر الكتاب ولا اجدعها ست بتنتف ريش فرخة، و طبعا معداش عليا اني اخفي الكتاب تحت السرير عشان يرجع ماسك نفسه بعد ما كنت فضلت فاتحاه على الاخر و بقى باين ان في حد لعب فيه، بس عدوا يومين، جه المدرس و قالي فين الواجب رديت و قلتله فيما معناه اني ملقيتش الصفحة اللي هو اشرلي عليها و لا لقيت الصفحة اللي في الكتاب الاصلي و علشان اقله اذاكر شوية، طبعا الراجل بقى يضرب كف بكف و يقلي و يحلف بحياة ولاده انه علم على الصفحات بايده اللي حيكلهم الدود و طبعا اتباعا لسياسة الثبات على الموقف و تتنيح نظرات العيون فالراجل شك في نفسه، انا بقى كملت عليه اخر لمسه، قلت له مش حضرتك بتدي دروس لمي و منى و و و و ، فقالي ايوة، قلت بس تاهت و لقيناها ، تلاقيك علمت على الصفحات عندهم هما و انا لأ، طبعا كل ده بان لماما ليه انا سقطت في امتحان الرياضيات و الباقي نجحوا و عليه تم الاستغناء عن خدمات الاستاذ و جبت استاذ تاني كنت بسمع عنه انه طيب و مالوش في التور ولا الطحين و بيمشي حسب مزاج الطالب و اهم حاجة انه مش بيقلع الجزمة لما يدخل عندنا لانه كان راجل كبير في السن و بيخاف ليبرد و كان يمكن اخر الرجال المحترمين


اعتقد ال3 قصص دول كفاية اوي و كفاية اوي الفضايح اللي قريتوها

مش لازم يبقوا خمسة


تحياتي

التاج ده مش حمرره لاي حد معين لكن اللي يحب ياخده يتفضل اهلا وسهلا و يبقى يقلي عشان اقرا فضايحه

هههههههههههههههههه

26 comments:

hurricane_x said...

hehe
7elw mawdoo3 2elwara2 2elma7roo2 dah :)
of course I won't do the tag cause I'm a decent boy :P

yasser_auf said...

الله يكون في عون الاهل
شكلك كنت بلوة صغنونة و كبرت
تحياتي

zenzana said...

ههههههههههههه هههههههههههههههههه
مش عارفة اقولك ايه يا مفترية غير اني عرفت دلوقتى ليه ارواحنا هايمة مع بعض، لاننا بلاوي زي بعض انا هاخد منك التاج عشان تتفرجي علي البلوة التانية صحبتك اللي هي انا
بليززززز انتي مش تزعلي مني بت وغلطت عشان خاطري، هحطلك غنوة السماح يا اهل السماح بتاعة محمد قنديل عشان اصالحك. اوكي؟

وينكى said...

هههههههههههههههه
لووووووووووووووول
يالهوتييييييييييييي
مش قادره ابطل ضحك
مصيبه...انتى اكبر مصيبه الواحد ممكن يقابلها
وانا اللى كنت فاكراكى طيبه وحنينه
على فكره..انا جت عليا فتره زورت فيها توقيع بابا برضه..بس ماستعملتوش كتير..ربنا كان مسهلهالى مع بابا نفسه..بس اهى..خبره برضه
وافتكر انى كنت بحب اوى اولع نار فى اى ورقه اشوفها..وكنت باتضرب ضرب
لكن تطفيش المدرسين بالطريقه دى...لأ جديده لانج

tota said...

يا حفصة يا جبارة

المهم الثبات تقوليش الثبات على الايمان
اللهم ما قوى ايمانك
ضحكتينى يا مفترية وماما والله لسه فاكرة موضوع الورق
هو دايما كده مفيش جريمة كاملة

تحياتى

Mohamed A. Ghaffar said...

Good Tricks

حفصوتشا ام مصطفيتش said...

اعصار باشا
تاج ايه ده اللي مش حترد عليه؟؟
انت برئ انت؟؟؟ امال ايش حال السكاكين و السم و المسدسات اللي شغال تلعب بيها طول النهار؟؟؟؟؟
حترد على التاج و في اقرب فرصة احسنلك


ياسر عوف
هههههههههههههههههههه
بلوة صغيرة و بقيت بلوة كبيرة؟؟؟؟؟؟؟
هههههه انت لسه شفت حاجة
اصبر بس و حتشوف


زنزانتي
مستنية منك بوست فضايح فضايح فضايح
يلا بقى

وينكي
يا حبيبتشي انا طيبة و حنينة بس الحاجة و بتولد الاختراع و كده يعني و بعدين المكر و الدهاء مطلوبين برضو


توتا
اللهم امين يا ختي
ضحكتط و النبي؟؟
ده يوم الهنا يوم لما تضحكي


محمدعبدالغفار
بعض ما عندكم يا سيدنا


تحياتي للجميع

abourrisha said...

إيه الافترا بتاع البنات ده

طيب قولي للراجل يغسل رجليه ولا يغير الشراب بدل ما تقطعي عيشه

وبعدين يظهر كل الأطفال بيحبوا يلعوا نار
البوست الجاي بتاع التاج أنا هاكتب فيه حاجة زي كده بس نار بصحيح

عجبني أوي قفشتك للمخرجين المصريين والأجانب إللي مصرين على أن الممثل إللى يلاقي واحد مقتول بسكين أو مسدس لازم يمسكه
باين مبيشفوش أفلام

على فكرة باركي لي النحس اتفك واعرفت ادخل البلوج بتاعي وكتبت رد على تعليقك هناك يريد تقرأيه

وفيه بوست جديد عن ذكريات 67

تحياتي

ذو النون المصري said...

ههههههههههههههههههه
شويه تتنيح للمدرس و تتنيح لماما و كمان تحرقي ورق علشان تجربه كيميائيه
ههههههههههههههه
كل ده كوم و انك تتبلي علي خلق الله كون
و كمان تشككي المدرس في نفسه
انتي فعلا قادره و مفتريه كمان
انتي و زنزانه كان الله في عون الامهات منكن
dangeres women

مزمز said...

يا قااااااااااااااادرة

ههههههه

أنا بصراحة مبسوط أوي من كل اللي قلتيه لأني أصلا أول ماشفت الصورة بتاعتك وانتي صغيرة دي حسيت إنها صورة عيلة مدأرمة وصايعة

ههههههه

أنا مش عارف أبطل ضحك بصراحة

يا بنت الإيه

بس كنتي عبقرية والله العظيم

فكرتيني بيا وأنا صغير كنت أكتر طفل كذاب على وجه الأرض كنت بكذب بطريقة مبالغ فيها وف كل حاجة بكذب بكذب بكذب ومكنتش بتقفش برضه

إيييه

يللا

وبعدين إنتي لازم تتعالجي من من موضوع الحرافيش ده

أنا بقيت كل ما أشوفها في المكتبة عندي أفتكرك على طول

سلام بقى

zenzana said...

طيب يا صوصا انا روحت اتسرمحت النهاردة وهكتب البوست الصبح او دلوقتي

hosnysoliman said...

حفصة واضح انك بلوه من بلاوى الزمن ياسر بيقلك كنت بلوة صغنونه انا متهياء لى وكبوره كمان..يخرب بيت خفة دمك ..انا عارفه لما حكيتى حكاية ريحة الشراب ان تصورت منظرك طول الدرس وانتى حاطه ليدك على مناخيرك وبصه الناحيه التانيه وكل ما يسالك مالك تبصى ليه وتضحكى ضحكه بلهاء وتقولى ابدا ولا حاجه اصلى عندى زكام..كل تاج وانتى طيبه

ذو النون المصري said...

انا لسه مش عارف احط اغنيه او ملف صوتي للبلوج بتاعي و مش عارف مين منكم ممكن يساعدني
منكم لله اذا ما ساعدتونيش
هادعي عليكم باتوبيس سياحي فاخر زي بتاع عادل امام
اذا معرفتونيش بيتعمل ازاي
انا عاوز لينك لاي حاجه لعمر خيرت او مارسيل خليفه

جبهة التهييس الشعبية said...

بت يا حفصتوتشا

هي ايه المثلية دي

انا جات لي صدمة

سبحان الله الواحد مهما يفتكر نفسه شاف في الدنيا يلاقي نفسه ما يعرفش حاجة

هي ايه يعني مالها كده؟ اصل انا استغربت الصراحة اول مرة اشوف حاجة كده حاسة انها كائن فضائي

انا سالتها كام سؤال

بس يا رب ما اكونش عكيت في الكلام وجرحتها انا اصلي لساني متبري مني

والله مش قصدي اضايقها انا بس فعلا عايزة افهم

حفصوتشا ام مصطفيتش said...

ابو ريشة
ازيك وحشتني
والله بقيت اكتب اي بوست دلوقتي و اقول يا ترى حيقول ايه عليا
و بعدين المتيس كان دكتاتوري اوي ازاي اقله ريحة رجله و حشةو لو على الرزق
الرزق من عند الله و هو كان بيدي دروس بالهبل فانا مش حاثر فيه


زوالنون
انا من انصار حقوق المراة من زمان اوي فلذلك من يومي مفترية و قوية و جبارة و ماما طول عمرها تقول عني غلباوية و متغلبش معايا حاجة
هههههههههههههههه

مزمز
انت ظلمتني
صورتي دي و ان اعندي 4 سنين و بيسجلولي في المتيسة
اصل باب و مام اكانوا عايزين يخلصوا مني قوام قوام عشان غلبوا معايا في البيت
و اتعالج من الحرافيش ليه
دي احلة جنون ممكن يصيب البشر


زنزانتي
اتسرمحتي فين يا صايعة
والله لاقول لاخوكي اول ما اشوفة


استاذ حسني
والله وصفت المشهد بالظبط
كنت افضل حاطة ايدي على نوزي و ارد عليه بكل الاطه و كبر نفس
هههههههههههههههههههه
للاسف انا لسه بلوة
هيهيهييهييييي


زوالنون لما نتقابل اونلاين حبقى اشرحلك ازاي تحط الكود و ابعتهولك بس قول ان شاء الله
ما هو لو انت بتسمع الكلام من اول 10 مرات مكنش ده بقى حالك



بت يا تهييس
هببتي ايه؟؟
مش معقولة مش عارفة يعني ايه مثلي الجنس؟؟؟
يعني بنت بتحب بنت و ولد بيحب ولد
المهم انها شخص بيحب من " مثل" جنسه

و انهي مثلية رحتي عندها؟؟
قولي لي
المهم مع ايماني بحرمانية الموضوع حرمانية باتة لكن مش حيفيدهم بحاجة اني اتخانق معاهم او اكفرهم
مش دوري في الحياة
لكن انا بنظر ليهم على اساس شخصياتهم و بس و في كتير منهم ناس محترمة و عندها افكار و مشاعر و شخصيات جديرة بالمصداقة
و ربنا اللي بايده انه يهدي زي ما هو اللي خلقهم برضو
و مؤكد كل واحد فيهم عنده سبب خلاه يقرر انه يكون كده المهم ان الموضوع ده الكلام فيه كتير و مش بحب اني اجرح حد منهم بكلامي و عمري ما اقصد اني اجرح او اضايق اي حد بكلامي



تحياتي للجميع

جبهة التهييس الشعبية said...

ايوة يا حفصوتشا

انا رحت عند مذكرات امرأة مثلية

وواحدة تانية يوميات مثلية حاجة كده

وواحد تاني قال رجل مثلي

لا والله انا مش قصدي اجرح حد

ولا اتخانق ياختي انا مالي


انا اصلي باقول لك ما بشوفش منهم ناس ع الحقيقة يعني

مش عارفة بيبقوا عاملين ازاي

يعني بيبقوا عادتشي كده زينا؟

وللا ايه؟

والواد جاي مصر

هو احنا ناقصين

مش كفاية الرجالة مضروبين عندنا ناقصين واحد من برة يجي يضربهم تاني

انا برضه ما احبش اجرح حد والله

ربنا يشفيهم يعني حرام ويعافينا جميعا

بس يعني كان عندي حب استطلاع اعرف ايه الحكاية

عموما لو حد اشتكى لك مني قولي لهم حقيقتي اني بت مهييسة ومضروبة وما ياخدوش على كلامي

يا رب ما يزعلوش من الاسئلة اللي سألتها ليهم

we2am said...

esh6aaaaaaa :D
moshkren 3l egaba ya bnty:)
bs wlhy sokrr awe mamtk..sad2t she6an so3'nn zayk ezay? :P
enty nageb m7foz 3mlk hasas fe mo7'k b7rafesho fe3lan :)

مصرى said...

هههههههههههههههههههههههههههههههه

حفصة إيه البرائة دي يعني في التلت قصص بس زورتي و حرقتي و جننتي المدرس

هههههههههههههههههه

بجد إنت مش سهلة
و مش قادر أبطل ضحك لغاية دلوقت
و حلوة حكاية الثبات ع الموقف دي عملتها كتير و أنا صغير برضه

ام العيال said...

ايه داا
دي مش مصايب
التزوير بس هي الي قويه
؟؟؟؟؟؟؟؟دا انتي كنت فتاه هادئه
امال دلوقتي عاملا ايه
اتاريت ساكت و متخبي
قوليلي هو جدك
ا الفلسطييني...اكيد هما كده خلئهم في مناخيرهم

zenzana said...

الثبات علي الموقف كان مبدئ ف كل مصيبة
ست تهييس المثلية
دى يا اختشي الموضة بتاعة اليومين دول

كمان اتضح لي انه دواء جديد اكاديمية مخابز عمن الشوربة بتدرسه لقسم المخبرين عشان يبتكروا مع المتهمين ويستعملوا سلاح المقشات

Sampateek said...

عايزة اسال عنك بس و اسلم عليكي عاملة اية؟
كويسة؟
يا رب دايما

حجي مرة تانية اقرا الاجوبة


قبلاتشي الدافئة في ليلة باردة

عمر said...

هههههههه

انت عقلية اجرامية من الدرجة الأولي.. برافو عليكي

طب ممكن لو سمحتي تخلي أبويا يبيعلي العربية؟؟ ولا أقولك.. اقنعي مديري في المكتب يصدر قرار بتعييني شريك دولي ومدير عام ورفد كل الزملاء اللي ما بحبهومش.. او تعيينهم في البوفيه

شهروزة said...

أعاااااااااا
الحقييييينى
مزنوقة برة بلوجى ومش عارفة ادخل فيه ولا أكتب ولا أضيف حاجة ولا اعمل أى حاجة

بلوجر بيلوى درااااعى وبيفرض عليا انى اعمل اب جريد للبيتا

ومش راضى يخلينى أعدى لجوة مصارين البلوج

هى التعليقات وبس أرد عليهااا

اعمل ايـــــــة؟؟
أختك مزنوووووقة

طيب اى حد يلحقنـــــــــــى

سابوك يا ابوريشة واتديروا عليااا

اعاااااااااا

الحكايات حلوة يا حفصة
كان نفسى أعمل فضيحة تانية زى دى
بس بقا العاقبة عندكم فى المسراات

مزنوووووووقة بررررة أناااااا
أعاااااااااااااا

حفصوتشا ام مصطفيتش said...

يا نهارك يا جبهة
انتي ام التهييس فعلا
بقى تروحي للراج لو تقولي له الكلام ده معلش انا حبقى اراضيهم


وئوم حبيبي
اخبارك
شفتي مامتي طيبة ازاي؟؟
و بعدين مالهم الحرافيش يا ختي
زي العسل

مصري صديكي
بذمتك شفت احلى من كده براءة


ام العيال يا حبيبة
هو جدي الفلسطيني فعلا اصل التاني الله يرحمه مات من زمان اوي
و انا والله فتاة بريئة ددا ددا ددا
حتى بصي على وشي
مش شايفة صورتي قدامك بتشر براءة ازاي
:)

كلبوزة الكلابيز الامامير زي حالاتي كده
يا ستي كفاية سؤالك عليا و تعالى براحتك


عمر
انت بس هاتلي حاجة من ئطرهم او ابعتلي صورة ليهم عشان ادرس شخصياتهم كويس و انا في الخدمة يا باشا


شهروزة النوسة
شفتي بقلك في ايه بقالي كذا يوم
و معلش تعيشي و تاخدي غيرها بس نصيحتي قبل ما تحولي لبيتا غصب عنك احتفظي باسماء كل اللينكات اللي عندك وحطيهم في وورد فايل و ان شاء الله كله يبقى تمام و الحقي كمان اعملي لينكات لكل بوستاتك عشان لو حصل لا قدر الله و اتوفى زي بتاعي
الحاجة الاخيرة اللي انصحك بيها اعملي حاجة كده اسمها جوجل ريدر و ابقى اسالي الواد الحاج جرجس عليها و هو يقولك عليها


تحياتي للجميع

مريض نفسى said...

حفصوتشا ام مصطفيتش
هل لهذا الاسم الافتراضى معنى معين او رمز ام ماذا
تحياتى على صراحتك

حفصوتشا ام مصطفيتش said...

الاخ مريض نفسي
و بعد اطلاعي على بلوجك مش لاقياك مريض خالص
المه انا اسمي مالهوش معنى معين
هو بس اسمي لما يتقلب ايطالي و يتدلع
و مصطفيتش هو اسم ابني بالتبني البلوجاوي و هو ده اسمه لما يبقى اسم روسي او شرق اوروبي وخلاص

بس كده