احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Monday, November 3, 2008

صدمة معقودة بفيونكات زي البابيون

بقالي كام يوم بتابع صدى و تجويف المفاجات المتفجرة في موضوع نهى رشدي العميلة الخاينة و مدعية الفضيلة
اي والله
هي دي نهى حسب اخر التقارير و الاحصاءات
بجد مش قادرة اوصف مدى الدهشة اللي انا فيها من هول و مصيبة اللي قريته من مختلف التعليقات سواء على الفيسبوك لغاية المدونات

اولا
مع بداية القضية و قرينا كتيرتعليقات عن ان لو نهى كانت احتشمت في لبسها مكنش حصل اللي حصل، طيب ما هي دي اصلها مش اول حالة تحرش حصلت في مصر، معروف اوي الكام حالة تحرش اللي حصلت على مدار السنتين تلاتة اللي فاتوا بشكل جماعي و طالت كل ما يكون على شكل انثى سواء بنت او ست متجوزة او ست كبيرة في السن، سواء كانت حلوة او مش حلوة، مكشوفة او متغطية، بنت صغيرة او حامل، يعني التحرش طايل الكل، غير ان ظاهرة التحرش بدت تستشري و تستفحل و انتشرت بشكل مش طبيعي مع بداية انتشار الحجابات و الاسدالات و النقابات، طيب نفسر بايه ظهور الحالتين دول؟؟
و نفسر بايه ارتباطهم ببعض؟؟
ما هما اللي بيقولوا يا ريت البنات تتغطى ، ردي عليهم ان التحرش واصل الكل، و لان اللي بيتحرش لو عارف انه فيه قانون حيتعدل و يبقى زي الكلب و ماشي ديله بين رجليه و ميجرؤش انه يهوب ناحية اي بنت لا من قريب و لا من بعيد
الشئ المثير للتقزز و الغثيان هو ان اغلب التعليقات الفاجرة في حق شرف نهى و بيعيبوا في عرضها طالعة يا اما من رجالة مربية دقنها و زبيبة الصلاة موسومة على جبينهم او من بنات حاطين صور لستات منقبين و محجبين
دول كانوا على الفيسبوك في حالة ان فيه حد حابب يتذاكى و يقلي و انتي شفتي شكلهم ازاي
و سواء ده كانت صورهم الحقيقية او صور لشخصيات عامة منشورة على النت فمؤكد هما مختارين صورة بتدل عليهم
فبصراحة مش عارفة مين اللي بيسئ للدين الاسلامي و بيديله مظهر سئ اوي اللي سمح لنفسه انه يخوض في اعراض الناس و يهتكها بالمنظر ده


ثانيا
بعض الناس
من مدونين او غيرهم على الفيسبوك
حاولوا "يتخيلوا" الظروف اللي ممكن تكون اثرت على شريف و دفعته لانه يعمل العملة السودا اللي هو عملها. و اسفه جدا
بس مهما كانت ظروف سيئة بتمر بشخص مش من حقه انه يعتدي على غيره لا بالقول ولا بالفعل،هل هو يرضى ان حد تاني يتحرش بامه او اخته او بنته لو ربنا رزقه؟؟ لو كل راجل محترم فكر كدا مظنهوش يجرؤ انه يعتدي على البنات اللي ماشيين في الشارع و الا يبقى ديوث و معندهوش شرف
انا اعرف انه في وقت المجاعات الواحد بيسرق عشان ياكل ، مفهومة و لها ظروفها و ان كان شئ لابد من نقاشه ووضع حلول ليه غير السرقة، لكن انه مش قادرة يتجوز فيكون الحل انه يبقى عامل زي التور الهايج و طايح في بنات خلق الله، فالحل بالنسبة لي اني احجزه في
عنبر المهوسيين في العباسية.

ثالثا
و ما ادراك ما ثالثا
نهى رشدي اسرائيلية
دندن دن ديييش
افندم؟ بتقولوا ايه؟
نهى اسرائيلية، طيب خير يا طير يعني؟؟ ايه المشكلة؟؟
; الاسرائيلين بينا و بينهم مشاكل، ماشي، بس ده ميمنعش ان لو حد فيهم حب ياخد حقه ياخده، و احنا كمان لو حبينا ناخد بحقنا فلازم نصر عليه و ناخده.
لكن ، المفاجاة الاخطر ان نهى مش اسرائيلية ، مش اسرائيلية بالمعنى المتعارف عليه. نهى من عرب 48، او بمعنى اصح جدها من عرب
سنة 48، طيب ده يشينها في ايه؟؟
ايه نوع المذلة اللي لازم تنكتب عليها بما ان ابوها من فلسطينيين 48؟؟ حد يعرف المعاناة اللي عانها فلسيطينيو 48؟ حد سمع عن حكايات من جدودة ازاي كانوا بيتدبحوا بالفؤووس و البلط من عصابات الهجانة و غيرهم في عز ما هما نايمين في بيوتهم؟؟ حد سمع عن فزع ام منهم من خوفها و هي بنت 15 سنة و معاها طفلين نسيت واحد منهم و عبال ما افتكرته كانت سلمت قضاها لربنا؟؟
حد سمع عن عرب 48 اللي هربوا في نص الليل في عز الشتا بالهدوم اللي عليهم و مش واخدين معاهم غيرمفتاح البيت على اساس يرجعوا بعد اسبوع او بالكتير اسبوعين و لغاية دلوقتي مرجعوش، مات منهم اللي مات، و عايش منهم على امل انه يرجع اللي لسه عايش. حد سمع عن مختار البلدة اللي يشوف الذل و المهانة و ميكونش عارف مصيره ايه بعد ما كان له شنة و رنة و صاحب حكم نافذ و بيحكم قرية و يتحكم في مصاير ناس و بيهتم لامرهم كلهم؟؟
هما دول جزء من عرب 48
ناس زيهم زي اي حد
عاشوا زي ما كل حد عاش
و ماتوا زي ما اي حد مات
لكن عندهم من الذعر اللي يكفي يملي افلام رعب لها اول مالهاش اخر
انا اول مرة شفت مقابلة منى الشاذلي مع نهى سمعتها بتقول انها لما قربت علي شريف في عربيته قفل الترباس لكن نهى مقالتش قفل، هي قالت "سكر"( بالفتحة على السين و الشدة على الكاف) العربية، وقتها عرفت ان البنت فيها عرق شامي، قلت يمكن والدتها سورية او شامية بالمجمل، لكن ده مفرقش معايا في نظرتي ليها انها مصرة تاخد حقها، بالعكس لو اصرارها انها تاخد حقها نابع من كونها فسلطينية و معروف ان البنت الفلسطينية قوية و شرسة اذا استلزم الامر، فده يزعلني ان مافيش واحدة مصرية مصرة توقف التحرشات عند حدها. انا مش بتحامل مع طرف ضد الطرف التاني و لا عمري ما تحاملت مع مصري ضد فلسطين او العكس، لكن الفلسطيني معروف انه اتربت عنده شئ من القسوة او القوة او الاصرار على عدم ضياع الحق كرد فعل للارض اللي اتاخدت فجاة من دون سابق انذار من الاغلبية الفلسطينية و كرد فعلا للتشرد اللي حصل للفلسطينيين في كل انحاء الدنيا.
زمان و انا صغيرة كنت اسمع ان ابصر مش عارفة نقابة مين بتدين سفر المخرج فلان الفلاني او علان العلاني عشان سافر اسرائيل، طيب المطرب الفلاني ده او المخرج العلاني ده مسافر مثلا للاسرائيلين اللي هناك؟؟ ما هو مسافر للعرب اللي هناك مش "للعدو" لا سمح الله. حد عارف قد ايه هما هناك بيعانوا من كونهم مقصيين من العرب اللي برا فلسطين لانهم موجودين في الكيان الكخة الاسرائيلي و كمان مقصيين من الاسرائيلين لانهم عرب و فلسطينيين؟؟
يعني هما حصار من جوا حصار
والغريب اننا شايفين نماذج من العرب دول
محمود درويش
عزمي بشارة
كاميليا جبران و اخواتها و امثلة من نفس النوع ده كتيرة
فسواء اللي اطلقوا على نهى اشعة انها اسرائيلية
او انها من عرب 48 فانا مش عارفة ايه المشكلة او العيبة في كدا؟ انا تخيلت لو كان اهل والدي لسه موجودين هناك و مع ذلك اضطرني ظروف اني اجي مصر و حد يتحرش بيا فاسمع مقولة " اه، ما اصلها اسرائيلية من عرب 48" يعني بجد كانت ممكن تشلني او تجيبلي حسرة على نظرة الناس للامور ازاي
و ازاي بيحكموا على غيرهم من غير تقصي لاي حقيقة او فصفصه تفاصيل
الجهل فعلا افه

و اللي عملته نهى اصلا المفروض انه يبقى عادي
و اصلا مينفعش يكون فيه تحرش بالمستوى ده
في ايطاليا معروفين بكثرة معاكستهم للستات
و دي بيعتبروها في اوروبا حاجة اوفر شويتين
طيب لو جم هنا حيعملوا ايه؟؟
مع انهم في ايطاليا عمرها ما بتوصل بيهم انهم يمسكوا واحدة و يقفشوا فيها بالمنظر المخزي ده، هما بيعاكسوا شفهي و بصنعة لطافة كتعبير عن الجمال و تقديرهم ليه بس مش اكتر
و اي نعم هما هناك عندهم حرية جنسية لكن مهما كان وجود الحرية دي او فكرة ان الراجل قادر يفرغ رغباته او لا مش السبب و لا تديه الحق انه يعتدي على خلق ربنا و يستضعفهم.


رابعا
و دي للاسف مخلياني فعلا مؤمنة بنظرية المؤامرة
و انا مش بصدق النظرية دي غير يعني في الحالات القصوى
لكن مقدرش اخفي انه واضح جدا تعرض نهى لحملة تشويه عن عمد و سبق الاصرار و الترصد
دخول نبيه الوحش الغير مبرر
و اي نعم هو كل قضاياه غير مبررة
لكن دي بزيادة يعني
يعني حاجة كيسكلياه خالص لا تقدر بتمن
حكاية ان المدعوة ب نجلاء الامام دي يعني صحيح الانتقام بين بنات حوا ممكن ياخد اشكال اقوى من كدا
بس دي هنا محامية بتحط مصداقيتها على المحك
فمؤكد هي مش هبلة و عارفة هي بتعمل ايه
المثل بيقول العيار اللي مبيصبش بيدوش
يعني مؤكد هما عارفين ان الحكاية مش حتاخد لها اكتر من يومين عشان تنكشف ان كل ادعائتهم غلط
لكن الفكرة انهم غلوشوا على الموضوع و شوشروا و السلام و ادي الدنيا هايصة و مصهللة على كونها اسرائيلية او غيره
و البنت تضطر تطلع جواز سفرها
و تبقى تدخل في خصوصيات الغير و اهي قلبة دماغ و السلام
عملية التشويه الخطيرة جدا دي انا مش عارفة سببها ايه و ليه كمية الهجوم عليها بالمنظر ده؟؟
مين له غرض انه يسيئ لها و يهنها و يشهر بيها؟؟
و المحامية اللي اسمها نجلاء دي فدي عرة المحامين و عرة الستات و ابقوا قابلوني لو اي حركة تحرير مرأة نفعت طول ما نجلاء دي و امثالها هما اللي ماسكين المواضيع دي و عايشين الدور و واخدين الحكاية اعلام و بس
يعني هما فعلا قلبهم لا حقوق مراة و لا بطيخ
و سلم لي على حرية المراة و كرامتها طول ما دول اللي مسؤولين عنها
اخيرا
قضية زي دي مكنش المفروض تاخد الكم ده من الاعلام
لانه اصلا ده المفروض اللي يحصل
بنت تتعرض لتحرش
فتقدم الشخص اللي اتحرش بيها للمحاكمة
و بس خلاص
لكن ان الموضوع يتحول لراي عام بالشكل ده و لا كأنها قضية لوسي ارتين في زمانها يعني حاجة تكسف
اي نعم فرحنا بالحكم لانه من كترة الاحباطات مكنش حد متوقع او مصدق
و لان مكنش حد عارف ان التحرش له عقوبة و تعويض كمان
و ده لجهلنا احنا مش اكتر
و اديه درس و اتعلمنا منه
ان الراجل اللي يتحرش
مصيره تلات سنين سجن
و ان البنت اللي يتحرش بها
متسكتش و تبلغ و تصر على موقفها

مش بعيد ان اللي بيتعمل في نهى ده له علاقة ان فيه جهة معينة مش عاوزة البنات تاخد حقها و مش عاوزة المجتمع يوقف تحرشاته بالبنات بدعوة غطوهم اشرفلهم
و يمكن نفس الجهة دي هي اللي زاقة الوحش عليها كنوع من انواع الغتاتة و التباتة و نحاسة الشعور
بس السؤال
مين يا ترى له صالح في تهديد نهى و تخويفها بالشكل ده و كسبان ايه يا ترى؟؟
مين اللي خايف و مرعوب من بنات ياخدوا حقهم لو حد اتحرش بيهم في الشارع؟
مين اللي خايف ان الشارع المصري يرجع يتظبط من تاني؟؟
مين له صالح في ابقاء الشارع تحت وطأة تهديد الرجالة للستات و نشر فكرة انه مش قادر يتجوز فيتحرش؟
مين؟؟؟؟

14 comments:

عمرو said...

أعتقد كده أن موضوع التهجم على نهى و الطعن فى شرفها و جنسيتها موضوع مدبر علشان البنات يخافوا يعملوا ظيها و اْلا ما معنى كلام الهطل أنها اٍسرائيليه و الحاجات دى ؟؟ يعنى هم ما كنوش يعرفوا ده قبل ما تروح المحكمه ؟؟ كل ده و الله كلام فارغ و نهى أشجع من ناس كتير متخفيين ورا أكاذيبهم المكشوفه

Anonymous said...

كل ده رغي :)

المسلمين الوهابيين عموما كانوا عاوزين يبينوا مجتمعاتهم مجتمعات يوتوبية انما حكاية نهى دى فضحت شذوذهم عشان كده مبقوقين منها

Desert cat said...

اولا حتى لو نهى اسرائيلية ده ميعفيش المتحرش من عملته القذرة
والكلام ده انا قولته ياما لكن نقول ايه فى العقول الخربانة واللى مش قادرين يحترموا الحاجه اللى ربنا ميزهم بيها اللى اسمها عقل ويدوا نفسهم ابسط حقوقهم فى انهم يقروا ويثقفوا نفسهم بيجروا ورا اى حاجه تتقال وورا والناس اللى عايزاها تولع علشان يقولوا شوفوا البلد سايبة والبنات بيتم التحرش بيهم فى الشوارع اصل لبس البنات مش عارفه ماله دى عملية مدبرة يا سيدتى وقلب الموازين من المحامية المخلولة وتدخل الوحش يخلينا نصدق ان بعض الجماعات بتسلط ولاد ينزلوا الشوارع يتحرشوا بالبنات علشان عايزينها تتقلب لايران لكن تقريبا بيسلطوا عيال مش بتميز لانهم بيتحرشوا برضه بالمختفيات .. والحقيقة انا بوجه لنهى الف الف شكر لانها شجعت بنات كتير وجرأتهم وفتحت عيونهم على ازاى ياخدوا حقهم وبالقانون
وبالفعل ما ضاع حق ورائه مطالب .. من كام سنة اول ما فتحت المشروع بتاعى كان واحد جارى سلفى متخلف عمل كام حركة نقص معايا وكان قصده انه يضايقنى ولما رحت عملت فيه محضر اتلم خالص بعيد عنى بل بقى يشوفنى فى شارع يرجع يمشى من شارع تانى وفضل زى الكلب كدا لحد ما انا عزلت خالص
يعنى كل واحده ما تسيبش حقها ومش تستلم ربنا امر بغض البصر مش امر ان المرأة مش تخرج من بيتها علشان اى واحد ماشى هايج مش يتعدى عليها
فى حتجه اسمها قانون احنا مش فى غابة

مودتى

lastknight said...

هايطقلك عرق يا حفصه .. شوفى يا ست البنات .. حين يضيع العدل .. يضيع الطريق .. الناس أتعمت .. حتى المحاميه العره اللى تطفلت على البنت المجنى عليها و لزقتلها عشان تتصور معاها فى التليفزيون و بس .. و المحامى الأعر منها اللى هز ط___وله و راح مقدم بلاغ للنائب العام .. العدل ضاع يا حفصه .. ماتستغربيش من الغجر و الحثاله أنهم يقودوا فكر الأمه المعميه
..
خدى بالك من أعصابك

العجوز والبحر said...

حفظه كل من يهاجم نهى خايف من اللى عملته لانه بيعمل كده وعارف ان كثير من اللى بيحرش بهن حيعملوا زيها ويفضحوه وهولاء بيتمحكوا فى الملابس والحشمه وبعد كلام المحاميه صاروا يتمحكون فى جنسيتها ....ولاكن نهى بميت راجل من هؤلاء .....

Fantasia said...

الناس اتجننت يا حفصة.. ضربوا خلاص
مفيش يا حبيبتي عنده ريحة العقل أو المنطق عشان تخاطبيهم من خلاله

الناس اللي عندها تشوهات وتقيحات نفسية طلعت كلها مرة واحدة تهاجم، كأننا كدا بقى المفروض نكش ونقول ياااه دا احنا كنا مخدوعين والراجل دايما على حق حتى لو متحرش!! يا حبيبتي ما تتعبيش نفسك.. الناس دي طالعة بتستعرض تشوهاتها وتقيحاتها لأنها عارفة ان الأمراض النفسية تفشت في المجتمع وفيه اللي هيكرر الكلام ده زي البغبغان وراهم على اعتبار ان مفيش حاجة حاجة اسمها قيم ولا اخلاق ولا نحوة ولا أي بتنجان من اللي بيضحكوا بيه على البنات الصغيرة عشان يتحكموا فيهم ويطلعوا امراضهم النفسية

bassim said...

ايه الجمال دة يا حفصة؟
رائعة و أكتر كمان قلتي ال في نفسنا كلنا
مين له مصلحة في تغطية البنات؟
مين مين مين؟

DantY ElMasrY said...

عزيزتى
إذا فسد الملح بماذا يملح؟
إذا فسد العقل بماذا نحكم؟
الناس فى مصر فاسدين ولا أقول المجتمع المصرى !!!
ولكن أقول المصريون فاسدون
والفساد أنك تين من يتشدق بالقومية العربية ولكنه يكره الفلسطينيين
أو من يتغنى بحب مصر دون الأقباط

الناس فاسدة
مفهوم الخير نفسه يحتاج للتعريف

عاشور الناجي said...

إنّه الطوفان يا حفصة

و مصر تعيشه فعلا

و القادم حتما أفظل لأن الطوفان هو
الإصلاح الوحيد الجدير بالإحترام

عباس العبد said...

حفصت
كل عام و أنتم بخير
===
اسمحيلى أرد على فانتازيا
-
فانتازيا
الناس متجننتش يا فانتا
الناس " عقلت " و حبت تدارى الفضيحة
هى دى طريقتنا فى تغطية الفضايح
الناس معندهاش تقيحات فكرية و نفسية و اخرجتها على حالة نهى
نهى هى نهى , هى من داخل المجتمع المتقيح اللى أنت بتقولى عليه
كام واحدة تم التحرش بيها و سكتت علشان .. و علشان .. و علشان .. , حاجات كتير
و كام واحدة " بتنبسط لما واحد يعاكسها " .. و كام واحدة تم أغتصابها مش التحرش بيها , فضلت الصمت علشان " الفضيحة " , احنا عندنا الضحية هى اللى تتفضح لو بلغت .
و متقوليش علشان احنا مجتمع ذكورى
ازعل منك لأنى عارف انك اكبر من كده , احنا مش مجتمع ذكورى خالص , احنا قتلة ميكى ماوس , استحالة نكون مجتمع ذكورى
و بلاش ثنائية
الذكر \ الرجل
قال يعنى تبحثوا عن رجل و ترفضوا ذكر
--
نهى اتقال عليها اسرائيلية , مش علشان هى اسرائيلية
نهى اتقال عليها كده , لأن مفيش "بنت مصرية حتعمل كده و تسجن واحد , فهى كان لازم حتطلع " مش مصرية " , اسرائيلية , نمساوية , فرنسية , امريكانية
اى جنسية اخرى غير مصرية
الناس استكترت على نفسها أن مصرية تاخد حقها
--
ردود الأفعال اتقسمت كتير
الأول
تهريج تام و تهييص و هتاف و دول اللى مش فاهمين حاجة
التانى
و بعيدن جماعة " متبعو النموذج " بتوع كلنا نهى ( مع الأعتذار لحفصة ) و دول اللى كانوا منتظرين أى حد يحسسهم ان فى امل و دول علاقتهم بالفعل الأيجابى زى علاقتى كده باللغة البنغالية , نسمع عنها , بس دول عندهم امل ان المجتمع يتغير
التالت
محبو الكهوف
و دول اللى قالوا ان الظروف هى اللى عملت نهى
لدرجة ان فى واحدة قالت ان المتحرش اهبل و معرفش يعمل حاجة معاها
و دول اللى مش عايزين يعملوا حاجة لأنهم خايفين يسيبوا ضل الراجل , و عندهم علطول احساس بأن ناخد حقنا اه , بس بالراحة أحسن الراجل يزعل مننا
الرابع
البلطجية بتوع خدى حقك بأيدك
و دول عايزين سلطة و مش فارق معاهم القانون
يعنى مش قلبهم على " تنفيذ القانون " زى ما أنتى بتقولى دول عايزين ما أطلقوا عليه " سلطة الرجل " , تبادل ادوار مش اكتر
--
فهمتى
نهى منتج من المجتمع
حتى ردود الأفعال " الحريمى هى منتج من المجتمع
و مش حقول أكتر من كده
علشان لسه مخلصتش التدوينة بتاعتى

^ H@fSS@^ said...

عمرو
اهلا بيك
اتفق مع وجهة نظرك و كمان عباس العبد قدم تفسير تاني انا متفقة جزئيا معاه فيه


مصري
الحمدلله كل ده رغي
لما موضوع زي ده يبقى يستحق اننا نرغي فيه معلش استحملنا يا سيدي



قطة الصحراء
اعتقد مافيش اي اختلاف بينا في الراي
بس مين يسمع يا ستي
انا لساني نشف
فاكرة مدونة الصباغ ؟؟
فكرة نوعية التعلقيات اللي جت عليها؟؟
بذمتك محستيش بشعور مقزز من تعليقات البنات قبل الاولاد؟؟


الفارس الاخير
صدقني بحاول امتنع لكن مافيش مفر
يمكن ده نوع م السادية اني بحب اعذب نفسي بنفسي


العجوز
اهلا بيك

^ H@fSS@^ said...

باسم
اعتقد ان الحكومة ليها مصلحة و قبلهم كلهم الجماعات المتاسلمة زي الاخوان و ما شابههم


دانتي
طيب ايش يفرق المجتمع المصري عن المصريين؟؟
ما هو المجتمع المصري متكون من المصريين و لا انا غلطانة؟؟
فهمني



عاشور
بص اي عاشور
لو الطوفان ده مؤكد حتبقى الدنيا بعده اكثر بياضا و نضافة يبقى معندي شمانع يحصل
احنا فعلا لا نساوي اي شئ و تراثنا ممكن اهديه للغرب
حيستفيدوا منه و يوظفوه صح و يطوروه كمان

^ H@fSS@^ said...

فانتا و عباس
طبعا من حق اي حد يناقش اي حد هنا
البيت بتكوا زي ما بنقول

حقول اني اتفق مع فانتا ان الناس اتجننت
لان اللي بيحصل ده مش معقولة يكون خارج من ناس طبيعية و عندها مخ بتفكر فيه و اخلاق بتقيم بيها اي موقف

الشئ التاني يا عباس ان فرحتي بنهى لها اسباب كتيرة مش بس انفعال عاطفي و حيروح لحال سبيله
اول سبب ان لساني نشف و انا بردد فكرة ان البنت لازم تاخد حقها و متخافش من نظرة الناس ليها
و اسال قطة الصحراء على نوعية الردود اللي شوفناها في تدوينة الصباغ من البنات قبل الولاد نفسهم
اولا البنات شايفين انهم لو استقووا و اخوا حقهم سواء انها ترد عدوان المتحرش عليه او انها تلجا للعنف او انها تبلغ الشرطة مش محبوب
و انها بكدا مش حتبقى انثى كما يجب ان تكون اللي هو حسب ما المجتمع فهمها
ان البنت دي لازم تفضل طول الوقت بسكوتة و رقيقة و قطة مغمضة و ميطلعش صوتها
فهي لو تطاولت على راجل حتى لو كان حقير وواطي و متحرش بيها و بالف واحدة قبلها فده عيب
فانا تضامني مع نهى انها مثال حي و واقعي حقيقي مش قصة خيالية زي كلنا ليلى مثلا
حتى لو كانت ليلى مستقاة من وحل الواقع
و هو دي اللي قلته في تدوينتي عن نهى
انها مثال حقيقي
راجع كلامي و شوف انا قلت ايه
انا مش بس عشان هي قررت تعمل شئ احنا مش متعودين عليه
لأ، عشان هي انسانة طبيعية قررت تعمل حاجة اغلب البنات فاكرين انها مينفعش تتعمل
و ادي لنك صفحة تعليقات الصباغ اقرا بنفسك اذا مكنتش قريته
https://www.blogger.com/comment.g?blogID=4827678510106684443&postID=4495080917108686311
و بعدين معلش اسفه بس هي فعلا غلطة مجتمع ذكروي
هو مين اللي فهم البنت انها مينفعش تخرج و تعيش حياتها؟؟
مش ابوها
او اخوها او جوزها و عمها و خالها اللي بدورهم مسيطرين على الام اللي بدورها بتفهم بنتها ان ده عيب عشان لو طلعت عليكي سمعة بطالة مش حتتجوزي و مافيش حد حيبص فيكي؟؟
لكن انا حقلك انها مش غلطة المجتمع الذكوري بنسبة ميه الميه
جزء منها
برضو خنوع البنات للي بيحصلهم
و لو لاحظت يا قداستك اني قلت في نفس البوست ان لو نهى اخدت بحقها لانها موصومة بكونها غير مصرية فده شئ يحزنني

و اخيرا عشان مطولتش و الت اكتر من كدا
نهى نتاج للمتجمع
احنا نتاج للمجتمع
الراجل سواء المحترم او المتحرش نتاج للمجتمع
طيب ما هو طبيعي يكونوا نتاج للمجتمع اللي احنا طالعين منه يا عباس
مؤكد مش حنطلع لمتجمع تاني
بس كل واحد بتفضل له استقلاليه و طرقه في اتخاذ حقه
انت ليه متسغب ان فيه بنت ممكن تاخد حقها بدراعها بعنف يعني مادام مافيش ثقة في القانون؟؟
نهى و حظها وصلها لكدا
دلوقتي سامعة عن بنتين تانيين راحوا يبلغوا محدش عبرهم
ممكن تكون طريقة تقديمهم للموضوع مكنتش كويسة
لكن يعني نهى كانت اكسبشنل
انا بجد مش فاهمة انت عاوز توصل معانا لايه؟؟
ارجوك خلص تدوينتك بتاعت الحمل الكاذب لانها طولت اوي و كدا الافكار ضاعت و جزء منها بعد ما قريته انا حاسة انه نوعا ما ضد بعضه
او بلاش ضد بعضه
متشتت اوي عن بعضه
مش معقولة تدوينة واحدة تنقسم لخمس اجزاء
و كل جزء فيها بيحكي عن اشي مختلف عن اللي سابقه
انت بجد مبرجلني
خلص تدويناتك و خلينا نشوف والنبي عشان نعرف راسنا من رجلينا
و تحياتي

Fantasia said...

يااه ازيكم يا جماعة

حمد الله ع السلامة يا عبس

تصدق وحشتني المناكفات دي؟ وحشتني المناقشات والرأي والرأي الآخر واختلاف التحليلات.. وبعدين احنا لو متناقشناش مع بعض عقلنا هيصدي.. لأن معظم مجهودنا ضايع في مهاترات مع ناس مش فاهمة أي حاجة في أي حاجة من اساسه. وأول مرة من كام شهر حد يختلف معايا وهو عنده وجهة نظر محترمة، وأنا واثقة في عقله.. الله يخيليك ما تحرمني من هذه المتعة الفكرية.. أي كلام اقوله ما يعجبكش ادخل فيا شمال على طول

شوف يا سيدي.. انت عندك حق طبعا ان اللي حصل دا محاولة من المجتمع انه يتسق مع نفسه ويرجع حالة "السلام" اللي هو عايش فيها، بأنه يقرر يلفظ الجسم الغريب اللي اتغرس في نسيجه زي الشوكة وبقى بيقلق منامه

نهى تصنيفها فعلا انها جسم غريب.. دخيلة على المجتمع.. وكان لازم تتصنف على انها من خارج المنظومة عشان السلام الاجتماعي ما يتعكرش.. ما هو السلام الاجتماعي دا مش طبقي وبس.. لأ طبقي وأبوي كمان

دا بقى يرجعنا لنقطة الاختلاف واللي اثارتها حفصة مشكورة.. وأنا بس عايزة أوضح حاجة هنا.. ان الثقافة الذكورية ليست حكرا على الذكور.. مين قال ان في مجتمعنا الذكور بس هما اللي بيحملوا ثقافة ذكورية؟ دي ثقافة مجتمع.. خلاص ترسخت في العقل الجمعي والتكوين النفسي لاجيال ورا اجيال.. والانثى في مجتمعنا تربت على تبني نفس الثقافة.. مش كدا بس.. دا انت تلاقيها أول المتحمسين واللي بيسنوا سنانهم لأي حد يهوب ناحية الاسس اللي قايم عليها النظام الأبوي

التعايش مع القهر بشكل دائم، بيخلي المقهور يتقمص صورة اللي بيقهره ويبقى نسخة منه.. نسخة بهتانة، لكنها أكثر تعصبا لمنطق القاهر.. وهو دا اللي بنشوفه في كل المجتمعات المتخلفة.. تلاقي البلاد اللي فيها استبداد وديكتاتورية كل اللي فيها متقمصين دور الديكتاتور المستبد في اسرهم.. وتلاقي حتى احزاب المعارضة اللي بتنادي بالديمقراطية أكثر استبدادا بداخلها

والمرأة اللي معندهاش القدرة تحرر عقلها من التبعية، بتحول نفسها لأداة يتم استغلالها في ترسيخ نفس الثقافة، وبتعتر الدور ده هو غايتها في الحياة، لأن التمرد محتاج قوة وحرية، وهي لا تملك لا هذه ولا تلك.. يبقى هتعمل إيه؟ لازم تتأقلم مع القطيع وتبقى جزء من النسيج المجتمعي حتى لا يتم لفظها زي نهى

صدقني الثقافة الذكورية هي السبب.. وآسفة لو كانت دي حاجة تصغرني في نظرك.. لكني أوعدك اني أكبر عن كدا لو ثبت لي خطأ نظريتي

خالص تحياتي