احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Monday, November 10, 2008

كخ كدا يا وائل يا عباس

تؤ تؤ تؤ تؤ
عيب عليك ان فعلت عظيمون و ان مفعلتش برضو عيب عليك، تجيبها كدا تجيبها كدا ، هي كدا

طيب تعمل ايه؟؟ انا اقولك
روح ارمي نفسك في البحر و ريحنا بقا
ايه ده ياوائل؟؟
انت ازاي متديناش تفاصيل حياتك الشخصية بالمللي؟؟ يعني اقعد انا دلوقتي كدا اضرب اخماس في اسداس على نوعية نشاطاتك؟؟ و مين بيمولها؟؟ و ليه بتتعمل اصلا؟؟ و امتى اتغديت و لو متغديتش يبقى ليه؟؟ و هل يا ترى الحاجة طبخت لك كشري ولا مسقعة النهاردة؟؟
و كيف تجرؤ انك تقبل منحة من قبل العدو؟ و كيف تجرؤ ان مصاريف المنحة دي تكون على حساب مركز ادهم التابع للجامعة الامريكية التابعة لامريكا العدوة؟؟ اذن انت فاسق و عميل صهيوني منحل
اي والله
يا وائل انت المفروض تكتب في مدونتك كل تفاصيل حياتك بالمللي زي تقارير الاخوة المستنيرين بتاعت الستينات كدا عشان نعرف كل حاجة عن تحركاتك يا امتن حضطر اشغل صراصيري في تتبع كل تحركاتك و تمويلاتك و افضحك بالمفتشر على صفحات الجرايد، المعارض منها و الغير معارض
و خد بالك
لما بتكتب حاجاتك الشخصية نبص نلاقي الناس بتقولك ياااااي مدونتك بقت شخصية اوي و وفقدت مستواها و حاجة يااااااااااااع
و لما تتكلم عن سفرياتك و تشرحها و تنشر نشاطاتك الناس تعيب عليك و تتهمك انك مبقتش تعمل تغطيات سخنة من بتاعت زمان و كل واحد يشارط عليك كانه هو الممول الرئيسي للموقع بتاعك لا سمح الله
الا قولي يا وائل، انت مش بتشتغل ليه شغلانة كويسة تنزلها الصبح و ترجع منها بالليل و تقبض منها مرتب كويس و تنهد بقى و تريحنا، يا اخي فلقتنا، يعني بجد عامللي صداع افقي في المخيخ
اه مينفعش، عارف ليه يا وائل؟؟ عشان امن الدولة مخنق عليك و مانعين اي شركة خاص او عام، صغيرة او كبيرة انها تشغلك او تتعامل معاك.
و حرجع اششد عليك اننا لازم نكون عارفين كل خط سيرك و تحركاتك بالمللي يا وائل، مينفعش، امال احنا قاعدين على الكومبيوترات و مشغلين خطوط النت ليه؟؟
و بما انك انت السبب في اني ادخل عالم التدوين فده يديني الحق اني اكبس على انفاسك و اطالبك اني اكون ملمة بنواياك كمان
و بعدين مش عارفة كل مادا امريكا بقى مستواها في النازل، وصلت انها بتعين مخبرين و جواسيس من امثالك بالمفتشر كدا؟؟ عيني عينك كدا؟؟ دي حاجة غبية اوي انهم يعمللوكوا ريكروتمنت علني بالمنظر ده، دول كدا حرقوا ورقهم من قبل ما تبتدوا شغل جواسيسي، بصراحة مالهومش حق.
طيب ناويين تعملوا ايه دلوقتي ؟؟ تجميل و لا بوتوكس؟؟
ما هو اصله لازم حتغير خلقتك عشان لما تروح تلم المعلومات كونك جاسوس و عميل لامريكا متتعرفش و لا ايه الحاصل؟؟
و كمان خد بالك حكاية انك تخبي علينا نوع تحركاتك و مين بيمولها دى له تاثير سئ على البورصة المصرية و نتيجة امتحانات الثانوية العامة و نتيجة انتخابات اوباما نفسها
صحيح بمناسبة اوباما قلي صحيح، شكله ايه عن قرب؟؟ ما هومؤكد كان بيجتمع معاكوا كل يوم، منها تناقشوا السياسة المحطوطة و تنفذوها تاني يوم و منها يقبضكوا المعلوم، هل صحيح انه زيه زي اي امريكي اسود بياكل تشيكن وينجز بالهوت صوص و يمزمزها بسنانه؟؟
صح؟؟ مش كدا؟؟؟ متنكرش احنا مصورينك و هو بيسلمك ظرف بني كبير و عليه بقع زيت

اخي وائل
الاعتراف سيد الادلة فلازم تعترف و غير كدا عاوزاك تشغل الجايكو و المايكو و الفويتر اياهم ده بحيث كل تحركاتك تبقى نازلة اول باول كبوست
مش في عامود على جنب و تروح و تمشي مع كل ابدايت و تضيع الحقيقة و منعرفش مين قال ايه و ليه و ازاي
و يترب الزمن عليها و منقدرش نلم بكل تفاصيلك
اخي وائل، فيها لاخفيها
او تستحق اني اقولك
تبا لك

رجل امن امريكي متنكر في شكل عربي بيسلم وائل الفلوس في جيبه لكنهم مغلوشين و عاملين نفسهم بيتخانقوا مع بعض
قال يعني

6 comments:

طالب ثانوى said...

انا مش فاهم انتى بتهاجمى وائل ولا بتتريقى على حاجة معينة

واحد مش فاهم حاجة said...

بجد بجد انا تعبت مالحوار دة واللى بيجرى فية

كل واحد بقى واخد التدوين واللى بيجرى فية على صدرة ومش عارف ميين عمل اية وميين كتب بوست بضان بيقول فية اية وميين قابل ميين

ناسيين اساسا ان اسمة تدوين


انا هابعبع واستحملى بقى بما انك فتحتى الموضوع


انا فاكر اول ما عرفت التدوين دة

دخلت لاقيت عالم رايقة

اة بنفس اللفظ كدة رايقة

يعملوا بانرات بروقان
يتكلموا عن موضوع معين بروقان
وبيخترعوا افتكاسات رايقة

والروقان مش بقصد بية الهيافة او السطحية بالعكس الروقان دة كان بيديهم تقل فى القضية اللى بيتكلموا فيها

دلوقتى ممكن تلاقى مدون عدى علية خبر

يطلع يقول انا مخنوق وتعبان نفسيا وبطنى وجعانى وهاموت بسبب الخبر دة

ياعم مدونتك وانت حر فيها

بس صحتك يعنى انا قلقان على صحتك

هاينفعك اية ياعم انك تزعل ولا بطنك توجعك مالعفانة اللى فى الاخبار

مالاخبار طول عمرها معفنة

واحد يسالنى انا محموق اوى كدة لية

اقولك ياعم عشان انا مش عاجبنى ان الشباك الوحيد اللى اتفتح بينى وبين ناس بتفهم وبتفهمنى يجى حد يرميلى قدام الشباك دة زبالة

لا يبقى بلاها خلى الزبالة اللى فى دماغى تفضل زى ما هى بدل ما يجيلى زبالة من برة
مش عارف بدل مانرمى زبالتنا اللى مانعانا من اننا نشم ريحة الحرية او الامل نقوم نحدفها على بعض بدل مانخرج برة الاطار بتاعنا خالص


اكتبوا افكاركم فى مدوناتكم بروقان يا اسيادنا

بس خلاص

tamer.sala7 said...

لا طبعا بتتريق علي حاجة معينة

عم مينا said...

هاهاها بجد ضحكتيني من قلبي يا حفصة
أنا موافئك في كل كلمة قلتيها
لازم نتخلي عن نظرية المؤامرة اللي جايبانا ورا!
مش ممكن كل واحد يسافر أمريكا يبقي خاين
و كل واحد يعمل أي حاجة ليها علاقة بالجامعة الأمريكية يبقي عميل

kareem said...

هو كل واحد اخد منحه من امريكا عميل


لو كده انا بفتخر اني عميل

و طظ فيكي

^ H@fSS@^ said...

ههههههههههههههههههههههههههههه
كريم
انت قليل الادب بس دمك خفيف و متسرع
اقرا و افهم الاول و بعدين ابقى تعالى اشتم اذا كان لك حق