التاج التاج التاج موعودة ياللي عليكي التاج

اتمررلي تاجين

واحد من وئام و بعتتلي تاج الصفحة 123 من اخر كتاب بقراه

التاج التاني من ذو النون و المفروض اني احكي فيه خمس حاجات من ذكرياتي او حاجات مستخبية

المهم

امري لله و اديني حجاوب

تاج الصفحة 123

"

فتحت باب الحجرة فارتمى ضوء المصباح على الارض. تنحت من أمامه و هي تدفعه بيدها. رأى ست قمر جالسة على حافة الفراش و هو الموضع الوحيد الصالح للجلوس

"

من الحرافيش

********************

تاج ذوالنون

اول قصة

و انا في الجامعة كان لازم كل سنة طبعا اعمل تصريح العربية اللي اهلي حيجوا يوصلوني بيه من و الى الجامعة، وقتها كنت في قطر ، فمحدش يفتكر اني كنت بترفع عن السواقة، لا السواقة هي اللي كانت مترفعة عننا، المهم، انا جدي خلقه ضيق و ميحبش حد يقله تلت الخمسة كام، فانا يدوبك اعرف اخد منه معاد عشان اوقع ورق التصريح و امضيه تعهدات و الكلام ده كله، خلصت المهمة بصعوبة و اخدت الورق على مكتب التصريحات، كان يوم زحمة اوي، فانا انتخت على طرابيزة لغاية ما يوصل دوري و جبت كوباية نسكافية، و بس، عاديكوا على اللي حصل، كعادتي لازم ادلق اي حاجة فيها ميه او سوائل، طبعا عشان اتفادى الحرق فعملت حركة بهلوانية مفاداها ان النسكافيه وقعت على الورق و طبعا بقى الورق مينفعش اني اقدمه و لا بقى ينفع اني ارجع لجدي و اقله وقع تاني، حيطلقني، بس قلت مافيش غير حل واحد، ايوة بالظبط زي ما جه في بالكوا، رحت المكتبة و جبت ورق شفاف و ورق كلك و قلم رصاص سن خفيف جدا و استيكه مخصوص للورق الخفيف و للحبر الجاف كمان و قلم من نفس نوع جدي بالظبط و كبرت صورة البطاقة الشخصية بتاعته و روقتها

و اتخذت ليا مكان منزوي و درست التوقيع من جميع ابعاده و فضلت اتدرب زي اللهلوبة و استحضرت كل معلوماتي عن صفات الخطوط و بيان اختلاف اشكالها و كل العلم اللي عندي والحمدلله لما تاكدت من حرفية الشكل قمت طابعاه على طلب جديد و فيشت الهوامش و زبطت الورق كله و دعيت ربنا انه يساعد بنت مسكينة زيي جدها صعب المراس حبتين و انها يعني حتعمل ايه

اقله هي مش بتزور التوقيع عشان تسرق، و الحمدلله وقفت في الطابور تاني و والورق مشي اخر حلاوة بالصلاة عالنبي و ده شجعني اني اخلي جدي يوقع على ورق كتييييييييييييييييييييييير سهلي امور كتيرة اوي ايام الجامعة و من غير ما هو يتعب نفسه او يدرى بالموضوع شئ

و كمان ربيت سمعة كويسة بين البنات وكل اللي تتزنق كانت تجيلي لكن الشهادة لله عمري ما زورت توقيع على موضوع انا شاكة في صحبته

اه انا فتوة لكن في الحق بس

القصة التانية

مرة زمان و انا عندي 10 سنين ماما خرجت مشوار و مش عارفة ازاي قدرت اقنعها اني مش قادرة اخرج، اصلي في التمثيل ولا امينة رزق في عز شبابها، الا صحيح هي ماتت و لا لسه عايشة؟؟، المهم هي خرجت من هنا و انا جبت ورق قديم و قلت لما اجرب اولع فيه نار و اشوف حيبقى شكله ايه، و كل ده بسبب تاثير درس العلوم عليا و عن ازاي ان الحاجات لما بتتحرق بتتحول لفحم و تتغير طبيعتها الفيزيائية و كلام اهطل كده ، فلما انا شرحت لماما اني عاوزة اعمل التجربة دي بنفسي قالت لي اياكي اللعب بالنار مش كويس، طبعا للاسف انا عنيدة و مش بصدق الكلام، فمصدقت انها برة البيت و رحت اعمل التجربة الخطيرة دي، المهم ولعت النار في كبشة ورق بتاع كراريس فيها ادلة اني مكنتش بحل الواجب و اذا حليته بيكون الحل فيه دليل قاطع اني مكنتش مركزة بمليم مع المتيسة، و قلت افضل حل هو التخلص نهائيا من الكراريس دي و اجيب غيرها و انقل الحل من البت هالة الاولى بتاعت الفصل الله يمسيها بالخير بقى، بس انا بقى كنت واعية سالت نفسي لو النار خرجت عن سيطرتي اعمل ايه

فقلت احرق الورق في حوض الحمام عشان لو حصل اي شئ افتح عليه المية قوام و اهزم الخضة، اه اصل انا احب لو عملت حاجة اعملها صح يا بلاش، و طبعا انا اصلي اروبة من يومي و خبيثة و بتفرج على افلام كتير من وانا في اللفة، فبستفيد من غلطات الابطال الاغبياء، اللي هي زي انه يلاقي واحد ميت و الدم نازل و سكينة مغروزة فيه و سامع صوت البوليس بيقرب و برضو بغباءه الجبار يقوم يمسك السكينة و قال ايه يعني مش مصدق و و يعيط بعد كده لما البوليس يمسكه، طب والله لو مش حيتمسك عشان مشكوك فيه انه القاتل انا اقبض عليه بتهمة الغباء العلني المتكرر، المهم نرجع لموضوعنا، انا بقى حرقت اللي حرقته و تاويت اللي تاويته و قمت صبيت ميه بعد الجرمة النكراء و رميت بواقي الورق في التواليت الله يعزكم، المهم ربنا رايد اني انفضح قدام ماما فيقوم التواليت ميشفطش كل الورق المحروق و يتبقى شوية منه على الوش، و انا و لا على بالي، على راي المثل وقعة الشاطر بالف ، ماما ترجع من بره و من خضتها، تنادي عليا بصوت عالي اوي يخضني و تواجهني بكل صراحة

"

ماما:انت اللي حرقت الورق ده؟ و لو حرقتيه ، حرقتيه ليه؟ اتكلمي احسن لك؟

انا:( بكل ما عندي من براءة و جواها خضة و لعن للذات على غبائي من عدم احكام التخلص من الدليل) لا مش انا،

ماما: امال مين؟؟ انت بس اللي كنتي لوحدك في البيت يبقى ازاي مش انت؟؟؟

انا: معرفش( ابتدي اسح في دموع، و مش تماسيحي لاني سهل اوي اعيط) انا فضلت في اودتي اذاكر لغاية ما انت جيتي دلوقتي

اهئ اهئ اهئ

ماما: ( بتخبط كف بكف و مش عارفة تعمل ايه و اعتقد ان برج من فواضل ابراج مخها شفته بيطير)@#$%^&*؟؟

طبعا حلفتلها ايمانات ربنا كلها اني ولا ليا خبر عن اللي حصل و لانها طيبة و بتصدق في حكايات الجن و توابعها و فاترعبت لما لقيتني مصرة في جوابي و بعيد نفس الكلام، اه ما هو ده اللي علمهولي في الجيش، و فضلت يا حرام اسبوع مشغلة قران في البيت اربعة و عشرين ساعة و تبخرنا و تعيط بالليل شوية و شوية تدعي ربنا

المهم انه الان و بعد مرور 19 سنة لسه ماما تحلفني كل فترة والتانية انه مش انا اللي حرقت الورق و انا اقلها انتي لسه فاكرة ارجوكي متفكرنيش لاني كل ما اعرف اني كنت قاعدة مع جني اتلبش فتسكت هي يا حرام و تقلي متخافيش لو اعترفتي مش حعملك حاجة انتي بقيتي كبيرة زي الشحطة و مش حطول اعملك حاجة، لكن السر في الاصرار على الموقف. هههههههههههههههههههههههههههه

القصة التالتة و الاخيرة

و انا في سنة ساتة ابتدائي و كنا اخر دفعة يخلوا فيها الابتدائي ست سنين، المهم كان عندي مدرس خصوصي واخدني مقاولة يجي ساعتين كل يوم يمسكني رياضيات(يااااااااع)و علوم( نص يااااع)و هاتك يا شرح، بس المشكلة مش في كده، انا متعودة اتنح مهما كانت الضغوط، لكن المشكلة كانت في انه كان بيلف طول اليوم على رجليه و يجي عندي انا و يقلع الجزمة و تفوح الروايح، طيب انا ذنبي ايه،، طبعا هو يقلع الجزمة من هنا و انا افصل نفسي عن الواقع طوالي، و بالتالي كنت مش بركز معاه خالص و لا اعرف هو كلمني عن ايه النهاردة، بعد فترة بديت ازهق منه بالأوي و قلت خلاص يا اما هو يجنني بريحة جزمته ، يا اما انا اجننه مني و اطفشه، اصلي اشتكيته لماما فقالت لي اني بتدلع و بتلكك و انه ده تالت مدرس يتغير السنة دي و مش حنجيب غيره

قلت في سري خلاص، انا عملت اللي عليا، و انتي مسمحتيش بحل سلمي، خلاص بقى حوريكي حاعمل فيه ايه، يا انا يا المدرس في البيت ده، المهم جيت في مرة اداني فيها واجب و بعد ما علم على التمارين في كتاب سلاح التلميذ و علم على صفحات الكتاب الاصلي بتاع الحكومة ، قلت خلاص هي دي فرصتي، مسكت الكتابين و شقيت منهم الصفحات المستهدفة و بخفة ايد منقطعة النظير، و سهرت ليلتي انضف بواقي الورق من جذر الكتاب ولا اجدعها ست بتنتف ريش فرخة، و طبعا معداش عليا اني اخفي الكتاب تحت السرير عشان يرجع ماسك نفسه بعد ما كنت فضلت فاتحاه على الاخر و بقى باين ان في حد لعب فيه، بس عدوا يومين، جه المدرس و قالي فين الواجب رديت و قلتله فيما معناه اني ملقيتش الصفحة اللي هو اشرلي عليها و لا لقيت الصفحة اللي في الكتاب الاصلي و علشان اقله اذاكر شوية، طبعا الراجل بقى يضرب كف بكف و يقلي و يحلف بحياة ولاده انه علم على الصفحات بايده اللي حيكلهم الدود و طبعا اتباعا لسياسة الثبات على الموقف و تتنيح نظرات العيون فالراجل شك في نفسه، انا بقى كملت عليه اخر لمسه، قلت له مش حضرتك بتدي دروس لمي و منى و و و و ، فقالي ايوة، قلت بس تاهت و لقيناها ، تلاقيك علمت على الصفحات عندهم هما و انا لأ، طبعا كل ده بان لماما ليه انا سقطت في امتحان الرياضيات و الباقي نجحوا و عليه تم الاستغناء عن خدمات الاستاذ و جبت استاذ تاني كنت بسمع عنه انه طيب و مالوش في التور ولا الطحين و بيمشي حسب مزاج الطالب و اهم حاجة انه مش بيقلع الجزمة لما يدخل عندنا لانه كان راجل كبير في السن و بيخاف ليبرد و كان يمكن اخر الرجال المحترمين

اعتقد ال3 قصص دول كفاية اوي و كفاية اوي الفضايح اللي قريتوها

مش لازم يبقوا خمسة

تحياتي

التاج ده مش حمرره لاي حد معين لكن اللي يحب ياخده يتفضل اهلا وسهلا و يبقى يقلي عشان اقرا فضايحه

هههههههههههههههههه