احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Wednesday, April 16, 2008

حاجاتي


من غير سبب افرح

و بسبب صغير جدا ازعل

هل يا ترى ده كويس و لا وحش؟

ولا مافيش حاجة اصلا اسمها وحش و حلو؟

وليه لازم احكم من اساسه؟

سواء احكم على نفسي و لا على غيري؟

***************************

بتضايق من ناس او هيئات ابعتلها ايمليات و متردش مع ان الكلام موجه ليهم شخصيا و في صميم عملهم

بتضايق لو شفت حد في الشارع مضطر للمساعدة و مش عاوز يسألها و انا حاسة بكده لكن مكسوفة اأقدمها لحسن احرجه

بتضايق لما تعدي من قدامي فرصة لاصلاح شئ لكن مش بلحق اعملها

بتضايق لما اسكت عن الرد مع شخصية غبية فقط لاكتشف ان ده في نظره انتصار!!!!؟؟؟

بتضايق لما اكون بتكلم مع حد و اتفاجئ ان الشخص ده لا بيسمع الا من خلال جزمته، لا يتكلم بالمنطق، لا يرى الا من وجهة نظره العمياء، فأصاب بالاغماء

بتضايق لما حد يكسر عليا و يخبط لي عربيتي و كمان شايف ان ده عادي

بتضايق لما كل واحد في الشغل يتمسك برايه علشان برسيتجه مهم و مش مهم الشغل يروح في داهية و في الاخر نفس الموظف ده يكسب جايزة اكتر موظف متعاون و خلاق!!!؟؟؟

بتضايق لما ابدي راي و يترفض و في الاخر بيطلع صح و يقتنع بيه غيري بس بعد فوات الاوان!!!؟؟

***************************************

بفرح اوي لو شفت سرب حمام طاير في السما ساعة مغربية

بفرح اوي لما اجيب حاجة لاخواتي الصغيرين و يفرحوا بيها مع انها بالنسبة لي تافهة جدا

بفرح جدا لو افتكرت اعمل حاجة صغيرة جدا لشخص بحبه اوي و الحاجة دي تبقى تفاصيل التفاصيل اللي اتقالت من خلال سياق الحديث و انا اخدت بالي منها

بفرح اوي لو حد قالي كلمة حلوة لكن الاهم صادقة و حقيقية

بفرح اوي لما الاقي صاحبتي متضايقة و اخدها اخرجها و اخفف عنها و اخرجها من موقفها المحدود

بفرح جدا لو حد استفاد مني من غير ما ياخد باله و ومن غير ما اعتبرها جميلة عليه

بفرح جدا و لو حسيت اني غيرت للافضل حاجة في حياة شخص كان غير مؤمن بنفسه

بفرح جدا لو فضلت قاعدة في شباك اوضتي و بسمع صوت حس الشارع و هو هادي و ريحة الهوا و زقزقة العصافير

بفرح لو نمت و جيت اتقلب في نومي الاقي القمر باصصلي من السما و مركز عليا انا بالظبط كانه منور بس علشاني

بفرح لما تمر ذكرى حلوة في بالي، بسترجعها فورا بكل خصائصها و انشط بيها زاد روحي

بفرح اوي لما يكون يوم شغلي ملئ بالاحداث المستعصية على الحل

لكن بفضل وراها لغاية ما اخلص عليها و اثبت للباقي انهم معذروين فقط لانهم يؤمنون بكلمة مستحيل

بفرح من غير سبب ، بس بكون قاعدة و من دون اي مقدمات الاقي نفسي ضحكت او ابتسمت براحة على جنب بُقي و خلاص

بفرح لاني بحب افرح

لكن بزعل لما ازعل لاني مش بحب ازعل

لكنها هي كده الحياة يا صوفيا


10 comments:

Hypatia said...

لما لقيت العنوان قلت حتكتبي عن مصطفي اسماعين
:)

ربنا يفرحك علطول يا حفصه وميجيبش زعل ابدا انشاءلله

Aardvark EF-111B said...

:)

karakib said...

الفرح معدي
و الحزن مغري

bluestone said...

كنت لسه بقول لهاني
الحزن ليه صاحب
والفرح ليه صاحب
بس فيه ناس متواعدة بس على الوعد

عمري ما شفت الفرح معدي على فكرة

وبرضه انتي فكرتيني بمنير .. يظهر اني عيانة بمنير النهاردة ..
ساعات بحب حاجات مايحبهاش غيري
في الرايحة في الجايات بغني مع طيري
:)

مساكي حلو بحاجاتك دايما

Migo Mishmish said...

انتى بجد ياحفصه انسانه رائعه وحساسه انا كنت كاتب كام بيت كدا بيعبر عن الى انتى قلتيه :
انا ....
وقت الكلام باسكت
ووقت السكوت بتكلم
ساعات فى حزنى بافرح
وساعات فى فرحى بتألم
انا غير كل البشر ..
انا غير كل الناس
يمكن يكون دا جنون ؟!!!!
بس انا مش شايف نفسى نقطه تلاقى الكون
انا نقطه فى وسط محيط
واحب اكون بسيط
وبساطتى نابعه مني
لانى ....
مش منهم ..ولا نفسى اكون زيهم
انا احب ابقى نفسى
بقوانينى الخاصه بيا
بطريقتى الداروينيه
وهاعيش كل الحالات
ولا بصش فى الساعات لانى باختصار ...
بكره الحسابات
كره العمى ......
ميجوووووووو
ملحوظه انا زعلان منك لانك بقالك كتير مش بتزورينا وتشربى معانا الشاى فى البلكونه انا ومشمش ..سلام ياجميل

-_- said...

اتبسطت اوي لما شفت بانر لاولاد حارتنا في ركن المدونة .. مع انها اول زيارة ليا هنا لكن انطباعي عن المدونة انها جميلة جدا و ده مش بسبب نجيب محفوظ بس والله

ذو النون المصري said...

و الله انا بيضايقني اللي بيضايق تماما
و بحب جدا الحمام الطاير ساعة المغربيه لكن للاسف لم اعد اراه لان اهل قريتي توقفوا تقريبا عن تربية الحمام
فيلم الحريه رائع فعلا
تحياتي

مصطفى اسماعيل said...

نسرين
فى القاهرة بنقول على اسماعين
اسماعيل
(W)
--------------------
حفصة
(F)
(L)
(K)

m.sobhy1990@gmail.com said...

والله مجرد الإحساس
فرح كان أوحزن فده فى حد ذاته شىء كويس

وربنا يفرحك دايما
مع إن ده شىء مستحيل ومايستحملوش الإنسان أصلا

تحياتى

^ H@fSS@^ said...

نيسو
تخيلي
انا نفسي حسيت بكده
مش عارفة ازاي و انا عارفة انا حكتب عن ايه
معلش تخاريف


ارضفارك
:)


هاني
الفرح مظنهوش معدي
و الحزن مش مغري
الحزن قاتل و ادماني

بلوستون
عارفة منير ده اعتقد انه غنى لكل حاجة ممكن تمر بيومنا
عن نفسي هو معلق معايا ليلي و نهاري
لسه بس من يومين ركزت مع كلمات اغنية البنات
لقيتها تليق على اللي بيحصل دلوقتي ف يمصر
و بالذات اسراء و نادية مبروك
بتسعديني بمرورك اللطيف


ميجو و مشمش
اولا مافيش زعل
خلوا الشيطان بعيد
انا بس من شغلتي و علشان انتوا مش بتكتبوا غير كل فين و فين
بس صدقوني انتوا في بالي دايما
اصلكوا بتفكروني باتنين صحابي هنا في قطر و قربوا يسافروا و انا متضايقة اوي بس متنساش تغي راسمي من حفظة لحفصة
ماشي
ابقى تعالى
انت و مشمش علشان خاطري انا بس مشغولة لشوشتي

وقبل كل ده احب اقولك
كلامك عسل و كفاية انه صادق من القلب و طبيعي


اهلا بشرم
شكرا لزيارتك بس لعلمك هي مش الاولانية
انت جيت من زمااااان مرة يمكن
اهلا وسهلا


ذو النون عندنا هنا
يا نرحبا يا نرحبا
نورك طفى الكهربا
و ادي حاجة كمان مشتركة بيننا
ايه السعد ده كله يا ربي
بس ابقىانت ربي حمام حتى ينفع لما نيجي نزورك علشان ندبحه و ناكله
مش كجه و لا ايه يا هاني؟؟



مصطفى اسماعيل
فكر السكندريين تعبانين في النطق للدرجة دي و لا هي بس نيسو؟؟
هههههه
بس اموت و اعرف ايه الحروف اللي انت حاططها دي



محمد صبحي
كلامك صحيح
لان غيرنا ممكن مش بيحسوا خالص
و ربنا يبسطنا على قد نيتنا


تحياتي للجميع