احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Friday, February 1, 2008

تاج غريب المضمون

هل توافق علي حذف خانة الديانه من البطاقه الشخصيه؟

المشكلة مش في اني اعارض او اوافق، الموضوع كله يتحل بحاجة بسيطة جدا، عدم الحجر على حرية المواطن في التغيير بين الديانات او عدمها من اصله و اذا ده حيسبب مشاكل يبقى نحذفها من اساسه و دمتم.


ما رايك في المثليين؟هل تري انها حرية شخصيه؟ هل توافق علي الاعتراف بالمثليين؟هل لك اصدقاء من المثليين؟

رايي انهم ناس و بشر زينا زيهم لكن تختلف اراءهم عننا في ذوقهم الشخصي و دي حاجة مقدرش افرضها على الناس بالنسبة للموافقة فانا مش فاهمة يعني لو تخيلنا ان كل الناس رفضت الاعتراف بيهم هل مثلا حيختفوا؟ لا ابدا حيفضلوا موجودين و ممكن يكتروا .




هل تعتقد بوجود اضطهاد للمسيحيين في مصر؟
اعتقد انه في اضطهاد لكن مش كبير اوي حتفضل في حكايات عن قصص للاضطهاد بس لسه في ناس كتار عايشين مع بعض بكل حب و حسن عشرة


من هو الشخص الذي تختاره لرئاسة الجمهوريه؟
عمرو موسى و اعتقد ان ده راي ناس كتيرة و الا مكنش استبعد من الخارجية و اترمى في الجامعة العربية



اذا قمت بتاسيس حزب سياسي ،فمن هم الاشخاص الذين سوف تضمهم للحزب ليشاركوك الحكم؟
تحديث مهم جدا
يسري فودة وزارة الاعلام
انيس منصور وزارة الثقافة
نجيب ساويريس وزارة الاقتصاد
وائل عباس وزارة الداخلية
زبيدة الحرملك وزارة الشؤون الاجتماعية
كلبوزة سمباتيك وزارة التموين و مستشارة الامن القومي
عباس العبد وزارة الكتب (شعارها كتاب لكل مواطن)
جدو العزيز وزارة الخارجية
هاني انتوك وزارة البيئة ومدير حديقة الحيوان و رئيس هيئة الرفق بالحيوان و مكافحة انفلونزا الطيور
يحيي المصري وزارة التربية و التعليم
حسن الهلالي وزارة الأوقاف و الشؤون الدينية
مصطفى اسماعيل وزير شؤون اعالي النيل و رئيس هيئة السد العالي وسفير مصر في اوغنده
محمد المصري محافظ الفيوم و مدير مهرجان القاهرة السنمائي الدولي و مندوب مصر الدائم في جامعة الدول العربية
سندريل وزيرالشباب و الرياضة و مندوب مصر في الامم المتحدة
نسرين بسوني رئيس هيئة الاذاعة و التلفزيون و السنما و المسرح بالمشاركة مع محمد المصري و كمان معاها هيئة تنشيط السياحة
ذوالنون المصري مدير المتحف المصري و المصنفات و رئيس هيئة الرقابة على المصنفات الفنية و مدير وزارة مصلحة الجمارك
دانتي المصري رئيس مجلس الشعب و نائب رئيس محكمة النقض و صاحب مصنع الاسمنت الوحيد في العالم كله
محمد عبدالغفار رئيس اتحاد المصري للكرة الطايرة و سفير مصر في انجولا
بنت القمر وزارة التعليم العالي و البحث العلمي و شؤون صغار الموظفين و هيئة الطاقة الذرية
ارضفارك وزير الدفاع و قائد المركبة امينوفيس للصعود الى زحل و رئيس هيئة قناة السويس و مضيق هرمز
الجحيم هو الحقيقة وزارة الزراعة و مدير مركز الاستشعار عن بعد
الرافتاني مدير مجمع اللغة العربية و رئيس جامعة القاهرة و الهيئة العامة لمترو الانفاق و التكتك
نوارة نجم مندوب وكالة رويترز و الاسوشيتد برس و مدير تحرير الاهرام و الاخبار و الجمهورية و الوقائع
مينا زكري رئيس مجلس ادارة مصر للطيران و هيئة الاتصالات السلكية و اللاسلكية (عشان عنده لاب توب و ماشي بيه طول النهار فيقدر يتابع حركة الطيران)؟
و باقي المدونيين هم اعضاء مجلس الشعب و الشورى و المجلس الاعلى للصحافة
بدوي الاول عشر رئيس جهاز المخابرات
هرطقة وزير الوزارة اللي بتراقب الوزارات التانية
و في اتنين مدونين مش حذكر اسمهم لاني بحبهم اوي
دول بقى حعينهم جواسيس لحسابنا على اسرائيل و اول ما يوصلوا ابلغ عنهم طوالي و ساعتها يوروني شطارتهم بقى



هل توافق علي مشاركة الاقباط و الاخوان في حكم مصر؟

اوافق على الاقباط طبعا لانهم مش داخلين الحكومة بصفتهم الدينية لكن الاخوان و لا ممكن ابدا لانهم داخلين بصفتهم الدينية و ده في ظلم لناس تانية اولهم المسلمين التانيين اللي مش متفقين مع سياسات الاخوان فما بالك بغير المسلمين؟




ما هي افضل مدونه زرتها؟
الوعي المصري و حجاب نقاب و اشياء اخرى




هل توافق علي الزواج من مطلقه؟
مينفعش ارد على السؤال ده بس حقول ومالها المطلقة؟؟



اذا انجبت ولدين و بنتين ، فاي الاسماء ستختارها لهم؟

مش حقول الاسماء الحقيقية اللي نفسي فيها لحن حد ينطس في عقله و ياخدهم مني لذلك الاسماء اللي حقولها هنا ممكن التداول بيها
ممكن اسميهم مسعد و عاطف و البنات تفيدة و شلبية


هل تعتقد ان توريث الحكم في مصر سيحدث فعلا؟

بص التوريث زي ما احنا متخيلينه مش حيحصل بمعنى ايه؟ بمعنى ان مبارك حيموت حتقوم انتخابات عشان يشوفوا مين يمسك الحكم بداله جيمي حيرشح نفسه عن الحزب الوطني و بما انهم اغلبية فحيكسبوا يعني حيكسبوا و بكده حتكون انتخابات نزيهة و حرة و راحت علينا بسبب اسباب تكنيقية، بس خلاص.

ما هو افضل انجاز لمبارك ؟ و ما هو اسواء سقطات حكمه؟
ممممممممممممممممممممممممممممممممممممممممممممممممممممممممممممممممممممممممممممممممممممممممش عارفة ده سؤال صعب صعب صعب جدا



لمن تمرر هذا التاج؟
لاي حد و لكل حد بس انا ليا سؤال
مين اللي بيألف التاجات دي؟ اصل كل مرة الاقي تاج عند مدون و يكون مبعوتله من حد طيب مين الفه من الاصل؟؟

مستشكرة جدا

25 comments:

محمد عبد الغفار said...

امور خلافيه حادة ، والأجابات أحادية النظره

خمسة فضفضة said...
This comment has been removed by the author.
خمسة فضفضة said...

السلام عليكم ورحم الله وبركاته

يا ستي التاج ده تاليف احمد الصباغ

http://ahmedelsabbagh.blogspot.com/
ومررة لنص الكره الارضيه

hartaka said...

بالنسبة لحذف الديانة
أوافق طبعا كل دول العالم المحترمة بتعمل كدة

المثليين قابلت بعضهم
اما الاعتراف بيهم دة فدى صعبة شوية احنا بردوا مجتمعات شرقية
بس الى اقدر اقولة انهم كدة علشان مشوهين نفسياً ولو اتعالجوا هيرجعوا ناس طبيعيين

طبعا فية اضهاد للمسيحيين
دى طبيعة الحياة
لو هما اكثر ممنا هيحصلنا نفس الى بيحصلهم

رئاسة الجمهورية ممكن ابراهيم عيسى
اما عمرو موسى دة كلب زى اى حد من
كلاب مبارك

افضل مدونة
حجاب ونقاب
الوعى المصرى
هيباتيا

افضل انجاز لمبارك
لاشىء
اسوأ سقطات حكمة
القضاء على الطبقة الوسطى

ممكن اتجوز مطلقة
ممكن

توريث الحكم اعتقد صعب شوية
الاخوان متغلغلين فى البلد كلها
واكبر انجاز لمبارك انة سابهم يبرطعوا وقضى على اى احزاب تانية ممكن تبقى بديل

مشاركة الاقباط فى حكم مصر
كمان 200 سنة

بالنسبة لحزب سياسى

جلال امين وزير الثقافة
محمود سعد وزير الإعلام
نجيب ساويرس وزير الإقتصاد

الباقى

مشلاقى حد عدل

^ H@fSS@^ said...

يا محمد و هل من المفترض اني ارد بالنيابة عن الشعب و تكون نظرتي شاملة يعني؟؟ طبيعي حتكون ردودي احادية النظرة
ابقى خد التاج و رد عليه و ناقشني


شكرا يا فضفضة
شكله التاج وصلك و انتي مبقوقة منه


هرطقة
شكرا لاجاباتك بس لو انت مختار ابراهيم عيسى فهو الان في قبضة الاخوان تماما
يبقى ايش فرق عنهم؟؟
انا بحب عمرو موسى و اييييييييه


تحياتي للجميع

Unknown said...

أختنا الحبيبه حفصه

أفضل مدونه (بعد معلمنا وائل عباس) أخجلتم تواضعنا
وجه كمان هرتقه وإداني ترقيه... شكرا يا جميل
إنما بقى وزارة الأوقاف والشؤون الدينيه ف
هع هع هع هع هع هع هع هع
إنتي عاوزه تجيبي ضلفها؟

Unknown said...

وعلي فكره وفي الواقع والذي منه
Hegab, Nekab and Other Trash
ترجمتها
حجاب ونقاب وزبالات أخري
علشان نتوخي الدقه يعني!!!!ه

karakib said...

اول قرار لوزير البيئة و مدير حديقة الحيوان
يوضع في السجن كل من رئيس حديقة الحيوانات و نائبيه و كل الموظفين من درجة مدير فما فوقها حتي الانتهاء من التحقيقات في نفوق 720 حيوان في الثلاث سنوات الماضية
-----------
يتم البدء بانشاء شركتين مصريتين قطاع خاص للنظافة في خلال اسبوع علي الاكثر و سيتم متابعة عملهم و محاسبتهم علي قدر نظافة الشوارع و سيتم التوسع في هذة التجربة بالتشجيع علي فتح شركات اخري تباعا
----------
اللي هيبني علي الارض الزراعيه أي حاجه ان شالله سور طوب ني هاحبسه هو و عيلته و كل اللي يعرفوه
---------
سيتم تخصيص ربع ميزانية الوزارة لمعالجة قضية قش الارز و ورد النيل و انشاء مركز بحثي علي اعلي مستوي للقضاء علي هذه الظاهرة و سيتم التعاون مع علماؤنا المصريين بالخارج
--------
السماح بزراعة التبغ في الاراضي الضحراوية المستصلحة حديثا بدلا من استيراده بمبالغ خياليه كل عام و سيتم هذا بالتزامن مع اطلاق مشروع اخر يمنع التدخين في الاماكن العامه و الحكوميه و المغلقة .. علي أن يتم تخصيص غرفة في كل هذه الاماكن للمدخنين
--------
وضع مشروع قانون لمناقشته في محلس الشعب في كيفية الحد من القاء المخلفات الصناعيه في النيل و ايجاد سبل أخري لصرف المخلفات ... مش شغل مجانين هو
مش هامنع انهم يصرفوا في النيل و انا لم اجد البديل
-------
كل القرارات السابقة و التالية ليست بناء علي توجيهات اي رئيس او اي شخص و لا انسب فضلها الا لمزز افكاري انا بس

DantY ElMasrY said...

رئيس مجلس الشعب ونائب رئيس محكمة النقض وكمان مصنع اسمنت ؟؟؟؟
موافق بس عندى شوية ملاحظات بصفتى شريك اساسة فى الحكم
انا الرجل التانى والتالت
وائل عباس وزير داخلية ماشى بس نضيفله محافظ سينا الشمالية
نلغى وزارة التموين ونشوف وزارة تانية لكلبوزة يعنى مثلا تبقى رئيس جامعة عين شمس وحلوان ووزارة الصناعة
سندرل ياخد كمان رئيس الاتحاد المصرى لكرة القدم
جحيم ياخد سفير مصر فى المغرب والبرازيل مع الوزارتين اللى معاه
انتوك
ينشال من وزارة الزراعة
ونلغيها اصلا
ويمسك مدير هيئة ستاد القاهرة الدولى ورئيس اللجنة الأولمبية المصرية وبطل مصر فى التايكوندو

DantY ElMasrY said...

بس وانا رئيس مجل ئعب مش هاقدر امارس دور تحريضى
بقلك ايه ممكن ابقى زعيم المعارضة ؟

karakib said...

يا عم دانتي
انتوك مش ماسك وزارة الزراعة
دول ادوني وزارة البيئة مش الزراعة :) حلوة البيئة
كله في خدمة الوطن يعني
عايز اقول لك كمان انه المفروض مجلس الشعب بيحاسب الحكومة و يقدم ستجوابات و حوارات و بتاع
يعني هتبقي زي الفل
و بما اني هاكون وزير
يعني سلطة تنفيذية او سلطة بلدي و انت مجلس شعب يعني سلطة تشريعية او سلطة بابا غنوج اقدر اقول لك انت ممكن تكون واحد من المحرضين عليا بما اني تنفيذية و انت تشريعية
و نزعق في بعض و جريدة الاهرام تصورنا بعدها و احنا قاعدين بنقزقز لب و نضحك علي جنب في البرطمان
نقوم نستغل نفوذنا و نقفل الاهرام و نفتح جريدة جديدة و نسميها الاهرامات
و بعد شوية نقفلها برضه

Unknown said...

و أنا مسكت المخابرات يا حفصة ؟؟
طيب أول حاجة حعملها حقبض على وزير الخارجية بتهمة التخابر مع الخارج و التعامل مع الدول الأجنبية

ووائل عباس مادام مسك الداخلية فاكيد أكيد أول قرار حيطلعه أن لازم عمليات التعذيب اللى بتحصل كلها فى مصر تتصور فيديو و تتحط على الوعى المصرى عشان يبقى كليب لكل مواطن و بكدة محدش يتكسف أنه اتعذب و يبقى قضينا على مشكلة الشكاوى من التعذيب

Hypatia said...

السينما والمسرح والاذاعه والتلفزيون مع محمد المصرى نتناقش وبعدين ننزل القرارات بتاعتنا

ــــــــــــــــــــ

نيجي بقي لهيئه تنشيط السياحه
اول قرار تسهيلات تامه لرجال الاعمال المصريين بالخارج و الداخل للاستثمار فى قطاع السياحه بمصر وعلى رأسهم نجيب سويريس وغيره من رجال الاعمال المصريين

خطه اعاده احياء شامله لسيناء وكل مدن البحر الاحمر

تغييرات جذريه فى المدن السياحيه الكبري وعلى رأسهم الاسكندريه والاستعانه بالخبرات الاجنبيه اللى طورت وعمرت دبي وان شاء الله حيكون عندنا اتناشر دبي

تسهيل السياحه الداخليه للمصريين محدودي الدخل

بالتعاون مع قطاع الاذاعه والتلفزيون"انا ومحمد المصرى"حملات اعلانيه ضخمه ومشرفه للترويج للمناطق السياحيه والسياحه العلاجيه فى مصر

بالتعاون مع وزاره التربيه والتعليم"يحيي المصري"رحلات مدرسيه مدعمه للاماكن السياحيه بمصر

ده كده عالسريع يا حفصه اصبرى كده امخمخ انا ومحمد المصري ونرتب الكلام بتاع الاذاعه والتلفزيون والمسرح والسينما


دانتى انا معترضه على تولى ساندريل اتحاد الكوره انا ارشح مصطفى اسماعيل
:)

DantY ElMasrY said...

قررت اقبل رئاسة مجلس الشعب اوكى
عدى اقتراح لوزير الداخلية وائل عباس
علشان يطور وزارة الداخلية لازم يستخدم التكنولوجيا والأنيميشن فى التعذيب
ويقدم خدمة تعذيب مبتكرة يعنى مثلا يفرج المتهمين على افلام رعب طول الليل ويحطهم فى اوضة من غير حمام والصبح هايعترفو على اللى الباشا عاوزه بالظبط
من غير تعذيب يمسكه عليه بتوع حموم الإنسان
والمواط اللى مش هايعترف ممكن يخليه يقرا مدونة بضينة او يخللى واحد صاحبنا يبص فى وشه ويضحك ضحكته نياهاهاهاهاها
وهاطالب بوزارة لأدم المصرى
مثلا وزارة الموضة وشياكة الشعب

عين فى الجنة said...

انا ايضا موش عارف مين اللى بيألف الاسئلة دى وليه سموها تاج
انا ومعلش عشان السذاجة كنت فاكر ان التاج ده حيوصلنى على المدونة زى الايميل كده ولازم اجاوب على الاسئلة اجبارى يعنى وده خلانى معاند انى اجاوب
لكن لما نسرين بسيونى مررت لى التاج فهمت الحدوته وموش عارف ليه برضه بقيت موش عاوز اجاوب عليها
لكن انتى اجاباتك دمها خفيف كالمعتاد طبعا

بنت القمر said...

هههههههههههههه
برضه نسربن اختارتني وزيرة تعليم عالي
غريبه
هو انا شكلس ابله لا ايه
ماشي يا قمر
بس يعني ايه شئون صغار الموظفين هو انا مش وش كبار الموظفين
اما بالنسبه للذريه دي طبعا لعبتي عشان يبقا معايه مفاتيح الامن القومي
واشن حرب كونيه علي اي حد يدوس لي علي رجل اقصد علي طرف
هههههههه
مشكورة

Anonymous said...

التاج يا ستى عمله أحمد الصباغ

بس بيتهيألى لما أخدته من عنده كانت الأسئلة غير كدة شوية أو صيغتها لفت شوية لما لف بين الأيادى؟؟؟

بس الاجابة منطقية
مفقعنيش وانا باخده الا سؤال المطلقة
بس جاوبته برضه
وهم يعنى ناقصين حتة؟؟

امتيثثثثثثثثثم
حيكااااااام

ذو النون المصري said...

انا مدير للمتحف المصري!!! ماشي موافقين علي اساس اننا محبين للثقافه و الفنون و عندي ذائقه فنيه جيده و متفتح لكل اولوان الفنون يعني معنديش فيها حلال و حرام
و المصنفات الفنيه
برضه موافق علي اساس انها هتكسبني لاني مش هلغي اي كتاب او اي مطبوعه
لكن مش عارف الجمارك دي هعمل فيها ايه هي كمان
تكونيش بتستغليني فاكره اني كمان هلغي الجمارك
لا دا بعدك انتي و اي حد بيفكر يغرق البلد بالبضائع الصينيه اللي مغرقانا اصلا بالجمارك
ههههههههههههههههه

ذو النون المصري said...

انا صراحه مش متابع لحسن الهلالي لكن قريت فيها شويه و هي مميزه فعلا
و موضوعاتها جريئه و تستحق ان تكون في المقدمه

أبوشنب said...

طب ما تشوفي اي حتة وزارة على جنب كدة

وليكي عليا عزومة على سانتوتش طعمية عند الرغيف الساخن

S H A H said...

انتي مالك وقعتيني كدة من التشكيل الوزاري؟؟؟

تصدقي اتضايقت؟

و بعدين فعلا مين بيعمل التاجات دي؟ والله لسة كانت جاية على بالي قبل ما اقرا البوست

متهيألي واحد بيألفه و ييجاوب عليه و يكون قايل انا جايلي تاج و خلاص و اديها تمرير

و ابقي افتكرينا باي حاجة

^ H@fSS@^ said...

اشكر من هنأني سواء بالحضور او بالبرقيات بس احي اقول لشاه ارجوك متزعلش و ابقى فكرلك في وزارة و انا امسكهالك
بالنسبة لابوشنب
بقى يا راجل عاوز تشتري مني الوزارة و ترشيني ابيع الوطن بسنتوتش طعمية
طيب قول وجبة كنتاكي ولا حاجة
بس سنكوشت بس
حرام والله
رحرح الميزانية شوية لو سمحت
بالنسبة لبقية الوزرا
اشكركم لجهودكم و ارجكوا خليكوا عارفين ان ده حيكون في ميزان حسناتكم معايا و حتفرق جدا من اللي جه الاول من اللي جه متاخر للي مجاش خالص

خالص تحياتي

الأغاني للرأفتاني said...

هاهاها
مجمع اللغه العربيه يا حفصه هاها
دا انا يادوب بافك الخط
هاها منك لله

^ H@fSS@^ said...

ايه يا رافتاني
ده انت ابو اللغات كلها
بتتكلم مصري و اسكندراني و عنجليزي و بتكتب شعر
يبقى مين قدك يا سيدي

لا انت حتمسك المنصب خلاص

جبهة التهييس الشعبية said...

هااهااااااي
صفصف
عملتيني رويترز
:(
قصدك اني باكتم السر في بير؟