احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Saturday, October 11, 2008

رتم يوم على وزن شتا


هل بتحصل في يوم انك تلاقي رتمة اليوم ماشية بالظبط زي كلمات اغنية بتحبها؟ و مؤكد لا كاتبها يعرفك و لا انت صحيت من النوم و قلت انا النهاردة ناوي اشرب عنب العنب و لا حروح اركب حنطور.
حط الدبلة و حط الساعة
حط سجايرة و الولاعة
علق حلمه على الشماعة
شد لحاف الشتا من البرد
يمكن كوثر مصطفى وقتها كانت بتراقب جوزها او اخوها اللي لسه مش عارف يكمل حياته زي ما هو عاوز.
بس انا سخنت ميه للقهوة، و سلقت بيضة و قرمشت التوست و ولعت بخور بريحة الزبدة و الروم معرفش ازاي بيصنعوه و كمان ولعت شمعة بالفانيليا. عبال ما كل ده يجهز، شقرت على زرعة الياسمين العقيمة و لسه عندي امل ان فتافيت قشر البيض الناشف حتساعد في اخصابها
زودت ميه البامبو و رميت ورد قديم معفن. بيقولوا ان البامبو بيجيب حظ سعيد للمكان اللي بيبقى فيه. عن نفسي كنت مربية كام عود في اودتي في امريكا، عمري ما شعرت بتوحد مع اي نبات زي ما شعرت مع البامبو، مش حدعي سابق معرفة بيه لانه بقى موضة دلوقتي، كل معرفتي بيه انه الاكل المفضل للباندا. لكن لما لقيته رخيص اوي كدا في امريكا قلت اربي لي كام عود، كنت حاسة اني عاوزة ارتبط بشئ هناك او احسس نفسي اني مش في غربة، و يمكن لعادتي الفطرية لحبي رعاية اي شئ و انميه، سواء اراعي شخص او نبات او قضية.، مبقدرش اقعد من غير ما احس اني مسؤولة عن حد.
لما جبته، زميلتي الصينية في السكن قالت لي انه بيمثل لهم في الصين علامة حظ و خير، المعلومة دي فادتني لما قطها مات و حبيت اعزيها فاديتها فرع عشان تبطل عياط و نخلص من موال "كاتسمياو". انبسطت اوي و حست ان اللي جاي حيبقى احلى و انا فرحت انها خلصت موال نحيب وفاته الكريمة.
رعاية البامبو سهلة اوي، ننساه في المية، كل اسبوع نحط له قشر البيض المتفتفت صغير اوي اوي (يندق بايد الهون) و نزود المية كل ما تنقص، و شوية شمس بس متكونش حارقة زي هنا مثلا
ممكن بقى نزرع كلنا بامبو؟؟و نحطها تحت مسمى عتبة جديدة
رؤيته فعلا بتشرح القلب، اللذيذ في الموضوع اني اصريت ممعنش النظر فيه النهاردة.
بلعت فطاري و فتحت الاخبار، كلها مااسي عن السقوط " الغير مسبوق" للبورصة و انهيار الدولار و البترول و قيم الفايدة و اسعار الاسهم و السندات و الاراضي و العقارات. حالة انتحار جماعي للحيتان الاقتصادية
هو التفسير بسيط خالص، بوش لقى نفسه ماشي ماشي و مش عارف يتذرع باي حرب جديدة و يقعد فترة مفتوحة الامد من غيرما حد يقدر يقله بم و لا قادر يمد في القديمة فقالك اسيبهالهم مخضرة و وروني شطارتكوا يا حلوين.
اول مرة كرهت العولمة كان من يجيي 6 سنين لما منعوا عننا البونس السنوي بتاعنا مع اننا كنا كقسم حسابات الافراد عاملين ربح كويس اوي و وكمان تعدينا الهدف الطلوب مننا. السبب بقى كان ان قسم حسابات الشركات في البنك خسر لان فيه شركة ماسكة توكيلات دايو في قطر خسرت عشان الشركة الجدة في كوريا اعلنت افلاسها، طب و انا مالي؟؟
لكن دلوقتي مش طايقة العولمة الاقتصادية دي بتاتا
وقفوا تعينات
و وقفوا الترقيات
قلصوا حجم العمالة
و لان مالياش لااسهم و لا عقارات و لا يحزنون
فقلعت النضارة
و طفيت الموبايل
و شديت الكوفرتا
و شغلت التكييف
و دندنت و قلت
انا قلبي برج حمام
هج الحمام منه
ياللي عنيك كلام
ليه الضلوع انوا
انا قلبي كان شباك
بس الهوا شباك
يا بكرة بستناك
ليك العيون حنوا
و من ثم كرهت عيشتي الحمقاء مفرغة المعنى بزيادة
دمتم

6 comments:

محمد المصري said...

....
بكرة اللي جاي شموس
وعنيكي يتحنُّوا

:)

يا رب يكون البوست رتم يوم بس مش رتم فترة أطول من كده

sampateek said...

انا متاكدة ان حالة الابتئاس اللي انت فيها دي سببها التوست و البيضة المسلوقة و علشان تطلعي منها لازم تفطري 4 بيض مقي بالزبدة و طبق لبنة بالطماطم و مفيش مانع شوية فول بالزيت و كام رغيف محمصين

انا كمان اشترك معاكي في حب البامبو بس اول مرة اعرف موضوع الحظ ده انا مربياه في فازة في الحمام يمكن علشان كده ربنا مسهلهالي؟!!

اسكتي يا حفصوتشا يا اختي الواحدة منمنا مبقتش بتطيق تسمع الاخبار بتاتا
احنا ناقصين شلل يا اختشي

يسعد مساكي يا جميلة
تحياتشي

Anonymous said...

حفصت هانم ايه البامبو ده مش ده اللى بيعملوا منه الزمامير؟ هو بيتزرع مخصوص؟ انا افتكرته بيطلع لوحده.

معلش بكرة الدنيا تبقى حلوة

^ H@fSS@^ said...

محمد
وحشتيني
فينك يا راجل
بص حقلك انا من دلوقتي عارفة انها مش مسالة يوم
لكن اهو منير موجود نفضفض معاه شوية و هو بيغني
نورتني


سمبوكتي
وحياتك كانت عشان التلاجة فاضية و لسه منزلتش اجيب مونة البيت

بصي بقي اول مرة اعرف ان فيه حد بيحط زرع في الحمام
على اساس يمتص الغازات السيئة؟؟
بس مادام انت شايفة انه ربنا مسهلها عليكي فخليه
هههههههههههههههههههههههههههههه
عارفة بقى مشكلة البورصة فين
اني بشتغل في بنك دلوقتي و كل يوم هاريننا تقارير و ايملات عن الوضع
و ابو الوضع
و ام الوضع
و ولاد الوضع
لما كرهت وضعي خالص



مصري
et tu buto?
حفصت برضو؟؟
ماشي يا سيدي منه لله رامز
فضحني
ايوة يا سيد يالبامبو هو ده اللي بيعملوا منه الزمامير
بس مش فاهمة يعني ايه بتزرع مخصوص؟؟
ما هو لازم يتزرع
بس سهل العناية بيه اوي
روح بجد اشتريلك كام عود منعنع يشرحوا قلبك


تحياتي للجميع

bluestone said...

انا قلبي برج حمام
هج الحمام منه

وياريت مايرجعش الحمام
ويفضل البرج فاضي ومهجور
وانا اصلا هقلبه كشك سجاير احسن

وملعون ابو كل الحمام

انما قوليلي نجيب بامبو منين في القاهرة ...؟؟؟

انا قررت اصلا ألا اقوم بتربية اي شيء او رعاية اي شيء او اي شخص
او بحاول

كان عندي زمان كلب .. ولما خبطه سواق تاكسي تحت البيت وهرب
قررت اني ماربيش اي حاجة خالص

ولا حتى الحمام

^ H@fSS@^ said...

بلو
بصي هو الحمام خلق مش حيرجع لان البرج خوخ و بقى قديم و محتاج ترميمات كتيرة اوي
محتاج منحة من الامم المتحدة عشان يبقى عليه القيمة و تتم حمايته من هجوم تاني
معلش

بصي النباتات غير الحيوانات
لانك بتحسي برضة بحركة الحيوان
فلما يموت بتعمل فراخ وحش
لكن النبات ديتها كام يوم حزن و بتنسي بعد كدا


تحياتي