رسالة من القلب

جت و قالت لي: نفسي ارجع اكلمه

قلت لها مينفعش

قال لي ليه

قلت لها كده انتي قلتي خلاص

فكان لازم يبقى خلاص

قالت لي بس هي مش خلاص انا لسه عاوزة اقله كلام

قلت لها حتقوليله ايه يعني

قالت :حقله

"

نفسي احضنك و ارجع اخد راسك بين اديا تاني

نفسي ارجع اطبطب عليك و تحضني من تاني

اخرمرة شفتك فيها كانت عاوزة افضل ماسكه فيك مسيبكش

اناعارفة اني حشوفك تاني بس مكنتش متاكده

بس كنت عاوزة احضنك و اضمك ليا جامد جدا

للاسف كان حوالينا ناس كتار

و كانوا شايفين الدمع اللي في عنيا

و زمة شفايفي و تعصيبة حواجبي

كانوا شافين ان فيه حد بيموت و مع ذلك معملوش حاجة

انا مكنتش عارفة انت اللي بتموت و لا انا

ولا يمكن احنا الاتنين

انا اتغيرت

انا عارفة بس اعمل ايه

مفتقداك؟

جدا

و ربنا الشاهد عليا

اخاصمك ماشي

لكن نسيب بعض مش معقولة

لسه مش قادرة اصدقها

شغلت نفسي بحاجات كتير

بس مش حاسة باي راحة

حاسة اني ممكن اتجنن

عارف ايه المشكلة

انت مكنتش بس حبيبي

انت كنت ضنايا

و الضنا غالي

و انت غالي

و لسه غالي

انا بحبك

بس للاسف

في زماننا ده

ليس بالحب وحده يعيش المواطن الغلبان

"

بكيت لها

و بكيت عليها

و بكيت له و عليه

سيبتها و مشيت لانه اول مره اقرر اني لازم ادور على حد احمله مسؤولية فشل هدوء و استقرار وليفين مخلوقين لبعض

هي الدنيا ضلمة كده ليه؟؟

خريطتنا الثقافية

رابط وقع في ايدي و لا حدش صلى عليه، تابعته و قريت اللي فيه و فوجعت باللي فيه من معلومات على مستوى ثقافتنا و و تحضرنا
او قيمنا و طرق معيشتنا
و علشان اكون امينة في نقلي لمعنى الخريطة دي فهي بكل بساطة بتقول ان الاطلس المستقبلي ده ما هو الا موضح للفرق بين الاماكن بناءا على الثقافة و التكنولوجيا و بعض المواضيع الاخرى

الرابط ده خلاني اعرف ايه سر مشاكلنا دلوقتي، فيه توضيح لمستوى و قيم و طرق معيشة كل دولة و متلونة حسب تقدمها من تخلفها و معمول مقياس بالالوان لتسهيل عملية استيعاب الفروق بالزمن بين كل مكان و التاني
بصراحة أنا اكتأبت بعد اللي شفته، الفرق بين الدول و بعضها متفاوت أي نعم بس في الاخر فترة الفجوة اللي بينهم معقولة نوعا ما
لكن
اني اكتشف ان بينا و بين الدول اللي هي اصلا متخلفة مقارنة بالاخرى فرق لا يقل عن 400 سنة بل و يزيد فدي كانت خبطة جامدة اوي على النافوخ
في مقدمة الدول المتفوقة في مستوى الحياة و الرقي الثقافي تأتي الدانمارك و السويد و فنلندا و ايسلانده و دول عندهم اقل نسبة تخلف ثقافي و المقياس بيتكلم عن حسبة زمنية في حدود 0-9 سنوات
بعديهم تيجي كل من فرنسا و المانيا و ايرلنده و كندا و نيوزيلنده و الحسبة الزمنية عندهم من 10-19 سنة
بعد كده تيجي الولايات المتحدة الامريكية و استراليا وايطاليا و بولنده و بعض الدول الاخرى اللي بصراحة نظري ماسعفنيش على توضيحهم و دول حسبتهم الزمنية بين 20-49 سنة
بعدهم تيجي الارجنتين و تشيلي و بعض الدول في اسيا الصغرى بفرق زمني بين 50-99 سنة
نبتدي بقى نخش في الخطر
الدول اللي باللون الاصفر مقياسها الزمني بين 100-199و هما جنوب افريقيا و روسيا و فينيزويلا و كازاخستان و تركيا و اخرون
بعدهم باللون البرتقالي دول مقايسها الزمني من 200-399 سنة و هما زي الصين و ايران البيرو و المكسيك و منغوليا و الايكوادور
ثم
تاتي الفجيعة
الدول باللون الاحمر مقياسها الزمني من 400 سنة و ما هو اكثر
و هم بكل بساطة الدول العربية و الافريقية و الاسلامية في المجمل





ثواني بس علشان ماسكة قلبي لان جالي هبوط حاد في الدورة الدموية
الا مافيه دولة واحدة سواء عربية ولا اسلامية توحد ربنا و تبقى على الاقل اصفر، لا كله برتقالي و نازل، اه ياااني
طبعا الصورة بتكمل شرح لمعنى التقسيم الثقافي ده و بتدي امثله على شدة تباين المستوى الثقافي و الحضاري مثلا زي
1-مشكلة الرسوم المسيئة للرسول اللهم صلي و سلم و بارك عليه بين الدانمارك و بين العالم الاسلامي و العربي في المجمل
2- الفرق اللي بين تركيا و اوروبا الغربية هو اللي مخلي اوروبا متحفظة على انضمام تركيا للاتحاد الاوروبي
3- حتى اوروبا الغربية و امريكا بينهم فرق زمني و ده لان الاوروبيين شايفين ان امريكا متاخرة مقارنة بيهم لوجود مواضيع زي عقوبة الاعدام و نظام التامين الصحي و مواضيع الحفاظ على البيئة و ما يتعلق بها من اعادة تدوير المهملات


اضيف على كده انه لا عجب ان جنوب افريقيا تفوز بتصويت الاستضافة لكاس العالم ومش مصر و انه لا عجب اننا قدامنا مليون سنة مش بس 400 علشان نعرف نقوم و نفوق لانه مجتمعة فينا تلات حاجات كوننا عالم اسلامي يصرعلى العيش في الماضي بدل ما يفكر فيه، كوننا عالم افريقي تتنازعه الحروب و الامراض و الويلات السماوية منها و الغير سماوية، و لاننا عالم عربي اخيرا
يعني ليست قوة واحدة و لا اثنتان بل ثلاث قوى فتاكة
و بحسبة بسيطة على قدر علمي بالرياضيات
احنا دلوقتي سنة 2008 وناقص 400 تساوي 1608
مش ده بالظبط عصر الازمنة الوسطى المظلمة في اوروبا؟؟

عن بلال و هديل و جسد المرأة يوم ان اكتشفت انه سلعة و اخيرا و للاسف احمد مهنى

في خلال بضعة ساعات ولت تعرضت لعدة مواقف مجتمعة ادت كلها لبؤرة انصهار واحدة
الاول:
الفرق بين ان تكون بلال دياب و احمد مهنى
نبذة بسيطة عن كل شخصية منهم
بلال دياب هو الانسان الشجاع اللي قام وقف في خطبة رئيس الوزراء الشنعاء في حفلة في جامعة القاهرة و قطع عليه كلامه و قاله كلمة حق صادقة و حقيقية
و احمد مهنى لمن لا يعرف هو شخص يدعي انه شاعرولكن دعوني اولا اشرح لكم ما هي كلمة شاعر و ما تستوجبه من معطيات حتى ينتج عنها شعر. حتى تكون شاعرا فيجب ان يكون لديك جهاز عصبي وبالتالي يؤدي ذلك لحدوث ما يسمى بالشعور و بالتالي انتاج ما يسمى شعر، لكن اعتقد تسميه شاعر هي مجحفة في حق تركيبة البناء الجسماني لهذا الشخص. فلا هو شاعر، و لا هو عنده جهاز عصبي و لا هو بيحس من اصله.
الفرق بين الاثنين ان الاول انسان و راجل و التاني مالهوش علاقة بجنس البني ادمين اصلا و اعتقد انه حتى في عالم الحيوان فروح المساعدة دائما ما تكون موجودة في حالة حدوث خطر

عارفة ايه اللي حيتقالي في التعليقات من دلوقتي، اولها اني مستفزة و بحب اهاجم و اني مش المفروض اني اتكلم عن شخص بالطريقة دي، اصلي شفت الكلام ده كتير، لكن الشاعر افندي خلق اعدائه بنفسه و خرج ناس كتيرة عن شعورها لدرجة خلق جبهة راي عام ضده مشفتهاش من قبل كده في اوساط المدونيين من مختلف الاتجاهات و الديانات و الخلفيات الفكرية ووحدنا كلنا ضده من اقصانا الى ادنانا


مؤكد ان دمي اتحرق لما شفت كلام الباشا
و لكن قبلها فرحت ان لسه فيه شباب زي بلال
يا بلال مكنتش تقدر تاخر ظهورك لبعد تدوينة السخص اياه علشان تغسل المرار اللي في قلوبنا؟؟

الثاني
اصبحت غير مؤمنة تماما بنقاب و حجاب المرأة و لاسباب كثيرة يصعب حصرها هنا و لكن اشدد انها ليست المحور الاساسي في الحوار
نعيب على المتاسلمين انهم يصبون جل اهتمامهم على المرأة و جسدها و شعرها و مفاتنها و كل ما يتعلق بها، اذن من يهتم بالجنس اكثر؟؟
و من هو الذي لا يفكر الا بكيف سوف يتمتع بها و كيف يقي نفسه من شرها و اغوائها المزعوم؟؟
ظهرت مجموعات مكافئة في القوة و لكنها مضادة في الاتجاه فجعلت المرأة تتعري نهائيا كرد فعل متطرف هو الاخر لتغطية المرأة المبالغ فيه و الذي لم ينزل الله به من سلطان. و اصبحت الحكاية زي الكورة بيلعبوا بيها فريقين كل واحد منهم واقف على طرف النقيض من الاخر، حالة من التطرف خلتني اسال نفسي، طيب أنا فين من ده كله؟؟ مين اللي سمح لنفسه انه يستخدمني كاداة في حرب و أنا مش عاوزة اتعامل معاملة البيدق، أنا ملكة في كياني الخاص بيا. طبعا الغلطة الاساسية الاولى تقع على تشدد المسلمين في المبالغة في تغطية الست بكل السبل المتاحة لدرجة انهم هما اللي خلوا الناس تبتدي تقرف منهم و من تشددهم
طبعا مش كل الناس استجابت بشكل عنيف لتشدد المسلمين
لان للاسف الاغلبية قطيع و مريحة نفسها من مغبة التفكير و الخروج عن الاطار المسالم المرسوم لنا و بدقة و علينا اتباعه دون ان نجرؤ على حتى المساس بحدوده.
و طبيعي ان أي تشدد في ناحية معينة بتيجي عليه ردة فعل مكافئة له في القوة و مضادة له في الاتجاة
فدلوقتي الاتجاة بدى يظهر ناحية تحرير المرأة من معضلة اغطي شعري و لا لأ و وصلنا مرحلة اتفه اللي هي تغطية الوش و لا لأ و اللي فوجئت بناس بيفسروا ايات من القران على كيف كيفهم على انها وجوب فرضية الخمار.
زملاء ليا حيقولولي ان ردة فعلا تجاة الحجاب و النقاب طبيعية علشان نوازن الموضوع شوية و انا متفقة معاهم على كده لكن برضو لقيت اني مخنوقة بين مطرقة التشدد الاسلامي و سندان تحرير المرأة المبالغ فيه احيانا و حسيت انه ايوة صحيح لسه بدري علشان نكون وسطيين مش متطرفين لكن ملقيتش فيه أي مانع اني من دلوقتي افتح باب للوسطية و التوازن. ده مش تمييع مني للامور و لا أنا الشخص اللي بيحب يقف في الوسط و لونه يبقى رمادي متفحلق، أنا بكل بساطة عاوزة اكون طبيعية
يعني مش مجبرة اني البس لبس معين علشان ابين توجهاتي الفكرية ما بين متشددة او متحررة لاقصى درجة.
عمري ما كانت متحمسة لشئ بالدرجة دي لدرجة اني فتحت مجموعة كتاب الوشوش اياه لاني حسيت ان بؤرة الوسط دي لازم تتخلق و من دلوقتي
و لما اقصى اليمين واقصى اليسار يتصلح حالهم ساعتها يحلها الف حلال لكن على الاقل خلقت مكان للتوازن


الثالث
من اسبوع حضرت ورشة عمل للتوعية بمرض الأيدز و رفع الوصم المصاحب للمريض ، اجتمعنا بمدونيين عرب من مختلف البلاد. اخص بالذكر مدون سعودي اتكلم عن مدونة اسمها هديل الحضيف ، قال انها حاليا مريضة و للاسف فيما يبدو انهم مانعين عنها الرعاية المفترض انها تاخدها و ده لاسباب كتيرة، منها ان والدها كاتب اصلاحي بينادي بضرورة تغيير حاجات كتيرة في المجتمع السعودي و دائما ما تقابل اراءه بالرفض، زائد على كده ان هديل نفسها لها مدونة اسمها باب الجنة و بتكتب فيها بكل انفتاح و جرأة جديدة على المجتمع السعودي المنغلق نوعا ما جدا و الغير محتوي للمرأة ابدا.
لما اتكلم الزميل المشارك بالكلام ده مقدرتش اصدقه بكل سهولة لانه مهما بلغت السفالة السعودية المتمثلة في الحكومة مش حتوصل لدرجة انهم يمنعوا العلاج المطلوب عن انسان مريض ايا كانت خلفياته
و لكن
فوجعت و فوجئت امبارح بالليل من ايميل من مدون صديق (ارض فارك) بيبلغني بخبر وفاتها و في نفس الوقت لقيت بيلا كمان كاتبه عنها و متاثرة بتدوينة عبده باشا. علقت عند بيلا و سالتها اذا تعرف حاجة عن الموضوع و للاسف قد كان ان اهمال المستشفيات و تعمدهم عدم تقديم يد المساعدة ليها كان له اثر سلبي جدا على التعجيل بوافتها.
بصراحة أنا مش قادرة اصدق لان ده قتل عن سبق الاصرار و الترصد

وسؤالي هو

مين يا ترى حياخد بحق الوردة الفتية دي؟؟
مين حيحاكم نظام منحط اخلاقيا و سافل اجتماعيا و واطي نفسيا ؟؟
مين؟؟
ممكن اقول ان فيه شئ وحيد بعث عندي القليل من الامل؟؟ او رؤية مستقبلية للي ممكن يحصل في مجتمع بدى يخطو اولى خطواته نحو التفتح مع الاخر

الشئ ده ان كمية المعلقين عندها سواء معزين او من قبل كده متمنيين لها الشفاء كتيرة جدا

و نفسي راودتني اني اتخيل ان وفاتها بالشكل المتعسف ده ممكن تفتح باب ثورة هناك

ارجو ان جريمة قتلها متفوتش على خير و ميروحش دمها هدر

ارجو ان انا نعمل زي ما الايرلنديين عملوا بعد وفاة صحفية قررت كشف تجارة المخدرات في بلدها اسمها

فيرونيكا جورين

"
و مين يجز بايده الورد؟؟

يقص بقصد جناح عصفور؟ مين ؟؟

مين مين؟؟

مين يجري دموع عالخد؟؟
مين؟؟
يطفي بقساوة شعاع نور!!؟؟

مين مين!!؟؟

ايديه تفرح بالدم!!؟؟

بجرح ما عمره يوم يتلم!!؟؟

مين مين!!؟؟
"

مالنا يا بنات حوا؟
ليه مقهورين؟ لغاية امتى؟؟
لغاية امتى حنفضل مكتومين، متكممين متفعصين،
لامتى؟؟

تعايش مع الأيدز

قبل السفر

ماما: الأيدز؟ و انتي مالك ومال المرض ده؟؟ ربنا يكفينا الشر؟؟

انا: ما هو دورنا كمدونيين اننا نوعي المجتمع اللي احنا فيه بخطورة المرض و الاهم من كده كيفية التعايش معاه

ماما: و هو يعني انتي اللي جبتي الديب من ديله مافيش حد غيرك يعمل الشغلانة دي؟

انا: مؤكد انا مش لوحدي بس انتي خايفة من ايه؟؟

ماما: انا خايفة عليكي لتتعدي و ده مرض ربنا ينجينا منه.

انا: متخافيش المرض مش بيتنقل بالسهولة دي

ماما: مش عارفة انتي مش فاكرة انكل فلان نسيبنا اللي سافر اوغندا يساعد في العمليات الجراحية هناك و اتنقل المرض بس من ملامسته للعيانين؟؟

انا: ربنا يرحمه يا ماما و مؤكد ربنا حيرحمه بس لو تفتكري بقى نظرة الناس ليه كانت ازاي و ازاي قضى اخر ايامه لوحده مش بيشوف حد غير مراته و ابنه؟؟

ماما: ايوة المسكين الناس كلها نسيته و اتحاشت التعامل معاه و كانه عمل حاجة غلط

انا: اهو انا بقى و زمايل تانيين ليا حنحاول نغير نظرة الناس لمريض الايدز لانه انسان زيه زيناو لان مش كل مريض ايدز يبقى معناها عمل حاجة غلط و لانه حتى لو عمل حاجة غلط فلازم برضو نساعده و لازم نمنع انتشار المرض و لا ايه قولك؟؟

ماما: والله كويس بس برضو بخاف عليكي

انا: سلمي امرك لربنا انا مش مسافرة اجاهد في تورا بورا يعني

الى هنا انتهى حواري مع واالدتي في محاولة للحصول على اذن بالسفر لحضور ورشة عمل الامم المتحدة في القاهرة و اقدر اقول اني بديت اقنعها او بالفعل اقنعتها بوجهة نظر جديدة

بعد السفر

انا: بابا، انا عاوزة اعرف فين اقدر اروح اعمل اختبار الأيدز؟

بابا:(متفاجئ و مندهش جدا) خير كفى الله الشر؟؟

أنا: لا بس كنوع من الوقاية و احب اعرف ايه البروسيجر المتبع يعني

بابا: بصي انتي تيجي عندي العيادة و اخدلك انا عينة الدم و ابعتها مترمزة لمعمل تحاليل اعرفهم و من غير ما شخصيتك تنكشف لهم

انا : طيب ماشي كويس بس فلنفرض اني مش بنت دكتور طبيب و معنديش الميزة دي الانسان العادي بيعمل ايه و بيروح فين؟؟

بابا: ممكن يروح اي معمل تحاليل و من حقه ان يخفي هويته و يديهم رمز و المعمل يطلع له كود و لما تبقى النتيجة تطلع يبقى يحلها حلال، انتي طبعا مش بتسالي ليكي ، مؤكد لحد من صحابكيا خبيثة و بتخبي عليه، صح؟؟

انا: لا يا بابا، انا بسال ليا انا، انا عاوزة اعمل التحليل

بابا: (باين من صوته جزعه الخرافي و تخوفه من ردي و مما هو ات)طيب ليه بس يا بابا انت حاسة بحاجة؟؟

انا: لا مش حاسة بشئ بس المفروض اني ابدا بنفسي لو ناوية اوعي المجتمع اللي انا فيه

بابا: والله كويس بس ايه اللي قوم الموضوع في دماغك و ازاي مش خايفة ان الناس تظن بيكي ظن سوء؟

انا: ما هو ده اللي انا بحاول اعمله، ابين اني انسانة طبيعية و مع ذلك حاروح احلل و اعرف

بابا: ايوة طيب بس ليه

انا: ما هو يا بابا الورشة اللي حضرتها دي مش لازم تروح على فاشوش، هما اختاروا ناس مننا علشان كلامنا يكون اقرب للغة الانسان العادي مش كلام جرايد بعيد عن الانسان البسيط

بابا: طيب والله كويس و مين صاحب الفكرة الخطيرة دي

انا: المكتب الانمائي للامم المتحدة و اهم هدف من اهداف الورشة هو اننا نعلم غيرنا بساطة التعايش مع مريض الأيدز من ناحية و من ناحية تانية نشر فكرة التحليل كنوع من الوقاية نظرا لتفشي الامرض و عدم العلم بيه

بابا:ربنا يوفقكوا بس برضو تعالي لي العيادة و انا اعملك التحليل حتى علشان يطلع لك عليه تخفيض مع المعمل اللي بتعامل معاه

انا: حاضر بس انت مالك اتخضيت كده ليه؟؟

بابا: لا اصل مش كويس بنت في مجتمع شرقي تروح تعمل تحليل ايدز ، انا معنديش مشكلة بس اخاف عليكي من الناس و كلامها،يا عالم لو كان اب تاني كان عمل ايه في بنته لو قالت له عاوزة اروح احلل ايدز؟؟

انا: و انا كمان بس لاني فعلا لما اتوعيت اكتر من الورشة خفت شوية، انا مثلا بروح محلات تجميل كتيرة، صحيح بينضفوا الادوات بس بعد الورشة تخيلت لوبرضو اتنقلتي حاجة

بابا: خير ان شا ءالله ، مع السلامة دلوقتي

انا: مع السلامة

********************

يعني لما والدي و والدتي اتنين متعلمين و مثقفين و متفتحين مقارنة بالنسبة لاولياء امور تانيين و ده كان مقدار تخوفهم مني و عليا، و زائد عليها ان والدي نفسه دكتور، فما بالي بالبقية الباقية من المجتمع اللي لا اتعلمت و لا بتقرا و لا عندها ادنى نوع ثقافة؟؟

اوعدكوا اني اعمل التحليل و انشر تجربتي في ممرات المعامل و كيفية التعامل مع مريض الايدز او حتى الشخص اللي عاوز يحلل كنوع من العلم بالشئ

اعتقد مبدئيا انها تجربة مش سهلة

فلنا الله

و للمريض حق المعيشة و التعايش بكل حرية و خصوصية

مدونون اخرون كتبوا عن التعايش

شريف عبدالعزيز-العدالة للجميع

احمد شقير-حكاوي اخر الليل

احمد زيدان-احمد زيدان

محمود عزت- كوبري امبابة

منى زيدان- ببساطة انا

سارة زعيمي-كلمات من اجل التغيير

سعاد الخواجة- فراشة البحرين

هاني جورج- روبابيكيا

شمعي اسعد-قصاقيص ورق

احمد باعبود-العيش في السعودية

بسمة موسى-باقة ورد

منعم محمود-انا اخوان

ماريان ناجي-القهوة العالية

عصام حمود-حمود ستوديو

غادة عبدالعال-عايزة اتجوز

ترتيب الاسماء مالهوش اي معنى

انا كل اللي كنت بشوفه في طريقي كنت بشيله و احطه هنا

بس بجد انا فرحانة ان احنا الشعوب العربية العادية متجمعين على شئ هادف و كويس و بالفعل بنحققه

و ان احنا مش محتاجين لا زيد و لا عبيد و لا اي اتفاقيه و لا اي شئ من فوق علشان يخلينا نجتمع ببعض

فرصة جديرة بالتكرار على عدة مستويات

مالك يا مصر؟؟

عظيمة يا مصر يا ارض النعم

يا مهد الحضارة ......

استرجع كلمات الاغنية دي و كلمات اغاني كتيرة تانية و احزن

ايه اللي جرالك يا مصر؟؟

ايه اللي حصلك؟؟

مين دفنك بالحيا و احنا لسه عايشين؟؟

مين يا مصر؟؟

ردي عليا و جاوبيني، مين خانقك؟؟

ايه اللي انا شفته فيكي يا مصر؟؟

تراب خانق على كل حاجة فيكي و اسى في العيون و هدة حيل

و ربنا يكفينا هدة الحيل

ناسك تعبانة يا مصر

مين سمح للعشاوئيات تبوظ خلقتك كده؟

و ليه؟ ازاي كل حاجة عندنا بايظة و مالهاش نظام و تموت اي حاجة حلوة فينا؟؟

كل حاجة زنقة و زحمة و متعبة و متبهدلة، ليه بس كده يا مصر؟؟

دي تبقى نهايتها كده يا مصر؟؟

قومي يا مصر

قومي بقى خلاص

كفاية كده

يا شر شيل ايدك و كفاية بقى

دي مصر

قلبي عليكي يا مصر

و قلبي ليكي يا مصر

"

دور جواك تلقاها هي الصحبة و هي الاهل

عشرة بلدي بتبقى نسينها على البال مش سهل

يمكن ناسي لانك فيها

مش واحشاك ولا غبت عليها

بس اللي مجرب و فارقها

قال في الدنيا مافيش بعديها

مشربتش من نيلها

جربت تمشي في شوارعها و تشكي لها

"

و عمري ما حنساكي يا مصر