احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Friday, November 21, 2008

درس في تحمل تبعية القرار

زمان
اصاب مرض الجديري المائي بعض من اطفال عائلتي
و انتقل بينا بفعل قربنا من بعض فانتقل لي تباعا
نبه علينا الاباء عدم لمس هذة "الفقاقيع" و الا حدث ما لا تحمد عواقبه و لا تفند اسبابه
فاجتنبنا عدم لمسهم بالفعل
الا انا
و ليس عندا مني و لكن كعادة حظي استقرت ناموسة على احدى هذه الفقاقيع و قرصتني
و احسست القرصة و لكني لم اجرؤ على الهرش في هذة الفقاعة و الا حدث من العواقب ما لا اعرفه بالظبط
تماسكت لمدة ثلاثة ايام تعذيبية
لم تكن القرصة بالخطيرة
لكن تخيل هنا كيس ماء صغير على جلدك و اتت ناموسة لتدغدغ نفسها فيها، هل تتذكر تلك المرة التي احسست فيها بشعور دغدغة خفيف و لكنه مقشعر فقط لتكتشف تسلق نملة اعلى رسغك او يدك؟؟
هو كذلك مضروبا في عشرة
بالنسبة لفتاة في السادسة على ما اعتقد كان تعذيبا فوق احتمالي
في اليوم الثالث ذهبت لامي ابكي بحرقة و صوت خفيض على غير عادتي اتوسل لها ان اهرش و اللي يحصل يحصل
فقالت لي" انتي اصلك مش متخيلة ايه اللي حيحصلك لو هرشتي، حتخلي كل الفقاقيع تكتر لانك حتنشري المرض و كمان حتعملي ندبة في مكان الهرشة"
ناهيك اني مش عارفة يعني ايه ندبة فشرحت امي ليا انها علامة زي اللي موجودة على اعلى حاجبي الشمال نظير شقاوتي مع شظايا الزجاج
فعرفت ان تمن الهرش حيكون علامة تانية فسكت
رحت لوالدي ابكيله هوكمان فعرض عليا صفقة، قالي حسمحلك تهرشي بشرط واحد، قلت له هات ما عندك يا رجل؟؟ قالي تتحملي تبعية نتيجة قرارك، لو الهرشة سابتلك علامة زي ما مامتك قالت او زادت الفقاقيع احنا مش مسؤولين، حنساعدك تتعالجي طبعا لكن مش من حقك تشتكي لانك انتي اللي عاوزة تهرشي و عرفتي انك حتنضري لو هرشتي الفقيعة، ماشي؟؟
قلت له ماشي بس اهرش
كرر عليا فكرة اني اتحمل تبعية قراري، مش عارفة ازاي و انا بنت ست سنين فهمتها و تحملت قراري
و هرشت
كنت في قمة الراحة بعدها
و شفت الفقيعة و هي بتتفجر قدامي و المية ذات اللون الغريب و هي بتنزل قدامي لكن كانت راحة ما بعدها راحة
و قام والدي و صب لي من الدوا الازرق اللي كانوا بيحطوه على فقاقيع الجديري
عدى قرب الاسبوعين و راحت اثار كل الفقاقيع، الا مكان ما هرشت، انوجدت دايرة صغيرة لونها ابيض من بقية جلدي و مش بنفس المستوى، كانت متقعرة بعض الشئ. الاول انزعجت و جريت اعيطلهم يلحقوني، لكن ماما قالت لي احنا قلنالك و بابا قالي افتكري بنود الصفقة، فسكت.
الى الان توجد هذه العلامة على دراعي الشمال، فخورة بيها جدا، دي حتى تنفعني لو وقعت بيا طيارة فيقدروا يتاكدوا من جثتي



دلوقتي
كنت محتاجة احجز تذكرة في وقت ضيق اوي، بالصدفة البحتة عرفت ان مكان عملي معين عندنا شخص مندوب من شركة حجوزات لاننا بنحتاج حجوزات طيران كتيرة اوي
كنت واقفة في مكتبه مستنياه يخلص شغل وواقفة معايا زميلة من نوعية الناس الحربوئين و محدش يسالني يعني ايه حربوئة، بس اللي هي شخصية بتكون عاوزة تلحق كل شئ و اي شئ و تلم بكل المواضيع و تتكلم مع كل الناس و عندها اخبار الشغل كلها و عارفة كل واحدة حصل معاها ايه الخ الخ الخ
المهم طنط حربوئة دي كانت على حظي واقفة معايا و لازم كعادة اي عربي التدخل والسؤال، فعرفت اني مسافرة المكان الفلاني في الوقت المزدحم العلاني،
طنط حربوئة: لسة محجزتيش، ادني دقني اهي اذا لقيتي حجز.
انا: انا شيكت اونلاين و لقيت و في كذا شركة طيران كمان.
طنط حربوئة: يبقى مؤكد لو اتاخرتي حيروح عليكي الاماكن و لو لقيتي حيكون السعر زاد مش اقل من الف ريال.
انا: ما هو انا لسه مش متاكدة من ميعاد السفر و مضطرة استنى اتاكد من مواعيد معينة مناسبة للناس اللي حتسافر معايا.
طنط حربوئة: بس كدا حتدفعي فلوس زيادة لو اخرتي الحجز عن النهاردة( يعني تكرار تكرار كانها مقالتش الكلام ده من قبل)
انا: انا متحملة تبعية نتيجة قراري
مش عارفة ايه اللي حصلها لكن وشها ازبهل شوية و قالت لي يعني ايه تتحملي قرارك؟
انا: يعني لما اتخذ قرار معين و له سلبياته مهما صغرت فلازم اكون متحملاها، فزي موضوع التذكرة ده قدامي حلين، يا اما اني احجز دلوقتي و يطلع حجز مش مناسب فاضط اغيره و برضو اضطر اني ادفع فلوس بس مش حكون عارفة كام بالظبط و ممكن اصلا ملاقيش ايام تناسبني
يا اما اني استنى يومين كمان و كنتيجة لتاخري في الحجز حدفع تمن تذكرة اغلى لكني لازم اكون متحملة نتيجة قراري، بس، ده قصدي
هي: (تبليم تام و سابتني و مشيت بعد كدا)
حد عنده تفسير؟؟
ليه تبقى غريبة لو تحملت تبعية قراري اللي اتخذته سواء شبة مكره او مش مكره خالص.؟؟؟؟


4 comments:

ذو النون المصري said...

بقالي كام بوست مجيتش هنا لاني مكنتش متابع مدونتي اصلا
و فوجئت بكام بوست فاتوني
وائل عباس زي ما كان سبب في دخولك التدوين كان ايضا سبب دخولي فيه و بالصدفه انه كنا في نفس اليوم 6 اكتوبر 2006 و انا باعتبره مجتهد و مكافح و يستاهل كل خير
...............
انا علي فكره فوجئت بان مدونة شهروزه محذوفه و مش عارف اتصل بيها من بعد الزواج او بالاصح محرج
معندكيش فكره عن سبب قفل المدونه هي علي فكره محذوفه خالص
...............
تحياتي

ابو احمد said...

الإبنه الغاليه
فعلا هى دى التربيه السليمه اللى خرجتلنا أستاذه مثقفه زيك تحياتى للوالد والوالده
وتحياتى للإبنه المتألقه دائما

somethingforthesoul said...

أعتقد كان ينفه ماء بارد او قطعة ثلج
أقول هذا الإقتراح لمن يكونوا فى نفس الظروف

تحياتى

^ H@fSS@^ said...

نون
لعلمك
انت لو علقت على كل بوست في مكانه برضو حيوصلني تعليقك و اعرف رد عليك والله
بالنسبة لوائل عباس
فلانه ناجح و كل ناجح له اعداء و حقودين عليه و منه
فبتالي لو عباس رقصلهم رقصة المجنونة مش حيعجبهم
و في ناس تانية منصبه نفسها قاضي على مدونات خلق ربنا

بالنسبة لشهروزة فانا مافيش بين يو بينها اي اتصال خالص
و معرفلهاش سكة
اسال رنده اعتقد تفيدك اكتر مني


ابو احمد
رايك على راسي من فوق
و تسلم لي يا رب


رائد فضاء
متشكرة على القاتراح
نستخدمه مع مريض جديد بعد الشر
دي قصة عمرها فوق ال22 سنة


تحياتي للجميع