احكم الحكم

إن التطرف هو أن تختار مسكنا فكريا و عقائديا لتقيم فيه راضياً عن نفسك و لكنك لا تريد لغيرك أن يختار لنفسه ما يطيب له من فكر و عقيدة بل تلزمه إلزاما بالحديد أحيانا أن ينخرط معك تحت سقف فكري واحد
زكي نجيب محمود

حكمة جديدة
ميموتش حق وراه مطالب

انا افكر اذن انا حاموووووت
حفصة

عتبات البهجة

"الوقوف على عتبات البهجة دائما أفضل من البهجة نفسها... اجل، البهجة أمر سهل، لكن إذا طمعت فيها قتلتك و أهلكتك."
ابراهيم عبدالمجيد-عتبات البهجة

Tuesday, January 16, 2007

عدت بالصلاة عالنبي و العود احمد و محمد كمان


اعزائي

انتهت فترة الحداد، و مع العلم اني قررت التوقف عن التدوين حتى اشعار اخر و حتى اجد سكن لبلؤي احسن من بلوجر عليه اللعنة، فقلد قررت اشراككم معي في هذه اللحظة التاريخية الفريدة

اوف زهقت من الفصحى

اسمعوا بقى، انا مش باخد بالي من التواريخ كويس اوي الا لو كانت عشان اعرف برج شخص او عيد ميلاده، او تاريخ مهم جدا جدا جدا زي 6اكتوبر مثلا او 5 يونيو للاسف و اللي بيصادف تاريخ ميلاد الحاجة السكرة امي

المهم

اليوم16 يناير، بتاريخ امريكا البلد اللي ان اعايشة فيها و هي تختلف عن امريكا اللي انتوا بتشوفوها في الافلام و التفلزيونات، صحيت من النوم، حضرت فطاري المتكون من فول مدمس بقوطة و لمون و زيت زتون و شوية ثوم مطحون لزوم السطلان الاصلي، وضبت شنطة المتيسة اصلي لسه بذاكر، تخيلوا مدرسة و لسه بتذاكر، لكن صحيح العلم لا يكيل بالبتنجان، و احب بالمناسبة دي افرحكوا و اقول اني جبت علامة شبه نهائية في الالماني مش عارفة ازاي لاني مكنتش بذاكر بتاتا و كنت معتمده على ذاكرتي لما درسته اول مرة من 15 سنه و كنت بفتح الكتاب كل شهر مرة ألم برؤوس المواضيع و اخلي البت المعيدة هي اللي تحل لي الواجب من منطلق مبدا حكم القوي على الضعيف، المهم اني نجحت و ده لاني كنت راسمة الدور كويس على الاستاذ الغلبان و هاتك يا كلام بالالماني طول المحاضرة و اجيبله مصطلحات ما انزل الله بها في المنهج و هو كان فخور اوي بيا و فاكرني البت الفصيحة.

المهم

لبست، قريت قران زيادة لزوم دخلة اول يوم في الكورس، ذاكرت شوية الماني تاني عشان يحس اني كنت بدح في الاجازة زي ما وعدته، حطيت الكوفية،و فتحت الشمسة عشان النطرة، مشيت من شقتي لغاية الكلية مسافة خماشر دكيكة، دخلت مكان المحاضرة و انا قاعدة بتمرن على كام جملة لقيتهم في نتيجة الماني عشان ابخهم في وش البروفيسور، يقوم ينسطل من اول يوم و ميفلقنيش، الساعة بقت تمانية و خمس دقايق، غريبة، عمره ما اتاخر، لحسن يكون توفى هو كمان، اصله على معاش لكنهم مخلينيه عشان مش لاقيين حد غيره يدرسلهم، بقت الساعة تامنية و عشرة دقايق و حتى البنات ماجوش، الله، دي مؤامرة بقى، لحسن يكونوا غيروا مكان المحاضرة!!!؟؟

شوية لقيت صديقتي العزيزة نينا اللي بتنضفلنا الفصول، دايما بناخد ركن انا وياها ونلف سوجارة ماركة كامل لايت خلطة تركي في المستخبي نقعد نتكلم عن العيال و بلاويهم و ابو العيال اللي عاطل عن العمل،و مغلبها معاه، فقلت اسالها لانها حويطة و عاملة زي مخبرين الحكومة عندنا، ملقيتش عندها الخبر اليقين ؟؟!!؟؟؟؟عجبي ؟؟؟ بس مش مشكلة قلت هي اساسا ميعتمدش عليها لانها دايما تايهة من الهم ، مشيت و قلت خلاص حسيب للبروفيسور نوته مكتوب فيها حضرت و لم اجدك ابقى تعالى انت مكتبي مفتوح لكل المواطنين ( انا بجد عندي مكتب لوحدي) يا حالولي يا حالولي

رجعت شقتي مأسوف على نومي اللي اتكسر و في الطريق لقيت زميلة ليا فبصت ليا باستغراب و سالتني انتي كنتي بتعملي ايه في المبنى؟ قلت لها اني حضرت و لم اجد الفصل برمته

بصت ليا باستغراب اكتر و قالت لي:

النهاردة مافيش دروس من اصله الدراسة حتبتدي بكرة يا فالحة

انا: .؟؟؟؟؟؟!!!!!!!!!!!!!!!!!!!!!!!!!!؟؟؟؟؟؟؟؟؟؟؟؟؟؟؟؟؟؟؟؟؟

اهيء اهيء اهيء

23 comments:

lastknight said...

مش قلنا بلاش السبرتو على الصبح ؟ نسكر بعد المغرب بس .. لا حول الله .. معلش .. و ماتتهميش الفول و التوم بالسطل اللى عندك .. كلنا بناكل توم و وفل وبلاوى مسيحه ., ماحدش بيروح شغله يوم الأجازه أبدا
عموما ولايهمك .. بس ماتقولش على الحكايه دى لأستاذ الألمانى بقى عشان مايسحبش الدرجه اللى اداهالك و يحولك على مدرسة التنميه الفكريه بتاعة العيال اللى عندهم عته مغولى

zenzana said...

هههههههههه، عودة محمودة، واحمدة، وجرجسة كمان، جيت ابوس القدم، وابدي الندم على غلطتى ف حقك يا ستو هانوم، بس مش هكلم الواد فارس عشان، اتهمنى زورا بدعمى للزعماء اللى فعلا كخة،

المهم ولا يهمك مش مشكلتك، دى مشكلة المسؤولين على الكورس، لانهم ما ظبتوش مواعيدهم على مواعيد ساعتك البيولوجيا

السماح يا اهل السماح، وحشتينى

tota said...

حفصة
حسيت انى لازم اقولك فى الركن البعيد الهادى وفى نفس المكان فى النادى
واخر الاغنية قالى النهاردة ايه قلت النهاردة السبت معدنا كان الحد فى الركن البعيد الهادى
انتى بتحبى الالمانى كده ؟
تحياتى

hosnysoliman said...

عودك كمان محمود ..بس واضح ان المدونه بتاعتك مش يتوع البلوجات هما اللى ضيعوها واضح انك انتى نسيتها فى حته..بلاش بقى الحشيش والسبرتو..وسيبك من الفول كمان

tamer afify said...

لا لا لا يا حفصة
انتي مش عجباني اليومين دول
ماكنتي بعقلك وكويسة وللا يمكن انا اللي مكونتش واخد بالي
تحياتي

أحمد said...

أنا أول مرة أعلق هنا بس أنا جيب البلوج بتاعك كذا مرة
كنت حاقولك مفيش حاجة ساقعة و لا حاجة بس مش هينفع عشان الحداد بتاعك
عموما فيه سكن كويس للبلؤي أهوه

http://www.atspace.com

أو ريحى دماغك خالص وجربى ده

http://www.godaddy.com

أنا جربت الأتنين و الأتنين زى الفل بس طبعا
التانى أحسن من الأول ستين ألف مرة

دلوقتى أن بجرب واحد تالت أسمه

http://www.pandela.com


تحياتى ليكى يا حفصة

albida said...

ااااااااه... ربنا يستر!! من أولها كده ابتدينها تهييس
:)

مقولتلك بلاش الفول عالصبح
هههههههه

manal

Gid-Do - جدو said...

حفصة
من كام سنة فاتو ـ عملت زيك ـ رحت شغلى ودخلت المبنى لقيت كل المكاتب مقفولة وبعدين اكتشفت ان اليوم كان اجازة ـ احنا فى امريكا الحياة ساعات بتخلينا عاملين زى المكن ـ تعيشى وتخدى غيرها

Gid-Do - جدو said...

حفصة
متسمعيش كلام الناس اللى بتحرضك على اعتزال اكل الفول ـ الفول سر الحياة واكسير الشباب ـ

^ H@fSS@^ said...

فارس قديم
سبرتو؟؟ شايفني شكل سبرتو؟؟
انا ديتي كله و السلام
و بعدين بعد كل العبقرية اللي شفتها تقلي عته مغولي
ماشي
لك بلؤ يترد لك عليه فيه
هههههههههههههههههههههههه

صفصف مان ابني
كنت فين غايب فترة ؟
متاكد انها الامتحانات؟؟ شفت حصلي ايه البلؤ بتاعي انتح
اه صحيح انت جيت و اخدت عزا الرجال

زنزانتي السكرة
بعد الشر عليكي في بوس القدم و فعلا هي مش مشكلتي لانهم يعينوا حد ينبهنا للمواعيد غلبت اقلهم بس محدش سمع كلامي

توتا
سخسخت على روحي من الضحك
الركن البعيد الهادي
يااااااااااااااااه من زمان مسمعتهاش اييييييييه فين ايام الطرب الاصيل
هههههههههههههههههههههههههه


الاستاذ حسني
والله على رايك انا السنة دي مضيعة كمية حاجات و اعترفت بالموضوع عند منولة اول السنة
نسيت غويشة فضة معتبرة في المطار و نسيت جاكت فاخر شتوي في الفندق و يمكن اكون نسيت بلوجي في زحل


تامر عفيفي
فينك يا راجل عاش من شافك
والله انا فعلا كنت بعقلي و كويسة لكن تعمل ايه بقى الغربة طيرت لي اخر برج


مبرمج حر
اهلا بيك في اول زيارة في البلؤ الجديد
و شكرا عالمعلومات القيمة حبتدي ادور على سكن جديد
حبقى اعزمك على حاجة ساقعة انش اء الله بس يعد اول الشهر


منولة البودة
لو مديتهاش فو لعالصبح مين يصلب طولي و يسند معدتي؟؟


جدو العزيز
شرفتني كمان مرة
و انا حسمع كلامك انت و مش حبطل فول ده خير كتافي منه
تحياتي للجميع

ذو النون المصري said...

مبروك علي المدونه الجديده و ياريت تعوضي فيها اللي فات و متنسيش يا اختي
الله جاب الله خاد الله عليه العوض
هيييييييييييه دنيا غداره لا تخلي اللي راكب راكب و لا اللي ماشي ماشي
حلوين الشويه النكد دول
تاني مره في نفس الشهر
ايه رايك؟

Anonymous said...

هههههههههههههههه
مهلش يابنتى
تعيشى وتاخدى غيرها
ياما عدت علينا مواقف زى
دى
انا متخيله شكلك ساعتها وانتى بتتحولى بقدره قادر لدونالدداك
معلش

hurricane_x said...

mmm...
garlic 3asob7 yamoftarya :)
ana 3aref ashkalko de...maleto 2elbalad..!
meet marra nasa7tek wemafeesh fayda, ma7adesh ye7oshny!

ذو النون المصري said...

يا ست حفصه ممكن اعرف منك نموزج لرابط صوره !!!اي صوره للبروفيل ؟؟اي صوره علشان اعمل واحد لنفسي!!!!و ياريت الصوت كمان الرابط بتاعه بيكون شكله ايه؟؟!!!!!!!!!!؟
ياريت اللي يعرف يديني اي رابط كنموزج للصوت و الصوره

admelmasry said...

اولا حمدلله علي سلامتك

وكنت عايز اسالك

ليه العزال يا جميل
ليه نويت الرحيل
بعتنا واشتكينا
وخلصت المراسيل

دي تاليفي لاتفتكري انها اغنية ولا حاجة هههههههه
علي فكرة اظاهر ان اللينك بتاعك مش شغال .. شكلك فعلا حذفت البلوج .. انا قعدت ادور ع البروفيل بتاعك عشان اجيبك تاني

اوعي تفكري في الرحيل مرة اخري .. اما بالنسبة للكورس فاحمدي ربنا ان دا كان يوم دراسه عادي وانك روحتي بدري كمان

ههههههههههههههه
ياعني لا كان يوم امتحان مثلا ولا انتي روحتي بعديها بيوم ولا حاجة .. لحسن بتحصل ههههههه



تحياتي

Anonymous said...

يا جدعااااااااان.. طالبين المساعده
الكائن الغير بشرى اللى اسمها ايف رجعت تانى تهبهب عند خالد الصاوى
روحوا دافعوا عن الخبز والحريه وانصروا الراجل
إلى الجهاااااااااااااااد

Anonymous said...

طيب احنا جايين نهني و نبوس و نزغرط نلاقي صورة الست كوندليزا رايس بضبها الشهير في وشنا ليه بس كده يا حفصفص

و بعدين انت اخدتي النمرة النهائية في الالماني من كتر التوم اللي بتضربيه المستر قال ينجحك و يخلص

طيب انت صحيتي الصبح رحتي الكلية يوم اجازة عادي انا بصحي العصر البس علشان اروح الشغل و بفتكر روحي الصبحية عادي يا امي

قبلاتشي

Yasmine Adel Fouad said...

و بتتريقى على ستك نينا و تقولى عليها ما يعتمدش عليها
ياخسارة الفطار الملوكى اللى عاملاه لنفسك بس معلش ليكى عندهم يوم و احنا كلنا شاهدين
حلو الكلام ؟

Ahmed said...

ههههههههه
بسيطة يا حفوتشا
نعيش و ناكل غيرها
هههههه
عن جد موقف ظريف كتير
بس يا رب لا تزعلي، و على فكرة صارت معي عدة مرات، أروح على الشغل يوم إجازتي
ههههههههه
على فكرة و أرشيف مدونتك القديم
أختفى؟

^ H@fSS@^ said...

ذو النون
انت بتشتغل معددة بعد المدرسة ولا ايه؟ سعيكم مشكور يا خويا

وينكي
بقى انا تقولي لي دونالد دك
ههههههههههههههههه
طب تصدقي اني فعلا بحبه

شهروزة
والله يا اختشي مابقاش فيا و خايفة لغاية ما اجي اتكلم معاكوا بلغة الاشارة

اعصار
ايه يا اعصار
ايوة ثوم و ماله و هو انا حبوس حد
يعني جتنا نيلة في حظنا الهباب

ذوالنون تاني
يا خويا والله معرفش ازاي بيحطوه انا الامر استغرق مني 3 مساعدات من 4 اصدقاء مختلفين و انتهى الامر انهم شتموني و كنا حنخسر بعض
لكن فوجئت بعد فترة ان الصورة اتقبلت
هيهيهيهيي

ادم
والله يا خويا الرحيل مكنش بمزاجي
الحكاية كانت بالظبط زي الترحيل القسري زي بتوع اهل القناة وقت الحرب حتتك بتتك قوام قوام ملحقتش حته الم عزالي
الظاهر مكتوب دايما عليا عدم الاستقرار بس ايه الشعر الخطير ده براحة علينا يا عم

سمباتيك
انتي افتكرتيها راسي؟؟
مش عارفة ليه حسيتها اللي ما يتسمى؟؟
هو بغباوته و وشه العكر
هههههههههههههه ابقى اصحي الضهر حتكون نص مصيبة
ههههههههههههههههههههههههههههه

انا حرة
وحشتيني يا عسل
شكلها نينا عديتني يا ختشي من كترة وقفتنا مع بعض

جاي
عزيزي انت لسه مخدتش بالك ان البلوج نفسه توفى ؟؟
زعلتني يا جاي
البوست اللي قبل ده كان العزا و خد بالك انت مجيتش

اهئ اهئ اهئ اهئ
صحيح
انت بتاكل ثوم انت كمان؟؟

قصاقيص said...

صباح المدمس ياقمر
طيب احنا هنا والمدمس قدرنا تقومي انتي تبعدي وبرضه مابتتخليش عنه..... حرام عليكي انا فاكرة اني اخر مرة اكلت مدمس ونزلت القاهرة قلعت الجزمة وقعدت ابوس في حديد المترو وانا فاكرة نفسي في السيدة
ولا تكونش حالة التوهان دي نتيجه اللي حصل للمدونة الفقيدة الله يرحمها؟؟
عموما كده او كده.......... صباح الفل يا فل

ام العيال said...

ده مش مناخوليا
ده....................
سطلان
بطلي فووووووول
و اذا كان و لابد بلاش ثوم
ارحمو من في الارض

Anonymous said...

سلام عليكي يا حفصة
ليه بس كده يا بنتي حد ياخذ فول بالثوم و الكلام ده اول يوم دراسة
الحمد لله ستر ربنا انه مش اول يوم و الا كان اللماني دخل في الانجليزي و بقي كوسة خالص
معلش تعشي وتاخدي غيرها
بس في يوم مش مطرة بقي
سلام
مها