باركولييييييييييييي

النهاردة ولاول مرة في حياتي، ايوة اول مرة في حياتي، اعمل بيض اومليت و ميتقطعش مني لما اقلبه، طول عمرك يا وهيبة، انا ممكن اعمل محاشي بمختلف انواعها و طواجن و اسماك و دواجن و حاجات كتيرة بجد لكن اجي عند الاومليت و افشل و ينتهي الامر بيه انه بقى بيض ملخبط او محروق او متشحتف الاواصل، لكن الليلة دي قلت لازم اقوم اكل حاجة لاني بقالي يوم و نص مش واكلة أي شئ غير شاي بميرامية لان عندي برد و زكام سخيفين جدا جدا جدا
الظاهر ان جوعي ضغطني اني اتقنه و كنت فرحانة اوي اوي اوي اني عرفت اظبته

اسيبكوا مع الصور عشان تصدقوني

الوش الأولاني

الوش التاني والحتة الدهبي اللي في النص دي كانت جبنة شيدر مبشورة وناعمة اوي وسايحة

حاجة مزاج يعني

الشكل النهائي مع كتع من الطماطم و اللبنة البيتي و اللي عاوز يعرف ازاي ممكن يعمل لبنة في البيت و بمنتى السهولة يقلي و انا اعمل بوست مخصوص عن الوصفة

ملحوظة: يمكن البعض لاحظ ان البوتجاز مش نضيف و انا احب اوضح اني بهتم بالنضافة جدا لكنها البنت الامريكانية اللي عايشة معانا و مش عارفة اوصفلكوا قد ايه هي مش نضيفة ولا تعرف اي شئ عن النضافة و لاني كنت عيانة فهي لعبت براحتها في البيت و وسخت المطبخ و لاني برضو كنت عيانة فمقدرتش انضف وراها و كنت بجد زهقانة منها

اه لو احكي لكوا على الخناقات والمواجاهات اللي بينا، بقالي 6 شهور بعلم فيها النضافة لكن تقولوا ايه، ديل الكلب او الكلبة

لنا بقية مع مذكرات حفصة في بلاد الامريكان منطقة المنسية

يوم الامتحان يكرم المرء او يهان

اية اللي حيحصل لايميلك لما تموت ؟
مش عارفة و الاكاده اني سالت نفسي السؤال ده كتير لكن متخذتش أي اجراء فعلي لتفاديه، طيب هل مثلا افتح حساب خزنة في بنك و اسيب فيه المعلومات دي و لا ايه يا هل ترى.

اديت الباس وورد لحد قبل كده؟
ااعتشكد ايوه لكن محصلتش حاجة وحشة لانهم كانو اناس بثق فيهم كويس اوي

لو اه كانت طبيعةعلاقتك بيه اية؟
اصديكائي

اسمك؟
حفصة

اسم الدلع المشهور في وسط اصحابك؟
والله اسمي من النوع المش مالوف فلذلك يصعب ايجاد دلع ليه و ان كان صحابي شفقة بحالي بينادوني حفصفص و صفاصيفوا و صفصف و بعض قرايبي بيقولولي دوسي بس مش قصدهم على شئ معين و فيه كمان بيقولولي اسوووس و زمان مدرب الكراتيه قالي حسميكي فيفي فسبتله التمرين و مشيت

عمرك؟
ايه البتاع ده ، مش كفاية فضايح في الفايل ما قلنا حبقى 30 في يوليو الجاي

برجك؟
السرطان و ده برج ناس كتير مهمة جدا لكن منه لله بوش و رامسفيلد و توم كروز جم بوظوا سمعته و جابوها الارض منهم لله بقى اشوف فيهم يوم بس الرسمي الاسد و ده عشان عبال ما بابا سجلني و لان ورقي مش شهادة ميلاد مصرية فاخدنا وقت و بقيت الاسد لكن انا والله السرطان

مجالك او مجال دراستك ؟
المفروض اني مربية فاضلة وعلى العموم انا بدرس انزليجي بجدارة و عربي بجدارتين مع ان العربي مش تخصصي بس بحب اللغة اوي و أي حد يحب دروس عربي او انزليجي او لعب عيال للاتفال نحن على اتم استعداد لتوصيل اهدافكم لرؤوس الاتفال من غير أي ضرب

شخصيتك نوعها اية؟
شخصيتي مفتكسة، مالهاش حل يعني، متناقضة يمكن، معرفش و اوقات بتكون سهلة جدا و اوقات بتكون معقدة جدا و الشاطر اوا لشاطرة اللي يقدر يفهمني

السفر بالنسبة لك؟
طول عمري مسافرة الصراحة زهقت نفسي اقعد كذا سنة من غير ما اسافر شوية

المود بتاعك؟
حضرتك المود بتاعي بيتغير مع تغير ساعات الابراج الصينية فكل شوية تلاقيني في حال لكن ببقى مسيطرة و الحمدلله لاني بشتغل مع نا س مالهاش ذنب في مخي الدزمة

وقت فراغك بتعمل فيه اية؟
الصراحة انا عندي خلط عجيب غريب بين وقت الفراخ و وقت الشغل لان ده هو ده و ديكهون هو الاولاني فتلاقيني بعمل كذا حاجة مع بعض و بستفيد من كل حاجة زي ما بقدر و كله ماشي حلاوة و ظريف عالاخر

الاكلة المفضلة؟
السؤال ده اصعب من أي سؤال كيميا عضوية حليته في حياتي لاني ذويقة و بحب الاكل ددا ددا ددا


الصفات اللي خدتها من ماما؟
قولي ايه اللي مخدتوش من ماما

الصفات اللي خدتها من بابا؟
حب القراية و كثرة الاطلاع و هي اصلا عادة عند ماما برضو لكن اهو عشان الراجل ميصحش يطلع من المولد بلا حمص :)

اكتر 6 حاجات بتكرهها؟
بكره ابص لنفسي في المراية بالليل عشان بخاف اوي
بكره اشوف خيالي بالليل برضو عشان بخاف برضو
بترعب و افقد اعصابي لو شفت برص و بتحصلي عملية انهيار جامدة جدا
بكره انفصام الشخصيات عن واقعها
بكره الادعاء يعني مدعي الثقافة ، الادب، الصحافة و الخ الخ الخ
بكره السبانخ و اللحمة و الضفادع

اكتر 6 حاجات بتحبها؟
البحر
الموسيقى
ضوافري لما احطلها لون مانيكير جديد
عيني لما اكحلها و حتى لما مش بكحلها برضو بحبها
الفضة و الاحجار الكريمة
اتمشى في الخان لغاية ما اتعب او ماما تستدعيني


الشغل بالنسبة لك؟
هم لابد منه و نفسي يبقى عندي مشروعي الخاص و شغلي الخاص مش كسلا (لا الصراحة كسلا)
لكن عندي سياسة معينة و نفسي اطبقها


اية الكومبيوتر والانترنت بالنسبة لك؟
والله لغاية 3 سنين فاتوا كانوا جهاز شيك لابد منه في البيت لوحده في برستيجي لكن بعد ما بقيت متيسة انجليزي بقوا دول اهم عندي من المنهج نفسه لاني اكتشفت بلاوي ممكن اعملها للاتفال من النت و عملت حاجات جبارة حازت على اعجاب الكثيرين لدرجة انهم اتجننواو بعتوني البعثة السودا اللي انا فيها دلوقتي اما حاليا فهو نافذتي على العالم و بالذات عليكوا انتوا

احب امرر العريضة دي لكل من
وينكي
زنزانة
ريكا
شهروزة
وئام
اوسا
كلبوزتي
قصاقيص

نوران
ام العيال
مذكرات امراة مثلية

ومن الرجالة المدونين
فارس قديم

الاستاذ حسني سليمان

ابوريشة
ياسر عوف
ذوالنون
دانتي المصري
مزمز
الحاج جرجس
اعصار
عاشور

الدبور

بس المرة دي مش برصاص الاحتلال

تحذير لاي من مرضى السكر او الضغط او اي مرض تاني متعلق بالحالة النفسية او حد معندوش الامراض دي كلها و مش عاوز تجيله الامراض دي و تحذير للحوامل و المرضعات و الشباب اللي خايف على نفسه من انه يتعدي لما يكبر
و تحذير للناس ذات الاحساس الرهيف
لقد حذر من انشر هذا البوست


المرة دي و زي ما سبق و كتبت في بوستي في المرحومة القديمة
ما بين فتح و حماس و المواطن الفلسطيني مقتول
ااااااااااااااااااااه يا وجع قلبي عليكي يا فلسطين
يا ورقة توتنا احنا المساكين
خلاص عريتينا و مبقانش ناقصين
ااااااه يا فلسطين
****************************
اخبار فعلا تستاهل حرقة الدم
و برضو معنديش حاجة اقولها غير حسبي الله و نعم الوكيل


http://www.aljazeera.net/NR/exeres/3C3188C6-BB00-4402-9D2F-85B586043446.htm


يعني مضايقين اوي ان الحكومة الاسرائيلية حتعيم نائب عربي و مسلم
وقال ايه معترضين على ان بكده الحكومة بتغطي على عنصريتها!!؟؟؟ طيب و انتوا مالكوا
حتخافوا على اسرائيل اكتر منها؟؟؟
والله ممكن يكون صح
يخرب بيت كده
يلعن الغباء
دي حاجة تفقع بالاويييي

و خدوا اللينك ده كمان


http://www.aljazeera.net/NR/exeres/ABAF30E2-E61B-4189-8495-C33F11F4EC7A.htm


ده هو اللي احنا شطار فيه بجدارة
تحياتي ليكوا و دعواتي بعد الاصابة بضغط دم او سكر او شلل عقلي

انه عاشوراء

صلوات الله تغشى دائما

للنبى المصطفى جد الحسين

خيرة الله من الخلق أبى

بعد جدى وانا ابن الخيرتين

عبد الله غلاما ناشئا

وقريش يعبدون الوثنين

يعبدون اللات والعزى معا

وعلى قام نحو القبلتين

والدى شمس وأمى قمر

وأنا الكوكب ابن النيرين

فضة قد صيغت من ذهب

وأنا الفضة ابن الذهبين

من له جد كجدى المصطفى

أحمد المختار نور الظلمتين

من له أب كأبى حيدر

فارس الخيل ورامى النبلتين

من له أم كأمى فاطمة

بضعة الزهراء قرة كل عين

من له عم كعمى جعفر

ذى الجناحين اصيل النسبين

نحن اصحاب العبا خمستنا

قد ملكنا شرقها والمغربين

نحن جبريل غدا خامسنا

ولنا الكعبة ثم الحرمين

أمة المختار قرى أعينا

فغدا تسقون من كف الحسين

في ذكرى مقتل سيدنا الحسين بن علي ابن ابي طالب عليهما السلام

و حفيد سيدنا محمد النور اللهم صلي و سلم و بارك عليه و على اله و من اتبعه بالحق الى يوم الدين

يوم لا يمكن ان يمحى من الذاكرة مهما طال الزمان

عالم قطط قطط بس مسخرة

يعني انا احب اكون متامشية مع الموضة بتاعت اي زمن
و لاحظت الفترة الاخيرة ان الكلام كتر عن الحيوانات بداية من كراكيب روبابيكيا انتوك اللي بدى من شهر يجيب في سيرة حيوانات الغابة مرورا بالفارس الاخير و كلامة عن الخيول و الفراخ و انتهاءا بالاميرة اوسا و معلوماتها المستفيضة عن القطط و انواعها و طبعا انا لاني عمري ما باخد اي موضوع جد او مش بحب يعني و لازم اشارك في الموجة لكن اقلبها هزار فجيبتلكوا الكليب ده و يا رب يطلع مسخرة

تحياتشي

عصفور النار

لا تعليق الا حسبي الله ونعم الوكيل

ذكريات ماتت من زمان

بُعثت ذكرى من قبر مخيلتي
اعتقتها توفت الى الابد، الحقيقة لم اتذكرها بالمرة و فوجئت بها تزورني بكل حيوية مع العلم انها تفتت الى رماد و اخلطت بهشيم الارض فذروتها امواجي
و لكن لم تاتي على صفحات بحر عقلي الهائج؟؟؟
تذكرت صديقة لي، او هكذا اعتقدتها، كنا متقاربين، او هكذا احسستها، كم كنا متفاهمين، او هكذا ظننتها، كم كنا متحابين و متوائمين، او هكذا تخيلتها. الآن اتذكركيف يتحول الحال الى حال
كما الماء التي كانت رقراقة في جدول مياة غدير و من ثم تصبح ثلجا لا يلين؟؟
اتذكر اول سنة لتعارفنا، بكيت عند انتهاء السنة الدراسية حزنا على فراقها فقد كانت هي صديقتي الوحيدة ، اتذكر كيف كان والدها رحمة الله عليه دائم السؤال عني و دائم الرعاية بي و توصيلي أي وقت ياتي لتوصيلها هي ايضا و لكن شعرت به والدي انا ايضا، كيف تغير كل هذا الى لا شئ البته؟!!؟؟؟
كيف يمكن للمرء ان يعمى عن من امامه من بشر و يعتقدهم ملائكته فيصحو يوما ليجد انهم كانوا من مفارقيه..... كيف يكون حال عدم الافتراق و المصاحبة و من ثم ياتي حال البعد و الجوف ..... كيف تتحول لحظات المكالمات الهاتفية اليومية، مع العلم انه سوف يكون هناك لقاء في غضون ساعات، الى قطع للعلاقات بشكل بارد و رسمي وصولا الى الامتناع عن الاشتراك في أي مناسبات اجتماعية شرها قبل خيرها
توفي والدها و عرفت بالخبر من صديقة مشتركة
جزعت و تملكتني غصة، ماذا انا فاعلة لارد جمائلة الجمة علي؟؟؟؟
هل تكفي قراءة ايات الرحمة و النور و اهداءها الى روحة الطيبة؟؟؟ اسيكون راضيا عني اذا علم اني متجافية مع اعز بناته؟؟؟ لكن اعلم هو الصورة الحقيقة للحكاية؟؟؟
تزوجت هي
فرحت لها مع العلم اني كنت اخر العارفين و لم اكن من المدعويين، حسنا كان متوقعا، فلم اتفاجأ. اجتمعنا في العمل مرة ثانية و لكن كانت وجوهنا تعلمت الضحكة المجبسة برتوش ما يسمى اخلاقيات العمل و التعاون الواجب بين اقسام المؤسسة حتى تعم الفائدة، صراحة كنا على اعلى قمم الاحتراف ، لم تعد هناك براءة تعم بساطة الحديث، اصبحنا نتحدث في أي موضوع و لكن على شكل حديث صحفي ، أي تصريح و لكن لا معنى له، كلام لكن لا يعنني و لا يعنيها في شئ، نعتقد اننا نتهامس باسرار و لكن افيق على لحظة بسيطة تذكرني بغرابة المعاملة قبل سنون قليلة فاتت، فاتعظ و الا فلن اكون مؤمنة، اغفر كثيرا لكني لا انسى، هكذا انا، هكذا هي تحكماتي الفلكية ، انا ارحم من العقرب، لا ينسى و لا يغفر، و اقوى من الحوت، ينسى و يغفر هذا اذا تذكر مبدئيا من موجعه فيضيع حقه بعد فترة.

لماذا تذكرتها في هذة اللحظات؟ و ما هو حالها الآن؟؟ و كيف هي؟ لي طريق منه استطيع السؤال عنها و على حالها و لكن لم؟ اعلم الآن ان لها طفل او اثنين، ليست سعيدة بحالها كزوجة لكنها متزوجة و هو في نظر مجتمعنا شئ محمود، اعتقد بالنسبة لها تشعر انها حققت احلامها، تخرجت من جامعة، اشتغلت في مؤسسة كبيرة و مشهورة عالميا ، تزوجت، اصبحت من ربات البيوت و السيدات العاملات، اصبحت ام و مربية، اصبحت لها دائرة معارف، اصبحت ذات منصب في نفس المؤسسة، اصبحت و اصبحت,.....

اصبحت انا ايضا، اصبحت على الكثير من الاشياء لم يكن لاحد ليتوقعها لي، فالجميع كان دائم الاستهزاء بقدري و التقليل من شان عقلي فقد كانت درجات المواد في الجامعة هي المقياس، لهم طبعا و ليست لي، لا مقياس حتى الآن مخلوق ليقيمني و يشهد لي بشئ، أي شئ

هل هناك معنى اذا كانت هي تذكرتني ايضا في مثل هذة اللحظة ..او حتى في أي لحظة اخرى

لا
لكنها ذكرى قررت القيام من بين اموات ذكريات اُخر لي
مجرد ذكرى لا اكثر و لا اقل لها
مجرد درس لي لا اكثر و لكنه اقل ما يوصف انه موجع و ايضا مفيد و ما بينهما حياة
تلقفتني رياحها فزعزعت مفهومي عن الصداقة و عن ثوابت الامور

لازمة اخيرة
هي هواء
انا ماء
منتهيين بهمزة و الف ، مبتدئين بهاء و ميم، فهمنا كان مشتركا اما
اليوم فلا هموم و لا ضحكات، فقط ذكريات توفيت واترحم عليها
وحدها الذكريات خالدة خلود البحر و الهواء
*****************************************************

الصورة الابداعية اللي فوق دي من خالص موهبة المدونة لله

فمش محتاجة اوصيكوا بحقوق النشر و الكلام ده و عيب اوي لو حد اخدها نشرها من غير ما يكتب المصدر اللي هو انا

بس يعني للتذكير

ههههههههههههههههههههههه

كتاكيتو السكرة

ربنا يسعدكوا و يفرحك قلبكوا زي البيبي العسل ده يا رب

عدت بالصلاة عالنبي و العود احمد و محمد كمان

اعزائي

انتهت فترة الحداد، و مع العلم اني قررت التوقف عن التدوين حتى اشعار اخر و حتى اجد سكن لبلؤي احسن من بلوجر عليه اللعنة، فقلد قررت اشراككم معي في هذه اللحظة التاريخية الفريدة

اوف زهقت من الفصحى

اسمعوا بقى، انا مش باخد بالي من التواريخ كويس اوي الا لو كانت عشان اعرف برج شخص او عيد ميلاده، او تاريخ مهم جدا جدا جدا زي 6اكتوبر مثلا او 5 يونيو للاسف و اللي بيصادف تاريخ ميلاد الحاجة السكرة امي

المهم

اليوم16 يناير، بتاريخ امريكا البلد اللي ان اعايشة فيها و هي تختلف عن امريكا اللي انتوا بتشوفوها في الافلام و التفلزيونات، صحيت من النوم، حضرت فطاري المتكون من فول مدمس بقوطة و لمون و زيت زتون و شوية ثوم مطحون لزوم السطلان الاصلي، وضبت شنطة المتيسة اصلي لسه بذاكر، تخيلوا مدرسة و لسه بتذاكر، لكن صحيح العلم لا يكيل بالبتنجان، و احب بالمناسبة دي افرحكوا و اقول اني جبت علامة شبه نهائية في الالماني مش عارفة ازاي لاني مكنتش بذاكر بتاتا و كنت معتمده على ذاكرتي لما درسته اول مرة من 15 سنه و كنت بفتح الكتاب كل شهر مرة ألم برؤوس المواضيع و اخلي البت المعيدة هي اللي تحل لي الواجب من منطلق مبدا حكم القوي على الضعيف، المهم اني نجحت و ده لاني كنت راسمة الدور كويس على الاستاذ الغلبان و هاتك يا كلام بالالماني طول المحاضرة و اجيبله مصطلحات ما انزل الله بها في المنهج و هو كان فخور اوي بيا و فاكرني البت الفصيحة.

المهم

لبست، قريت قران زيادة لزوم دخلة اول يوم في الكورس، ذاكرت شوية الماني تاني عشان يحس اني كنت بدح في الاجازة زي ما وعدته، حطيت الكوفية،و فتحت الشمسة عشان النطرة، مشيت من شقتي لغاية الكلية مسافة خماشر دكيكة، دخلت مكان المحاضرة و انا قاعدة بتمرن على كام جملة لقيتهم في نتيجة الماني عشان ابخهم في وش البروفيسور، يقوم ينسطل من اول يوم و ميفلقنيش، الساعة بقت تمانية و خمس دقايق، غريبة، عمره ما اتاخر، لحسن يكون توفى هو كمان، اصله على معاش لكنهم مخلينيه عشان مش لاقيين حد غيره يدرسلهم، بقت الساعة تامنية و عشرة دقايق و حتى البنات ماجوش، الله، دي مؤامرة بقى، لحسن يكونوا غيروا مكان المحاضرة!!!؟؟

شوية لقيت صديقتي العزيزة نينا اللي بتنضفلنا الفصول، دايما بناخد ركن انا وياها ونلف سوجارة ماركة كامل لايت خلطة تركي في المستخبي نقعد نتكلم عن العيال و بلاويهم و ابو العيال اللي عاطل عن العمل،و مغلبها معاه، فقلت اسالها لانها حويطة و عاملة زي مخبرين الحكومة عندنا، ملقيتش عندها الخبر اليقين ؟؟!!؟؟؟؟عجبي ؟؟؟ بس مش مشكلة قلت هي اساسا ميعتمدش عليها لانها دايما تايهة من الهم ، مشيت و قلت خلاص حسيب للبروفيسور نوته مكتوب فيها حضرت و لم اجدك ابقى تعالى انت مكتبي مفتوح لكل المواطنين ( انا بجد عندي مكتب لوحدي) يا حالولي يا حالولي

رجعت شقتي مأسوف على نومي اللي اتكسر و في الطريق لقيت زميلة ليا فبصت ليا باستغراب و سالتني انتي كنتي بتعملي ايه في المبنى؟ قلت لها اني حضرت و لم اجد الفصل برمته

بصت ليا باستغراب اكتر و قالت لي:

النهاردة مافيش دروس من اصله الدراسة حتبتدي بكرة يا فالحة

انا: .؟؟؟؟؟؟!!!!!!!!!!!!!!!!!!!!!!!!!!؟؟؟؟؟؟؟؟؟؟؟؟؟؟؟؟؟؟؟؟؟

اهيء اهيء اهيء

المرثية الاولى

يقال انه و في نهاية اليوم الاليم ،و التي لم تعلم نهايته بنت البنات المساكين، فوجئت الشابة بهروب مدونتها الى الجحيم، و نزلت دمعتها على خدها الحزين،فدهش شهريار بقلبها الصغير، و تحسرت على كلامها الذي طار في الهواء المفترض انه تكنو حديث، تأوهت و تعبرت و تحسبنت كما لما تتحسبن من قبل، واساها الاصدقاء لكن ما جدوى لوم الميتين، فكفكت دمعها و بدات تخط بقلمها ،لعلها تجد خلقا لترثي مدونتها، و التي بكل اسارارها كانت على علم عليم، مين اين لها ان تجد حروفها التي طارت في ليل بهيم،و حتى اذا وجدتها فلا قيمة لها من دون تعليقات القراء و المحبين،و جلست ، استجمعت قواها او ما تبقى منها بعد هول المصاب الاليم، و وجدت القلم يحرث حرثا لكنه ليس بالبهيم، و انتهت ان كل شئ موجود و لكنه ليس على ما يرام الى حين... و انهالت منها اللعنات و هي لم تكن لتتوقع ابدا ان يخرج منها هذا الكلام القتيم، و لكنه الحزن و ماله من مرار مثل العلقم المبين

ف اااه ثم ااااه ثم اااه على ابنتها التي لم تكن لتتم بوستها التاسع و التسعين و ثلاثة شهور من ذوي الثلاثين

المرثية الاولى

الا افلعنة الله على التدوين
ما له من صديق و لا يحزنون
غدار جبار اثيم
وغير ذلك فهو لئيم
نكتب نحن فهم يمسحون
لا مراعاة لاخلاق و لا لسنين
فحسبي الله و نعم الوكيل
حسبي الله و نعم الوكيل
ما لهم هم الا التنقيح المخلول
فكل فترة يغيرون
فيشقلبون حالنا و ما لهم علم
و ما لا يعلمون
تركوني بدموعي و قهري
فلا فرح لهم الى يوم الدين
الهي ادعوك ان تمسح البيتا و البلوجر و كل مواقع التدوين
فتدخل عليهم بكتيريا لا مضاد لها و لا يتطيبون
فيعلمون انهم في حقي ملومون
و انهم قد اضاعوا احلى كلمات عقلي المخزون
و انهم قد فرقوا جمعي و ببدوا شملي
فمنهم لك وانت خير المحاسبين
طردت من وطني
اخرجت من مكاني
و حتى تدويناتي قد اغتصبت امامي
فماذا يراد مني و كل ما لدي قد اصبح ركاما
افحتى التدوين ما لي فيه نصيب و لا مقسوم؟
حسبي الله و نعم الوكيل
حسبي الله و نعم الوكيل