احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Monday, February 12, 2007

الطريقة الفنية في صنع اللبنة المهلبية

اعزائي البلوجرز
كنت وعدتكوا في بوست سابق اني حكتبلكوا طريقة عمايل اللبنة
*
*
*
اهي
تجيبوا مصفا و تحطوا فيها طبقات كلينكس مقوى وعلى الاقل تحطوا اربعة و كل ما كان الكلينكس رقيق تحطوا طبقات اكترعشان قوة الامتصاص يعني
يتم دلق كل محتويات علبة الزبادي و حسب الكمية اللي انتوا عاوزينها و انصح في البداية بالتجربة في كمية قليلة


يتم رشرشة شوية ملح بس للحفظ لكن اذا انتوا من اللي بتحبوا الملح الزيادة اوي كتروا الملح و انا مالي بس ابقوا اشربوا كركديه ساقع بعدها


يتم ضرب الزبادي بالخلاط بتاع البيض او ربه بالشوكة المهم انه يتخض عشان ميبوظش و ممكن اضافه قشطة او كريمة لباني بس انا مش مسؤوله عن النتايج عن نفسي محبتش الكريمة اللباني لكن القشطة ااااه يا وعدي كانت قشطة فعلا
يتم التحفظ على مصفاية اللبنة و غلقها يطبق تاني كبير و نضيف و الابقاء عليها برة التلاجة لمده يوم واحد اذا كان الجو تحت الصفر عندنا غير كده انا مش مسؤولة و كان الله في عون اللي عايشين في الحر انا مالياش دعوة يتصرفوا

يتم الابقاء على التحفظ على اللبنة و الكشف عليها بعد يومين بالكتير و اذا لقيتوها بالشكل المتكسر ده اهنيكوا
نجحتوا في جعلها لبنة بيتي اصلي اذا ملقيتوهاش يبقى مالياش دعوة ضيعتوا على نفسكوا تمن اربع علب زبادي
و شغل نص ساعة و انتظار تلات ايام
زيادة ف التاكد من انها بقت فعلا لبنة مش كده و كده تقوموا تشيلوا الكلينكس من الجنب، لو اللبنة وقعت لوحدها و اتكسرت على نفسها تبقى خلاص بقت لبنة ، طبعا لو مش زي اللي فوق تبقى لسه بتستهبل و مش راضية تبقى لبنة، استنوا يوم كمان

الدليل الاخير انها بقت لبنة عشان انا زهقت ان السلطانية اللي بتحطوها تحت المصفاية حتلاقوا فيها مية الزبادي و ده معناها انه تمت تصفية العلبة بتاعت الزبادي الى اخر نفس

تفرشوا اللبنة جوا علبة للحفظ و تعملو احركتين قرعة زي ما انا عاملة كده و تحطوا زتونتين او ورقتين نعناع او قرن فلفل حار او ممكن شوية زعتر على الوش يااااااااه مقلقوش ، لحسن تقولوا لي اعملي لنا بوست عن الزعتر و فوايدة و طبخاتة

ده شكل العلبة النهائي بعد ما قعدت اربع ايام افطر منها
يلا بالهنا و الشفا
محدش يسالني تاني عن وصفة اكل عشان التصوير بياخد مني وقت
و انتوا عارفين التكاليف و اللذي منه

مع تحيات وصفات و مأكولات المهجر للعزاب و العزابات

42 comments:

Reformer1976 said...

أنا ما كنتش متصور إن الموضوع معقد كدة... طب ما ينفعش تسهلس عليا الموضوع وتجيبي لي علبة جاهزة معاكي وانتي جاية
:D

أنـــا حـــــــــرة said...

ايه الحلاوة دى
صحيح انا مش بحب اللبنه
لانى مبحبش اللبن اساسا و هكذا الزبادى الخ الخ
بس الطريقة شكلها مش مكلكعه
هى ايدك اللى فى الصوره دى
:)

يللا بالهنا و الشفا
عايزين حاجه حلوة بقى من عمايل ايدك يافندم

مصرى said...

بالهنا و الشفا يا حفصة
بس دي شغلانة يعني لازم أقعد تلات أيام على ماتخلص مافيش حل أسرع شوية
:)

Mohamed A. Ghaffar said...

انت عندك مواهب جميله

متعملى بلوج مخصوص طلبقك اليوم ولا طبقك المفضله ولا بلوج ابلة حفصوتشا ولا من كل بلد اكله

جد مش هزار هيكسر الدنيا

GayofSun said...

واو عن جد سال لعابي و أنا أنظر للشكل النهائي
ممكن سندويش سا حصفوتشا
....


صديقتي الغالية حفصوتشا ام مصطفيتش
يااااااه يا خسارة
كنت أتمنى من كل قلبي أني أشوفك قبل ما أرجع لبلدي.. إييييه
لما تفضلي لبلدي دانت بتوري الحتة كلها و البيت بيتك و أهلا و سهلا بك في أي وقت
و أنا بتمنى أشوفك كمان
على فكرة
وينكي صرعتنا و هي تحكيلنا عنك
حفصوتشا قالت، حفصوتشا كتبت، حفصوتشا، أصلها، و حصفوتشها فصلها
دي بتموك فيك
بدأت الفار يلعب بعبي " كما يقولون أخواتنا الفلسطينين "
^_*
تحياتي

قصاقيص said...

ياااااااااااااااه
حرام عليكي
والله بعملها في يومين بس ويمكن اقل
بس عموما تسلم ايديكي ياقمر

zenzana said...

بصي انا دايما بعملها صحيح ببقي متأخرة ف المواعيد انتى عارفة السن له احكام بس بوصل في نفس اليوم

انا هستنا العملي لما تيجي
فين البوست التاني يا جبانة
متجبيش حاجة معاكي للواد جرجس ممكن ظبوط من بتوع مكافحة الخناق

وحشششششششششتيني
امتى هنم سوا ع الخلق مع ريكا وشهروزة

hosnysoliman said...

شيف حفصه ايه الحلاوه دى..سيبك من التدريس والتعليم والعبى لعبة الاكل ممكن تكون اكسب..انا على كلن حاروح بكره اشتريها جتهزه لان ريقى جرى عليها وبيقلك شرى العبد ولا تربيته

حفصوتشا ام مصطفيتش said...

جرجس
انت مبتجيش غير على سيرة الاكل؟؟ و اول تعليق كمان
ايه بتشم ريحة المطبخ تقوم ناطط قوام قوام
اهلا بيك يا خويا

حرتي العسل
مبتحبيش اللبن؟؟ عيب عليكي حد ميحبش منتجات الالبان و جميع مشتقاتها؟؟
الله يرحمه جدي الفرنساوي كان معلمنا حب الاجبان و الالبان و جميع ما يستخرج منهم
ايوة هي دي ايجي بس كنت لابسه جوانتي
تقوليش واقفة في معمل
ههههههههههه
تحبي تاكلي ايه من ايدي يا فنتم؟؟


مصري
انت مش حتعد تشتغل فيها تلات ايام ات حتسيبها هي لوحدها تصفي يومين و احتمال تاخدلها يوم كمان
انت بس سمي و يلا


محمد عبدالغفار
اشكرك يا سيدي واله فكرت في فكر بلوج مخصوص لكني لقيت اني مش منتظمة في عمل الاطباق و اهو احط كل حاجة هنا
فيالنهاية بلؤي اسمه الناس او العالم يعني كل ما يخص الناس و كل ما يحدث في العالم
انا قريت الموضوع الاخراني بتاع هالة زفت سرحان
الصراحة دي حاجة منيلة خالص لكن انت ما شاء الله حاطط كذا رابط و بيشيكمهم كلهم بس موضوع محتاج فعلا ان احنا منعديهوش بالساهل لانها واحدة اخلاقها مش نضيفة
شكرا ليك جدا


عزيزي جاي
بقى البنة برضو بنعملها سندوتش؟؟
ممكن منقوشة لبنة لكن مش سنكوشت يا جاي
بقلك لازم تحكي لي علمت ايه و رت فين في مصر بالتفصيل


قصقوصة
واله هي بتاخدلها يومين بكتيرة بس انا قلت يوم زيادة للي يحب بس والله
و تسلم ايديك انتي يا عسل


زنزانتي
البوست التاني حمي اوي معايا و قررت اتفحص و اتمحص فيه زيادة بتين اصله تقيل على القلب شوية فقلت اخفف على قلبكوا بالللبنة و بعدين ادخل بالضاني
هههههههههههههههه


استاذ سليمان
انا خايفة اكون السبب في سمنتك و المدام تزعل مني
اخبار الاومليت ايه؟؟؟


تحياتي للجميع

Epitaph said...

ههههههههه
تسلم ايدك

مش عارفة
ح ابقي اتشجع و اعملها
مع اني كسووولة جدا
ههههههه

تحياتي يا شيف حفصة
و الف هنا

bon appetit

ابن النيل said...

استاذي حسني سليمان كلامه صحيح يا حفصه التدريس خلاص مبيجبش همه
خليكي في الاكل احسن حتي لو هتهاجري للخليج هتلاقي الاكيله هناك احسن من المتعلمين
و لو نويتي تبقي في مصر الاكيله برضه احسن و اكتر من المتعلمين و لو نويتي تروحي ليبيا او السودان او المغرب برضه الاكيله احسن من المتعلمين و لو نويتي تروحي مدغشقر بعقد عمل برضه الاكيله هناك يكسبوا المتعلمين و لو نويتي تروحي زنجبار برضه الاكيله اكتر من المتعلمين
ولو نويتي تروحي زيمبابوي هنا بقه فيه فرق !!!!!!!!!!!!!!!!!!!!!!!!!!!!!!!!!!!!!!!!!!!!!!؟في كل حته الاكيله بيكسبوا المتعلمين
هنا بقه المتعلمين يخسروا
هههههههههههههههههههههه
محبيتش اطول عليكي

ابن النيل said...

التعليق السابق هو تعليق ذو النون المصري لكن والله ماانا عارف ازاي المدونه فتحت علي مدونة واحد تاني
حاجه غريبه فعلا
صحيح و الله ما بهزر

yasser_auf said...

منك لله جوعتيني ما انتي عارفة اني مسرب الي هنا و قاعد لوحدي يومين استجم

جوعـــــــــــتــــــــــينــــــي

ماشي يا ست البيت تمام جميل و خفيف ممكن بقي تبعتي الطبق علي عنوان الاسكندرية

تحياتي

zenzana said...

ابيتاف هانم
امتي هنشوفك يا ختي؟ هتفضلي مستخبية ومكتفية باتصالاتك باخرين اكتر اهمية مني ومن حفصة، طب ماشي؟ لو جدعة ابقي تعالي العبي معانا بالعجلة انا وحفصة واحنا هنشخرمك ومحدش هينفعك حتي لو كان الريس حنتيرة

ذو النون وابن النيل كل واحد يخلي باله من البلؤ بتاعه زي البنطلون بالظبط احسن في حاجات بتتسرق

lastknight said...

كده أخيرا حد من الشله الفقريه دى ضمن مستقبله .. عربية كبده و لبنه على ناصية مكتبة السندباد .. و هاتلعبى بالفلوس لعب .. الشعب كله مفجوع قوى هنا .. و الأكل بيمشى حلاوه .. مش تقوليلى كتب و تدوين و كلام فارغ .. انتى تشرفينا .. و احنا نرتب مع البلديه عشان نحجزلك الناصيه .. و لحد ماتفرج بعربية يد ممكن تشتغلى من مكتبة السندياد .. ماهى ماحدش بيدخلها اساسا .. يعنى نقلبها مطبخ و ماحدش هاياخد باله .. و نقعد الزعيم بصينيه على الناصيه .. و صينيه تانيه جرجس يدور بيها على القهاوى .. انا بقى لأنى بيه هامسك التليفون استقبل طلبات الهوم ديليفرى .. و البت زنزانه بما أنها أروبه تبقى هى اللى تحاسب ..بس ماتقعديهاش جنب البضاعه لا تخلصها قبل ماتتباع
و ممكن توتا و عشتار عشان هوانم قوى نصورهم و هم بياكلوا الحاجات بتاعتك و نعملها أعلان زى بتاع ماكدونالدز .. قال يعنى زبايننا من التبكه الراكيه
قشطه يا حفصوتشا .. شكلك هاتعدى

ذو النون المصري said...

الاخ المجهول ده بيرجع و للا ايه؟

ذو النون المصري said...

و بعدين ده كله ترجيع!!1ليه انت واكل ايه؟

مصرى said...

لاحظت حاجة في التعليقات
جدك فرنساوي
و جدك فلسطيني
و إنت مصرية
و عايشة في أمريكا
دي عصبة أمم
:)

ـــــــــــــــــــــــــــــــــ
الأنونيموس ده ماله جراله إيه يا عم شوفلنا ترجمة بأي لغه حية للي إنت كاتبه ده

وينكى said...

ماتحاوليش
انا ماليش فى المطبخ مهما حصل
على فكره
انا عامله حفله على ما قسم عندى
ياريت تشرفينى النهارده
وقت ماتقري الاعلان

حفصوتشا ام مصطفيتش said...

احب اعتذر للكل اني مش حقدر ارد حاليا بالتفصيل و اعتذر لناس اللي لسه محطش اسمها في اللسته واعتذر اني مش حقدر اعلق الفترة الجاية عندكوا انا حاليا بكتب من موقع الكيبورد العربي والكتابة منه متعبة جدا
و زي ما الشهر اللي فات بالظبط اتلغت مدوناتي فالمرة دي جهاز اللاب توب بتاعي انحرق خالص و حاول اشغله تاني لكني خسرت كل ملفاتي
موعدكم ان شاء الله مع المرثية التانية بس بعد ماتتم اجراءات الدفن الرسمية حبقى اوافيكم بالاخبار اولا باول
بالنسبة لشخص المقرف فمحدش يرد عليه لاني حمسح تعليقات فبلاش تضيعوا وقتكوا على شخصية معفنة بالمنظر ده
تحياتي للجميع و دعواتكم ليا بالصبر و السلوان
حفصة اهئ اهئ اهئ

Sharm said...

انا جعت
عايز اكل

مذكرات امرأة مثلية said...

ايه يا حفوصة ايه يا بنتي
هو انا كل ما جي عندك الاقيكي مشغولة في الطبيخ
المهم يا ستي دي الاكلة باين عليها لذيذة قوي
و بخاب آكل صوابعي و راها
ههههه
انا بعد اذنك حطيت لك لينك في مدونتي
سلام

Sampateek said...

عسولة يا حفصوتشة يا سكرة
حلوة قوي بقى اللبنة بتستهبل دي
ههههههههه
انت ست بيت بيريمو
بس انا اسهل ادلدل السبت و انده على عم عبده يحطتلي علبتين لبنة بدل الشغلانة دي
انت لو جدعة بقى بجد تجيبيلي طريقة المش البلدي الاصفر الفلاحي ده
بس من غير دود
هههههههه
بموت فيه و مفيش منه هنا
قبلاتشي يا سكر

albida said...

ههههههههه
يخرب عقلك يا حفصوصة!! والله ولا كتاب أبلة نظرية
:)

ده انا هوريهم العجب فى البيت
ههههههه

manal

frozen love said...

من حلاوة وصفك حسيت اني ممكن تحصل معجزة وادخل المطبخ بقى بغرض اخر غير الشاي والحاجات العبيطة


شاكرين مهللين

frozen love said...

نسيت اقولك اني جامدة وضحكتني..وماشية مع التدوينة اللي فاتت بتاعة مكة الطائف

hurricane_x said...

hwa ana mosh 3aref hatetla3 2eh bezabt, bas 2keed hagarabha 2ensha2 Allah.
hya momken tettakel bel3asal :D

ام العيال said...

ما هي مليا البلد ليه الغليه دي
دي لو حتتحول الى دهب
انا ام العيال هانييم
اجلس سلاثه ايامن علشان لبنه
على العموم يسلمو ايديكي و بالهنا و الشفا بس اوعي تكوني اكلتي البنت الي معاكي منها
نيااااااهاها

kaed said...

يا حفصة جوعتينا بجد و النبى يا شيخة المرة اللى جاية تعليمينا طريقة عمل المحشى اللة يخليكى ألا نفسى فية بجد

قصاقيص said...

فينك ؟؟ غايبة عننا ليه من يوم طريقة عمل اللبنه المهلبية؟؟
انتي بتقولي انك اكلتي منها 4 ايام انا كده هقلق
ههههههههههه

جبهة التهييس الشعبية said...

جوعتينا

شهروزة said...

أممممممممم
فتحتى نفسى وراسى
وحشتينى يا مضروبة انتشى

ألف سلامة عاللابتوب تبعك يا ألبى
بلغنى ان صحته مهسكّكة شويتين

اسكتشى يا بنتشى
كانت فسحة مصر عاوزاكى
ابقى تعالى اقرى شوية تفاصيل عنها عندى لما توصلى لأرض مدونتك بسلامة الله

أمواااااة يا حبيبتشى
ومتقوليش لحد وتسيحيلى

نيااهااهااااااا

.:.-=- ELGaZaLy-=-.:. said...

جميلة اوى الوصفة..اكيد حلوة للمغتربين

او الى عايشين برة انا مكملتهاش للاخر..

بس اوعدك هاجربها...

Reformer1976 said...

فين بوستاتك الجديدة يا أستاذة؟؟؟؟ جمهورك من المحيط إلى الترعة اللي جنب بيتنا منتظرين موضوعاتك الجديدة... هتيجي إمتى بقى؟؟؟

قصاقيص said...

حبيبتي حفصة
أنا بدأت أتعقدلك سلف
هو كل شهر ماّساة جديدة؟؟!!؟؟
صحيح قليل البخت يتحرق لاب توبه وملفاته الخفيه ومايلاقيش غير موقع الكتابة العربية

bastokka said...

ممكن واحد مؤجزة؟
ممكن واحد زيارة للحوافريت؟

اوروفوار

Noran said...

ما أكدبش عليككى أنا لحد دلوقتى خايفة أعملها لحسن تبوظ و تفشل
;)

انتى فين ؟؟؟ فات و قت عليكى غايبه ؟؟

وحشتينا
:(

محمد said...

الموضوع ده جامد
وطعمه حلو قوي
ومش لاقي كلام تاني أقوله بعد اللي البلوجرز قالوه
البلوج ده حلو قوي
ويالرب تشرفنا بالزيارة

Abd El Rahman said...

ده انا على ما اعملها اكون اتجوزت وخلفت والعيال طلعت لبنة أهلي

جبهة التهييس الشعبية said...

القصاص للأسرى المصريين

abu_shakuush said...

وصحتين وعافية :-)

Nah·det Masr said...

شكراً يا حفص، هأحوال أعملها بالذات اني قاعد لوحدي وبأطبخ الأيام دي!