رتم يوم على وزن شتا

هل بتحصل في يوم انك تلاقي رتمة اليوم ماشية بالظبط زي كلمات اغنية بتحبها؟ و مؤكد لا كاتبها يعرفك و لا انت صحيت من النوم و قلت انا النهاردة ناوي اشرب عنب العنب و لا حروح اركب حنطور.

حط الدبلة و حط الساعة

حط سجايرة و الولاعة

علق حلمه على الشماعة

شد لحاف الشتا من البرد

يمكن كوثر مصطفى وقتها كانت بتراقب جوزها او اخوها اللي لسه مش عارف يكمل حياته زي ما هو عاوز.

بس انا سخنت ميه للقهوة، و سلقت بيضة و قرمشت التوست و ولعت بخور بريحة الزبدة و الروم معرفش ازاي بيصنعوه و كمان ولعت شمعة بالفانيليا. عبال ما كل ده يجهز، شقرت على زرعة الياسمين العقيمة و لسه عندي امل ان فتافيت قشر البيض الناشف حتساعد في اخصابها

زودت ميه البامبو و رميت ورد قديم معفن. بيقولوا ان البامبو بيجيب حظ سعيد للمكان اللي بيبقى فيه. عن نفسي كنت مربية كام عود في اودتي في امريكا، عمري ما شعرت بتوحد مع اي نبات زي ما شعرت مع البامبو، مش حدعي سابق معرفة بيه لانه بقى موضة دلوقتي، كل معرفتي بيه انه الاكل المفضل للباندا. لكن لما لقيته رخيص اوي كدا في امريكا قلت اربي لي كام عود، كنت حاسة اني عاوزة ارتبط بشئ هناك او احسس نفسي اني مش في غربة، و يمكن لعادتي الفطرية لحبي رعاية اي شئ و انميه، سواء اراعي شخص او نبات او قضية.، مبقدرش اقعد من غير ما احس اني مسؤولة عن حد.

لما جبته، زميلتي الصينية في السكن قالت لي انه بيمثل لهم في الصين علامة حظ و خير، المعلومة دي فادتني لما قطها مات و حبيت اعزيها فاديتها فرع عشان تبطل عياط و نخلص من موال "كاتسمياو". انبسطت اوي و حست ان اللي جاي حيبقى احلى و انا فرحت انها خلصت موال نحيب وفاته الكريمة.

رعاية البامبو سهلة اوي، ننساه في المية، كل اسبوع نحط له قشر البيض المتفتفت صغير اوي اوي (يندق بايد الهون) و نزود المية كل ما تنقص، و شوية شمس بس متكونش حارقة زي هنا مثلا

ممكن بقى نزرع كلنا بامبو؟؟و نحطها تحت مسمى عتبة جديدة

رؤيته فعلا بتشرح القلب، اللذيذ في الموضوع اني اصريت ممعنش النظر فيه النهاردة.

بلعت فطاري و فتحت الاخبار، كلها مااسي عن السقوط " الغير مسبوق" للبورصة و انهيار الدولار و البترول و قيم الفايدة و اسعار الاسهم و السندات و الاراضي و العقارات. حالة انتحار جماعي للحيتان الاقتصادية

هو التفسير بسيط خالص، بوش لقى نفسه ماشي ماشي و مش عارف يتذرع باي حرب جديدة و يقعد فترة مفتوحة الامد من غيرما حد يقدر يقله بم و لا قادر يمد في القديمة فقالك اسيبهالهم مخضرة و وروني شطارتكوا يا حلوين.

اول مرة كرهت العولمة كان من يجيي 6 سنين لما منعوا عننا البونس السنوي بتاعنا مع اننا كنا كقسم حسابات الافراد عاملين ربح كويس اوي و وكمان تعدينا الهدف الطلوب مننا. السبب بقى كان ان قسم حسابات الشركات في البنك خسر لان فيه شركة ماسكة توكيلات دايو في قطر خسرت عشان الشركة الجدة في كوريا اعلنت افلاسها، طب و انا مالي؟؟

لكن دلوقتي مش طايقة العولمة الاقتصادية دي بتاتا

وقفوا تعينات

و وقفوا الترقيات

قلصوا حجم العمالة

و لان مالياش لااسهم و لا عقارات و لا يحزنون

فقلعت النضارة

و طفيت الموبايل

و شديت الكوفرتا

و شغلت التكييف

و دندنت و قلت

انا قلبي برج حمام

هج الحمام منه

ياللي عنيك كلام

ليه الضلوع انوا

انا قلبي كان شباك

بس الهوا شباك

يا بكرة بستناك

ليك العيون حنوا

و من ثم كرهت عيشتي الحمقاء مفرغة المعنى بزيادة

دمتم