صدمة معقودة بفيونكات زي البابيون

بقالي كام يوم بتابع صدى و تجويف المفاجات المتفجرة في موضوع نهى رشدي العميلة الخاينة و مدعية الفضيلة
اي والله
هي دي نهى حسب اخر التقارير و الاحصاءات
بجد مش قادرة اوصف مدى الدهشة اللي انا فيها من هول و مصيبة اللي قريته من مختلف التعليقات سواء على الفيسبوك لغاية المدونات

اولا
مع بداية القضية و قرينا كتيرتعليقات عن ان لو نهى كانت احتشمت في لبسها مكنش حصل اللي حصل، طيب ما هي دي اصلها مش اول حالة تحرش حصلت في مصر، معروف اوي الكام حالة تحرش اللي حصلت على مدار السنتين تلاتة اللي فاتوا بشكل جماعي و طالت كل ما يكون على شكل انثى سواء بنت او ست متجوزة او ست كبيرة في السن، سواء كانت حلوة او مش حلوة، مكشوفة او متغطية، بنت صغيرة او حامل، يعني التحرش طايل الكل، غير ان ظاهرة التحرش بدت تستشري و تستفحل و انتشرت بشكل مش طبيعي مع بداية انتشار الحجابات و الاسدالات و النقابات، طيب نفسر بايه ظهور الحالتين دول؟؟
و نفسر بايه ارتباطهم ببعض؟؟
ما هما اللي بيقولوا يا ريت البنات تتغطى ، ردي عليهم ان التحرش واصل الكل، و لان اللي بيتحرش لو عارف انه فيه قانون حيتعدل و يبقى زي الكلب و ماشي ديله بين رجليه و ميجرؤش انه يهوب ناحية اي بنت لا من قريب و لا من بعيد
الشئ المثير للتقزز و الغثيان هو ان اغلب التعليقات الفاجرة في حق شرف نهى و بيعيبوا في عرضها طالعة يا اما من رجالة مربية دقنها و زبيبة الصلاة موسومة على جبينهم او من بنات حاطين صور لستات منقبين و محجبين
دول كانوا على الفيسبوك في حالة ان فيه حد حابب يتذاكى و يقلي و انتي شفتي شكلهم ازاي
و سواء ده كانت صورهم الحقيقية او صور لشخصيات عامة منشورة على النت فمؤكد هما مختارين صورة بتدل عليهم
فبصراحة مش عارفة مين اللي بيسئ للدين الاسلامي و بيديله مظهر سئ اوي اللي سمح لنفسه انه يخوض في اعراض الناس و يهتكها بالمنظر ده


ثانيا
بعض الناس
من مدونين او غيرهم على الفيسبوك
حاولوا "يتخيلوا" الظروف اللي ممكن تكون اثرت على شريف و دفعته لانه يعمل العملة السودا اللي هو عملها. و اسفه جدا
بس مهما كانت ظروف سيئة بتمر بشخص مش من حقه انه يعتدي على غيره لا بالقول ولا بالفعل،هل هو يرضى ان حد تاني يتحرش بامه او اخته او بنته لو ربنا رزقه؟؟ لو كل راجل محترم فكر كدا مظنهوش يجرؤ انه يعتدي على البنات اللي ماشيين في الشارع و الا يبقى ديوث و معندهوش شرف
انا اعرف انه في وقت المجاعات الواحد بيسرق عشان ياكل ، مفهومة و لها ظروفها و ان كان شئ لابد من نقاشه ووضع حلول ليه غير السرقة، لكن انه مش قادرة يتجوز فيكون الحل انه يبقى عامل زي التور الهايج و طايح في بنات خلق الله، فالحل بالنسبة لي اني احجزه في
عنبر المهوسيين في العباسية.

ثالثا
و ما ادراك ما ثالثا
نهى رشدي اسرائيلية
دندن دن ديييش
افندم؟ بتقولوا ايه؟
نهى اسرائيلية، طيب خير يا طير يعني؟؟ ايه المشكلة؟؟
; الاسرائيلين بينا و بينهم مشاكل، ماشي، بس ده ميمنعش ان لو حد فيهم حب ياخد حقه ياخده، و احنا كمان لو حبينا ناخد بحقنا فلازم نصر عليه و ناخده.
لكن ، المفاجاة الاخطر ان نهى مش اسرائيلية ، مش اسرائيلية بالمعنى المتعارف عليه. نهى من عرب 48، او بمعنى اصح جدها من عرب
سنة 48، طيب ده يشينها في ايه؟؟
ايه نوع المذلة اللي لازم تنكتب عليها بما ان ابوها من فلسطينيين 48؟؟ حد يعرف المعاناة اللي عانها فلسيطينيو 48؟ حد سمع عن حكايات من جدودة ازاي كانوا بيتدبحوا بالفؤووس و البلط من عصابات الهجانة و غيرهم في عز ما هما نايمين في بيوتهم؟؟ حد سمع عن فزع ام منهم من خوفها و هي بنت 15 سنة و معاها طفلين نسيت واحد منهم و عبال ما افتكرته كانت سلمت قضاها لربنا؟؟
حد سمع عن عرب 48 اللي هربوا في نص الليل في عز الشتا بالهدوم اللي عليهم و مش واخدين معاهم غيرمفتاح البيت على اساس يرجعوا بعد اسبوع او بالكتير اسبوعين و لغاية دلوقتي مرجعوش، مات منهم اللي مات، و عايش منهم على امل انه يرجع اللي لسه عايش. حد سمع عن مختار البلدة اللي يشوف الذل و المهانة و ميكونش عارف مصيره ايه بعد ما كان له شنة و رنة و صاحب حكم نافذ و بيحكم قرية و يتحكم في مصاير ناس و بيهتم لامرهم كلهم؟؟
هما دول جزء من عرب 48
ناس زيهم زي اي حد
عاشوا زي ما كل حد عاش
و ماتوا زي ما اي حد مات
لكن عندهم من الذعر اللي يكفي يملي افلام رعب لها اول مالهاش اخر
انا اول مرة شفت مقابلة منى الشاذلي مع نهى سمعتها بتقول انها لما قربت علي شريف في عربيته قفل الترباس لكن نهى مقالتش قفل، هي قالت "سكر"( بالفتحة على السين و الشدة على الكاف) العربية، وقتها عرفت ان البنت فيها عرق شامي، قلت يمكن والدتها سورية او شامية بالمجمل، لكن ده مفرقش معايا في نظرتي ليها انها مصرة تاخد حقها، بالعكس لو اصرارها انها تاخد حقها نابع من كونها فسلطينية و معروف ان البنت الفلسطينية قوية و شرسة اذا استلزم الامر، فده يزعلني ان مافيش واحدة مصرية مصرة توقف التحرشات عند حدها. انا مش بتحامل مع طرف ضد الطرف التاني و لا عمري ما تحاملت مع مصري ضد فلسطين او العكس، لكن الفلسطيني معروف انه اتربت عنده شئ من القسوة او القوة او الاصرار على عدم ضياع الحق كرد فعل للارض اللي اتاخدت فجاة من دون سابق انذار من الاغلبية الفلسطينية و كرد فعلا للتشرد اللي حصل للفلسطينيين في كل انحاء الدنيا.
زمان و انا صغيرة كنت اسمع ان ابصر مش عارفة نقابة مين بتدين سفر المخرج فلان الفلاني او علان العلاني عشان سافر اسرائيل، طيب المطرب الفلاني ده او المخرج العلاني ده مسافر مثلا للاسرائيلين اللي هناك؟؟ ما هو مسافر للعرب اللي هناك مش "للعدو" لا سمح الله. حد عارف قد ايه هما هناك بيعانوا من كونهم مقصيين من العرب اللي برا فلسطين لانهم موجودين في الكيان الكخة الاسرائيلي و كمان مقصيين من الاسرائيلين لانهم عرب و فلسطينيين؟؟
يعني هما حصار من جوا حصار
والغريب اننا شايفين نماذج من العرب دول
محمود درويش
عزمي بشارة
كاميليا جبران و اخواتها و امثلة من نفس النوع ده كتيرة
فسواء اللي اطلقوا على نهى اشعة انها اسرائيلية
او انها من عرب 48 فانا مش عارفة ايه المشكلة او العيبة في كدا؟ انا تخيلت لو كان اهل والدي لسه موجودين هناك و مع ذلك اضطرني ظروف اني اجي مصر و حد يتحرش بيا فاسمع مقولة " اه، ما اصلها اسرائيلية من عرب 48" يعني بجد كانت ممكن تشلني او تجيبلي حسرة على نظرة الناس للامور ازاي

و ازاي بيحكموا على غيرهم من غير تقصي لاي حقيقة او فصفصه تفاصيل

الجهل فعلا افه

و اللي عملته نهى اصلا المفروض انه يبقى عادي
و اصلا مينفعش يكون فيه تحرش بالمستوى ده
في ايطاليا معروفين بكثرة معاكستهم للستات
و دي بيعتبروها في اوروبا حاجة اوفر شويتين
طيب لو جم هنا حيعملوا ايه؟؟
مع انهم في ايطاليا عمرها ما بتوصل بيهم انهم يمسكوا واحدة و يقفشوا فيها بالمنظر المخزي ده، هما بيعاكسوا شفهي و بصنعة لطافة كتعبير عن الجمال و تقديرهم ليه بس مش اكتر
و اي نعم هما هناك عندهم حرية جنسية لكن مهما كان وجود الحرية دي او فكرة ان الراجل قادر يفرغ رغباته او لا مش السبب و لا تديه الحق انه يعتدي على خلق ربنا و يستضعفهم.


رابعا
و دي للاسف مخلياني فعلا مؤمنة بنظرية المؤامرة
و انا مش بصدق النظرية دي غير يعني في الحالات القصوى
لكن مقدرش اخفي انه واضح جدا تعرض نهى لحملة تشويه عن عمد و سبق الاصرار و الترصد
دخول نبيه الوحش الغير مبرر
و اي نعم هو كل قضاياه غير مبررة
لكن دي بزيادة يعني
يعني حاجة كيسكلياه خالص لا تقدر بتمن
حكاية ان المدعوة ب نجلاء الامام دي يعني صحيح الانتقام بين بنات حوا ممكن ياخد اشكال اقوى من كدا
بس دي هنا محامية بتحط مصداقيتها على المحك
فمؤكد هي مش هبلة و عارفة هي بتعمل ايه
المثل بيقول العيار اللي مبيصبش بيدوش
يعني مؤكد هما عارفين ان الحكاية مش حتاخد لها اكتر من يومين عشان تنكشف ان كل ادعائتهم غلط
لكن الفكرة انهم غلوشوا على الموضوع و شوشروا و السلام و ادي الدنيا هايصة و مصهللة على كونها اسرائيلية او غيره
و البنت تضطر تطلع جواز سفرها
و تبقى تدخل في خصوصيات الغير و اهي قلبة دماغ و السلام
عملية التشويه الخطيرة جدا دي انا مش عارفة سببها ايه و ليه كمية الهجوم عليها بالمنظر ده؟؟
مين له غرض انه يسيئ لها و يهنها و يشهر بيها؟؟
و المحامية اللي اسمها نجلاء دي فدي عرة المحامين و عرة الستات و ابقوا قابلوني لو اي حركة تحرير مرأة نفعت طول ما نجلاء دي و امثالها هما اللي ماسكين المواضيع دي و عايشين الدور و واخدين الحكاية اعلام و بس
يعني هما فعلا قلبهم لا حقوق مراة و لا بطيخ
و سلم لي على حرية المراة و كرامتها طول ما دول اللي مسؤولين عنها
اخيرا
قضية زي دي مكنش المفروض تاخد الكم ده من الاعلام
لانه اصلا ده المفروض اللي يحصل
بنت تتعرض لتحرش
فتقدم الشخص اللي اتحرش بيها للمحاكمة
و بس خلاص
لكن ان الموضوع يتحول لراي عام بالشكل ده و لا كأنها قضية لوسي ارتين في زمانها يعني حاجة تكسف
اي نعم فرحنا بالحكم لانه من كترة الاحباطات مكنش حد متوقع او مصدق
و لان مكنش حد عارف ان التحرش له عقوبة و تعويض كمان
و ده لجهلنا احنا مش اكتر
و اديه درس و اتعلمنا منه
ان الراجل اللي يتحرش
مصيره تلات سنين سجن
و ان البنت اللي يتحرش بها
متسكتش و تبلغ و تصر على موقفها

مش بعيد ان اللي بيتعمل في نهى ده له علاقة ان فيه جهة معينة مش عاوزة البنات تاخد حقها و مش عاوزة المجتمع يوقف تحرشاته بالبنات بدعوة غطوهم اشرفلهم
و يمكن نفس الجهة دي هي اللي زاقة الوحش عليها كنوع من انواع الغتاتة و التباتة و نحاسة الشعور
بس السؤال
مين يا ترى له صالح في تهديد نهى و تخويفها بالشكل ده و كسبان ايه يا ترى؟؟
مين اللي خايف و مرعوب من بنات ياخدوا حقهم لو حد اتحرش بيهم في الشارع؟
مين اللي خايف ان الشارع المصري يرجع يتظبط من تاني؟؟
مين له صالح في ابقاء الشارع تحت وطأة تهديد الرجالة للستات و نشر فكرة انه مش قادر يتجوز فيتحرش؟
مين؟؟؟؟