اسراء بنت قشوع

اذا كنت من مواليد السبعينات و اوائل الثمانينات فمؤكد لازم تكون عارف الفلم التحفة ده

من احلى افلامك يا ممدوح عبدالعليم و اثار الحكيم و معاهم احمد بدير و صلاح قابيل الله يرحمه

و فلم باختصار لمن لا يعرفه بيحكي قصة مؤلف سيناريو بسيط الشخصية، طيب القلب و ذو مبادئ لا تلين فهو القروي الاصيل الذي اتى للقاهرة لنشر فنه لعل و عسى ان يتشهر

تقع احداث الفلم في مجملها لما رامي قشوع، اسم بطلنا، يودي نص سيناريو فلمه للطباعة و هوبا يتسرق منه النص و يبتدي يخطط له احمد بدير و تحصل مجموعة من الاحادث اللي كان ابطال الفلم بيمشوا وراها و هما مش عارفين حتنتهي باية بالظبط مع انهم عارفين نهاية سيناريو الفلم اللي بطلنا الورقي كتبها بايده

و اسم الفلم متطابق تماما مع شخصية رامي فهو بطل لكنه من ورق

يعني ميستحملش ضغط كتير

اي نعم هو صاحب مبادئ

اي نعم هو شريف و طيب النية

اي نعم هو صادق في دعواه

لكنه لا يتحمل الضغط و للاسف غيره من الناس اللي كانت حواليه استغلت موقفه هو استخدمته لصالحهم

معلش يا رامي

المشكلة بقى ان ده كان فلم

لكن لما ده يحصل على مستوى شعب

فمش عارفة اسميه ايه؟؟

اسراء انتي كنت بطلة

اي نعم

اتسجنت

فعلا

امك اتخضت عليكي و معاها ما يقارب من 50 مليون مصري و يمكن اكتر من براة البلاد

صحيح انك انتي اللي فجرتي الفكرة

و كمان اتصورتي رافعة ايدك بعلامة النصر

يعني ثبتي التهمة على نفسك

يا اسراء لما اتقبض عليكي جالي اكتئاب

و لما اول مرة قالوا افرج عنك فرحت و لما رجعت سمعت انك مخطوفة رجعت تقوقعت تاني

يا اسراء مشاعر الناس مش لعبة يا حبيبتي

يا سراء لقد كنت معاكي

اما الان فانا بصراحة عاوزة الف و ارجع تاني

على راي علاء ولي الدين

مشكلتي التانية ان التركيز على اسراء و كام شخص بعينهم كان شديد اوي

بينما اشخاص زي احمد بدوي صاحب مدونة بدوي الاول عشر

مش متجابله سيرة الا غير من بعيد

فهل

1- لان احمد مش مدون مشهور

2- احمد مش ناصري او قومجي او تجمعي حزب وحدوي او يساري تقدمي

3- شكله مش فوتوجينيك

4-ولا علشان هو مناضل بجد و احنا بنحب الهجايص و بس

" بسجد شكر لربنا اني اتعاملت كويس و اني بنت و اتصانت"

" مكنتش متخيلة و ده كان سؤ تقدير مني"

" و مشاعر بخرجها"

"مافيش معنى الاهانة اللي المتخيلينه برا"

"لما هما بيعاملوني كويس كدا امل ماسكني ليه؟؟"

طبعا دي مقطفات من كلام اسراء

و انا مش عارفة هل فيه اهانه اكبر من ان حد يعتقل علشان قرر الاعتراض على الظروف المعيشية المتزفتة اللي هوا فيها

يعني وصل الحال بالمواطن العربي انه لما يتقبض عليه لكن يتعامل كويس يبقى كتر خير الدنيا؟؟

و المصيبة الاكبر ان اسراء و حسب اقوالها كانت بتخرج مشاعر على النت

يا داهية دقي

يا شمس حلي

يا مراكب اغرقي

يعني فضفضة مشاعر ادت الى ما حدث و مازال يحدث للان في المحلة و القاهرة و الشباب المقبوض عليهم و الناس اللي ماتت و القلق اللي حصل

يعني مين يتحمل مسؤولية كل ده؟؟

امتى حنتعلم اننا نكون قد ماقفنا و نتحمل مسؤوليتها؟

امتى