احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Wednesday, May 21, 2008

هي الدنيا ضلمة كده ليه؟؟


خريطتنا الثقافية

رابط وقع في ايدي و لا حدش صلى عليه، تابعته و قريت اللي فيه و فوجعت باللي فيه من معلومات على مستوى ثقافتنا و و تحضرنا
او قيمنا و طرق معيشتنا
و علشان اكون امينة في نقلي لمعنى الخريطة دي فهي بكل بساطة بتقول ان الاطلس المستقبلي ده ما هو الا موضح للفرق بين الاماكن بناءا على الثقافة و التكنولوجيا و بعض المواضيع الاخرى

الرابط ده خلاني اعرف ايه سر مشاكلنا دلوقتي، فيه توضيح لمستوى و قيم و طرق معيشة كل دولة و متلونة حسب تقدمها من تخلفها و معمول مقياس بالالوان لتسهيل عملية استيعاب الفروق بالزمن بين كل مكان و التاني
بصراحة أنا اكتأبت بعد اللي شفته، الفرق بين الدول و بعضها متفاوت أي نعم بس في الاخر فترة الفجوة اللي بينهم معقولة نوعا ما
لكن
اني اكتشف ان بينا و بين الدول اللي هي اصلا متخلفة مقارنة بالاخرى فرق لا يقل عن 400 سنة بل و يزيد فدي كانت خبطة جامدة اوي على النافوخ
في مقدمة الدول المتفوقة في مستوى الحياة و الرقي الثقافي تأتي الدانمارك و السويد و فنلندا و ايسلانده و دول عندهم اقل نسبة تخلف ثقافي و المقياس بيتكلم عن حسبة زمنية في حدود 0-9 سنوات
بعديهم تيجي كل من فرنسا و المانيا و ايرلنده و كندا و نيوزيلنده و الحسبة الزمنية عندهم من 10-19 سنة
بعد كده تيجي الولايات المتحدة الامريكية و استراليا وايطاليا و بولنده و بعض الدول الاخرى اللي بصراحة نظري ماسعفنيش على توضيحهم و دول حسبتهم الزمنية بين 20-49 سنة
بعدهم تيجي الارجنتين و تشيلي و بعض الدول في اسيا الصغرى بفرق زمني بين 50-99 سنة
نبتدي بقى نخش في الخطر
الدول اللي باللون الاصفر مقياسها الزمني بين 100-199و هما جنوب افريقيا و روسيا و فينيزويلا و كازاخستان و تركيا و اخرون
بعدهم باللون البرتقالي دول مقايسها الزمني من 200-399 سنة و هما زي الصين و ايران البيرو و المكسيك و منغوليا و الايكوادور
ثم
تاتي الفجيعة
الدول باللون الاحمر مقياسها الزمني من 400 سنة و ما هو اكثر
و هم بكل بساطة الدول العربية و الافريقية و الاسلامية في المجمل





ثواني بس علشان ماسكة قلبي لان جالي هبوط حاد في الدورة الدموية
الا مافيه دولة واحدة سواء عربية ولا اسلامية توحد ربنا و تبقى على الاقل اصفر، لا كله برتقالي و نازل، اه ياااني
طبعا الصورة بتكمل شرح لمعنى التقسيم الثقافي ده و بتدي امثله على شدة تباين المستوى الثقافي و الحضاري مثلا زي
1-مشكلة الرسوم المسيئة للرسول اللهم صلي و سلم و بارك عليه بين الدانمارك و بين العالم الاسلامي و العربي في المجمل
2- الفرق اللي بين تركيا و اوروبا الغربية هو اللي مخلي اوروبا متحفظة على انضمام تركيا للاتحاد الاوروبي
3- حتى اوروبا الغربية و امريكا بينهم فرق زمني و ده لان الاوروبيين شايفين ان امريكا متاخرة مقارنة بيهم لوجود مواضيع زي عقوبة الاعدام و نظام التامين الصحي و مواضيع الحفاظ على البيئة و ما يتعلق بها من اعادة تدوير المهملات


اضيف على كده انه لا عجب ان جنوب افريقيا تفوز بتصويت الاستضافة لكاس العالم ومش مصر و انه لا عجب اننا قدامنا مليون سنة مش بس 400 علشان نعرف نقوم و نفوق لانه مجتمعة فينا تلات حاجات كوننا عالم اسلامي يصرعلى العيش في الماضي بدل ما يفكر فيه، كوننا عالم افريقي تتنازعه الحروب و الامراض و الويلات السماوية منها و الغير سماوية، و لاننا عالم عربي اخيرا
يعني ليست قوة واحدة و لا اثنتان بل ثلاث قوى فتاكة
و بحسبة بسيطة على قدر علمي بالرياضيات
احنا دلوقتي سنة 2008 وناقص 400 تساوي 1608
مش ده بالظبط عصر الازمنة الوسطى المظلمة في اوروبا؟؟

32 comments:

Astronaute said...

بعد إذنك لو ممكن أعمل إعلان عندك

أيتها المرآة لا تتزوجى الرجل المسلم فهو مختون

جريمة ختان الأولاد

تعرف لأول مرة على الأضرار

شرح لن تقرئه فى أى مكان اخر

شارك و انشر الوعى لإيقاف الجريمه

http://freespacecraft.blogspot.com/2008/05/blog-post.html

Abdou Basha said...

بوست جميل ومهم يا حفصة
وان كنت مش عارف من اللي عمل الخريطة دي او إيه مصادر بياناته
إنما هي منطقية إلى حد كبير

M@RV3L said...

مفيش شك ان العرب والعالم الاسلامي كله في اخر الامم دلوقتي

لكن فعلا ايه هي المعايير اللي كانوا بيحكموا بها

سيبك من مصر...انما بلد مثلا زي الامارات او الكويت او قطر المستوى المعيشي فيهم متقدم جدا والمستوى الثقافي مش بطال

ازاي دول مثل جنوب افريقيا و البرازيل تكون سابقة لهم

كذلك بالنسبة للهند..فاحوال الهند مشابهة لاحوال البرازيل

اعتقد ان معايير التقدم والتخلف مطاطة جدا

Nah·det Masr said...

عزيزتي حفصة، كل ما أقرالك بوست احس انه لسة فيه ناس عقلها في دماغها. الأيميلات اللي بتجيلي والحديث مع الأخرين بيحسسني ان الشعب المصري نسبة كبيرة منه اتبرع بعقله للدجالين. بوست جميل ياريت حد يسمع...

karakib said...

أه طبعا احنا في القرون الوسطي
طبعا
من قبل الدراسه دي كمان

bluestone said...

بينا وبين اقرب نموذج للادمية 400سنة بس ؟؟؟؟
ده خريطة مش محايدة ابدا

عارفة يا حفصة
احيانا بحس اننا قدامنا 5000 آلاف سنة تانيين عشان نرجع بني آدمين او نقرب من اننا نبقى بني آدمين

الشكل الحالي مالوش توصيف

الحاجة اللي بتستدعي التفكير دلوقتي ..
نعمل ايه ؟؟
نمشي؟؟
نروح ننتمي لعالم اقرب شوية للبشر

ولا نستنى ونعافر ونحبط ؟؟

DantY ElMasrY said...

مش من باب المزايدة لو قلت اننا فى الفترة من 1200 الى 1400ميلادية مقارنة بأوروبا
بالنظر الى علاقاتنا كأفراد مع بعض وعلاقاتنا مع المؤسسات الدينية ونظرتنا الى حكامنا ونظرة حكامنا الينا
فأوروبا كانت خارجة من الحروب الصليبية مهزومة
ويحكمها بارونات يستمدون الشرعية من الكنائس
والكنائس تمارس ارهاب على الشعب وتحارب العلم والفن
احنا كدا بالظبط
والموضوع مش بناكل ايه وبنلبس ايه وعندنا عربيات امكانياتها ايه ولا قدراتنا الإتصالية ايه
قديما قالوا :
من أدمن الطرق أوشك أن يفتح له

أبوفارس said...

٤٠٠ سنه بس طب والله كتر خيرهم دول بيجاملونا..
سؤال أيه أخر أنجاز حضارى أضفناه كعرب (مسلمين ومسيحين) أو مسلمين (بما فينا من ترك وعجم) للحضاره اﻷنسانيه..؟؟
على المستوى المادى
أى حاجه فى حجم آله اﻷحتراق الداخلى أو الصمام الثنائى مثلا
أو على المستوى المعنوى حاجه فى مستوى أعلان حثوق اﻷنسان أو الدستور الفرنسى مثلا
أو المستوى الفكرى حاجه فى حجم الفلسفه الماركسيه أو البنيويه مثلا..؟؟
تعرفوا آخر أضافه للحضاره البشريه كانت أيه؟؟
مقدمه أبن خلدون..
وده كان من ٨٠٠ سنه..ولم يكن لها صدى على اﻷطلاق فى المجتمع العربى-اﻷسلامى..بل كانت بمثابه رقصه البحعه اﻷخيره -دى أشاره لباليه بحيره البجع وأظن الباليه حرام اﻷيام دى-.وحتى أبن خلدون قالها.."موات كامل" تأثيرها كان هناك فى الغرب مثلها مثل فلسفه أبن رشد..
ولله اﻷمر
......
أستأذنك سيدتى فى تعليق على تعليق.. M@RV3L
معلهش حضرتك تابعت اﻷنتخابات "البرلمانيه" الكويتيه اﻷخيره..شفت الحمله والنتائج..؟؟وعاوز تقارنهم بالبرازيل أو الهند أو جنوب أفريقيا...والله فعلا ٤٠٠ سنه مجامله..تحياتى وخالص تقديرى..خالد

Nsreen Bsunee said...

صفصف
بوست جامد جدا بس مشكليش صدمه يعني دول بيجاملونا على رأي الاستاذ ابوفارس
يا بنتى السعوديه لوحدها كاااارثه لازم تتظل باللون الاسود

الاستاذ مارفيل
يا عزيزى اى تقدم او ثقافه تتحدث عنها فى الكويت اعتقد ان مستوي المعيشه مالوش دخل بالبحث ده والا كانت السعوديه والامارات فى المقدمه
هنا فى الكويت المواطنين اغلبيتهم الساحقه مستوي تحضرهم وثقافتهم صفرررر
دول ميعرفوش ان شهر 12هو ديسمبر وشهر 8هو اغسطس وان مصر فى افريقيا ومفيش اى اتقان للغه ومفيش احترام لادميه العمال والخادمين
بس بس خليني ساكته
الخليج كله لازم يتظلل بالاسود


بس مصر عيب اوى على مصر اللى هيا فيه ده
الله يرحم الاسكندر الاكبر لو كان بيتنبأ بالمستقبل كان بني مدينته على الشاطئ المقابل فى اوروبا
:(

HafSSa said...

اهلا بملاح
اتفضل اعمل الاعلان مع اني مختلفة معاك في الراي و بانياه عن طريق مشورة من دكتور
بس مش مجال نقاشنا دلوقتي
اهلا بيك مرة تانية

عبده باشا
شرفتني يا فندم
انا كمان مش عارفة مصدر التحليل ايه
و صديق نبهني لانه ممكن يكون مش موضوعي
مثلا لان اوربا نفسها لسه عندها نسبة تعصب عرقي مش طبيعية كلن عن نفسي الخريطة دي لقت لها عندي صدى جامد اوي


مارفل
الكويت و قطر و الامارات فعلا فيهم اعلى معدل دخل للمواطن بس ثقافيا و تحضريا و اخلاقيا و حقوق انسان و حقوق مواطنه و طرق تفكير المجتمع كلها ازاي؟؟؟
مش بالفلوس بتتقاس الحكاية هي
كنا بقينا دول زرقا طوالي


اهليييييييين يا باشمهندس
عاش من شافك
صدقني على قد ما يبان ان ناس كتيرة بايعة عقلها
لكن فيه كتنار بدوا يظهروا و يتكاتفوا و المستقبل نوعا ما فيه وجه مشرق


كراكيب
هو طبعا مؤد احنا في العصور الوسطى من قبل الدراسة دي بس الحكاية عامله زي ما يكون حد طس وشك بشوية ميه فاتنبهت و في الاخر الواحد مش بيحب يسمع شتيمته بودانه
مش كده و لا ايه؟؟

بلو العزيزة
على قد ما بكرة شكله ميطمنش بس انا بقول نعافرو نستنى
اما عن الاحباط فهو حاصل لخاص
و اتعودنا عليه
معلش حتعدي بس بصعوبة


اهلا بدانتي
كلامك صحي ومافيهوش مزايدة
و صدقني ايدي ورمت من كتر الدق فهل من مجيب؟؟


ابو فارس لم نضف اي شئ بل اعتمدنا الاخد قانونا و المقاطعة عهرا
هو ده حالنا بكل بساطة


نيسو حبيبي
بصي يا ستي
الخليجيين ميعرفوش ان اغسطس شهر تمانية و ديسمبر شهر 12 لانهم ببساطةميعرفوش اسامي الشهور بالافرنجي
و انا مريت بالمشكلة دي لما جيتهنا كانت مصايب
اوافقك الراي على تظليل اغلب بلاد الخليج باللون الاسود
و حسرتي على مصر متتعوضش بكنوز الدنيا


تحياتي للجميع

karakib said...

لأ في الحاله دي هنسمعها طول الوقت
و هيمشي العيال الصغيرة تزفنا كمان
مش هانسي واحد بص لصاحبه عالقهوه و قال له
غالم تالت يعني ايه
و لما صاحبه شرح له و فهم
سكت شوية و قال له احنا مش عالم تالت
احنا عالم ولاد وسخه

Astronaute said...

شكرا يا صديقه

أتمنى ان تتابعى الجزء الثانى من الموضوع و سأحاول فيه أن أشرح أكثر الأضرار البشعة لهذا الإعتداء على السلامة الجسدية

و أراهن على إنى سأقنعك فى النهاية
إنتى و الدكتور
:))

تحياتى

Sampateek said...

و ماله البرتقالي؟
وحش؟
ده حتى موضة


تحياتي
متنسيش تغطيني و تصوتي

الدرويش المرووش said...

يا رب إرحمنا

إيه النكد اللى محاصرنا ده

الدراسه ده مغرضه و غير دقيقه و متحامله

إحنا زى الفل ومش ناقصنا حاجه

مع تحياتى
أبو الدراويش
من طابور العيش

زكرياء said...

ممكن من فضلك عنوان اقرب طبيب قلب و شرايين؟ الظاهر اني سأودع قريبا اسفا و الما من الفضيحة الملونة...احمر آآآآآه من الأحمر

رجل من غمار الموالى said...

السلام عليكم
طبعاً الموضوع دلالاته واضحة
على الرغم من الطرق الحسابية دى مش واضحة معاييرها قوى
..........
لكن أعتقد من الممكن لو ربنا رزق مجتمعنا المصرى بنظام حكم رشيد
ممكن ينصلح حالنا وننتقل فى غمضة عين لفوق ..فوق
..........
الظاهر أنا بحلم
أفوق واللا إيه ؟
.............
السلام عليكم

Migo Mishmish said...

طمنطيني 400 سنه بس تأخر طب ده كويس
هما مش بيقولوا ان في عفاريت. طب يا رب عفاريت الفراعنه تشوف التعليق ده وتطلع تنطط البهايم اللي كابسين على نفس البلد.يا لعنه الفراعنه انتي فيييييييييييييين؟
Love,
MishMish

Aardvark EF-111B said...

مقياس الخريطة..القيم و النظرة للحياة

الحرية, قيمة الفرد, إحترام الحقوق والقانون, المرونة في التعاطي و العرف الإجتماعي

بغض النظر عن الأرقام

الخريطة شارحة نفسها

المدهش إن دول توتاليتارية عتيدة زي الصين و إيران أعلى من الشرق الإسلامي..واضح إن الوهابية عاملة عمايلها

لكن بأمانة أعتقد إنهم بيجاملوا جنوب أفريقيا..بلد مش راضية تعترف بحجم كارثة الإيدز يبقى تترمى في الزبالة

HafSSa said...

كراكيب
من عالم وسخة لعالم ولاد كلب على راي قداسته
يبقى يا قلبي لا تحزن
مش حيغير شئ نشر الخريطة من عدمه

ملاح فضائي
حضرتك اشرح براحتك
بس والله سالت كذا دكتور طبيب و كمان مش مسلمين يعني علشان حضرتك متتخيلش مثلا انهم حيكونوا متاثرين بالحكم الاسلامي في الموضوع


سمباتيك حبيبة قلبي
دايما تعليقاتك بتجي يتطري على قلبي وسط المعمعمة و الحون
دمتي سمبوكتي الحبوبة


الدروييش المرووش
فعلا الدراسة مغرضة والدليل
طابور العيش
ههههههههههههههههه


زكرياء
اهلا يا فندم عاش من شافك
سلامتك من مرض القلب
هو انت مكنتش متخيل الوضع كده و لا ايه؟؟
روق يا باشا انت لسه صغير و ياما حتشووووف


رجل الموالي
ارجوك بلا شنرمي مشاكلنا على نظام الحكم
دي حاجات مالهاش علاقة بنظام الحكم من بعيد او قريب
فيه دول تانية نظام حكمها منيل بنيلة بس هي بتبقى طبيعة بشر
يا اما عاوزين يبقوا بني ادميين
او مش بني ادميين


ميجوو مشمش
معنديش غير لوووووووول
بلاش الحوافريت والنبي
بخاف منه مووووت


ارض فارك
اتفق معاك ف يالغب اللي قلته
انا اللي كمان مستغرباله مش بس عدم اعتراف جنوب افريقيا بالايد وبس و كمان عندهم اعلى معدل جريمة
بس يمكن برضو عندهم مستوى حريات او قوانين لانهم مليانيني بيض مستعمرين
فده يمكن اللي رافع مستواهم
مش عارفة



تحياتي للجميع

زكرياء said...

مشكلتي انني لا افكر في الحال الآن بقدر ما افكر في الخطة البديلة، يعني صراحة انا من الحالمين الذين يضيعون اوقاتا كثيرة في تلك الخطة الغبية التي ترفعنا من هذه الحالة الزفتية إلى حاله افضل...ففعلا عندنا كل المقومات، فنحن فعليا و عمليا عندنا المعرفة الكافية، بفضل اكثر من مليون عالم و مهندس و طبيب...في كل المجالات يزاولون اعمالهم في العالم المتقدم، يعني في ظرف اقل من جيل يمكن نقل هذه المعرفة إلى عالمنا الأحمر على الخريطة، اما من ناحية الموارد الطبيعية فنحن اغنى الناس جميعا...لكن ما ينقص هو الإرادة، التي تشكل لي لغزا في حد ذاتها...لماذا لا نمتلكها و هي وحدها ما ينقصنا؟؟

HafSSa said...

بص يا زكرياء
المثل بيقول الحلو ميكملش
بس احنا مش بس تنقصنا الارادة
بس تنقصنا حاجات تانية كتيرة
فمثلا لازم نبطل العيش في نظرية المؤامرة
و نبطل نعيش في فكرة انه لولا بس حكامنا و انظمتنا كنا عسل العسل

لا هي عدة عوامل مش بس نقص الارادة
بس شوف مؤكد مادام وصلنا للدرك الاسف من الانحطاط بالشكل ده
و زي ما اوروبا قامت منن بعد غفوتها
فمؤكد احنا كمان حنقوم
بس مش بالساهل
و ممكن توصل لدم
:)
ضحكة شريرة شوية


تحياتي

ذو النون المصري said...

خمسه لصحتك
خمسه سياحه
خمسه غم
لا عشره غم
لا خليها الفين غم
و للا اقول لك بلاش
خليها 400 سنه غم
جاتنا ستين نيله او 67 خيبه علي راي عزو
مش عارف لامتي هنفضل في النهائي دائما
نفسي في اي ميدان نطلع لفوق شويه
معدلات القراءه زي الزفتو التعليم ازفت و التنميه العن و انيل
حكامنا ايه وظيفتهم؟
السرقه و بس؟؟؟

HafSSa said...

ذوالنون والله ما انا عارفة نلاحقها منين و لامنين
بجد وضع مكئب
بقلك احنا دلوقتي في العصور الوسطى
فلك ان تتخيل حجم الانحطاط اللي احنا فيه
لنا الله

تحياتي

Sharm said...

هانت يعنى يا حفصة كلها كام سنة و نتقدم ان شاء الله ده حتى في العجلة الندامة و انا متفائل خير ان خلال ال 400 سنة الجايين جيمي هيصلح كل اللى بوظه سوسو و ايد بإيد نبنى مصر من جديد و صدق اللى قال مصر بتتقدم بينا

Fantasia said...

هو كدة بالظبط يا حفصة.. هي العصور الوسطى بعينها. والله بالصدفة أنا حاليا بقرا كتاب عن سجلات الشهود في محاكم التفتيش.. لو أقولك حجم التشابه بين حالنا وحالهم, بين اللي كانوا بيقولوه وقتها واللي بيتقال عندنا دلوقتي, هتقولي عليا بخرف! شيء فوق العقل.. دا مش تشابه.. دا تطابق

هي الدنيا مش ضلمة كدة ليه.. هي حمرا كدة ليه؟ دا طلع مافيش أحمر مننا!.. عيني علينا وعلى بختنا الهباب. يعني كان لازم نيجي في الزمن الاسود ده؟

HafSSa said...

شرم
هانت فعلا و طول ما احنا ماشيين على الوصفة اياها حنفلح


فانتا
لما قريت ردك حسيت اني عاوزة اقول جملة مرسي الزناتي ف ي المشاغبين
انا عارف بيجبولنا الحاجات دي منين
هههههههههههههههههههههه
ضحكتيني يا رفيقة الكفاح المسلح
احنا بالفعل مفرقناش اي فتفوتة عن كل بلاوي العصور الوسطى
بس املي ان اولدنا يمكن يلحقوا يعيشوا في جو احسن مننا


تحياتي

مُزمُز said...

ربعميت سنة بس؟؟؟؟؟

بصي يا حفصة يا بنتي

أنا أزهري زي مانتي عارفة

ويوم السبت عندي بداية الامتحانات
وأول يوم هيبقى مادة الفقه
وتاني يوم مادة النحو
وتالت يوم مادة البلاغة

تعالي بس اقري كتاب واحد بس من التلاتة دول
وخاصة الفقه والبلاغة
وانتي تعرفي أنما شخصيا عايش في سنة كام قبل الميلاد :)

ثانيا بقى

الأغنية بتاعت منير دي منين؟؟؟؟؟؟؟

ehsanbros said...

ذكرتيني عن موضوع قديم كتبته عن تشابه عصرنا الحالي في الدول الاسلامية بالعصور الوسطى في اوروبا:

http://ehsanbros.blogspot.com/2007/12/blog-post_17.html

Abominatrix said...

حفصة..
احنا فعلاً بنرجع ل ورا. لسا قرأت بوست عند فانتازيا جابلي إكتئاب والله عن واحدة بنت و أبوها المجرم بيعمل حاجات مقرفة و بتسأل مفتي تعمل إيه فالمتخلف بيقول لها إن مش حرام و ال ايه متظنيش ظن وحش. و لسة لو فعلاً هنبقا زي أوروبا في العصور الوسطة يبقى لسة في مصايب و بلاوي تانية هتحصل كمان.

إذا كان دلوقتي هيلاري كلينتون مرشحة نفسها عشان تحكم أمريكا واحنا في مصر الناس مخها ضرب لما واحدة ست بقت مأذون و عايزين يموتوها. احنا فعلاً بنرجع ل ورا. ربنا يستر.

HafSSa said...

مزمز
في واحد فعلا كان بيستعوض ربنا على التعليم عندنا في مصر مادام الكتب اياها دي لسه موجودة في مقرراتنا
الاغنية دي اسمه مين لمحمد منير من فلم دنيا مع جوسلين صعب و المرحومة حنان ترك


احسان بروس
اهلا بيك يا فندم من بعد غيبة
انا رجعت فعلا للموضوع
و تحليلك صحيح جدا
للاسف


ابوميناتريكس
المشكلة مش في بعض الفتاوى اللي موديانا ورا و بس
لا
دي كذا حاجة متراكمة فوق بعضها
و المشكلة الاكبر هي في اصرارنا على اتباع نفس المنطق و الاسلوب مع انه ماثبتش اي فايدة في تقدمنا لاي خطوة للامام
و المصيبة اننا بنرجع لورا بزيادة يا ريتنا واقفين محلك سر


تحياتي للجميع

راجى said...

الجانى ممكن يلوم الضحية والمجرم بيقتل القتيل ويمشى فى جنازته
والقاتل المغتصب ممكن يلون الخرائط زى ما يحب ويلوم الشعوب اللى مص دمها على تخلفها اللى من صنع ايديه
والمصيبة الاكبر انه بيقدر يقنع اهلنا ان تخلفهم نابع من ثقافتهم ودينهم موش من اجرامه ووحشيته
بيقدرو يخلونا ننقلب على الفلسطينيين المحاصرين علشان انتخبوا حماس
وبيقدروا يخلوا المسلمين تتدبح فى بعض فى العراق واحنا دايما بننسى جرائم الناس المتقدمين اللى بيلونوا الدنيا على كيفهم
بننسى ابادة الهنود الحمر وابادة اهل استراليا وتشريد اهل فلسطين وقنبلة هيروشيما ونجازاكى وجريمة الوقوف بدون حراك امام مجازر صبرا وشتيلا والتوتسى
والهوتوفى رواندا وجريمة جلب العبيد من افريقيا لامريكا
الناس اللى بتلون الخرائط حضاراتهم نخرها السوس وبتقع واتفرجوا على نموذج منهم مثل مشجعين كرة القدم الهوليجنز وعصابات النازى الجدد حليقى الرأس
واتفرجوا على فضائحهم الجنسية والماليةوامراضهم النفسية
ما تتغروش بشوية المظاهر اللى على السطح وماتخليهموش يغسلوا امخاخكم
ارفضوا وتمسكوا بثقافتكم ودينكم

S H A H said...

والله يا حفصة انا جالي إحباط لما عرفت انا قاعد في حتة متأخرة أكتر من 400 سنة

كلمة دول عالم ثالث بقى تصنيفها مش صح

و استاذنك يا جميل هروح أأكل الجمل بتاعي و ارجعلك تاني :))))