احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Saturday, December 8, 2007

يوميات تائهة في معرض الكتاب

اليوم انتهى معرض الكتاب التمنتاشر المقام هنا في الدوحة
طبعا معتقدش اني لازم احكي ان دي كانت احلى فسحة عندي من فترة طويلة اوي
اول يوم للمعرض رحت قلت بس استكشف المكان و كده كده مش حيدخلونا عشان مؤكد الوزير او هيئة ذات مستوى رفيع بتفتتح المعرض و لذلك بيمنعونا من الدخول لأن السنة اللي قبل اللي فاتت كان معاد افتتاح المعرض الساعة 5 للجمهور رحنا أنا و اتنين صحابي الساعة 6 و نص لقيناهم بيقولوا الدخول يمكن يبقى سبعة او ممكن مافيش دخول خالص للجمهور ، ليه يا باشا، اصل في مسؤول مستوى رفيع بيفتتح المعرض، و اتلطعنا على امل الدخول لكن زهقنا و مشينا
السنة دي قلت اعرف فين موقعه اصلا لانه اتغير و قلت لو عرفت ادخله حبقى ادخله اشوف شكل القاعة الجديدة ايه لكن لقيته فاتح و خلوا الافتتاح الرسمي الصبح عشان خاطر ميعطلوش الناس بالليل، والله فيهم الخير.
الصراحة عجبتنني القاعة، كبيرة ، واسعة و تقضي كتير بدل الزحمة و فيه اماكن ركن للعربيات و دي طبعا المستحيل الرابع بعد العنقاء و الغول و الخل الوفي هنا في قطر ان حد يلاقي ركنة في أي مكان او أي وقت
اللذيذ ان مع انها كانت جولة تفقديه الا اني اشتريت اول خمس كتب يومها و لولا اني كنت بشتري من مصروف الاحتياط كنت غزيت كل الاستاندات بس بعدها بيومين نزل المرتب اللي يا حرام ضاع في فتحة صفحة.
ربنا السنة دي فاتح عليا ، اول مرة اشتري كمية الكتب دي مرة واحدة ، عادة ممكن اشتري بالكتير 10 كتب على فترات متقاربة، بس المرة دي اشتريت ما يتعدى ال 66 كتاب من مختلف القطاعات
ر وايات و قصص قصيرة
الحب فوق هضبة الهرم- نجيب محفوظ- دارالشروق
فارس النور
مكتوب
فتيات فالكيري
فيرونيكا تقرر ان تموت
باولو كويلهو - دار ورد /سوريا
حاج-جان ايرياس-دار ورد / سوريا
مالك حزين -ابراهيم اصلان -دار الشروق
حدث في بلاد قريبة من الشمس / محاكمة الشيطان-ممدوح شعث -دار اطلس
قطعة من اوروبا -رضوى عاشور – الشروق
زهرة الخشخاش / نسف الادمغة-خيري شلبي-الشروق
المسافات / الصياد و اليمام / قناديل البحر-ابراهيم عبد المجيد -الشروق
السائرون نياما-سعد مكاوي
تاكسي-خالد الخميسي
شكلها باظت -عمر طاهر -اطلس
الخرز الملون-محمد سلماوي-الشروق

-
دين وما شابه
الاسلاميات -سيد القمني -المركز المصري لبحوث الحضارة
الدم المقدس الكأس المقدس-ميشيل بيحنت، ريتشارد لي، هنري لنكولن-الاوائل /سوريا
تيارات الفكر الاسلامي-محمد عمارة -الشروق

سياسة و تاريخ
العلمانية الجزئية و العلمانية الشاملة – جزأين- عبدالوهاب المسيري -الشروق
نحن و ابعادنا الاربعة -جمال حمدان -مدبولي
بولينج في بغداد -نصري الصايغ -رياض الريس للنشر/ لبنان
الفاطمية دولة التفاريح و التباريح -جمال بدوي -الشروق
ماذا حدث للمصريين -جلال امين -الشروق
سلسلة التاريخ: الجانب الاخر: اعادة قراءة للتاريخ المصري، فؤاد الاول المعلوم و المجهول (1) يونان لبيب رزق -الشروق

نفس السلسلة:فاروق الاول و عرش مصر -لطيفة محمد سالم اليد الخفية -المسيري -الشروق
الجماعات الوظيفية اليهودية نموذج تفسيري جديد -المسيري -الشروق

تراجم ذاتية و ما شابه
شارع التنهدات -انيس منصور - نهضة مصر
المجالس المحفوظية-جمال الغيطاني -الشروق
حصاد السنين -زكي نجيب محمود -الشروق

شعر
يامنة -الابنودي -اطلس
اعمال الحلاج الكاملة -الحلاج -رياض الريس للنشر


لغويات و لغات و صوتيات
اللغات المفقودة- اندرو روبنسون -ماك جرو هيل منشورات مكتبة الاسكندرية
قصة الكتابة -اولاف برجرين -مكتبة الاسكندرية
الخليل بن احمد الفراهيدي – رحاب عكاوي -دار الفكر العربي


معلومات عامة لذيذة مافيش مانع منها
بريتانيكا – فنانون حول العالم – مكتبة الشروق الدولية
بريتانيكا – القصص الخيالية و الحكايات الشعبية

قصص اطفال عربية
شركة فيزو – وليد طاهر – الشروق (مسخرة طحن، صورة فيزو على غلاف رجله لابسه فردة شبشب واحدة و مذبهل)
فيزو اصبح سعيدا
فيزو يعرف يعرف
كان زمان مناظر مصرية- حلمي التوني – الشروق ، بجد كتاب جميل، فيه معالم مصرية كانت ظاهرة لغاية جيلي و من هم بعدي بقليل و للاسف بدت المظاهر دي تندثر. جيد جدا لكل اب و ام يريد لاولاده ان يعرف نتاريخ مصر بصورة مبسطة و عالية الجودة، كتاب افخر انه يكون في مكتبتي.
اول يوم في المدرسة – فاطمة المعدول – الشروق
حسين يرى كل شئ
شادي و هند في السوق
سلمى تعرف حقوقها – فاطمة المعدول – نهضة مصر
الدنيا زحمة جدا
سارة ترسم و تعزف موسيقى
أنا اسمع – هنادي دية – اصالة للنشر و التوزيع
أنا امشي
أنا اتكلم
أنا ارى
فراشة و دودة – اصالة للنشر
قطة و سمكة
شعور غريب – فاطمة شرف الدين – اصالة للنشر
تامر و قصة الشعر الجديدة – اصالة للنشر

دي كانت لسته باسماء الكتب اللي اشترتها و انصحكوا بقراءة تاكسي ، لون جديد او لون لم نعتاد عليه الى الان نوعا ما، ماهياش رواية بالمعنى المعتاد لكنها سرد لمواقف حقيقية نتعرض لها يوميا لما نركب تاكسي بس الراوي برع في نقلها و بيان اهم مقطع في الحوار الدائر بينه و بين السائق الغلبان و الغريب في الموضوع ان هؤلاء السائقين الذين لا خلفية ثقافية و لا وقت فاضي عشان يحللوا مجتمعنهم اثبتوا ان ما قالوه صحيح ميه ميه احسن من أي محلل تاريخي او ناقد اجتماعي او باحث اكاديمي، سبحان الله. كمان انصح بقراءة شكلها باظت بالذات للجيل المولود من 1973 الى1980 لان نفس المؤلف ذكر ده في كتابه، جيلنا اللي كان متعود على سينما الاطفال كل يوم جمعة و ماما نجوى و بقلظ و تاكسي السهرة و غيرهم من اشكال الثقافة في ذلك العصر القديم نسبيا. كتاب الدم المقدس و الكاس المقدس كمان مثير للتساؤلات و الجدل بشكل كبير جدا ، نفس المؤلفين دول كنت شفت لهم الفلم الوثائقي اللي عملوه في اوائل السبعينات من انتاج البي بي سي و وضحوا فكرة ان فلم او رواية شفرة دافنشي لم تكن الاولى من نوعها للتساؤل حول فكرة ما اذا كان سيدنا عيسى له ذرية حية الى الان. موضوع خطير جدا لانه لو اثبت صحته فيها انهيار لاساس الكنايس كلها او اغلبها في العالم بالذات البروتيستانتية و بعدها الكاثوليكية.
كتاب جمال بدوي عن مصرالفاطمية اثار انتباهي أنا لانه فيه تحامل شديد على الدولة الفاطمية لكن له عودة لاني تصفحت اوله بس و لم اكمله و أنا واقفة. ضاع عليا كتاب مروان كنفاني و اللي عباس العبد كان اشار عنه في مدونته . كتب باولو كويلهو كده تبقى كملت كلها عندي هي و كتب نجيب محفوظ. كتاب سيد القمني كان غالي اوي فاضطريت اني اشتري بس الاسلاميات و بس لانه كان اشمل عن الباقي، و كتاب محمد عمارة كان عنوانه براق اوي بس اول ما شفت انه هو اللي مالفه توجست خيفة و لما قريت التاخير اللي على ضهر الكتاب تاكد لي تحيزه الغير ظاهر و ان كان الكتاب كويس نوعا ما ان الواحد يتعرف على معلومات زيادة و اقلها انه يتعرض لوجهة نظر مش موضوعية. كتب المسيري كلها عجبتني جدا لدرجة اني وقفت اقراهم ولا يجيي ساعة بحالها، وجهة نظر جديدة يا ريت الناس تعقلها لكن برضو لم اتبحر بزيادة.
كان نفسي الاقي وكالة عطية بس كانت خلصانة او مجتش اصلا مش فاكرة السبب يعني اوي. قصة الخرز الملون لسلماوي قصة حقيقية لذلك اعتقد انها حتكون شيقة. طبعا مهما بعدت عن التدريس مقدرش ابعد عن كتب و قصص الاطفال و الكويس اني لاحظت مؤخرا و اخيرا اهتمام دور النشر العربية باصدار قصص من نوعية جديدة و نظيفة زي اللي سبق و ذكرتهم فوق. شركة اصاله اللبنانية ابهرتني بتنوع مصادر التعلم للغة العربية و القصص المختلفة للمستويات المختلفة اللي بتقدمها و اكترحاجة عجبتني ان اغلب القصص المعروضة من صميم ثقافتنا يعني مش ترجمة عن كتب اجنبية، ده اللي كان نفسي اشوفه من فترة.
طبعا الرحلات الكتابية المعرضية دي لم تخلو من منغصات اهمها وجود كميات رهيبة من الكتب الغثة و الغير مفيدة و للاسف هي تلك الكتب التي يقبل عليها اغلب الناس لدرجة ان الكثير من البائعين لما كنت اسالهم عن كتاب يقولوا فيما معناه لو كنا عارفين ان حد ممكن يهتم بكتاب زي ده كنا جبنا منه . كمية كتب متخلفة من نوعية " كيف تضعين المكياج المتقن و عزومتي و سفرتي و حبل غسيلي و شنطتك لونها ايه النهاردة . أنا معنديش مانع ان يطلع كتب كده بس مش مئات منهم و تطغى على حساب الكتب الاكثر اهمية، للاسف تدل على مستوى تدني الثقافة و نوعية الاهتمام للناس حاليا.
الشئ الاخر اللي اصابني بالذهول هو كمية الكتب الدينية و من يصاحبها من بائعين، اولا احب اؤكد اني مرحتش هناك بطوعي، أنا كنت بدور على دار نشر معينة و لقيت نفسي دخلت مكان كله رجالة بدقون لنص كروشهم و جلابيات ميني جيب خالص نظرات الشرر او اقلها التساؤل ماذا تفعل صابئة مثلي في مكان عام من دون عباية او نقاب و كمان لابسه الوان و حاطة مكياج و اكسسوارات؟؟ يا للهول . والله ده اللي حسيته من نظرات عنيهم، يعني حتى كعادة البائعين مافيش حد منهم دعاني لقسمه الظاهر من باب اني مرة و مينفعش يتعاملوا معاها، طبعا الحمدلله لاني اول ما اكتشفت اني دخلت القسم السعودي و المصري المشابه ليه كنت عاوزة اطلع بسرعة و لما طلعت لقيتني دخلت القسم الايراني اللي هو على راي المثل مااسخم من ستي الا سيدي. كتب دينية برضك بس شيعية اغلبها الا فيما ندر عن التاريخ او الفن و الادب الايراني الحديث. يعني كان نفسي اسال أي واحد من الطائفتين، معندكوش أي نوع ثقافة اخر غير كتب دينية؟؟ يعني السعودية و سيبك منها بلد جديدة لا تاريخ و لا ادب و لا ثقافة و لا أي شئ يمكن يتكتب عنه و حتى الجغرافيا مش صعبة يعني و التنقيب ممنوع حدوثه و ممنوع الكلام عنه. طيب ايران دولة و كان لها حضارة قديمة و كانت امبراطورية، معقولة مافيش أي شئ يتحدث عنها و عن جمالها و فنوناها و رسومتها و انجازتها على مر العصور، معقولة كله الامام الفلاني و الامام العلاني و هلم جرا؟؟
اااااااه يا قلبي خليك ساكت
و لا كله كوم و كتب سلسلة مش عارف مين ، كلها تحت العنوان ده
من وحي محاضرات عمرو خالد (فقة الوضوء، فقة الغسيل "متعرفش انهي غسيل ايه بالظبط" ، فقة قص الشعر ، فقة البتنجان ، قصة حياة فلان ابن علان و بين قوسين العلامة و الحبر الكبير و كمية كتب لما قرات عنوانها قلت والله نصيبة بالكيلو. و لقيت شابة مصرية تجيلها 21 سنة بس على درجة من الهبل ما شاء الله حياتها لونها بمبي خالص و مسخسخ كمان، بصت هي على كتب من وحي عمرو خالد و راحت لقيتهم رخاص و صغيرين (الكتاب لا يتعدى حجم الكف و صفحاته فيها ميه و الف فتوى و درس و عبرة) راحت شارية المشنة كلها و فرحت قوي و قالت لصحبتها ولا اختها كده ابقى كملت نص ديني ياااي عمرو خالد مجموعته كلها عندي مش مصدقه نفسي. كنت عايزة اقلها يا فرحة العزول فينا لما تبقى دي ثقافتك.
طبعا الكتب الدينية التانية كانت عناوينها مصايب مصايب و الناس في العجايب، اشي الاهوال و اشي الافعال و اشي كيف تعرف ان ربنا راضي عنك؟؟ طيب بالذمة ده كلام؟؟ و عناوين حاولت احصرها و اكتبها بس بعدين استخسرت الحبرو الوقت و مجهودي في اني اكتبهم.
برضو كان في كمية كتب عن اليد الخفية لليهود من اول موضوع فلسطين الى موضوع مين سد بلاعة الشارع و ما النتائج المترتبة على انقطاع الميه عن البيت. في مكتبة سورية كانت كل كتبها عن اليهود ، شهود يهوه، المسيخ الدجال، الايادي الخفية و الايادي السمينة و الايادي المجهولة و طراطيف الصوابع السودا و مين اكل البالوظة للعرب لدرجة اني مقدرتش استحمل و سالت البائع قلت له كل كتبكم عن اليهود او اسرائيل و مافيش مواضيع تانية؟ قالي كيف مافي عندي كتاب عن الصوفية، قلت له حلو هاته اشوفه، لقيته نظرية الصوفية التامرية و مذاهبها المنحطةو دسائسها و كيف انها ملعوب اسرائيلي يهودي دخيل على الاسلام بغرض تخريبه؟؟؟؟؟؟؟؟؟؟؟؟؟؟؟؟ طيب اعمل أنا ايه دلوقتي؟؟ قلت يا راجل كل الكتب دي طيب و فكرك ليه معرفناش نحرر فلسطين لغاية دلوقتي و لا الجولان، اتضايق جدا و قالي الجولان مانها محتلة!! رفعت حواجبي وقلت الله امال الاحتلال الاسرائيلي ده ايه؟ قالي احنا مش معترفين باسرائيل فبالتالي مش معترفين باحتلالها. طبعا الشاطر وقتها كان يلمني من على الارض من كتر الضحك. قلت طيب كتر الكتب عن اليهود و كل ما يتعلق بهم ليه، فقالي عشان نحاربهم و نعرف كل شئ عنهم!! سكت و سيبته و مشيت و أنا في عقل بالي بقول مش غريبة عالنظام السوري انه يحارب عن طريق من مكاتبهم، نظري يعني، من يوم حرب 1973و هما محاربوش و لا اعلنوا سلام يعني حاجة غريبة يا جدع حالة اللاسلم و اللا حرب اللي هما فيها دي و نفس الوقت مافيش مرة سمعت ان فيه عسكري سوري ضرب بمب عيد بالغلط على أي موقع اسرائيلي ؟؟؟؟؟؟؟؟؟؟؟؟؟؟؟؟ ممممممممممم، شئ مثير و يدعو لرفع علامة تعجب كبيرة بطول سقف الاوضة.
على قد ما فرحت بالكتب اللي جبتها على قد ما اصيبت بحالة يأس مضافة لحالة الاكتئاب اللي بمر بيها دلوقتي من تدني مستوى الثقافة الموجودة و المطلوبة حاليا. الاسم ان فيه ناس بتشتري كتب لكن الحقيقة انهم كتب و لا لها قيمة و الغرض منها زيادة التغييب العقلي و الفكري للقارئ من اول ما يكون عنده خمس سنين لغاية ما يكون عنده مليون و لا حياة لمن تنادي.
صدق سعد زغلول لما قال، مافيش فايدة يا صفية.
أنا بقول اهئ اهئ اهئ و اثقافتاه و اعلاماه و امصيبتاه
تحياتي

16 comments:

مصطفى اسماعيل said...

انا مش عارف انتى متضايقة ليه من المكتبة السورية
انتى عندك ادنى شك ان التدنى اللى احنا فيها ده سببه اليهود لعنة الله عليهم
شىء غريب انتى بجد ياصفصف

انا سمعت عن كتاب وليد طاهر وفعلفن عايز اجيبه

محمد عمارة يا شيخة
حرام عليكى

انا للأسف ماقرتش لعبدالوهاب المسيرى قبل كدة
بس اكيد هقراله

باولوا كويليوا ماعنديش ليه غير الزهير والخيميائى واحدى عشر دقيقة
واظن كفاية اوى عليه كدة
:)

وانا قريت لخيرى شلبى رواية واحدة واظن انى مش هقررها





تعرفى
فى معرض الكتاب اللى فات
واحد صاحبى كان ضايع منه راس المال المجلد الثانى
فكان بيدور عليه فى المعرض
ولجل حظه كل ماندخل قاعة نلاقى اخونا بتاع الدقون دول
انا بموت على نفسى من الضحك لما اتخيل انه ممكن يغلط ويسأل واحد منهم على الكتاب ده
بس هو كان رافع شعار
لف وارجع تانى


مبروك الكتب
عقبال ما يجيى بقا معرض الكتاب عندنا

محمد عبد الغفار said...

قرأت اربعه من كل ما ذكرتى

أبوشنب said...

هههههههههههه

معرض كتاب هنا في الدوحة

ههههههههه

اول مرة اعرف انهم بيعملو معرض كتاب

دول كبيرهم يخلصو الراية والملاحق اللي وراها قراية

عموما ندور عليه السنة الجاية

Anonymous said...

أنا بحقد عليكي بقى أنا قاعد ألف على أعمال الحلاج بقالي سنة و مش لاقيه و إنت بكل بساطة كده تجيبيه
جتنا نيلة في حظنا الهباب

بالنسبة لموضوع الدقون في المعرض اللي فات كانوا جناح المجلس الأعلى للثقافة مع الإخوة دول فدخلت دار منهم أشوف لقيت كتب عن المؤامرة الليبرالية و المؤامرة العلمانية و المؤامرة الإشتراكية و المؤامرة الصوفية و المؤامرة الشيعية و المؤامرة البهائية و الغريب إن يا أخي طلعوا كلهم في الآخر يهود فسألت صاحب الدار ماعندكش كتاب عن المؤامرة السلفية
:D
و طبعا الجولا مش محتل إنت عندك شك في كده و لا إيه

بالنسبة لمجموعة الكتب كلها جميلة جدا كتاب المجالس المحفوظية هايعجبك جدا
عقبال ما ييجي المعرض عندنا

Aardvark EF-111B said...

قالي احنا مش معترفين باسرائيل فبالتالي مش معترفين باحتلالها

عفوا بس دي فلسفه؟؟
أنا لا أعترف إن البحر مالح يبقى أشرب منه؟؟

هي دي كمان مؤآمره؟ و للا أنا إللي علماني متصهين؟

^ H@fSS@^ said...

يا مصطفى
هو مكنش عندي شك بس من كتر ما قريت عناوينه جالي شك ان احنا فعلا واقعين تحت مؤامرة
بص محمد عمارة قلت لك مش بحبه بس قلت من باب العلم بالشئ او حتى من باب تعرف عدوك بيقول ايه

يا محمد يا ريت كنت تقول يمن هما الاربع كتب
بجد اثريني برايك فيهم

اهلا بأبو شنب
على اساس ان هنا تعني انك في الدوحة فانا مستغربة لان دي السنة ال18 للمعرض و بيعملوا عليه اعلانات من قبلها بفترة و كمان معاده معروف في اوائل شهر ديسمبر
فات عليك يا راجل

يحي المصري
الحلاج و صاحبة الحلاج تحت امر حضرتك
ليك عليا ان شاء الله لما انزل مصر المرة الجاية الكتاب يكون عندك و اعتبره عربون صداقة م شمحتاجة عرابين
:)
انا بقى اللي كنت داخية على الكجالس و وقت لما شفته تقريبا شهقت
بس من غير تقلية ملوخية

ارضفارك اي اف 111بي
بص انا الا الان بحالو استفهم عن فلسفة الراجل اللي قالي كده مفهمتش بس انت فهمتني مشكور
انت جبت الجون
و لعلمك انت او اي واحد يقول ان الجولان محتل يبقى علماني متصهين
تبا لهم

تحياتي للجميع

ذو النون المصري said...

انا اهتميت جدا بالقراءه عن معرض الكتاب في الدوخه باعتباري مهتم اصلا بالقراءه عموما
انا قريت من المجموعه كلها كتابين فقط
فيرونيكا تقرر ان تموت
و اليد الخفيه للمسيري
و نفسي الاقي اي عمل اخر لباولو كويلهو
انا فطسان علي نفسي من الضحك من كلامك عن المعرض السلفي و كل الكتب عن المؤامره و الصهاينه و خلافه و كلام الاخ السوري
و الله حكاية الكتب الاكثر رواجا دي تعتبر مصيبه ثقافيه و شكل مصائبنا هتطول اكتر و اكتر لاننا لسه للاسف تافهين ثقافيا

Anonymous said...

حفصة

وش البوست ده حلو علي مش هاحقد عليكي كبرت في دماغي إني أدور على أعمال الحلاج لغاية إما ألاقيها و وجدتها
مش من رياض الريس و الطبعة غريبة أعمال الحلاج و الغلاق لونه فوشيا بس مش مشكلة لقيته و خلاص

محمد المصري said...

البوست ده جميل أوي

بس يا بنتي أنا مش وصيتك على أعمال أدبيَّة لبهاء طاهر ويوسف إدريس ؟!

ليهم طبعات في دار الشروق !

وكمان كان مهم تشتري كتاب المسيري : رحلتي الفكرية في البذور والجذور والثمار

عموماً بلاش تقطيم :) تتعوض إن شاء الله

عقبالنا

Dr. Diaa Elnaggar said...

قبل أي حاجة شاكر لك على إضافة اسم مدونتي في قائمة ناس وعالم عندك، وكانت مفاجأة حقا لي.

بعد كده سؤال صغير: مين السفلة هناء و محمد حسن دول؟

التدوينة ممتازة، ومليئة بالنقد الساخر الذي معك حق فيه:

لقيت نفسي دخلت مكان كله رجالة بدقون لنص كروشهم و جلابيات ميني جيب خالص نظرات الشرر او اقلها التساؤل ماذا تفعل صابئة مثلي في مكان عام من دون عباية او نقاب و كمان لابسه الوان و حاطة مكياج و اكسسوارات؟؟ يا للهول .

أما كلامك عن المعروض الهائل من الكتب الدينية وتهافت الناس على شراءه فقط فينطبق عليه مقولة: الحر تكفيه الإشارة.

بس هو سؤال صغير تالت: حتلحقي تقرأي كل الكتب دي عقبال ما يجي معرض الكتاب القادم؟

سعيد جدا بتدوينتك هذه

عميق تحياتي

ضياء

^ H@fSS@^ said...

ذو النون انت بس شاور على كتب باولو و حتلاقيها كلها عندك بأذن الله
و اذا انت كنت فطسان على روحك من الراجل السوري فانا كنت متبعترة على الارض ولا اللي مشي عليا فيل


الف مبروك يا يحيي
كنت ناوية اعيرك النسخة اللي عندي و انا قلبي بيتقطع
و قلت كله يهون حتى اخليك تقراه و تحكيهولي عشان معندي شوقت اخلص الكتب او خايفة ملحقش اخلصها:)

محمد افندي المصري
صدقني يا باشا ملقتش حاجات لبهاء طاهر غير قصة هي اصلا عندي و اما عن يوسف ادريس مكنش فيه شئ له هناك
اعتقد اغلب الظن ان دار الشروق حصلت لهم مشكلة في شحن كميات من الكتب و ملحقتش توصل المعرض زي ما حكى لي المسؤول عن القسم بتاعهم
و لكن حعتمد عليك انك تيدين كتبه اقراها و لو عجبتني حبقى اشتريها

د.ضياء يا فندم احنا اللي نتشرف بوجود رابط مدونة حضرتك عندي هنا
ادعيلي ان شاء الله الحق اقراهم
نوعام عنديش هنا حاجة تانية تتعمل غير القراءة بعد انتهاء ساعات العمل الرسمية و من ناحية اخرى لو مخلصوش مش مشكلة
يمكن مشتريش السنة الجاية و ان كان اشك اني اقدر اصمد قدام سحر الكتب

تحياتي للجميع

نسيت اقول ان مكتبة الاسكندرية كانت جايبة كتب جيدة جدا و مستواها الفني كان عالي اوي
و الحاجة الاجمل كانوا عاملين سيديهات عليها كل مخطوطات المكتبة بطريقة تخيلية
يعني اللي مش قادر يزور المكتبة لو اشترى السي دي كانه زارها بنفسه
والله فرحت انه في نوع من التفكير الخلاق بيحصل
كنت خلاص بفقد الامل

Anonymous said...

بمناسبة الجولان مش محتل

وزير الثقافة السوري بيقول الجولان ستعود 2008 و القدس 2009

يللا هو الكلام يتقاس بالمسطرة

hartaka said...

ازيك يا حفصة
واللة الى انت بتقولية الواحد دايما يشوفة عندنا فى مصر بس العن طبعا

محمد عمارة للاسف بيكتب علشان يسترزق وخلاص والى بيغيظنى انة بيدعى الاستنارة
ويكتب عن رواد التنوير الدينى مع انة قفل فخفت انى اقرالة حتى الكتب بناعة حياة جمال الدين الافغانى ومحمد عبدة لحسن يغير فى التاريخ

كتاب ماذا حدث للمصريين ممتع جدا
وانصحك تجيبى تكملة البحث دة فى كتاب
عصر الجماهير الغفيرة
لنفس المؤلف
وفية تفسير جميل جدا عن سبب تدنى الثقافة فى مصر ومستوى القراءات الى بيقراها الناس دلوقت

أحييك على إختياراتك

^ H@fSS@^ said...

والله لو رجعنا لعصر التصريحات المستهبلة دي زي ايام اواخر الستينيات يبقى ان شاء الله على اواخر 2009 و حتكون سوريا كلها متاخده لكن طبعا
المثل بيقولك علم في المتبلم يصبح ناسي

اهلا بهرطقة والله كنت ناوية اشتري عصر الجماهير الغفيرة بس ملحقتش و كان خلص محمد عمارة بان لي من قبل ما افتح الكتاب تحيزه و اصلا معروف نوعية توجهاته لكن الكتاب قلت مافيش ضرر منه على اساس الحمدلله اني ممكن اميز بين الحقيقي و الكذب
من اول ما امسكت الكتاب لقيته كاتب في اخره " بل اننا لن ندرك تيارات الصحوة الاسلامية المعاصرة الا بادراك جذورها في هذا التاريخ"
فسالت نفسي اي صحوة اسلامية دي بيتكلم عليها؟؟ و صدق ظني

تحياتي

انحلت سيور العربه وسقط المهر من الاعياء said...

بون سور حفصه


اتمنى تكون انبسطتى وتكون كل الكتب عجبتك

............
اسجل انحيازى لمحمد عماره على عكس سير حوارك وقناعاتك التى احترمها بالطبع فهو قامه فكريه اصيله ولكن مشكلتنا هو كما نقلتى عن ذكى نجيب محفوظ هى الكهوف الفكريه والانطلاق من ايدلوجيه معينه معاكسه لاتجاهات معينه على طول الخط حتى مع حياديتها الغير كامله لان الحياد فى الاصل هو الاكذوبه الكبرى لكل اصحاب الايدولوجيات فكل اصحاب كهف رضوا بالاقامه فيه وليس لهم القدره على التواصل بعقل مفتوح مع الاخر المختلف الابما يخدم فكرتهم قبولا او رفضا

مشكلة مجتمعنا العربى او الثالث بشكل اعم هو عدم تمكننا من من التخلص من افكارنا الموروثه لتبنى قيم جديده اكثر ايجابيه فى التعامل مع الاخر على ضفته
ربما يكون لى عوده

لاستكمال الحوار وعرض وجهة نظرى با ستفاضه
..............


تحياتى

.....................

بعد اذنك يا حفصه

تحياتى للاستاذ دانتى المصرى
......................

انا اعشق كل طقوس المغاربه

وبالذات الحشيش
ههههههههههه

كنت عاوز اكمل فى موضوع الفاطمين والمغاربه وفيه علاقه ما بينهم لان الفاطميون قدموا من المغرب فى الاصل بس صاحبة المدونه نزلت بوست بسرعه

تحياتى

^ H@fSS@^ said...

يا عم الجحيم
بونجور عليك و رحمة الله و بركاته
يا سيدي سجل تحيزك انت حر و انا حرة وانت صح و انا صحة
لطن صدقني لما بشتري كتب اتجنبية بلاقي ان الكاتب فعلا حيادي و بيتناو لموضوعه بحياديه تامة
نفسي الاقي كاتب عربي يكتب عن موضوع متعدد الوجهات و يبقى غير انحيازي
ما علينا
بالنسبة لدانتي المصري
انت ممكن كنت تعلق ف ينفس الموضوع عادي و هو بتوصله ايميلات بكل التعليقات لانه مشترك في الموضوع لكن انا عن نفسي سبت البوست اللي فات حق قدره
حلوة حق قدره دي
يعني هو كان بوست صغير و مافيش تعليقات كتيرة عليه و بناءا على ذلك يا فندم تقرر انزال هذا البوست الجديد
تحياتي