احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Friday, October 3, 2008

طيران الدويقة


شعارنا

"

الطم لانه حتفوتك الطيارة، انت اتزنقت معانا خلاص

"

يعني ابطل اجي مصر و لا ايه؟؟

في مايو اللي فات لما حضرنا مؤتمر الايدز حجزولنا على مصر للطيران و وقتها كانت الرحلة معقولة، صحيح المضيف مكنش طايق يوم ميلاده لكن انا قلت يا واد طنش خالص و صحيح المضيفة استحلفتها بالله عز و جل تقلي مين زعلها عشان ااجر اتنين صعايدة بعشرة جنية يطخوه بس هي فضلت متمسكة بموقفها و حكيت لي عن كمية مشاكل في خلال خمس دقايق و مسكتتش غير لما وطيت حبيت على ايديها انها ترحم من في السماء

عشانا صاحب السماء يرحمها بعدين يوم الحساب.

المهم ،على راي طنط دولت، قررت بعدها اني ادي مصر للطيران فرصة تانية تصلح بيها غلطتها و تغطي على اللي حصل بيننا زمان. و قررت اني نزلتي الجاية لمصر تبقى تكون عن طريق مصر للطيران و اهو اشوف بعد ما بقوا في ال

star alliance

و شعارهم بقى

fly safe, fly with style.

مش عارفة هل مصر للطيران متاكدين انهم فاهمين المعنى الصحيح للكلمة؟؟

اصل كل كلمة بعد فترة معينة من الاستخدام المتكرر ليها بشكل معين بتفقد بقية معانيها، فمثلا احنا دايما بنستخدم كلمة ستايل مع كل من يلبس و ياكل و يعيش بشياكة و الاطة لكن هل مصر للطيران قصدها انه اللي يسافر بستايل يعني باسلوب عمرك ما شفت زيه

قبل كده يخليك تحرم تسافر معانا تاني؟؟ الله اعلم


انا بقى قلت ادلع نفسي و احجز تذكرة درجة سيدات اعمال و اشوف الحالة هناك ازاي


اولا

طلبت بطانية لاني عيانة و التكييف مكسر عضمي

فقيل لي انه مافيش؟؟!!!؟ ازاي متعرفش

و لغاية نص الرحلة و المضيفة لسه بتدور على بطانية سلف ليا من اي ست عندها عيل صحي من النوم


ثانيا

الاكل مش بتيجي معاه مية

اي والله

يعني هما بياخدوا المية مننا فر المطار تخوفا من اني اكون مخبية فيها توكسفين الدي دي تي و حفجر نفسي

يقوموا كمان ميدونيش ميه جوا الطيارة و لازم اطلبها

و تغيب طنط المضيفة عليا و في الاخر الاقيها جايبة لي حق ميه احلف عليه


ثالثا

خير اللهم اجعله خير

اول ما دخلت الطيارة شميت ريحة مش و لا بد

و قوية لدرجة انها ممكن تخلي اي ارهابي يفكر انه يرجع و ميفجرش الطيارة دي بالذات لاننا حنموت باسفكسيا الروائح التواليتيه الخانقة

فانا طلبت من المضيفة منديل معطر اهوي بي على نفسي و انقي الاوكشجين اللي داخلي

فكان ما حصلت عليه هو كلينيكس عادي مرشوش عليه كالونيا ماركة اسانس شادية زي اللي حطها احمد زكي في فلم اربعة في مهمة رسمية و اتاري ايه

هي دي نفس الريحة الخانقة اللي استقبلونا بيها و انا كنت فاكراها ريحة المجاري اللي طافحة

فلكوا ان تتخيلوا كم الخنقة اللي حصلت لي

لما جيت احط المنديل على مناخيري

و بعدها صحيت عليهم بيفوقوني


رابعا

الفراخ في الاكل اصلها بلاستيك مطور و الخضار استوى على الشجر لوحده

يعني كله طبيعي طبيعي

كل ده كان قسم الطيارة


بالنسبة للمطار نفسه فهو بيبعت مسج واضحة لاي مسافر

لو اجنبي يخليه يحلف ما يعتب ارض مصر تاني

و لو مصري يخليك تقول طيب اروح فين يعني؟؟؟


يعني في كل مطارات الدنيا اللي سافرت لها بتبقى في كاونترات و كل كاونتر فوقيه لوحة اليكترونية بتبين اسم الشركة و رقم الرحلةو وقت الصعود طيب ليه كل التفاصيل دي؟؟

مؤكد عشان مش كل طيارات الدنيا بتقوم في وقت واحد و كمان عشان ميتلخبطش مسافر و يروح لمكان تاني او طيران تاني

كل ده شفته في كل مطارات الدنيا


الا مطر القاهرة الجوي

يا فضيحتك يا حفصة وسط الاجانب و المقيمين

مدخلين الناس كلها مع بعض و تبقى واقف لا انت عارف ده طابور السنبلاوين و لا كوم امبو و لا فرنسا

و حاجة اخر لخبطة

و اذ فجاتن تلاقي واحد مصري طيراني طلع على الكاونترات ينادي بزعيق على طيارة الكويت او قبرص

لانه لسه ناسها موصلوش

طيب ما هو طبيعي ميوصلوش

لانوا متبعترين الناس داير ما يدور المطار

فبعد المنادية دي

تبص تلاقي الشكل التالي

حاول تتخيل معايا صفوف نمل شبة منحرفة و فجاة ترمي عليها مية او توقف عود كبريت مشتعل في فوهة حجرها، حيكون شكلها عامل ازاي؟؟

حتبقى هرجلة ما بعدها هرجلة و تخبط

و زق

و خناقات

و ستات ينسوا عيالهم

و عيال بتضرب في بعضها

و ناس حاجات تقع منها


طبعا لانه من اول التشك ان الكل متاخر و محد ش عارف حاجة فبردو نروح نختم و احنا كلنا متاخرين مع اني جيت قبلها بتلات ساعات خس

و نقف في طابور طويل

يبدا من اول منابع النيل و ينتهي عند الدلتا

و يتم اهدار ما لا يقل عن عشرتاشر فيمتو ثانية في الدقيقة في مجرى الطابور

و كل ده احنا منتظرين و مش لاقيين اي حد نكلمه

تقلش المطار ده ذاتي التشغيل؟؟

و لما لقيت مسؤوول

قلت يا حضرتك انا طيارتي بتقوم بعد نص ساعة و الطابور ده حيتفوق على بتاع العيش

فقالي لااااااااااا

احنا اللي بنطلع الطيارات و احنا اللي بنزلها

و مادامك دخلتي المطار يبقى مش حتخرجي منه

فقلت هوبا

حتاخد امن دولة دلوقتي

و نعرك مع بعض

فرديت و قلت له بامارة السنة اللي فاتت لما اخرتوني بنفس سبب النظام بتاع اللا نظام ده و راحت عليا الطيارة

فقالي لا

السنة دي احنا غير

احنا مشتركين مع اتحاد النجوم

فقلت له خلاص

ما دام اتحاد النجوم يبقى عيني حتشوفهم في عز الضهر

و بما اني كمان كنت حاجزة درجة سيدات اعمال فبيبقى ليا استراحة خاصة نقعد فيها

سيبكوا انه مبقاش فاضل كتير على وقت الطيارة

بس اصلا مكان الاستراحة مالهوش علاقة بالقاعة اللي حنتشحن منها على الطيارة

فلما سالت البوليس ازاي احل المعضلة دي

قالي بكل بساطة و هو بيغمز لي بعينه انه متتالطيش عليا و روحي اترزعي في اي مكان

ووقفت في طابور تاني لغاية ما وصلنا الطيارة

و لما اشتكيت للراجل

قالي لا غلطتك انك ماصرتيش تقعدي في الاستراحة الخاصة بيكي

و احنا كنا حنوصلك مهما اخرنا الطيارة

فبصيت له و كنت عاوزة اقله انا مثقش فيكوا بس خفت ياخد مني التذكرةو يحرمني من السفر

بس قلت خلاص خليني ساكته و خلاص


و دي كانت نهاية فرقة علي الكسار

مع سفريات مصر للطيران و مطار القاهرة "الدولي" خدوا بالكوا دي اهم حاجة انه دولي

حد له شوق في حاجة من مصر؟؟

انا بقول اننا فعلا نهاجر و خلاص

و اهو نفضي المطر عليهم

علهم يتعظوا




17 comments:

Anonymous said...

اللى خلاهم يشغلوا طيار مش مستقر نفسيا و كان سبب فى موت مئات و فضيحة دولية و ازمة شبه سياسية مع اقوى دولة فى العالم يبقى مش عاوزة ده كله يحصل؟؟

خدى اتفرجي على البتاع ده هايجعبك عن مصر للطيران
http://www.youtube.com/watch?v=xkywyFKQyA0

^ H@fSS@^ said...

اهلا يا مصري بس انا مش متاكده انت قصدك مين بطيار مش مستقر نفسيا؟؟ انهي مرة دي؟
قصدك البطوطي و رحلة اكتوبر 1999

Anonymous said...

أظن اسمه كان دونالد داك او ميكي ماوس اه البطوطي

^ H@fSS@^ said...

شفت الكليب
مسخرة
بس لعلمك الطيارة اللي كنت فيها كانت اوحش و ااقدم من اللي باينة في الكليب
تخيل
لسه فيه هناك ما هو اسواء

بالنسبة للبطوطي فحكاية انه كان مختلف نفسيا دي
مسمعتش عنها حاجة
ادلة كتيرة ظهرت و تحقيقات حصلت و كان فيه هناك حاجات كتيرة بتقول ان الطيارة سقطت بفعل مؤثر خارجي مش داخلي


انت امتى ناوي تشغل مدونتك؟؟
و لا كل ده تحت التليين؟؟

Bou-ME said...

حفوووووووووووووووووووووووووووووووووووووووووووووووووووصة..... رجعني يا قمممممرررر و نورتي من تااااااااااااااااااااااااااااااني

معلش أنا قديمة حبيتين بقالي حبة حلوين مدخلتش على و لا مدونة


منوووووووووووووووووووووور يا صفصفففففففف

مطلق said...

المصري

الكابتن متجوزش عليه الا الرحمه
وبطل تعد ادام التلفزيون كتير لان الواضح انك متاثر اوي بالافلام و بطل تريقه و حياه خالتك


حفصه


الحوادث الي بتتكلمي عليها مبننكرش انها مبتحصلش بس دي فرديه
ادخلي علي منظمه الطيران العالميه و شوفي ترتيب مصر للطيران بين الاف الشركات و اوعدك حيعجبك لانه من اول 20 شركه و سبقنا شركات عالميه

Empress appy said...

ايه يا حفصه مالك ومال السنبلاوين بقى هااا هنعك طيب دى فيها مطار البقليه واوعى تسالى يعنى ايه معرفش مطار وخلاص
المهم عاوزه اقولك كلمه واحده على طيران مصر اللطيران من واقع تجربه مرة واحده ومكررتهاش
اسمهم مخيفات مصر للطيران بس ده يلخص لكى كل حاجه
كل سنه وانتى طيبه يا قمر

Anonymous said...

ياريت لو عندك لنكات بتتكلم عن موضوع الطيارة ده تبعتيهالى

هاشتغل قريب انشاءالله :)

^ H@fSS@^ said...

مريم منورة بنورك يا حبيبتي


كريم
اهلا بيك هنا بس اسفه اوي
اللي حصل معايا ده مش فردي خالص
ده جماعي و بالاجماع
مافيش حد سمعته بيحكي عن تجربته عن مصر للطيران الا و كانت تجربة مريرة
حتى موظفينها بيشتكوا منها
معلش مصر على عيني و راسي من فوق
لكن مش مستعدة اغمي عيوني و احطهم في الرمل
عشان نحافظ على سمعة اكل عليهاالدهر و شرب واتكرع كمان


ابي حبيبتي
سايق عليكي النبي تحكي عشان منها نعرف وجه اخر لقصص مصر للطيران و منها كريم يعرف اني مش لوحدي في الخندق


مصري حاولت افتحلك لينكات الجيزرة لانها وقتها هي القناة الوحيدة اللي عملت تحقيق عن الموضوع في برنامج سري للغاية في الفترة من 2000
قول من يناير لغاية نص السنة
دور في ارشيف البرنامج على موقع القناة
للاسف انا مش فاتح معايا اي موقع دلوقتي
الشئ التاني ان ليا قريب و راجل كبير السن يعني مش شاب غاوي شهرة مثلا
و كان من ضمن الناس اللي سافرت و ادت جزئها في التحقيق
و مكنش فيه اي علامات على مرض البطوطي بتاتا
و غير كده الشخص ده بيؤكد خضوع الطيارين بالذات لفحوصات كل فترة عشان يتاكدوا من سلامتهم كل فترة و التانية لانهم عارفيناثر طول السفر و لمسافات بعيدة ممكن يعمل ايه
و ف يالنهاية دي وجهة نظري
و انت لك وجهة نظر
فلو انت كمان تقدر تجيب لي اي لنك فيه اثبات ان البطوطي كان عنده اي مرض نفسي يبقى كويس
البينة على من ادعى


تحياتي

Anonymous said...

بالراحة بس مالك واخدة موقف دفاعي كده
انا يسأل بكل براءة بجد

اولا سيبك من الجزيرة انا شفت الحلقة اللى بتقولي عليها

ثانيا انا خالي هاجر امريكا من حوالي 30 سنة و كان من ضمن الفريق اللى ترجم و هو مصدري لموضوع جنان البطوطى و ازاى حكومة مصر ساعتها باست مؤخرة امريكا انها ماتقولش الموضوع ده والا مصر للطيران هاتقع مش هاتقوم.

^ H@fSS@^ said...

لا يا مصري
مش قصدي اهاجمك
ليه اصلا؟؟
الفكرة ان اللي انا شفته حسسني انها حاجة غير مرض البطوطي
و عرضت لرايي و مصادره
معنى اني اقلك البينة على من ادعى لانك اول واحد اشوفه
يقول النظرية دي و ده العادي
ان اللي يجيي يكسر مفهوم معين يجيب لنا عليه دليل
و لان كمان حبيت اعرف من فين انت بنيت نظريتك بس مش اكتر
و اذا معندكش مانع احب انك تراسلني على ايميلي الموجود في البروفايل
dorybettyx@yahoo.com
انا اعرف ان فيه تجاوزات لمصر لطيران كتيرة
بس متخيلش انها توصل للدرجة دي
يعني مثلا من ضمن سفرياتي معاهم و انا نازلة من الطيارة
لقيت الكابتن كان مربي دقنه و كانت نازلة لغاية اول كرشة
فاستغربت ان دي وظائف مينفعش يبان فيها هوية دينية و كمان مش بالقوة دي يعني
لكن توصل ان البطوطي كان مختلف نفسيا
فدي صعبة شوية بالنسبة لي
و ربنا يرحمهم كلهم كانت ماساة على جميع المستويات

تحياتي

sherif said...

اولا:تحياتي لشخصكم الكريم ومدونتكم
الرائعة
ثانيا:اختي الفاضلة يمكن احنا بقينا نشوف كل حاجة وحشة او اتعودنا على كده انا مش بتهمك لا سمح الله ,انا باتكلم عننا كلنا...بس عايز اقولك اني سافرت على شركات طيران كبيره و لها اسمها و صدقيني بحب اسافر على مصر للطيران ,غريبه؟؟؟:)والله برتاح جدااا على رحلاتها و محصلش معايا قلق يذكر في مطار القاهره و انا شوفت توتر و زهق و قرف في مطارات خليجية ليها وزنها ...يمكن انا بس نفسي اوشوف مصر حلوه دائما
ولكم مني و اصدقاء المدونة كل التقدير و الاحترام واتمنى ان تقبلوني صديقا جديدا

^ H@fSS@^ said...

طيب بص يا شريف
المرة الجاية نحجز مع بعض
يا حظي يطبع عليك
يا حظك يطبع عليا
و لو محصلتليش مشاكل لك الحلاوة
ايه رايك في الحل ده ؟؟
:D

sherif said...

طيب اوك ده حل كويس جدا و انا مسافر ان شاء الله نهاية الاسبوع الجاي الكويت و على مصر للطيران يالا اتفضلي شرفينا و نوري الكويت طبعا بزيارنك ..
بس انتي مقولتيش لو حظك انتي طبع عليا ايه الحلللل!!!!
:)

^ H@fSS@^ said...

ساعتها تقول ان الله حق و تحلف يا ريتك صدقتني انا و ابي
و امنت براينا
:)
شفت ظلم اكتر من كدا

sherif said...

لا خلاص مش لاعب ايه الظلم ده
اتفضلي شوفي اللينك ده هتلاقي آراء كتير مختلفه عن مصر للطيران

http://www.airlinequality.com/Forum/egypt.htm

وعموما ربنا ييسرلك كل رحلاتك و متلاقيش اي مشاكل في اي رحلة او اي مطار
و بالتوفيق دائما

أُكتب بالرصاص said...

كلام إيه دا يا حفصة
مصر للطيران
لا ختلف عليها اثنان


وطبعا مطار القاهرة
اختلف عليه الجميع

منهم من قال انه مطار سيء
ومنهم من قال انه اسوء مطار ممكن تشوفيه في حياتك
ومنهم من قال انه مش مطار اصلا

تعرفي ضابط الجوازات اللي بيختم الجواز ناقص يقول وهو بيختم خروج
غوووور
إللي بعده

في مطار كازبلانكا
اللي بيختموا الجوازات فتيات مغربيات
خلال الدقائق المعدودة اللي بتراجع الجواز بتقميم حوار ودي جدا من الضيف متمنة له إقامة سعيدة

في مطار دبي ظابط الجوازات كان بيهزر معايا وبيبارك لي لما مصر كسبت ساحل العاج في امم افريقيا لدرجة والله انا انكسفت من بساطته معايا


الظاهر انه

مشربش من نيلها