احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Thursday, December 13, 2007

الاخوان المسلمين الاخوان الفشارين

كنت على وشك تحميل تدوينة عندي، اصلا كنت محتارة في اتنين لكن قبل ما احمل أي شئ قلت اخد لفة و فوجئت بالتدوينة دي عند بيسو اعز الله مقداره و بغض النظر سواء دي كانت تحليلاته الشخصية او اخبار مؤكده ميه ميه لكني منعت نفسي من الضرب و اللطم على وشي بمليون صرمة . يا بيسو لست وحدك من كان اعمى، لست وحدك من اصبح مغفلا و ان كان على اكل الحلاوة فده معناه ان احنا اكلنا حلاوة لما قلنا يا بس و يمكن يكون عندي سكر دلوقتي.
طول عمري مكنتش بحب التجمعات النسوية للاخوات المسلمين و أنا في ثانوي، من اول الاجبار على حفظ القران من غير ما افهمه، الى فرض زي معين علينا و احنا رايحين الدروس ، الى التهكم من جانب الابلة السخيفة لو واحدة فينا كانت مدلعة نفسها شوية، الى هنا حقول ان ده كان شعور يالطبيعي بالاشمئزاز من كل ما ينتمي للمسجد و العاملين فيه . أنا بحب اروح مسجد على كيفي ده اذا قررت اروح، واقعد فيه زي ما اقعد برضك على كيفي. كل ده ايام اعدادي و ثانوي.
اما الان وعيي بالاخوان بقى اكبر، و كل ما احاول اثق في أي شئ جايلنا من ناحيتهم تطلع ثقتي دي على فاشوش. و كل ما الواحد يقول ان الجيل الجديد الاخوانجي يمكن يكون احسن من اللي قبله يطلع لا،بالعكس يطلع اوعر و امكر و افهم و اذكى لانه متربي على النظام الاخواني بكل تلافيفه ده اولا ، و لانه مضاف اليه احدث عناصر التكنولوجيا ده ثانيا.
و مش عارفة ليه كل ما اقرا حاجة عن الاخوان المسلمين تيجي في بالي عدة امثلة يمنعني الادب من ذكرها .
على العموم مش حطول اكتر من كده بس اللي يحب يعرف قد ايه هو كان واكل الطاطورة ومتنيل بالاوي يقرا تدوينة بيسو.
لنا الله، الغزو الأخوانجي الشرس قادم فلنا الله.
ده رابط تدوينة بيسو اقروا و اتهنوا على الهبل يا اي حد حط بانر لمنعم و كان فاهم ان الحكاية كانت فعلا حرية للغير مهما اختلفوا عني

21 comments:

hartaka said...

واللة حتى اسم الناس دول بيخلينى عايز ارجع
حتى ايام مكنت متدين فى يوم من الايام قبل الخلاص
:)
مكنتش بميل ليهم مشعارف ليية شعور داخلى كدة بالقرف
وانا ضد فكرة انهم متواجدين علشان ليهم شعبية ومنظمين والكلام الى الناس حافظاة دة
الموضوع ببساطة فزاعة عاملها الريس للغرب علشان ميجوش للحكم فسايبهم يبرطعوا براحتهم
وكمان علشان شعبنا شعب اهبل اى حد يشوفة بدقن ولا مساك مصحف ولا سواك خلاص يبقى نبى
حقيقى عندى رغبة دفينة انى ارقع واحد من دول علقة سخنة
يمكن اكثر من اى ضابط شرطة

^ H@fSS@^ said...

عارف يا هرطقة بجد انا مصابة بخيبة امل مش طبيعيةعندهم قدرة على التلون و الخداع جبارة
هوا ده السلام في نظرهم
مش طبيعي
دول غلبوا الشيعة في تطبيقهم لمباد التقية
مراوغات مراوغات
يعني مقززة
اللي مش قادرة اصدقه ان منعم يطلع يقول ان المدونات كانت علمانية و دلوقتي بقت اسلامية
حتى دي حندخل توجهاتنا فيها و نقسم ده ايه و ده مين؟
حرام انا زهقت
و بعدين على حد علمي وائل عبتس مثلا مش علماني و غيره كتار
منين منعم يجيب الكلام ده ويقولوا و لا كانه عالم زمانه؟؟
مش فاهمة
بس الشئ الوحيد اللي توكد لي انه خلاص لا امل مهما كان في الاخوان
مشفتش خداع و مراوغة و تحايلات بالشكل ده
والظاهر انت كمان وقعت تحت سلطانهم زمان و شفت تصرفاتهم عاملة ازاي
تحياتي

محمود سعيد said...

انا عايز أسأل حضرتك سؤال :

قبل السؤال أقدر أقول لحضرتك إنى إخوان

السؤال :

هل أنا مراوغ ومتحايل ومخادع ؟

(عجبنى فى كلامك : اوعر و امكر و افهم و اذكى ، لإنى شايف ده مديح مش شتيمة)

منتظر أجابة حضرتك بشدة ، علشان أكمل تعليقى :-)

محمود سعيد said...

بالمناسبة أنا لم يسبق لى أن سمعت أو قرأت أو شاهدت منعم بيقول إن التدوين كان علمانى والحمد لله بقى إسلامى ...

فهل ممكن حضرتك تقولى لى قالها فين وإمتى علشان أفتح بعد ما كنت أعمى

لو حضرتك سمعتيه أو بيسو ، إسمحى لى أقولك أنا مبكذبكيش بس عايز دليل (أظن ده طلب مش كبير)

ومش عارف اللى كتبه منعم ده هل معناه إنه بيناقض نفسه مثلاً ولا معناه إيه ?

Aardvark EF-111B said...

أؤيد كلامك رغم إنه إسطوانه مشروخه, أنا فقط مستغرب إنك إكتشفت تدوينة بيسو مؤخرا فقط, هي في رأيي أحسن ما كتب بالعربي على النت من 3 شهور على الأقل

^ H@fSS@^ said...

ارضفارك
كلامي مكرر بالفعل بس زي ما قلت بحاول كل فترة اني يكون عنجي امل او اعطاء فرصة للتغير بس مافيش فايدة بالنسبة ان لسه بس اللي عارفه بالتدوينة و ده لاني بلف كل فين و فين للاسف

محمود سعيد
لو عاوز تستوثق من المصدر بتاع كلام منعم اسال بيسو او وائل عباس


تحياتي

انحلت سيور العربه وسقط المهر من الاعياء said...

العزيزه حفصه

منعم ليس شيطان

لاانكر وجود اخطاء جوهريه فى الذهنيه الاخوانيه وانهم فى طور الافول واعتقد ان هذا موجود فى كل الذهنيات الموجوده ف المحيط العربى عموما ان الخلل فى الاصل اننا كعرب لانصلح فى الاصل ان يكون لنا حياه ممكن تقولى اننا متخلفين بالفتره وليس هناك اى امل اننا نكون غير كده سواء على يد الاخوان او اليسار او اليمين او الناصريون او الشيعه او الوهابين الاشكاليه ابعد من الاخوان الاشكاليه اننا شعوب لاتجيد شىء الاالردح والتمحك فىالايدلوجيات وتحول كل شىء جميل الى قبيح
فاليسار فى كل العالم فاشل فشل ذريع

روحى مثلا شوفى تشافيز بيقول ايه عن ان الناس منتخبتوش مدى الحياه لرئاسة الجمهوريه قال ان المجتمع لم ينضج بعد للاشتر اكيه؟؟؟
هذا ما يريده اليسار لافرق بينه وبين الاخوان؟
احاجدا

اما بخصوص منعم هو شاب يحاول ان يخلق لنفسه توجه بعيد عما نشا عليه استطيع ان اقول لكى ان منعم يمر بازمة صراع نفسى عنيف كحال اىشاب مصرى مش عارف طريقه منين وهو من المنبوذين من اطراف فاعله بالجماعه ومنعم عمره قصيره على ما اتوقع مع الاخوان لانهم فعلا مفلسين شانهم كشان المقدسات اليساريه والهرطقات الليبراليه ومدعى الثقافه والكفاح والحناجر ومن مدونين يريد ان يكون لهم دور فى المشهد الهزلى العربى وان يشار اليهم بالبنان لانهم مالهمش لازمه وكفى فى عمليه ماسخه ليس له لون او طعم او رائحه ممكن تقولى ناس فاضيه زى حلاتى

عزيزتى المحترمه

انها ازمه جيل وازمة شعب وازمة هويه وازمه هواء وازمه فى المراحيض العامه وازمه فى كل شىء وليس ازمة منعم والاخوان منعم شاب مظلوم كشاننا جميعا

الان انا اؤيد الحزب الوطنى بشده والرئيس مبارك وضد
منعم
والاخوان
وعباس
وجميع خولات مصر
والناصريون
والمسيحيون
والشيعه
والوهابيون
والسنه
واليسار
واليمين
والعرب
والاكراد
ونفس حسنى ينفخ الجميع لانهم فعلا هلافيت لاحق لهم فى الحياه لان مافيش حد اصلا نضيف كلهم اوساخ وحسنى انضف من اليسار والاخوان بالفعل

الىالامام يا ريس

لقد اثبت لى انك بالفعل حكيم

فليس افضل لهذا الشعب سوى الجزمه
افضل شىء لهذ الشعب ان يظل دوما منبطحا رافعا بنطاله

اسمحيلى وانا على الارجح فىايامىالاخيره بمصر

اناابعث بتحيتى الىالسيد الرئيس مبارك

وابعث بكفرى الى جميع حنجورى مصر ومدونيها بتوع الاشتغالات اللى التدوين بقا السبوبه بتاعتهم من الصحف العالميه واللى مصلحتهم الشخصيه فوق اى شىء وموضوع مصر هو مصباح على بابا السحرى
اوصيك سيدى الرئيس بالحفاظ على مصر من الاوساخ والانجاس من كل الخلفيات
هذا الشعب بالفعل سيدى الرئيس غير ناضج ولاامل ان ينضج كما العرب عموما ارجو منك سيدى الرئيس ان تسلم مصر للامريكان ليحكمونا او اى شعب اوربى متحضر ليعلمونا من اول وجديد

كيف نكون انسانا حقيقيا
هذا بعد ان تنتهى حياتك

لانك اصلح من يحكمنا حاليا
وتحكم امثال
عاكف

ورفعت السعيد

وكمال خليل
وكمال ابو عيطه

واسامه الغزالى حرب

والمدونين الارزقيه
اللى بقوا عالمين على حسابك يا مصر

وزغردى يا انشراح
وزغردى يااللى مانتش غرمانه








ا

محمود سعيد said...

:-)

لم أجد لدى وائل عباس أو بيسو مصدراً لكلامهم

كنت سألت حضرتك سؤال قصدت منه أقول ...

إننا عندنا ثقافة التعميم أو الـstereotyping

الدمايطة بخلاء
البورسعيدية ...
الإسكندرانية ...

الإخوان فشارين

وتعليقاً على الجحيم

متهيألى الحكيم حسنى مبارك ، عمره الإفتراضى إنتهى من زمان

يحيا السيد الرئيس الحكيم جمال مبارك :-)

Unknown said...

عزيزتي

لا هم إخوان ولا هم مسلمين

^ H@fSS@^ said...

و هل معنى اني جبت سيرة منعم بشئ سلبي يبقى انا بقول انه شيطان؟؟
مش شايف ان دي قوية اوي يا جحيم
يعني الكلام لازم يبقى من نوعية يا اطخه يا اكسر مخه؟؟
يعني لازم منعم يبقى ملاك او شيطان مينفعش يكون انسان له غلطاته و احساناته؟؟
مظنش انك قرات تدوينة بيسو لانه بتحليله باين ان منعم هو المتحدث الرسمي الجديد للاخوان و بالتالي كلامنا عليه هنا مش على شخصه لكن على ايديولوجية الفكر اللي هو بيعبر عنها
و سمعني احلى سلام لعيلة مبارك كفر مصيلحة المنوفية


استاذ محمود سعيد لم تجد عند وائل عباس او بيسو مصدر لكلامهم؟؟؟
مممممم
يعني هما ابتدعوه؟؟ تبا عليهم اللعنة
هل سالتهم و لا اكتفيت انك قرات كلام تدويني و خلاص؟
لو سالتهم و ردوا قالولاك احنا بنخرف ابقى ايدني الرابط زي ما انت تعبت نفسك و جبت رابط مقالة منعم
و مشكور مقدما وبالنسبة للاخوان و سؤالك اذا كنت انت كذا وكذا فحقلك حاليا انا لا اثق الا باتنين فقط و اعتقد حتى انهم مش اخوان وان كانوا متدينين و مش حذكر اساميهم عشان يمكن ده ياثر سلبا عليهم لكن انا بحترمهم جدا و متاكده دائما من خلواجندتهم من مصالح تصب في بركة الاخوان

حسن الهلالي
اذا كانوا هما لا اخوان ولا مسلمين طيب نعالجهم ازاي من الفصام ده؟؟

DantY ElMasrY said...

حل مشكلة مصر هو التخلص من المصريين
هاتنتهى المشكلة ويعم الإحساس بالراحة
ومن باب التعميم المخل
:
حل مشكلة الإسلام هو التخلص منن الإسلاميين
ودا اقوى حل وأفضل حل
وبالمرة اليساريين هايطلعو فى شراشيب المقشة اللى كنست الإخوانوفى أقرب عربة قمامة
وارمى
ثم بعد ذلك ليس إلا التغريب او الهلاك

انحلت سيور العربه وسقط المهر من الاعياء said...

استاذى العزيز دانتى المصرى


احيك

برافوووووووووووووووووووووووووووووووووووو

لنا قؤيت تعليقك حسيت براحه غريبه يا خى

بجد تحياتى

Aardvark EF-111B said...

لا قيمه للفروق الأيديولوجيه بين كل الفئات الوارد ذكرها في التعليقات, طالما اشتركت جميعها في نفس مجموعة المفاهيم التعبويه و التحريضيه مع إنعدام القدرة على طرح بدائل أكثر فاعليه قابله للحياة ناهيك عن التطور

http://myantime.blogspot.com/2007/09/blog-post_7693.html

islam said...

http://2ade.blogspot.com/

محمد عبد الغفار said...

هو انت بنيتى وجهة نظرك بعد سماع رد عبد المنعم على لكلام ده ولا قبله؟؟

هل حريه التعبير تشمل حريه استخدام الألفاظ الوارده فى مقال بيسو؟؟

اخيراً الأخوان مش الهة

^ H@fSS@^ said...

يا دانتي اذا الحل نرمي المصيين في البحر و بالمثل نرمي الاخوان المسلمين في البحر يبقى مافيش حد حيفضل في البلد
امال الرئيس يحكم مين؟؟

جحيم خليك ورا دانتي كده فرحان على كل قواله و مبسوط اوي
ربنا يزيدك يا سيدي

ارضفاركقريت تدوينتك و علقت عليها و هي حقيقية ميه ميه و تصل لصلب الموضوع


محمد عبدالغفار
بنيت وجهة نظري يا سيدي من طول تعامل معاهم ف يمختلف اوجه حياتي و طول عمري بتلدغ منهم
و عشان ازيدك من الشعر بيت والدي نفسه كان زمااااااان اوان مسلمين و انا عشت معاهم و شفت منهم كتير و مش انا لوحدي
اما عن حرية التعبير و الالفاظ اللي مستخدمها بيسو فدي تروح تتناقش فيها معاه
انا لم بحط رابط مش حسيب كل حاجة في مقالة معينة و امسك في الفاظها
هو حر يكتب و حسابه عند ربنا لو غلطان
انا هنا بتكلم عن فكرة و عن اسلوب تخطيط لم يكن الهدف منه تدوين شخصي ابدا
انا مش حروح اعدل على بيسو و اقله اكتب عدل احسن لك يا محمد لاني انا مش ححاب حد يقلي اكتبي كدا و متكتبيش كدا
و بالنسبة لحق الرد لمنعم فهو عنده مدونته يكتب فيها و يقول كل اللي هو عاوزه و تاني حرجع اقول انا مش بتكلم عن منعم بصفته الشخصية
لكن بصفته التمثيلية بالنيابة عن الاخوان المسلمين

ارجو اني اكون وضحت وجهة نظري لكن لنا عودة و حوار زي ما انت تحب يا محمد

تحياتي

^ H@fSS@^ said...

الى اسلام
تؤ تؤ تؤ تؤ
كله الا انك تيجي تسيب رابط مدونتك بالشكل ده
انت لا قلت سلام و لا حتى هاي عليكوا

تفاعل معانا و سيبنا نعرفك مش بس تسيب لينكك
تحياتي

بحلم said...
This comment has been removed by the author.
بحلم said...
This comment has been removed by the author.
بحلم said...

ايه اليوم الغريب دة..ابتدي الصبح بمكالمة تليفون من صديقة كانت لا تتقبل الاخوان وقلبت اخوانجية-بما ان كل الناس كانوا وبقوا- لما اتجوزت اخوانجي
ونزلت بقي مدح فيهم م اللي قلبك يحبه..أقولها يا بنتي دول مايعين وكلامهم شبه المية لا طعم ولا لون ولا ريحة..تقوللي لااااا..دول ناس عاقلة وعارفين هم بيعملوا ايه
أقولها يا حبيبتي زيد زي عبيد زي الجن الازرق محتاجين نغير عقول..تقوللي ابدا..الأيام القادمة لنا..أقولها يا ضنايا لو مبارك عاوز كان نفخهم من بدري، دول بيأدوا مصلحة من يوم ما طلعوا يا حبة عيني، تقوللي دول ناس منظمين، ع الأقل لو مات قيادي منهم حييجي بداله عشرة علي نفس النهج
المهم نتيجة للصداع، اكتفيت بـ:هم..مم؟..ممممم!..امم
وبالليل، آجي أزور المدونة دي ألاقي الأخت حفصة ممطرة اللعنات علي ام رأسهم..يا اخواننا بالراحة علي عقلي، ف الآخر هم كيان زي أي كيان ف الدنيا، لا من واجبنا نسجدلهم ولا من حقنا نطخهم بالنار..أنا مش مؤهلة اني أحكم عليهم لأني مش مقربة منهم ولا فاضية أعرفهم، لكن كل ما أكرهه منهم الابتسامة المداهنة وتمويع المباديء، لكن بيحيرني قوي ، اني عمري ما شفت واحد محايد من ناحيتهم، يا اما كراهية دائما أو حب عبادة، والأعجب ان كل من يكرههم كان يوما ما معهم، وبالتالي كل من هو منهم، كان بيكرههم ف يوم أو متوقَع يكرههم بكرة
لكن يشفع لهم عندي، أن المتسلفين بيكرهوهم، والناس الغلابة بتحبهم
أنا ضد انهم يحكموا..وضد انهم يُضطهدوا وينكل بيهم
آسفة للاطالة، فقط كلمة أخيرة لمن يسب مصر وشعبها ويمجد الآن طواغبتها،أعتقد دة اختلال توازن ناتج عن مرحلة التوقف والتقاط الأنفاس..أنا فين؟..أنا مع مين وضد مين؟..أنا عملت ايه ف نفسي؟..مرحلة "بعد ما ادي وبعد ما خد" الشهيرة..الكفر بكل شيء، وركل أي فكر، وهز الكتفين استهتارا..مرحلة صعبة، أتمني أن يعود الوعي بقوة ف المرحلة اللي بعدها
تحياتي لحفصة ، وأتمني أن تأذني لي بالتواجد

^ H@fSS@^ said...

طبعا يا بحلم تواجدك مرحب بيه مش محتاج اذن
بس اذا كلامي وجعك معلش حقك عليا بس هي دي نظرتي للاخوان و مش ناوية اغيرها و انا مقدرش اكون موضوعية في موضيع معينة لان ثبت ان حكاية موضوعية دي بعيدة عننا في الوطن العربي شويتين
ايا كان ايه هما بس انا لا اتفق مع اي شئ هما بيعملوه و مش معنى ان السلفيين بيكرهوهم يبقوا حلوين
مش ده المقياس عندي
و هما اثبتوا في كذا موقف على مر العصور انهم بيتلونوا حسب ما تقتضيه مصالحهم و مستعدين يتحالفوا مع الشيطان نفسه عشان يوصلوا للعاوزينه
فما رايك سيدتي الجميلة؟؟
تحياتي