احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Tuesday, March 4, 2008

معا امام الله


لأني مؤمنة انه فيه أمل (تخيلوا لسه فيه شوية فاضلين) فقررت المشاركة(جالي امر من رامز بكده) في مبادرة معا امام الله

بصراحة مكنتش عارفة اكتب ايه بالظبط، يعني بانهي اسلوب او ازاي؟

هل اكتب قصة ذات دلالة؟ ولا احكي عن مواقف بتعدي عليا يوماتي و تتنوع ما بين تشدد مسلمين ضد مسيحيين و لا العكس و لا المواقف التانية اللي بيتكاتفوا فيها الاتنين و يبقى احلى من كده مافيش

احترت لكن محبتش اغلط غلطة هاملت و اخلي حيرتي و ترددي يفوتوا عليا فرصة المشاركة في الوقت الصحيح

معنديش اي حاجة اقولها غير ان نفسي فعلا الحكاية دي تنجح و الواحد يبقى عايش من غير ما يضطر يحمل هم حاجة مكنتش موجودة و لا كان لها اثر في مجتمعنا قبل كده

نفسي نتعامل مع بعض جوا مصر بكل سلاسلة و طبيعية

الغريب ان احنا بنعامل الاجانب بشكل كويس جدا و بنحترمهم هما او حتى اي حد غريب

لكن بنيجي عند المسيحيين " بتوعنا" يعني اهلنا من مصر و نتشدد طيب ليه؟؟

يعني زميلة او قريبة مترضاش تاكل من ايد او بيت مسيحيين زملاءنا في الشغل بحجة انها متضمنش هي حطت ايه و لانها مسمتش على الاكل، طيب و الاكل اللي بناكله في المطاعم بره ايش ضمنكوا هو محطوط فيه ايه؟؟ و ايش ضمنكوا ديانة الطباخ ايه؟؟ و لا حنخش لكل مطعم و نقله وريني البطاقة الشخصية بتاعت الطباخين اللي عندك؟؟

طيب ما فيه مسلمين ياما و مش بيتبعوا اي اسلوب نضافة و لا ليهم بيها علاقة؟؟ازدواجية المعايير هي اللي تعبانا

اصلا و انا بكتب الكلام ده دلوقتي محتارة ، فضلت افكر كتير في كل كلمة مكتوبة و كل شوية اكلم نفسي و اقول، لو كتبت دي فلان حيزعل مني، و لا فلانة تعتبرها قلة ادب، طيب لو هزرت شوية من باب التخفيف عن نفسي اولا و من باب تخفيف الموضوع على القارئ، هل حيعتبرني حد اني بستهبل في موضوع جد و لا ايه بالظبط؟؟

حتى الكلام في الموضوع الواحد خايف انه يغلط بكملة او بحرف ممكن يزعل منه اهله و صحابه

لكن

ارجو ان احنا، و اعني بها المسلمين و المسيحيين معا، ان نتوخى الحيادية، مش حلاقي مثال احسن من اللي ذكرته ماريان في القهوة العالية

و مش حلاقي تشبيه احلى من اللي وصفه اخر الحارة

ولا القصص اللي حكاها ابن عبدالعزيز و البقية طبعا انتوا عارفينها
هاني انتوك و عباس العبد

بالمختصر

عاوزة استريح من الهم ده

ارجوكوا

و على ذكر البطاقة الشخصية و ازدواجية المعايير اتفضلوا الموضوع ده
تحديييييث
لقد نسيت ان احط لنكات الاستبيان و انا اقول ايه اللي ناقص
اذا مسلم دوس هنا
اذا مسيحي دوس هنا

12 comments:

karakib said...

:)) هي دي حفصة :)

Unknown said...

اة والله هى دى حفصة

وهو دة حالنا

يارب خير

حفصة

فى سوال محيرنى

هو انتى

اللى كنتى عاملة زمان مدونة

اسمها

انا والكلام
وقلم بيستهبل

على باب الله said...

ًأملي كبير أن موضوع معاً أمام الله ينجح

لأننا فعلاً عمرنا ما كنا متعودين علي العصبية الدينية , اللي أصبحت بتزيد يوم بعد يوم

^ H@fSS@^ said...

و هو ده هاني
بس صحيح انا النهاردة فضلت ادور في بلؤك على البوست مش لاقياه مش عارفة ليه
يا ريت لو تديني الرابط بتاعه عشان احطه مع اسمك

واحد فاهم كويس اوي
متشكرة و البلوج اللي بتتكلم عليه كان بتاع مصطفى ابني في التدوين و للاسف مسحه لكن هو له بلوج جديد دلوقتي و ان شاء الله مش حستمسح
لو رحت لنكات المدونات حتلاقيه تحت اسم مصطفيتش

على باب الله
املي على املك و ان شاء الله امالنا كلنا


تحياتي للجميع

Alexandrian far away said...

أستاذه حفصه
صباح الخير
سامحيني
لكن بجد هي المشكله أن المسلمين والمسيحيين مش بياكلوا في بيوت بعض؟

يعني ممكن نعمل حمله جانبيه نقول فيها روحوا كلوا في بيوت بعض
أو شعار:
الدين لله والمطبخ للجميع
أنا متأكد أنك فاهمه أنا قصدي أيه
ومتأكد من طيب نوايا ونقاء سريرة كل من يشارك بهذه الحمله
لكن المشكله ان المشكله أعمق كثيرا جدا من رفض الأكل مع بعض

تحياتي وأحترامي

^ H@fSS@^ said...

صباحك نور يا استاذ اسكندراني
مؤكد المشكلة اكبر من ان احنا ناكل في بيوت بعض او مناكلش
لكن احب اوضح كذا نقطة
اولا خلينا نبتدي بخطوات صغيرة تكبر بعد كده و نغير بيها الناس حتة حتة و لا اننا نعمل مشاريع كبيرة تبوء بالفشل و منستفيدش منها حاجة غير اننا الاسم عملنا مبادرة
ده شئ
الشئ التاني ان من الاول قلت لهاني و لرامز ان احنا المسلمين يا ريت نعمل حملة مصالحة بيننا و بين بعض عشان نصلح المشاكل اللي بينا و نوضح المفاهيم اللي متبعها البعض من المسلمين و مبوظة العيشة علينا
انا لما جبت موضوع الاكل من عدمه عند بعض كان نوع من المثال و ليس الحصر يعني كفكرة بايخة بيعلق البعض عليها شماعة و قيس على كده امثلة كتيرة جدا لما بتتكرر مؤكد عاملة نوع من الشقاق او الزعل او ان كل واحد شايل في قلبه و ساكت
و ارجوك توضحلي ايه سبب المشكلة الاصلي اللي حضرتك بتشير اليه
و لو م شعاوزه يبان كتعليق انا ايميلي موجود في صفحة البروفايل و تقدر تبتعلي اللي انت عاوزه بالتفصيل الممل

و في الاخر يا ساكندراني
ادينا بنحاول
لعل و عسى

تحياتي

Alexandrian far away said...

صباح الورد يا استاذه حفصه
أنا رديت عليكي رد مطول شويه عند رامز
لكن حأقول هنا بأختصار أن المشكله هي التعامل مع المخالف دينيا من على ارضية ديني الخاص، المشكله أن الناس ترى في الأخر ديانته قبل اي شىء أخر، وترى الأتفاق والخلاف معه قبل أي شىء أخر من منطقة الديانه وليس أي شىء أخر
وهو على ما أرى وعي زائف ومزيف


تحياتي وصباح الورد

Anonymous said...

عارفه يا حفصوصتى
انا شغاله فى مكتب تلات ارباعه مسيحيين
واحلفلك ان مافيه فرق مابينا
انا فى تعاملاتى العاديه عمرى مافكرت اسأل حد انت ديانتك ايه.. لأن سؤالى ده باعتبره تعدى على خصوصيات ماليش فيها
انا اسال واحد لو هناسبه بس غير كده مش هاممنى
حلوه قوى موضوع المبادره دى

^ H@fSS@^ said...

استاذ اسكندراني
انا شفت تعليق حضرتك هناك و علقت عليه بس اذا كان رد حضرتك معتبرة مطول فاصبر لغاية ما تشوف ردي، تقريبا ينفع يبقى معلقات
:)

ونكوك المكوك
وحشتيني
اخبار الاعلانات ايه؟؟
انا بقترح تاخد يمقاولة لانك بتتعبي جامد اوي
نيجي بقى لموضوعنا
بصي يا ستي
يا ريت الناس تبقى كلها زيك كده
طبعا مش حننسى ان احنا المصريين بالذات بنعرف نفرق بعضنا من الشكل مين مسيحي و مين مسلم و حتى من قبل ما الحجاب يكتر في مصر
المشكلة ان البعض ممكن ميسالش عن يدانة غيره
لكن بشكل غير مباشر بيضطهده او يضيق عليه في المعاملة و السبب انه مختلف عنه

و مادام الموضوع عاجبك
ايه رايك تكتبي عنه ايه شئ و تنشريه بالصورة
احنا عاوزين ننشر الموضوع و نوضحه على اكبر مستوى

يلا انا متاكده انك حتكتبي عنه كويس
كفاية انك تكتبي قصة عن طبيعة العمل بينكوا و بين بعضكوا في الشغل
اهو حتى توري غيرك بالمثال الحي ازاي التعامل يكون و من غير ما ينقص اي شئ من دينك او معتقداتك
صح و لا ايه؟؟


تحياتي للجميع

MKSARAT - SAYED SAAD said...

حفصة ازيك
انت عارفة تقليقة مسيحى ومسلم دية
مش من شعبنا المصري ما طول عمرنا مسلم ومسيحي واحد لا حد قال انا مسلم ولا حد قال انا مسيحي
لكن متنسيش اننا مستهدفين من الغرب وبالاخص من اليهود لأنهم لحد دلوقتى مقتنعين ان ارضهم من اول دجلة والفرات لحد النيل
وبيقدروا يفكرا وينفذوا دة صح لألأنهم متحدين
يبقى الحل ايه
نجيب بعض من الناس الجهلة ونديهم افكار مسمومه تخليهم يتكلموا باسم الاسلام غلط وبعد كدة نروح للكنائس ونخلي البعض منها يكون داعي لأن المسلمين وحشين وفيهم وفيهم مين بقى المظلوم الشعب على فكرة انا اعز اصدقائي من المسلمين والمسحين ونقطة انت مسلم وانت مسيحي مش موجودة عندة لأننا احنا الاتنين عرب ومصرين في الاول
انا شوفت مسلمين متخلفين وشوفت مسحين اغبى منهم وللأسف كل يوم الافة من الاناس دول بيذيدوا
اللي اقدر اقلك علية اننا كل يوم في فكر جديد لتخريب المحروسة لأنها قلب العروبة ولو انتهت يبقى انتهى الوطن العربي
الموضوع كبير ومتاج كلام كتير وبراهين
هبقى اجبهالك في تعليق قريب ان شاء الله
تحياتي ومودتى

karakib said...

يا بنتي ده اول بوست عندي :) بس ما دام جطيتي لينكات باقي اعضاء المباردة يبقي خلاص الموجود يكفي :))

رجل من غمار الموالى said...

الشلام عليكم
دخلت استطلاع الرأى ده
كان صعب قوى
الإجابات الصادقة أحيانا بتهز صورة الانسان قدام نفسه
الإزدواجية فى الشخصية موجودة جوانا كلنا
يا ريت نقدر نتخلص منها